E hoˈi tatou e hiˈo i te mau taata no te haapii ia ratou e nafea ia ora e a muri noa ˈtu
1 Mai to ˈna matararaa mai, ua neneihia e hau atu e 65 mirioni buka E ora e a muri noa ˈtu i roto e 115 reo. Ua ite e rave rahi o te tavini nei ia Iehova i teie nei i te mau parau mau bibilia faufaa maoti i teie mauhaa faahiahia roa. I teie nei avaˈe e teie i mua mai, e vaiiho paha tatou i teie buka haapiiraa bibilia, aore ra e farerei tatou i te mau taata te vai ra ta ratou i roto i te tuhaa fenua.
2 Hoˈi-faahou-raa e farerei i te feia te vai ra ta ratou buka: Te noaa nei ta tahi feia poro i te mau faahopearaa maitatai ma te huti i te ara-maite-raa o te taata farii maitai i nia i te tabula o te mau tumu parau e ma te ani ia ˈna eaha te tumu parau ta ˈna e anaanatae ra. Ia maiti te taata e faaroo ra i te hoê tumu parau, e titau manihini ratou ia ˈna ia taio i te pene hou te tere i mua mai.
3 I te taime e nehenehe, e tia ia tatou ia faataa i te hoê taime farereiraa papu. Hou a hoˈi ai e hiˈo i te taata, e faaineine maitai tatou i te aparauraa o te tahi mau paratarapha o te pene o ta ˈna e maiti. Mai te peu e aita ta ˈna e maitiraa, e haamata tatou i te pene 1. I muri iho i te hiˈopoaraa i te tahi mau paratarapha, e faahiti tatou i te hoê uiraa o ta te mau paratarapha i muri mai e pahono. E tuu te reira i te niu no te tahi atu hoˈi-faahou-raa i reira tatou e tamau ai i te haapii i te buka E ora e a muri noa ˈtu.
4 Oia mau, mai te peu e e ani mai te taata e faaroo i te mau uiraa, e mea maitai aˈe ia haapao na mua i te reira ma te tura. Tei roto noa te pahonoraa o ta ˈna mau uiraa i te buka. Mai te peu e ua ite maitai tatou i te mea i papaihia i roto i te buka, e ite ohie noa tatou i te mau paratarapha e tano, e e nehenehe ïa tatou e pahono i te mau uiraa i faahitihia.
5 E hoˈi tatou e hiˈo i te feia o ta tatou i vaiiho atu i te hoê api parau iti: Peneiaˈe ua vaiiho tatou i te hoê api parau iti Te hoê oraraa hau i roto i te hoê ao apî i te taata e faaroo maira ia tatou. I te taime o te hoˈi-faahou-raa e farerei, e hiˈopoa tatou i te mau paratarapha matamua.
Mai te peu e te faaite ra te taata e faaroo maira ia tatou i te hoê anaanatae mau, ia tapae tatou i te hopea o te paratarapha matamua o te api 3, i te vahi i faahitihia te Salamo 37:29, e parau tatou e:
◼ “Te tuu ra teie mau parau i te tapao i nia i te uiraa tatarahia i roto i te teie buka E nehenehe oe e ora e a muri noa ˈtu i roto i te paradaiso i nia i te fenua nei. A hiˈo na i te manaˈo i te paratarapha 3 o te pene 1, i raro aˈe i te upoo parau iti ‘No te aha tatou e tiaturi ai’.” E taio tatou i muri iho i te paratarapha 3, e ani tatou i te uiraa i tuea ra e na reira atoa tatou e te mau paratarapha 4 e 5. E nehenehe tatou e parau faahou e: “No te aha e mea taa ê mau te mau huru tupuraa i teie nei mahana i te mea ta te Atua i opua? O ta te mau paratarapha i muri mai e faataa ra. Te hinaaro nei au e hoˈi mai i teie hebedoma i mua i taua noâ hora no te pahono i teie uiraa.” Mai te peu e te faaite ra te taata e faaroo i te anaanatae mau, e aita ta ˈna e buka, i taua taime ra, e pûpû atu ïa tatou.
6 No te pûpû i te buka “E ora e a muri noa ˈtu”, e parau tatou e:
◼ “Ua papu ia ˈu e te hinaaro nei oe i teie buka. No reira, e nehenehe ia oe e faahaere atu â i te taioraa e e fanaˈo hau atu â i ta tâua aparauraa i mua.” Mai te peu e e farii te taata e faaroo i te buka, e parau faahou tatou e: “Te pûpû nei matou no te hoê tino moni e 160 tara o te aufau i te hoê tuhaa o te mau haamâuˈaraa o te neneiraa.”
7 E mea faufaa mau ia hoˈi faahou e hiˈo i te mau taata no te haapii ia ratou nafea ratou e nehenehe e ora ˈi e a muri noa ˈtu. Ua aˈo o Iesu i ta ˈna mau pǐpǐ ia haapii ia vetahi ê i te mea ta ratou i haapii. Te pure nei tatou ia Iehova ia afai mai e rahi atu â mau taata rave ohipa. E rave tatou i ta tatou tuhaa i roto i te maimiraa i te mau taata farii maitai e e haapii tatou ia ratou ia riro mai atoa ei mau taata rave ohipa i roto i te ootiraa. — Mat. 9:37; 28:19, 20.