E tauturu tatou ia vetahi ê ia ite i te Tamaiti a te Atua, Iesu Mesia
1 Hau aˈe i te tahi atu taime o te matahiti, ua riro te avaˈe titema ei avaˈe i reira te rahiraa o te feia e faahua kerisetiano ra e manaˈo ai ia Iesu. E taime tano ïa no te faaite i te buka Te taata rahi roa ˈˈe i ora aˈenei. No te faufaa hoi o teie buka, e tia ia tatou ia pûpû atu na roto i te hoê huru anaanatae no te turai i te taata e faaroo ia haapii hau atu â no nia i te Tamaiti a te Atua. Nafea râ?
2 E tutava tatou i te haamata oioi i te hoê aparauraa niuhia i nia i te Bibilia o te huti ra i te ara-maite-raa i nia ia Iesu.
I muri aˈe i te aroharaa i te taata, e nehenehe tatou e parau ia ˈna e:
◼ “I teie nei mahana, te ani nei matou i te feia tapiri eaha to ratou manaˈo ia taio ratou i roto i te Bibilia e nehenehe e ora e a muri noa ˈtu. [A vaiiho i te taata ia pahono.] E mea faufaa mau, i te mea hoi e te faahiti nei te Bibilia i teie ravea e hau atu e maha ahuru taime. Eaha ïa te taui no tatou? A hiˈo i tei parauhia i roto i te Apokalupo 21:4. [Taio.] Te ite ra anei oe i te mea e tâpûhia ra? [A vaiiho i te taata ia pahono.] Nafea tatou e nehenehe ai e ora e a muri noa ˈtu?” E taio tatou i te Ioane 17:3, e i muri aˈe e haapapu tatou i te faufaaraa ia ite i te Atua e ta ˈna Tamaiti, Iesu Mesia. Mai te peu e e faaite te taata i te anaanatae, e faaite tatou ia ˈna i te buka Te taata rahi roa ˈˈe e e faaara tatou i to ˈna anaanatae maoti i te mau upoo parau iti o te omuaraa.
3 Mai te peu e e patoi te taata i te buka, e pûpû tatou ia ˈna i te mau vea hopea o Te Pare Tiairaa e te A ara mai na! aore ra te api parau iti E ora anei teie nei ao? E haamatara tatou hoê aore ra e piti manaˈo papu o te buka ta tatou e pûpû ra. E ani tatou ia ˈna i te tahi taime e au ia ˈna no te apee i te hiˈopoaraa o te tumu parau.
4 Mai te peu e te ru ra te taata e faaroo ra, e mea maitai aˈe paha ia haapoto noa i te faaiteraa i nia nei. E mea ohie aˈe paha no te feia poro apî i teie faaiteraa i muri ia faaohipa:
I muri aˈe i te faaiteraa e o vai tatou, e nehenehe tatou e parau e:
◼ “I teie nei mahana, te ani nei matou i te feia tapiri eaha to ratou manaˈo ia taio ratou i roto i te Bibilia e nehenehe e ora e a muri noa ˈtu. Ei hiˈoraa, a tapao na i tei parauhia e Iesu i roto i te Ioane 17:3. [Taio.] Ua neneihia teie buka no te tauturu i te mau taata ia ite maitai e o vai o Iesu Mesia e ta ˈna haapiiraa.” E faaite tatou i te tahi mau hohoˈa nehenehe o te buka Te taata rahi roa ˈˈe. E hohora ˈtu tatou i te omuaraa e e taio tatou i te paratarapha piti o te upoo parau iti “Te maitai e noaa mai na roto i te tuatapaparaa i to ˈna parau.” E pûpû ïa tatou ia ˈna te buka.
5 I muri aˈe i te vaiihoraa i te buka, e haamau tatou i te niu o te hoê haapiiraa bibilia ma te ani e tauaparau i te pene matamua, “Te mau poroi no te raˈi mai”, i te reira iho taime aore ra i te tahi atu hoˈi-faahou-raa e farerei tau mahana a muri aˈe. Maoti hoi i te parau atu i te taata ehia taime te maoro te farereiraa i mua, e parau noa tatou ia ˈna e i roto noa te tahi mau minuti e ite oia i te tahi atu mau haamaramaramaraa o te horoa mai i te haapiiraa no nia ia Iesu Mesia hutihia mai roto i te Parau a te Atua, te Bibilia.
6 Ia fanaˈo tatou paatoa i teie tau oroa no te huti i te ara-maite-raa o te mau taata i nia i te parau mau no nia i te Tamaiti a te Atua, Iesu Mesia, no te tauturu i te tahi ia rave i te eˈa o te aratai ia ratou i te ora mure ore! — Mat. 7:14.