E apee tatou i te anaanatae
1 Ia opere tatou i ta tatou mau vea aore ra te tahi mau buka, te haaparare nei tatou i te poroi ta Iesu Mesia i faaite. E tia ia tatou ia rave i te hoê tutavaraa taa ê no te hoˈi faahou e hiˈo i te taata tataitahi o te faaite ra i te anaanatae.
2 Mai te peu e ua haafaufaa tatou i te hoê tumu parau taa maitai o te A ara mai na! o tei faaanaanatae i te taata, e hiˈopoa ïa tatou i te tahi atu mau manaˈo o taua tumu parau ra ia hoˈi faahou tatou, ma te niu i ta tatou aparauraa i nia i te hoê irava tumu e i nia i te hoê aore ra e piti paratarapha. Mai te peu e te anaanatae noa ra o ˈna, e faaite tatou ia ˈna e mea maitai roa te A ara mai na! no te taatoaraa o te utuafare. Te tuatapapa nei te numera tataitahi i te mau tumu parau atoa, mai te mau mea e haaati ra ia tatou, te ravea no te haamaitai ia tatou iho, te mau ravea no te mau fifi i teie nei mahana e te mau uiraa no te mau taurearea. Mai te peu e te faaite ra te taata i te hoê anaanatae mau, e parau tatou ia ˈna e e nehenehe o ˈna e tamatahiti i te A ara mai na! e e roaa mai ia ˈna e 12 numera i roto e ono avaˈe.
3 Nafea ïa mai te peu e aita te taata e anaanatae ra i te tumu parau o te numera o te A ara mai na! faaitehia? Maoti râ i te opani i te aparauraa, e faaite hau atu â tatou ia ˈna no nia i te ohipa a te mau Ite no Iehova ma te faaohipa i te mau haamaramaramaraa i te api 400 e 401 o te buka Haaferuriraa.
4 Mai te peu e ua vaiiho tatou i te hoê vea o “Te Pare Tiairaa” ma te faahiti i te Timoteo 2, 3:1-5 e ma te taio i te mea i papaihia i te api 2, e nehenehe tatou e parau e, ia hoˈi faahou tatou:
◼ “I te roaraa o ta tâua aparauraa hopea, ua tauaparau tâua i te auraa o te mau ohipa e tupu ra i roto i te ao nei i teie nei mahana. E au ra e e rave rahi o te ore e anaanatae faahou i te Atua e i ta ˈna mau faaueraa tumu i roto i te Bibilia. Ua mana rahi te reira i nia i te huru o te mau taata i nia i te tahi e te tahi, mai ta te Timoteo 2, 3:1-5 e faaite ra. Ia manaˈo oe, te vai ra anei te mau tumu papu ia tiaturi i te mau tupuraa maitai aˈe i mua ia tatou?” I muri aˈe to tatou vaiihoraa i te taata ia pahono, e aratai tatou i to ˈna ara-maite-raa i nia i te Petero 2, 3:13. E e hiˈo tatou i te mau api 336-342 o te buka Haaferuriraa e e haapapu tatou i te mea ta te Basileia e afai mai no te huitaata nei.
5 I te taime o te hoˈi-faahou-raa e farerei, e ite paha tatou e aita te taata e hinaaro ra e tauaparau i nia i ta ˈna haapaoraa, ma te faariro i te reira ei ohipa na ˈna iho. E nehenehe tatou e parau e:
◼ “Ia hinaaro tatou aore ra eita, i roto i te hoê ao ta te mau ravea faarevaraa e haapurororaa i faanainai i te mahana tataitahi e i reira e rave rahi haapaoraa o te ora amui ra, eita e nehenehe e ape e ia rave te tahi mau tiaturiraa i te hoê faito na te mau fenua atoa. Tera râ, ahiri e taa te mau taata i te manaˈo o te tahi, e afaro ïa te mau taata o te mau haapaoraa atoa. E faaore paha te reira i te tahi mau feii no roto mai i te mau tiaturiraa faaroo. Eaha to oe manaˈo?” I muri iho i te vaiihoraa i te taata ia pahono, e faaite tatou ia ˈna i te tabula tumu parau o te buka Te huitaata i nia i te eˈa o te maimiraa i te Atua (farani).
6 E tutava tatou no te hoˈi faahou e hiˈo i te taata tataitahi o te anaanatae ra i te parau mau e no te tauturu ia ˈna ia rave i te eˈa o te aratai i te ora mure ore. — Ioane 4:23, 24.