E haafaufaa anaˈe i te tairururaa mataeinaa 1993 “Te haapiiraa no ǒ mai i te Atua ra”
1 ‘E haapii mai oe, e Iehova.’ (Sal. 86:11). Teie te huru pure paieti a te feia o tei pûpû ia ratou no te Atua no te tavini ia ˈna. Ua faaoti tatou ia ore e faaea i te haapii e i te faaohipa i te mea ta tatou e haapii ra. E tia paha i te tahi taime ia faatitiaifaro tatou ia au i te hiˈoraa a te papai salamo, e taparu tatou i te Atua ia tahoê i to tatou mafatu ia ore oia ia feaapiti. E horoa mai te tairururaa mataeinaa “Te haapiiraa no ǒ mai i te Atua ra” i te hoê haapiiraa ohie o te aratai ia tatou ia hiˈopoa faahou i te tahi mau tapao, no te tavini i te Atua ma te taiva ore i roto i te mau fifi ta te faanahoraa o te mau mea e ite ra i teie nei.
2 Te hoê tairururaa e maha mahana: E tupu te tairururaa i roto e 5 vahi i Polinesia. Te horoa ra Te taviniraa o te Basileia no tenuare 1993 i te tabula taatoa. E hohorahia te porotarama i roto i to ˈna taatoaraa na roto i te reo farani e te reo tahiti. E haamata te tairururaa i te hora 13 h 20 i te mahana maha e faaoti i te hora 16 h 15 i te sabati ahiahi. E matara noa te mau uputa i te poipoi atoa i te hora 7 h 30. A tapao e eita te taata e faatiahia ia tomo na mua ˈˈe, mai te peu oia ïa râ e ohipa te ravehia hou te hora matararaa.
3 Eaha ta te porotarama o taua tairururaa ra e hopoi mai na tatou? E rave rahi maa i te pae varua e te paari te faaitehia i roto i te mau huru taa ê: te mau oreroraa parau, te mau faahiˈoraa, te mau uiuiraa manaˈo e piti darama. Ia ore ia erehia ia tatou te tahi noa ˈˈe mea no taua haapiiraa faufaa ra! Hau atu, te hinaaro ru nei tatou ia farerei te mau hoa mea maoro e ia haamatau i te mau hoa apî. E apiti paha te mau pionie o te tavini ra i te mau motu i ta tatou tairururaa. E haafaufaa tatou i taua taime ra no te haamatau i taua mau taeae e taua mau tuahine haapao maitai. E te mau metua, a apiti atoa mai ta outou mau tamarii i te aparauraa. E tauturu te oaoa e te feruriraa haapae o taua mau pionie ra ia ratou ia rave i te hoê toroa i roto i te taviniraa ma te taime taatoa.
4 E hopoi ra anei tatou i te tuhaa ahuru atoa i te fare vairaa? I roto i te Malaki 3:10, ua tǎpǔ o Iehova i te mau ati Iseraela, mai te peu e ua ineine ratou i te tamata ia ˈna na roto i te hopoiraa i te tuhaa ahuru atoa i te fare vairaa, e ninii oia i nia ia ratou i te hoê haamaitairaa e aita e hopea.
5 No vetahi, te tamataraa ia Iehova oia hoi te haere-oioi-raa ia e farerei i ta ratou paoti ohipa no te ani atu i te mau mahana faaearaa aore ra te hoê faaearaa aufau-ore-hia no te haere i te tairururaa. I te tahi taime, te haamarirau nei te tahi mau taeae i te na reira no te mea te manaˈo ra ratou e eita to ratou paoti ohipa e horoa mai i te faaearaa no te hoê tairururaa. No te tahi atu râ mau tumu, eita ïa ratou e haamarirau rahi roa ia parau atu i ta ratou e opua e rave.
6 E tia ia tatou ia ani e: Mai te peu e te faaipoipo ra te hoê hoa piri i roto i te tahi atu vahi, eita anei au e haere e farerei i ta ˈu paoti ohipa no te ani atu i te hoê faaearaa ohipa no te haere atu i te faaipoiporaa? E mai te peu e e haamarirau oia, eita anei au e faataa ia ˈna ma te faatura e mea faufaa mau no ˈu ia haere? Oia mau, e mea faufaa roa ˈˈe ia haapiihia tatou e Iehova i te haereraa i te hoê faaipoiporaa! Mai te peu e te tiaturi papu nei tatou e mea faufaa roa te tairururaa no to tatou haereraa i mua i te pae varua, e ohie noa ïa tatou i te faataa i to tatou paoti ohipa ia horoa mai i te hoê faaearaa ohipa no te tairururaa. — Iak. 1:7, 8.
7 I Iseraela, ua riro te tuhaa ahuru ei turu i te pae materia i te vahi haamoriraa a Iehova. I teie nei mahana, te tuhaa ahuru o te taime ïa, te puai e te moni o tei faaohipa-taatoa-hia no te tavini ia Iehova e no te turu i te ohipa o te Basileia. Te vai ra te taime e haere ai tatou i te mau putuputuraa e i te mau tairururaa, e oia atoa te atuaturaa e te tamâraa i ta tatou mau vahi putuputuraa. I te tairururaa mataeinaa “Te haapiiraa no ǒ mai i te Atua ra”, e rave rahi taime to tatou no te hopoi i te taatoaraa o te tuhaa ahuru i te fare vairaa i te pae varua a Iehova. Eaha vetahi o ratou?
8 E hopoi tatou i ta tatou tuhaa ahuru na roto i te faaroo-maite-raa i te mau oreroraa parau, na roto i te himeneraa ma te aau tae i te himene tataitahi o te Basileia, e na roto i te faaroo-maite-raa i te pure tataitahi no te parau amene ma te aau rotahi.
9 Ua taaihia to tatou haereraa i mua i roto i te parau mau i roto i te hoê faito rahi ia au i ta tatou e faaroo. I roto i te hoê piha rahi, e mea ohie tatou ia anaanatae i te mau ohipa e ravehia ra e vetahi ê. No te reira, e tia ia ara noa tatou i to tatou mau manaˈo. E faaineine anaˈe ia tatou ma te haapao maitai no te tairururaa, ma te afai atu ta tatou Bibilia, te buka himene, te hoê penitara, e te hoê parau papai e oia atoa te numera o Te Pare Tiairaa o te tuatapapahia i taua hebedoma ra. E mea faufaa ia tapao i te mau manaˈo e te mau irava bibilia e faahitihia e te taata orero tataitahi. E mea maitai ia poto noa ta tatou mau tapaopaoraa; e haafifi te rave-rahi-raa i te mau tapao i te feruri-maite-raa. E tia atoa i te mau taurearea i te haapii ia riro mai ei feia faaroo haapao maitai. E hopoi mai te mau tamarii i te tuhaa ahuru e to ratou mau metua ma te pee-maite-raa i te mau oreroraa parau.
10 Te faataa nei te tahi mau metua i te mahana atoa i te fare i te hoê taime i reira ratou e titau manihini ai i ta ratou mau tamarii ia taio i te hoê buka a te Taiete aore ra ia hiˈopoa hoê o ta ˈna mau faahohoˈaraa. Maoti i taua haamataroraa maitai ra, e mea ohie roa ˈtu no te mau tamarii ia parahi noa ma te maniania ore i te mau putuputuraa e te mau tairururaa. Te parau nei te mau metua o te haapii maitai ra i ta ratou mau tamarii e aita ratou e faatia nei ia hopoi ratou i te mau taoˈa hauti e te mau buka peniraa i te mau putuputuraa. E nehenehe atoa e haapii i te mau tamarii apî e no te haamori ia Iehova tatou e haere ai i te mau putuputuraa. E haapopouhia te mau metua o te haapii ra i ta ratou mau tamarii i te auraa no ratou te hopoiraa i te tuhaa ahuru atoa i te fare vairaa.
11 E hopoi atoa tatou i te tuhaa ahuru ma te horoaraa ïa i to tatou taime e to tatou puai no te apiti atu i te mau faaineineraa o te tairururaa. E opuahia i te tamâ i te mau vahi hoê aore ra e piti mahana hou te tairururaa. Mai te peu e tei pihaiiho noa to tatou faaearaa, no te aha e ore ai e faanaho ia tatou no te apiti atu e to tatou utuafare atoa? Te hopoi nei te tahi mau taeae i te feia o te haere ra i mua i roto i ta ratou haapiiraa o te Bibilia, ia ite oia e eaha te anihia ra no te turu i te haamoriraa a Iehova, hou to ratou bapetizoraa. E rave rahi ohipa te tia ia ravehia no te manuïaraa o te tairururaa. No te aha e ore e riro mai ei feia rave ohipa e to tatou utuafare?
12 Te tahi atu ravea no te hopoi te tuhaa ahuru oia hoi te tururaa i te pae moni i te tairururaa. Ma te haapapu e te tapao o te mau ô materia oia hoi te tururaa i te haamoriraa viivii ore, ua horoa o Iehova i teie aˈoraa i te nunaa Iseraela e: “E eiaha hoi ratou e haere faufaa ore noa i mua i te aro o Iehova: e horoa te taata atoa i tei tia ia ˈna ra, i te maitai a to Atua a Iehova i horoa ˈtu ia oe ra.” (Deut. 16:16, 17). E mea iti aore ra e mea rahi, ia au i te mau ravea a te ati Iseraela tataitahi, e mea faahiahia te mau ô i faaineinehia e te nunaa na Iehova. Mai te reira atoa, te feruri nei e rave rahi taeae i roto i te pure i te ô o ta ratou e horoa, moni anei aore ra e parau moni (papaihia no te mau “Ite no Iehova”). Ua vaiiho aˈena anei tatou i ta tatou mau tamarii apî ia tuu i te hoê ô i roto i te afata faataahia no te reira?
13 E faaohipa anaˈe i te haapiiraa a to tatou Faaora, te Atua: Na roto i te mau peu maitatai e te hoê haerea maitai roa, e ia “nehenehe te parau a te Atua a to tatou Ora ra ia ratou i te mau mea atoa ra”. (Tito 2:10.) Oia hoi, e faaite tatou i te mau vahi o te tairururaa e te faaohipa nei tatou i te haapiiraa a te Atua i roto i to tatou oraraa.
14 Eaha te parau no ta tatou mau peu? I teie nei mahana i roto i te ao, e mea varavara roa i te faatura ia vetahi ê. Tera râ, aita te mau tavini o Iehova o te vaiiho nei e ia arataihia ratou e te mau faaueraa tumu a te Bibilia e manaˈo noa ra ia ratou iho, i to ratou mau hoa atoa râ (Phil. 2:4). Te haapao nei tatou i te feia e haaati ra ia tatou: ia pee tatou i te hoê anairaa no te haere e tii i te maa aore ra i te mau buka eita tatou e hauti i te poro rima; e faatura tatou i te feia ruhiruhia e te mau tamarii nainai o te apee ra paha i to ratou mau metua i roto i te anairaa e turai-ohie-noa-hia ratou e te feia paari o te hauti ra. I roto i te mau fare tamaaraa, e faaite tatou i te peu maitai e te tura i te feia rave ohipa, eiaha râ te mau peu au ore e te faahepo mai te peu e aita to tatou hinaaro i pahonohia.
15 E mana to to tatou haerea paieti i nia i te feia o te haaati ra ia tatou. I te matahiti i mairi aˈenei, i roto i te hoê oire i reira te tupuraa te hoê tairururaa, ua parau te hoê mutoi o tei faaohipa i to ˈna toroa e 21 matahiti i teie nei e: “Ua putapû roa vau i te auraro o ta outou i faaite. E mea faahiahia mau [outou]; e ohi outou i te mau pehu ma te ore e anihia ˈtu, e mea nahonaho maitai outou; mea faanaho-maitai-hia ta outou tairururaa.” Ua parau faahou o ˈna e: “E ata mai outou ia matou. E tapao maitai ïa. O ta matou ïa e imi ra. Te haapapu ra te reira e huru auhoa to outou e aita outou e huna ra i te tahi mea. Te ite atoa ra matou e tei pihaiiho te mau tamarii i to ratou mau metua e ua haapiihia. E tiaturi mai, ua putapû vau. Te oaoa nei au i te rave i te ohipa i ǒ nei.”
16 I roto i te hoê fenua, ua haere roa mai te feia haapao i te tahi oire i te Betela no te ani e ia faatupuhia i te hoê tairururaa i roto i to ratou oire. Ua farii te Taiete i ta ratou titauraa maitai, e aita ratou i tatarahapa. Ua parau te mono o te tavana e: “Te oaoa rahi nei matou i te iteraa i te hoê faanahoraa rahi i te tahoêraa mai i roto i to matou oire. Ua rave matou i te mau ravea atoa ia vai mai outou i ô nei (...) e aita rea ohipa o te faaoaoa hau atu â ia matou.” Maoti te haerea maitai o te taeae tataitahi e te tuahine tataitahi i horoahia ˈi te hoê faaiteraa faahiahia roa i roto i taua oire ra.
17 E faaohipa anei tatou iho i te haapiiraa a to tatou Faaora, te Atua, na roto i to tatou haerea maitai? E na reira tatou i roto e rave rahi tuhaa.
Huru ahuraa e te huru rouru: Ia haere tatou i te tairururaa, eiaha tatou e manaˈo e te rave nei tatou i te tau faafaaearaa. Te tia ra tatou i mua i te Atua ia haapii mai oia. I te mea hoi te reira iho â te huru, eita anei e tia ia ahu mai tatou mai ta tatou e haere nei i te mau putuputuraa i te Piha o te Basileia (Tim. 1, 2:9, 10)? Hau atu, e tia ia ara tatou i te mau ahu o ta tatou e oomo ra i muri aˈe i te mau rururaa. Ia hoˈi tatou i te fare, e mea tia anei, noa ˈtu to tatou matahiti, ia taui tatou i to tatou ahu au maitai e te tura o ta tatou e tuu ra i te mau vahi o te tairururaa no te oomo i te mau ahu o te faariro ia tatou ei feia o te ao haapao ore e te tura ore? Eita anei te reira e horoa i te manaˈo e e mau ahu hanahana rapae noa te mau ahu ta tatou e tuu ra i te mau putuputuraa e ere râ i te hohoˈa mau o to tatou oraraa? E haamanaˈo tatou e te amo nei tatou i te iˈoa o Iehova, e tia ia ara tatou ia ore e huti mai i te hoê faahaparaa tano i nia i te eˈa o te parau mau.
Eiaha ia moehia i te feia e bapetizo e, i te taime o taua ohipa moˈa ra, e ere i te mea tano i te omono i te mau piriaro e ua papaihia te mau poroi i nia iho e te mau tapao no teie nei ao, aore ra te mau parau faaiteite. E tia ia papu te mau matahiapo e ua hiˈopoa-maitai-hia te mau uiraa o te bapetizoraa na mua ˈˈe, e ua ite te taata bapetizo tataitahi e bapetizo anei o ˈna aore ra eita. (I te roaraa o te hiˈopoaraa i te mau uiraa, e mea tano ia horoa ˈtu i te taime au i te tahi mau manaˈo no nia i te ahu au maitai e tano no te bapetizoraa.) Aita e anihia ra i te feia e ua fariihia to ratou bapetizoraa e te mau matahiapo ia tapao ia ratou ia tae mai ratou i te tairururaa.
Te mau taoˈa haruharu: Noa ˈtu e faatiahia te mau taviri hohoˈa video, te tiaturi nei matou e e haapao outou ia vetahi ê. E ere i te tapao no te here i te haapeapea ia vetahi ê no te taviri i te hohoˈa. Aita e fifi ia haruharu outou i te mau oreroraa parau mai to outou parahiraa. A haamanaˈo râ eiaha roa te hoê taviri hohoˈa aore ra te tahi tauihaa haruharu ia tamauhia i nia i te tereraa uira aore ra te faanahoraa haapurororaa parau a te tairururaa, e eiaha ia vaiiho i te tahi matini i nia i te eˈa haereraa taata.
Te mau parahiraa: A haamanaˈo e E NEHENEHE E FAAHEREHERE I TE MAU PARAHIRAA NO TO ˈNA UTUAFARE ANAˈE E NO TE FEIA I HAERE MAI NA MURI IA TATOU I ROTO I TO TATOU PEREOO. I te mau tairururaa atoa, e faahereherehia vetahi mau parahiraa no te feia ruhiruhia e te feia hapepa. A faatura i te feia ruhiruhia e tia ˈi. I mutaa ihora, ua parahi te tahi mau taeae ruhiruhia i te mau vahi fifi roa ia haere atu no te mea ua rave te tahi mau taurearea i te mau parahiraa tei faataahia no te feia ruhiruhia. Eiaha e inoino mai i te mea aita i faataahia te mau parahiraa aore ra te mau piha no te feia maˈimaˈi mai te maˈi tatiraa.
Te mau taoˈa: Te faaitoitohia ˈtu nei outou ia faaiti i te rahiraa tauihaa o ta outou e afai mai i te tairururaa. Te anihia ra ia faaiti i te taoˈa no te hopoi. Mai te peu e eita te hoê taoˈa e ô i raro aˈe i to outou parahiraa, a vaiiho atu ïa i te fare aore ra i roto i te muriraa o to outou pereoo. I mutaa iho, ua afai mai vetahi te tahi mau afata faatoetoe rarahi e te tahi mau taoˈa pirihao o te ore e ô i raro aˈe i te parahiraa; ua tuu atura ratou i roto i te eˈa haereraa aore ra i nia i te parahiraa, ma te faaere i te hoê taata i te hoê parahiraa e ma te ofati i te tahi taime i te ture o te parururaa. E tia ia haapao tatou i roto i taua tuhaa ra.
Te tuhaa o te mau maa: Te hinaaro ra tatou paatoa e haafaufaa i te mau ô faahiahia a te Atua, ma te ara ia ore ia erehia te tahi ohipa (Ioane 6:12). Ua ravehia te hoê ohipa faaineineraa rahi ia roaa mai te mau parahiraa, te mau buka, te maa e te tahi atu mau ohipa e hinaarohia no te taatoaraa o te taata e haere mai. Ma te faaau atu i teie mau faanahoraa, ua titau-manihini-hia te amuiraa tataitahi i te hoê tairururaa papu. E mea faufaa mau ia rave amui tatou no te ara i te rahiraa. Oia mau, te titau nei paha te tahi mau tupuraa taa ê i te tahi mau taata ia haere atu i te hoê tairururaa i faanahohia i roto i te tahi atu tuhaa fenua. Teie râ, e tia i te rahiraa o ratou ia haere i te tairururaa i reira ta ratou amuiraa i te titauraahia (Kor. 1, 13:5; Phil. 2:4). E haafaahiahia te feia o te haere atu i te tairururaa i te mau maa huru rau o te horoahia ˈtu ia ratou ra. Ua hoohia mai te mau maa maitatai. A turu maite i te mau faanahoraa ravehia no te mau maa, o te nehenehe e aufau i te mau haamâuˈaraa no te tairururaa.
18 No te maitai o vetahi ê, e faaineine anaˈe ia tae oioi i te mahana atoa, i te mahana maha iho â, no te mea e rahi te taime e pau no te faanaho i te pereoo, no te imi i te parahiraa.
19 E haamaitairaa te vaiihoraa ia haapiihia tatou e Iehova. Mai te peu e e faaohipa tatou i to tatou taime, to tatou puai e ta tatou mau faufaa materia no te turu i te tairururaa mataeinaa “Te haapiiraa no ǒ mai i te Atua ra”, e roaa mai ïa i to tatou utuafare e o tatou iho nei te mau haamaitairaa aita e hopea i te pae varua.
Tairururaa mataeinaa—Faahaamanaˈoraa
Te mau peu maitatai: E mea faufaa ia faaite te feia atoa o te haere i te tairururaa i te mau peu maitatai, ma te faatura i te vahi o te tairururaa ei “fare o te Atua”. (Sal. 55:14.) I te roaraa o te mau oreroraa parau, te mau darama, te mau himene e te mau pure iho â, a ara ia ore ia haapeapea i te tahi atu feia i tae mai. E ere i te faatura ia hahaere ma te tumu ore, ia tamau i te paraparau, aore ra ia faaohipa i te mau pata hohoˈa pura aore ra te mau taviri hohoˈa video ia huti i te ara-maite-raa o te feia o te tamata ra i te feruri i nia i te haapiiraa horoahia. Na roto i to tatou hamani maitai e to tatou haerea maitai, e faaite ïa tatou e te haafaufaa nei tatou i te haapiiraa no ǒ mai i te Atua ra e te haere nei tatou i te tairururaa ia haapiihia e Iehova.
Pionie: E tia i te mau pionie tamau e taa ê atoa e tae noa ˈtu te mau tiaau ratere ia afai mai i ta ratou Parau tiaraa pionie (S-206) i te tairururaa. E nehenehe te feia tei roto i te taviniraa ma te taime taatoa e ono avaˈe i te taime a tupu ai ta ratou tairururaa mataeinaa, e haere e tii i ta ratou mau titeti maa, ma te faaite noa ˈtu i ta ratou parau tiaraa, e te reira i ta ratou noa iho tairururaa. E nehenehe atoa te mau tavini ma te taime taatoa e haere e tii, i te vahi hooraa buka anaˈe, i te mau buka apî ma te tamoni ore e tae noa ˈtu te tahi atu mau buka i te tarifa pionie ma te faaite noa ˈtu i ta ratou parau tiaraa. E nehenehe atoa te mau melo o te Betela e fanaˈo i teie mau faanahoraa ma te faaite noa ˈtu i ta ratou parau tiaraa.
Te mau pereoo turairai tamarii: I roto e rave rahi mau vahi, e opanihia ia rave i te mau pereoo turairai tamarii i te mau haaputuputuraa taata. Aita te mau ture i te pae no te parururaa e faatia ra e ia vaiiho-noa-hia teie mau pereoo iti i nia i te mau eˈa, te mau vahi haereraa taata e te mau area i rotopu i te mau parahiraa. Ia apǐ roa anaˈe teie mau vahi i te taata, mea atâta roa te mau pereoo turairai tamarii no te mau tamarii iho e tae noa ˈtu no te feia i ruru mai, e nehenehe hoi ratou e topa ˈtu i nia iho. A ara ia ore ia hopoihia mai te reira i te vahi tairururaa. Tera râ, e faatiahia te mau parahiraa tamarii aore ra te mau parahiraa e nehenehe e tuuhia i roto i te pereoo uira, no te mea e nehenehe te mau metua e tuu atu i nia i te hoê parahiraa i pihai iho ia ratou. Mauruuru no to outou tahoêraa mai i roto i teie nei tuhaa.
Bapetizoraa: E tia i te feia e bapetizo ia parahi i nia i te mau parahiraa i faataahia no ratou hou te omuaraa o te rururaa no te poipoi mahana maa. E rave mai te taata tataitahi i te hoê ahu hopuraa au maitai e te hoê tauera. Ia oti anaˈe te oreroraa parau bapetizoraa e te pure, e horoa mai te peretiteni o te rururaa i te mau faaueraa poto noa i te feia e bapetizo, e i muri iho, e ani oia i te feia i tae mai ia himene. I muri aˈe te himeneraa o te tuhaa hopea, e aratai te mau melo o te pǔpǔ fariiraa taata i te feia bapetizo i te vahi e ravehia te bapetizoraa aore ra i te mau pereoo e afai ia ratou i reira. I te mea e ua riro te bapetizoraa o te faataipe i te pûpûraa ia ˈna iho, ei ohipa i rotopu i te taata iho e o Iehova, aita i faanahohia i te mau “bapetizoraa tapǔpǔ” i reira e piti taata aore ra hau atu e tauahi ai te tahi e te tahi aore ra e tapea ˈi i to te tahi e to te tahi rima ia taumihia ratou i raro i te pape.
Feia rave ohipa: Mea faufaa roa te tauturu a te feia rave ohipa i te tere-maitai-raa o te hoê tairururaa mataeinaa. Noa ˈtu e e nehenehe ta outou e rave i te ohipa i te tahi noa taime o te tairururaa, e farii-maitai-hia ta outou tauturu. Mai te peu e e nehenehe ta outou e tauturu mai, a haere atu ïa e farerei i te feia e haapao i te tuhaa no te feia rave ohipa ia tae atu outou i te tairururaa. E nehenehe atoa te mau tamarii i raro mai i te 16 matahiti e apiti i te manuïaraa o te tairururaa, teie râ, e tia ia ratou ia rave i te ohipa na muri i to ratou metua tane aore ra to ratou metua vahine, aore ra te tahi atu taata paari.
Parau e pinehia i nia i te ahu: A tamau i te parau e pinehia i nia i to outou ahu tei nenei-taa-ê-hia, i te tairururaa, e tae noa ˈtu i nia i te mau tere i rotopu i te tairururaa e to outou vahi nohoraa. Mea pinepine hoi te reira i te horoa i te hoê faaiteraa maitai roa. E faaohie te parau e pinehia i nia i te ahu o tei faaî-maitai-hia ma te faaite e taata outou e apiti ra i te tairururaa i te tereraa o te tuhaa o te mau maa faaohie-noa-hia. E ani outou i teie mau parau na roto i te arai o ta outou amuiraa, no te mea eita teie mau parau e noaa i te tairururaa.
Huru tiaraa: E te parau pinehia o te tairururaa “Te haapiiraa no ǒ mai i te Atua ra”, te titau-atoa-hia ra i te taata tataitahi ia rave mai i ta ˈna parau “Mau faaueraa i te pae rapaauraa”. E rave atoa mai te mau melo o te Betela e te mau pionie ta ratou Parau tiaraa e tonoraa.
Faaararaa: Noa ˈtu eaha te vahi outou e faanaho ai i to outou pereoo, eiaha ia moehia ia ponao roa i ta outou mau opani e ia ore roa ˈtu ia vaiiho i te mau taoˈa ia itehia mai e te taata. Mai te peu e e nehenehe, a tamau i ta outou mau tauihaa i roto i te afata pereoo. A ara i te mau taata eiâ e te feia eiâ i roto i te mau pute ahu, mea au roa hoi na ratou i te mau haaputuputuraa rahi. Eiaha e vaiiho i te tahi taoˈa faufaa i nia i to outou parahiraa pereoo. Ua faaite atoa mai te tahi mau hiˈopoaraa i te feia eita e manaˈohia o tei huti i te mau tamarii apî i rapae au i te mau vahi o te tairururaa. A ara maitai.