“E aratai te eˈa o te Atua i te ora”—Tairururaa Mataeinaa aore ra na te mau Nunaa atoa 1998
1 Te faahaamanaˈo maira te Maseli 10:29 ia tatou e “e haapuraa etaeta te eˈa o Iehova.” Ua tano maitai ïa te upoo parau o te mau tairururaa mataeinaa i teie matahiti, “E aratai te eˈa o te Atua i te ora”! Nafea teie upoo parau ia tauaparauhia i roto i na mahana tairururaa e toru? Te tiai ru rahi nei tatou paatoa i te mea i faaineinehia no tatou. E hohorahia mai te mau manaˈo faufaa.
2 E tae atoa mai paha te tahi mau mitionare, mau tavini na te mau nunaa atoa aore ra mau taeae e tuahine e tavini ra na te ara, i ta tatou tairururaa. Eita e ore e mau tausani tia no te tahi atu mau fenua te tae mai i te mau oire i reira e tupu ai te mau tairururaa na te mau nunaa atoa. Peneiaˈe e e farerei tatou i vetahi. E faaitehia mai i te tairururaa i te mau tabula o te faataa ra i te haamaitairaa a Iehova i nia i te ohipa i roto i te mau tuhaa fenua taa ê.
3 E hoonahia te tutavaraa ia tae mai: Te faaruru nei e rave rahi o to tatou mau taeae no Afirika i te mau ati no te tamaˈi anei aore ra no te mau arepurepuraa e tupu nei i te tahi mau tuhaa o teie fenua rahi. E mea faufaa roa no ratou te mau tairururaa a te nunaa o Iehova. E tia hoi ia vetahi ia haere na raro noa e mau kilometera te atea i te hoê tairururaa e, noa ˈtu râ, eita ratou e manaˈo e mairi hoê noa ˈˈe. I te Repubilita Demotaratia no Congo (Zaire tahito), ua haere te hoê taeae e 73 matahiti to ˈna, tau 450 kilometera te atea, na raro noa i te hoê tairururaa. Ua tapae oia 16 mahana i muri aˈe i to ˈna faarevaraa, ua oruoru to ˈna avae, ua oaoa râ oia i te taeraa. I muri aˈe i te tairururaa, ma te oaoa rahi e te itoito faahou i te pae varua, ua hoˈi oia i ǒ na ra na raro noa. Tau matahiti mai â to ˈna na reira-noa-raa!
4 I Mozambique, ua tia i te hoê tiaau mataeinaa e ta ˈna vahine ia paiuma i te hoê mouˈa teitei e ia haere na roto i te hoê vahi rahi medebara, na raro noa i te tairururaa mataeinaa. Ua ratere raua e 90 kilometera te atea i roto e 45 hora. Ua faaitoito-rahi-hia te feia atoa i tae mai na roto i to raua hiˈoraa. Ua rave atoa e rave rahi mau utuafare tei putuputu mai, i te mau tutavaraa mai teie te huru, no te tae mai. Ua faatia te tiaau mataeinaa e ua haere te tahi mau taeae, e 60 matahiti to te hoê o ratou, e 200 kilometera te atea na raro noa!
5 Ua rave anei tatou i te mau faanahoraa papu no te haere i te tairururaa i teie matahiti? Eita paha tatou e haere na raro noa e mau kilometera te atea, e tia râ ia tatou ia rave i te mau tutavaraa e te mau haapaeraa no te tae mai e te utuafare. E faanahonaho anaˈe ia tatou no te apiti i te taatoaraa o te porotarama, mai te haamataraa e tae noa ˈtu i te hopea. Te haere nei e rave rahi taata o te haapii ra i te Bibilia, i mua i te bapetizoraa. Ia haere ratou i te tairururaa, e nehenehe ïa ratou e rave i te faaotiraa maitai. Ua titau manihini anei tatou i te feia farii maitai e te feia ta tatou e haapii ra i te Bibilia, ia haere mai na muri iho ia tatou i te tairururaa?
6 Te hoê tairururaa e toru mahana: I teie matahiti, e 5 tairururaa te tupu i Polinesia Farani nei. E toru tairururaa o te horoa i te porotarama na roto i te reo Farani, e e piti na roto i te reo Tahiti. Te vai ra te tabula o te mau vahi e te mau taio mahana o taua mau tairururaa ra i roto i Te Pare Tiairaa o te 15 no Febuare 1998. I teie nei taime, ua ite outou i te tairururaa ta ta outou amuiraa e haere atu.
7 Nota taa ê: E mea faufaa roa ia tae tatou i te tairururaa ta ta tatou amuiraa e haere atu. Eiaha e opua e haere i te hoê tairururaa na te mau nunaa atoa mai te peu e aita ta outou amuiraa i titauhia. E nehenehe noa te mau fare i reira e faatupuhia ˈi te mau tairururaa na te mau nunaa atoa, e farii i vetahi noa o te feia atoa e hinaaro e haere. Na roto i to outou faatura i taua mau faanahoraa ra e te rave-amui-raa i te ohipa, e tupu ïa te mau mea atoa ma te au e te nahonaho.—Kor. 1, 14:33, 40.
8 I te mau poipoi Mahana pae, Mahana maa, e Sabati, e haamata te tairururaa i te hora 9 e te afa. I te Mahana pae e i te Mahana maa, e faaoti ïa i te hora 5 i te ahiahi, e i te Sabati, i te hora 4 i te ahiahi. E matara te mau opani i te mahana tataitahi i te hora 8 i te poipoi. O te feia anaˈe e ohipa ta ratou, o te faatiahia ia tomo atu na mua ˈˈe i tera hora. Teie râ, eita te taata e faatiahia ia tapao i te mau parahiraa na mua ˈˈe i te hora 8.
9 Ia haere tatou i te tairururaa aore ra ia hoˈi mai mai reira mai, e tia ia tatou ia imi i te mau taime no te horoa i te faaiteraa ma te faanaho-ore-hia. E nehenehe te feia tito mori, te feia tapihoo, te mau rave ohipa hotela e te mau tuati, e anaanatae i te poroi o te Basileia. E faaineine anaˈe ia tatou ma te rave mai i te mau api parau iti, te mau vea hopea, te mau vea iti aore ra te tahi atu mau papai, no te faaohipa i te mau taime atoa no te horoa i te faaiteraa i te feia o te ore paha e faaroo i te parau apî maitai na roto i te tahi atu ravea.—Tim. 2, 3:17.
10 “E ara anaˈe e nafea tatou ia faaroo”: E mea maitai ia faaohipa te feia o te haere i te mau tairururaa, i te aˈoraa e vai ra i roto i te Luka 8:18. Te faaitoitohia ra te feia tataitahi ia rave mai i ta ratou Bibilia, te hoê buka himene e te hoê buka papai. E faaroo maitai anaˈe i te mau manaˈo faufaa o te tumu parau tataitahi e e tapaopao anaˈe i te mau manaˈo poto. E uiui anaˈe e nafea tatou iho ia faaohipa i te mea ta tatou e faaroo ra. I te po o te mahana tairururaa tataitahi, na mua ˈˈe tatou e taoto ai, no te aha e ore ai e taio faahou i ta tatou mau nota e e hiˈopoa ia tatou iho no te ite e te pee maite ra anei tatou i te eˈa o Iehova o te aratai ra i te ora?—Mas. 4:10-13.
11 Ua itehia e, i roto i te mau taime rururaa, te faarue nei vetahi i te fare tairururaa e te haere nei e parahi i roto i to ratou pereoo, aita ïa ratou e faaroo faahou ra i te porotarama. Ua itehia vetahi i te ori-haere-noa-raa ma te toaruaru na roto i te mau eˈa haereraa taata, e tia hoi ia ratou ia haere e parahi i roto i te fare tairururaa e ia faaroo. Ua faarue te tahi mau pǔpǔ taurearea i te tairururaa i te ropuraa o te avatea. Ua rave vetahi mau tavini a Iehova i mutaa iho, i te mau hapa ino mau, no te mea aita ratou i faaroo maite i ta ˈna mau faahaamanaˈoraa. Papu maitai e aita tatou e hinaaro ra e na reira atoa. (Arii 2, 17:13-15) Ua faaineine “te tavini haapao maitai e te paari” i te hoê haapiiraa faahiahia roa o ta tatou e hinaaro ra. E mea faufaa roa ïa no tatou ia ‘faarahi hua ˈtu i te haapao i te mau parau ta tatou e faaroo’ i te mau taime rururaa tataitahi o na mahana tairururaa e toru. I te mahana tataitahi, e hohorahia mai te tahi mea e tano maitai no tatou iho, te mau manaˈo iho â râ o te ohipa maitai i nia i to tatou huru oraraa a muri aˈe. Na roto i te faaroo-maite-raa e te faaohipa-maitai-raa i ta Iehova e horoa mai na tatou i te pae varua i te mau tairururaa i mua nei, e mau papu roa ˈtu â ïa to tatou tiaturiraa, o te turai ia tatou ia ore ia “painu” oia hoi ia faarue i te eˈa o te Atua o te aratai i te ora.—Mat. 24:45; Heb. 2:1, MN.
12 Te hoê faaahuraa o te faahanahana ia Iehova: I teie mau mahana fifi ta tatou e ora nei, e tia ia tatou ia ara taa ê ia ore tatou ia hema i te huru feruriraa o te ao nei. (Kor. 1, 2:12) E tia ia tatou ia faaahu e ia pahere i te rouru ma te au, ia itehia te tura o te Atua ta tatou e haamori nei. (Tim. 1, 2:9, 10) Aita e faufaa ia oomo mai i te mau ahu moni no te ‘faanehenehe i te [haapiiraa] a te Atua to tatou [Faaora].’ (Tito 2:10; MN) A hiˈo i te mau aˈoraa maitatai roa e te ohie ia faaohipa, a te mau Papai i roto i te mau paratarapha 14-18 o Te Pare Tiairaa o te 15 no Tiunu 1997, mau api 17 e 18. Eiaha roa ˈtu tatou e haafaufaa ore i te puai o te faaiteraa ta tatou e nehenehe e horoa na roto i te hoê faaahuraa o te faahanahana ia Iehova.
13 Ua faatia te hoê potii Ite, 16 matahiti to ˈna, e ua haere raua to ˈna taeae i te fare tamaaraa, i te hoê po i te otiraa te tairururaa, e ua ite atu raua i te tahi mau taeae e mau tuahine, e mea haapaoraa ore to ratou faaahuraa. Teie râ, ua faaite e rave rahi feia matau o teie fare tamaaraa i te huru maitai i to ratou iteraa i te mau Ite e mea nehenehe e mea au maitai to ratou ahu, o tei tamau i ta ratou tareta iˈoa, ua nehenehe ïa ratou e horoa i te faaiteraa i te tahi mau taata i reira.
14 Te hoê haerea e auhia mai e Iehova: Ua ite tatou e e nehenehe to tatou haerea kerisetiano e ohipa i nia i te manaˈo o to tatou taata-tupu no nia i te haamoriraa mau. No reira, te hinaaro nei tatou e faaite i te hoê haerea e au i te parau apî maitai i te mau taime atoa, e e faahanahana ia Iehova.—Phil. 1:27.
15 I te matahiti i mairi aˈenei, ua faanahonahohia te hoê tairururaa mataeinaa no te taime matamua, i te pae apatoerau no Angola. I te piti o te mahana, ua tonohia e piti mutoi no reira i te mau vahi tairururaa no te hiˈopoa i te tere-maitai-raa o te mau mea. Ua faaea raua i reira hoê mahana taatoa. I te hopea o te mahana, ua faaite raua i to raua maere no te mau mea o ta raua i faaroo e no te haerea nahonaho ta raua i ite. Ua parau hoê e: “No te aha mâua i tonohia mai ai i ǒ nei? Ua ite mâua e e haaputuputu te mau Ite no Iehova ma te nahonaho.”
16 Ua horo ê te hoê taata, e melo oia no te hoê pǔpǔ politita no te hoê fenua Afirika, i Europa, no te mea e ua taparahi-pohe-hia te mau melo atoa o ta ˈna pǔpǔ. Ua paruparu roa oia no te rahi o to ˈna mau fifi. I muri iho, ua farii oia i te hoê haapiiraa Bibilia. I to ˈna haereraa i ta ˈna tairururaa mataeinaa matamua, ua maere roa oia i te iteraa i te mau taata no te mau vahi huru rau ia haaputuputu i roto i te hau e te nahonaho, na te reira i haapapu ia ˈna e ua itea mai ia ˈna te parau mau. I taua tairururaa ra, ua faaoti atura oia i te tâpû i to ˈna mau taairaa politita. Ua bapetizohia ˈtura oia i muri iho e, i teie nei, te tavini nei o ˈna e ta ˈna mau tamarii ia Iehova.
17 Eaha ïa te huru o to tatou haerea i teie matahiti i nia i te feia o te haere mai paha i te tairururaa no te taime matamua? E ite anei ratou i to tatou huru e rave amui i te ohipa e vetahi atu mau rima tauturu? E maere anei ratou ia ite ratou e mea mâ te mau vahi e, na mua ˈˈe e hoˈi ai, te ohi nei tatou e ta tatou mau tamarii i te mau pehu na pihai iho i to tatou mau parahiraa? E ite anei ratou i to tatou haerea maitai roa i roto i to tatou mau tere mai to tatou nohoraa i te vahi tairururaa? E ite anei ratou e te hiˈopoa maitai nei tatou, te mau metua, i ta tatou mau tamarii i te mau taime atoa? Ia papu ia tatou e te tutava nei tatou i te horoa i te hiˈoraa maitai roa ˈˈe i mua i te feia atoa e mataitai maira ia tatou.
18 E aufau anaˈe i te mau haamâuˈaraa no te tairururaa: I roto i te ao i teie mahana, e mea moni roa te hoê titeti no te haere e mataitai i te hoê ohipa tuaro i nia i te tahua aore ra te tahi atu ohipa i roto i te piha rururaa. No te mea e mea moni ia tarahu i te mau piha i roto i te mau tuhaa oire. No te mau tairururaa, ua faaohipa noa na te Taiete i te faaueraa tumu ra “Tomoraa tamoni ore—Aita e titauraa moni.” Teie râ, nafea e pee ai te tarahuraa i te piha e vetahi atu mau haamâuˈaraa no te mau tairururaa? Na roto ïa i te mau ô horoa maitai a te feia e putuputu mai. Ua papu ia matou e e faaite atoa outou i te hoê â huru horoa maitai e to te mau tavini a te Atua i mutaa ihora, o tei pee i te hiˈoraa o te Atua ra o Iehova e to Iesu Mesia. (Kor. 2, 8:7) Te haapao maitai nei matou i te tuu i te mau ô atoa i te vahi papu, i te numera e i te faaohipa i te reira ia au i tei opuahia. E tia ia papaihia te mau parau moni atoa no te: Association “Les Témoins de Jéhovah.”
19 Parahiraa: E tano noâ te mau faaueraa i horoahia mai i te mau matahiti i mairi aˈenei: E TAPAO NOA I TE MAU PARAHIRAA NO TO ˈNA UTUAFARE ANAˈE E NO TE FEIA I HAERE MAI NA MURI IA TATOU I ROTO I TE PEREOO. E mea oaoa ia ite e, i te mau matahiti i mahemo aˈenei, ua rahi noa ˈtu te feia tairuru o tei faatura i teie faaueraa, e ua faarahi te reira i te here e itehia nei i ta tatou mau tairururaa. I te rahiraa o te mau vahi tairururaa, te vai nei te tahi mau parahiraa mea ohie aˈe ia naeahia. No reira, a faatura ˈtu ia vetahi ê na roto i te vaiihoraa i te mau parahiraa ohie aˈe ia naeahia, no te feia ruhiruhia e no vetahi e fifihia nei. Eiaha e haamoe e “eita [te here] e imi i te maitai no ˈna iho.”—Kor. 1, 13:4, 5; Phil. 2:4.
20 Pata hohoˈa, taviri video, e matini haruharu: E nehenehe e faaohipa i te mau pata hohoˈa e vetahi atu mau matini haruharu. Teie râ, eiaha tatou ia faahuehue i te tahi atu feia tairuru. Eiaha tatou ia hahaere noa i te mau taime rururaa no te pata i te hohoˈa, no te mea e nehenehe tatou e faahuehue i te feia e tutava ra i te faaroo. Eiaha roa ˈtu te tahi matini haruharu, noa ˈtu eaha te huru, ia tamauhia i nia i te faanahoraa uira aore ra te faanahoraa haapurororaa parau o te tairururaa, aore ra ia faaapǐapǐ i te mau eˈa e te mau vahi haereraa taata, aore ra ia tuuhia i te mau vahi e haafifi i te taata ia ite i mua.
21 Utuuturaa matamua: E haapao noa te tuhaa utuuturaa matamua i te mau tupuraa ru. A rave i ta outou huero raau aspirine, ta outou mau raau no te faatoparaa i te maa, ta outou mau taamu pepe, te mau pine e te tahi atu mau huru tauihaa aita e vai ra i te tairururaa. Te feia atoa e maˈi mafatu to ratou, aore ra e hiaai ra i te raau insuline aore ra e maˈi tupu taue to ratou, e vetahi atu â, e tia ïa ia ratou ia rave mai i te mau raau e hinaarohia. E tia ia vai noa te hoê melo o to ratou utuafare aore ra o ta ratou amuiraa o tei ite i to ratou maˈi, i pihai iho ia ratou i te mau taime atoa no te tauturu ia ratou mai te peu e e hinaarohia. Ua itehia i te tahi mau tairururaa e, ua maˈihia te tahi mau taata e maˈi tupu tamau to ratou e tei vaiiho-noa-hia o ratou anaˈe, e ua tupu ïa te mau fifi. Mai te peu e te hinaaro ra te hoê taata i te mau rapaauraa taa ê, e aita hoê melo o to ˈna utuafare e nehenehe e haapao ia ˈna, e tia ia faaarahia te mau matahiapo o ta ˈna amuiraa, e e rave ratou i te mau faanahoraa e titauhia no te tauturu ia ˈna. Eita e faataahia te mau piha taa ê no te feia e maˈi tati (allergies) to ratou.
22 Maa: E tia i te taata tataitahi ia afai mai i ta ˈna iho maa, eiaha râ ia faarue i te tairururaa i te taime faafaaearaa poto i te avatea no te haere e hoo mai i te maa i rapaeau. E navai noa te tahi maa mâmâ, paia maitai e te ohie ia afai. Te pûpû ra te tumu parau hau o Te taviniraa o te Basileia no Me 1995, i te paratarapha 26, i te tahi mau maa. Eiaha e tomo i roto i te fare tairururaa e te mau mohina hiˈo, e te mau ava atoa. A rave i te mau afata aore ra te mau pute faatoetoe nainai, ia ô i raro aˈe i to outou parahiraa. Ua itehia te tahi mau taata te amu ra i te maa i te taime e vauvauhia ˈi te porotarama, e ere roa ˈtu ïa i te haerea faatura.
23 Auê tatou i te oaoa e i te manaˈoraa i te tairururaa “E aratai te eˈa o te Atua i te ora” e piri maira! Ua rave anei tatou i te mau faanahoraa no te tae atu? Ia maitai ïa to tatou tere e ia hoˈi tatou i te fare ma te itoito faahou, ma te opua maite i te tamau noa i ta tatou taviniraa faufaa roa no Iehova e ia pee tamau i te eˈa o te Atua o te aratai i te ora, no to tatou oaoaraa mure ore!
[Box on page 6]
Tairururaa—Faahaamanaˈoraa
▪ Bapetizoraa: E parahi te feia e bapetizo i nia i te mau parahiraa i faataahia no ratou na mua ˈˈe i te haamataraa o te rururaa no te poipoi Mahana maa. E rave te taata tataitahi e bapetizo i te hoê ahu hopuraa au maitai e te hoê tauera. I mutaa iho, ua oomo mai vetahi i te mau ahu tura ore o tei faaino i te faufaaraa o te bapetizoraa. E haapapu te mau matahiapo e tuatapapa i te mau Uiraa na te feia e hinaaro ra e bapetizo e ua taa maitai anei i te feia tataitahi e bapetizo i teie mau manaˈo. Ua riro te bapetizoraa no te faataipe i te pûpûraa ia ˈna iho ei ohipa i rotopu i te taata iho e o Iehova. No reira, aita i faanahohia te mau “bapetizoraa tapǔpǔ” i reira e piti taata aore ra hau atu e tauahi ai te tahi e te tahi aore ra e tapea ˈi i to ratou rima ia taumihia ratou i raro i te pape.
▪ Tareta iˈoa: A tamau noa i te tareta iˈoa no 1998 i te tairururaa e tae noa ˈtu i to outou mau tere haere e hoˈi mai. E horoa pinepine te reira i te hoê faaiteraa maitai roa. E ani outou i te mau tareta iˈoa e te mau vairaa tareta na roto i ta outou amuiraa, no te mea aita te reira i te tairururaa. Eiaha e tiai i te mau mahana hopea na mua noa ˈˈe i te tairururaa no te ani atu i te mau tareta iˈoa no outou e no to outou utuafare. Eiaha ia moehia ia rave i ta outou tareta ra “Attestation prévisionnelle.”
▪ Vahi faaearaa: E ara te papai parau a te amuiraa ia hapono-oioi-hia te mau api parau ra “Demande de chambre pour cas particuliers” i te vahi nohoraa a te tairururaa. Mai te peu e e tia ia outou ia faaore i te hoê tapaoraa i te hoê piha no te hoê tupuraa taa ê, a faaara oioi mai ïa.
▪ Mau pereoo turairai tamarii e mau parahiraa tufetu: I roto e rave rahi vahi, e opanihia ia faaohipa i te mau pereoo turairai tamarii i te mau haaputuputuraa huiraatira. Aita te mau ture i te pae no te parururaa e faatia ra ia vaiiho-noa-hia te reira i roto i te mau vahi haereraa taata, i roto i te mau eˈa aore ra te mau area i ropu i te mau parahiraa. I te mea hoi e e nehenehe teie mau vahi e apǐ roa i te taata, e mea atâta te mau pereoo turairai tamarii no te mau aiû iho e te feia e topa ˈtu i nia iho. A ara ia ore ia hopoi mai i te reira i te vahi tairururaa. Teie râ, e faatiahia te mau parahiraa tamarii aore ra te mau parahiraa e nehenehe e tuuhia i roto i te pereoo uira, no te mea e nehenehe te mau metua e tamau atu i nia i te hoê parahiraa i pihai iho ia ratou. A ara atoa ia ore e hopoi mai i te mau parahiraa tufetu. Eita e faatiahia ia faaohipa i te reira i te mau haaputuputuraa huiraatira rahi. Mea faufaa e mea haapopouhia to outou tururaa mai i roto i teie na tuhaa e piti.
▪ Rima tauturu: E nehenehe anei outou e faaherehere i te tahi taime i te tairururaa no te tauturu i roto i te hoê o te mau tuhaa ohipa? E nehenehe tatou e tauturu e e oaoa rahi mai te peu e e tavini tatou i to tatou mau taeae, noa ˈtu e te tahi tau hora noa. Mai te peu e e nehenehe outou e tauturu mai, a haere atu ïa i te tuhaa haapao i te mau rima tauturu i te tairururaa. E nehenehe atoa te mau tamarii i raro mai i te 16 matahiti e tauturu maitai mai ma te rave i te ohipa na muri i to ratou metua tane, to ratou metua vahine aore ra te tahi atu taata paari.
▪ Faaararaa: A ponao noa i te mau opani pereoo e eiaha roa ˈtu e vaiiho i te mau taoˈa ia itehia e te taata. Mea au roa na te feia eiâ e te feia tinao pute i te mau haaputuputuraa rarahi. E ere i te mea paari ia vaiiho i te hoê taoˈa faufaa i nia i to outou parahiraa. Eita outou e ite e mai te peu e e mau Kerisetiano pauroa te feia e haaati ra ia outou. No te aha e faahema ˈi i te hoê taata? Ua tae atoa mai te tahi mau tabula parau e faataa ra e ua tamata te tahi feia matau ore i te ume i te tahi mau tamarii iti i rapaeau. EIAHA ROA ˈTU E VAIIHO I TA OUTOU MAU TAMARII MA TE ORE E ITE-MATA-HIA E OUTOU.