Te pûpû ra anei outou i te haapiiraa bibilia?
1 E rave rahi feia poro o te manuïa nei i te haamata i te mau haapiiraa bibilia ma te ani roa i te mau taata ia hiˈopoa i te Bibilia. Ua farii popou te hoê taata o tei patoi e rave rahi taime i ta tatou mau buka i te hoê haapiiraa bibilia. Ua parau o ˈna e: “Ua hinaaro noa na vau e haapii i te Bibilia.” Ua haamatahia hoê haapiiraa, e ua haere oioi to ˈna utuafare taatoa i mua.
2 E mea tia ia imi tatou pauroa i te haamata i te mau haapiiraa. Ia haere te mau taata i mua no te riro ei pǐpǐ na te Mesia, ia haapiihia ratou e tia ˈi. (Mat. 28:19, 20) Teie râ, mea na roto i te hiˈopoaraa i te Bibilia e o ratou e haapii ai tatou ia ratou. E pinepine e nehenehe e haamata i te mau haapiiraa ma te faaite noa i te mau taata e nafea ia haamatau i te Bibilia e te mau parau fafau a te Atua. Ua haamata te hoê taeae e pae haapiiraa i nia i te api parau Te hoê oraraa hau i roto i te hoê ao apî. I te mea e eita e maraa ia ˈna ia faatere tamau e rave rahi roa haapiiraa, ua horoa o ˈna i te tahi na te tahi atu feia poro.
3 Mai te peu e e haamata ohie tatou i te mau haapiiraa, e nehenehe tatou e afai i te tahi mau taata poro na muri ia tatou e e tauturu ia ratou ia haamata atoa ratou. Aore ra e nehenehe tatou e horoa i te tahi o ta tatou mau haapiiraa na te tahi atu mau melo o te amuiraa. Mai te peu e te hinaaro ra outou e faatere i te hoê haapiiraa bibilia, no te aha e ore ai e tamata i te pûpû atu i te mau taata ta outou e farerei nei na te mau fare? Ua hoˈi te hoê taata poro e hiˈo i te hoê potii o tei ore i faaite i te hoê anaanatae rahi. Ua pûpû râ te taata poro i te hoê haapiiraa bibilia, o ta ˈna ïa i farii. Ua bapetizohia o ˈna i teie nei, e te apiti nei to ˈna tuahine e to ˈna taoete i te mau putuputuraa.—Gal. 6:6.
4 Eita te mau taata atoa o te haamata ra i te haapii e tamau noa. Eita te mau taata atoa o te haapii ra e farii i te parau mau. E na reira râ vetahi. E rahi noa ˈtu â tatou i te haamata i te mau haapiiraa, e rahi noa ˈtu â ta tatou ravea e tauturu ai i te mau taata ia haamori ia Iehova.