E haamata tatou i te mau haapiiraa bibilia i te fare o te taata
1 Te hoê o te mau ohipa o tei haamaitai rahi i te mau kerisetiano mau, oia hoi te haapiiraa ïa i te parau mau maoti i te hoê haapiiraa bibilia i te fare o te taata. Tera râ, aita paha vetahi e apiti ra i taua tuhaa faufaa roa o te taviniraa, no te mea te manaˈo nei ratou e eita ratou e nehenehe e haamata e e aratai i te hoê haapiiraa bibilia. E rave rahi feia poro e mau pionie hiˈoraa maitai o tei manaˈo mai te reira atoa. Tera râ, ma te tuu i te tiaturiraa i nia ia Iehova e ma te faaohipa i te mau manaˈo o Te taviniraa o te Basileia, ua haapii ratou i te haamata e i te aratai i te mau haapiiraa bibilia, e ua ite ratou i te oaoa rahi i roto i te taviniraa. O outou atoa, e nehenehe outou e na reira.
2 A faaohipa i te ravea o te faaite tia roa ˈtu i te manaˈo e te mau api parau iti: Hoê o te mau ravea ohie roa ˈˈe no te haamataraa i te hoê haapiiraa bibilia na roto ïa i te ravea faaite tia i te manaˈo. Te mea ta vetahi mau taata e hinaaro, o te hoê ïa titauraa mahanahana ia haapii i te Bibilia. Teie te nehenehe e ravehia ma te ani-noa-raa ˈtu i te taata e faaroo maira: “E hinaaro anei oe iho e fanaˈo i te hoê haapiiraa bibilia i te fare e e faarahi i to oe ite o te mau Papai e o te opuaraa a te Atua no nia i te fenua?” Aore ra e parau paha outou ia ˈna e oaoa outou e faaite atu ia ˈna e nafea te hoê haapiiraa bibilia i te fare ia faaterehia. Noa ˈtu te patoi nei e rave rahi i teie aniraa, a manaˈo i te oaoa ta outou e ite ia farii mai te hoê taata.
3 Te faaohiparaa i te hoê o ta tatou mau api parau iti o te hoê ravea ê atu ïa no te haamata i te hoê haapiiraa bibilia. Noa ˈtu e mea haihai ratou, te faaite nei râ ratou i te hoê poroi puai e papu. Nafea ia haamata i te hoê haapiiraa bibilia e te hoê o ratou? Na roto noa i te horoaraa ˈtu i te hoê api parau iti i te taata e faaroo maira o ta outou e manaˈo ra e anaanatae oia. I muri iho, a rave i te mau faanahoraa, a titau manihini i te taata e faaroo maira ia taio i te paratarapha matamua e o tatou. A hiˈopoa i te mau irava i faahitihia, e a faataa eaha to ratou tuearaa e te tumu parau. I te tere matamua, e hiˈopoa noa paha outou hoê aore ra e piti paratarapha. Ia ite te taata e te haapii nei oia i te mau mea anaanatae i roto i te Bibilia, e faaroa ˈtu â outou i ta outou mau aparauraa.
4 Ma te faaohipa-noa-raa i te Bibilia: I te tahi mau taime, e farii te taata ia hiˈopoa i te Bibilia, aita râ oia e farii i te hoê haapiiraa bibilia aore ra e faaohipa i te hoê o ta tatou mau buka. E haamata e e aratai noa râ outou i te hoê haapiiraa bibilia ma te faaineineraa i te hoê aparauraa anaanatae maoti i te mau buka E ora e a muri noa ˈtu aore ra Haaferuriraa, ma te faaohipa noa râ i te Bibilia anaˈe ia haere outou e farerei i taua taata ra. E 15 aore ra e 20 minuti paha te maoro o taua mau aparauraa ra, hau atu â, ia au i te mau tupuraa. Mai te peu e e tupu tamau noa ratou e te pee nei i te hoê ravea haapiiraa maine o te mau parau mau a te Bibilia, ua haamata outou i te hoê haapiiraa e e tapao outou i nia i ta outou tabula ohipa. I te taime tano, a faaite atu i te buka E ora e a muri noa ˈtu e a aratai i te hoê haapiiraa ia au i te ravea matauhia.
5 Hau atu i te haafaufaa i te mau taime atoa ia poro outou, ua tamata anei outou i te haamata i te hoê haapiiraa bibilia e te feia tapiri, te mau hoa aore ra te mau melo o to outou utuafare? E mea maoro anei? Ua tamata anei outou aita i maoro aˈenei? Mai te peu e aita te hoê ravea i manuïa, ua tamata anei outou i te tahi atu?
6 Mai te peu e e faaohipa tatou i te mau manaˈo horoahia, e tamau noa tatou i te haere i roto i te pororaa e e tiaturi anaˈe i nia i te haamaitairaa a Iehova, e manuïa tatou i te haamata i te mau haapiiraa. Eiaha tatou e haafaufaa ore i te mana o te parau mau e te tauturu a Iehova. Ia faarahi tatou i to tatou oaoa i roto i te taviniraa ma te haamata e ma te aratai i te mau haapiiraa bibilia i te fare o te taata!