Te hoê mahana taa ê no te pûpû i te mau haapiiraa bibilia
1 Mai Tenuare atu, e faataa te mau amuiraa atoa i te hoê hopea hebedoma i te mau avaˈe atoa, peneiaˈe te matamua, no te pûpû i te mau haapiiraa bibilia. Hoê Mahana maa aore ra hoê Tapati, ia au i te mea maitai aˈe i ǒ tatou nei. I taua mahana ra, ia ore te taata e farii i te hoê haapiiraa bibilia, e nehenehe noa te feia poro e pûpû i te buka Bibilia haapii aore ra te mau vea hopea roa. E faanaho te taatoaraa o te mau matahiapo e tavini tauturu ia ratou no te apiti roa i teie ohipa e no te tauturu i te feia poro ia haamata i te mau haapiiraa bibilia.
2 Na te tomite tiaauraa a te amuiraa e faataa i te mahana o te hopea hebedoma no te pûpû i te mau haapiiraa bibilia. A haamanaˈo tamau atu i te feia poro ia nehenehe ratou e faaineine ia ratou e e tutava taa ê i te pûpû i te mau haapiiraa bibilia i tera e tera fare e ia farerei faahou ratou i te feia tei anaanatae na.
3 E nafea ia faaineine: Te vai ra te tahi mau manaˈo tauturu e nafea ia haamata i te mau haapiiraa bibilia i roto i te api hau o Ta tatou taviniraa i te Basileia no Tenuare 2006 e i te api 11 o te buka Haaferuriraa. E maiti paha vetahi i te faaohipa i te hoê api parau, mai E hinaaro anei oe e ite i te parau mau? Te horoa atoa ra te api 3 o Ta tatou taviniraa i te Basileia no Atete 2007 i te tahi mau manaˈo tauturu no te haamata i te mau haapiiraa bibilia ia farerei faahou tatou i te feia i farii i te mau vea. E faanahohia te mau matahiapo e tavini tauturu no te faatere i te hoê putuputuraa no te pororaa poto noa 10 e tae atu 15 minuti, i reira e hiˈopoahia ˈi aore ra e ravehia ˈi te hoê faahiˈoraa o te hoê aore ra e piti manaˈo tauturu ohie no te haamata i te mau haapiiraa bibilia.
4 Parau mau, e ere o te taata atoa te farii i te hoê haapiiraa bibilia e o te tamau noa i te haapii. Eiaha râ tatou e faaea, no te mea na Iehova e faatae mai nei i te mau taata e au i te mamoe i ta ˈna faanahonahoraa. (Ioa. 6:44) Ta tatou hopoia, e ere noa o te ueueraa i te mau huero o te parau mau, o te atuaturaa e te pîpîraa atoa râ i tei aˈa, ma te haapii ïa i te Bibilia i te feia aau tia. Mea na reira hoi tatou e faaohipa ˈi i te fanaˈoraa taa ê ei hoa rave ohipa no te Atua.—Kor. 1, 3:9.