Tuhaa 12: E faatere anaˈe i te mau haapiiraa bibilia o te paturu i te mau haereraa i mua
E tauturu anaˈe i te piahi ia haamata e ia faatere i te mau haapiiraa bibilia
1 E taiâ paha te hoê piahi Bibilia a tahi ra a poro ai i te haamata e te faatere o ˈna iho i te mau haapiiraa bibilia. E nafea e tauturu ai ia ˈna ia rave i teie tuhaa faufaa roa o ta tatou taviniraa ma te manaˈo maitai?—Mat. 24:14; 28:19, 20.
2 Ia faaî o ˈna i tei titauhia no te riro ei taata poro bapetizo-ore-hia, te haafaufaa aˈena ra iho â te piahi i te Haapiiraa o te taviniraa teotaratia. E nehenehe e noaa ia ˈna te mau aravihi faufaa roa no te riro “ei rave ohipa aita e haamaraa, e te tia hoi i te tufa i te parau mau ra” na roto i te faaineineraa e te raveraa i te mau tumu parau.—Tim. 2, 2:15.
3 E haapii anaˈe na roto i te hiˈoraa: Ua faaineine Iesu i ta ˈna mau pǐpǐ ma te horoa i te hoê haapiiraa maramarama e te hoê hiˈoraa maitai roa. Ua parau oia e: “O te pǐpǐ . . . i haapii-hua-hia ra, e riro ïa i te faito atoa i tana orometua.” (Luka 6:40) E mea faufaa roa ia pee outou ia Iesu ma te horoa outou atoa i te hiˈoraa. Ma te rave i ta outou taviniraa ei hiˈoraa, e taa iho â i te piahi e te fa o te mau farerei-faahou-raa, o te haamataraa ïa i te mau haapiiraa bibilia.
4 A faataa e ia pûpû tatou i te hoê haapiiraa, e pinepine e ere i te mea faufaa ia faataa huˈahuˈa i te tereraa o te haapiiraa. E pinepine e mea maitai aˈe ia faaite ma te faaohipa hoê aore ra e piti paratarafa o te hoê papai e haapiihia ra. E nehenehe outou e ite i te mau manaˈo tauturu i te api 8 o teie nei Taviniraa i te Basileia e i te api 6 o Ta tatou taviniraa i te Basileia no Tenuare 2002.
5 Mai te peu e e nehenehe, a titau manihini i te piahi ia apiti ia outou aore ra i te tahi atu mau taata poro aravihi i te mau haapiiraa bibilia. E nehenehe paha o ˈna e paraparau i nia i te hoê paratarafa aore ra i nia i te hoê irava bibilia faufaa. I reira, na roto i ta ˈna e ite, e haapii te piahi e rave rahi mea no nia i te faatereraa i te mau haapiiraa bibilia o te paturu i te mau haereraa i mua. (Mas. 27:17; Tim. 2, 2:2) A haapopou ia ˈna e a faaite ia ˈna e nafea o ˈna e nehenehe ai e haamaitai atu â.
6 E faaineine te haapiiraa i horoahia i te feia poro apî no te riro ei orometua haapii i te Parau a te Atua no te “ohipa maitatai” oia hoi te haamataraa e te faatereraa ratou iho i te mau haapiiraa bibilia. (Tim. 2, 3:17) Auê te oaoa ia apiti ia ratou i te pororaa i teie titau-manihini-raa î i te here: “E tei hinaaro ra, a rave noa mai oia i te pape ora.”—Apo. 22:17.