Te ora i muri aˈe i te pohe—Eaha ta te taata e tiaturi ra?
“Ia pohe te taata nei, e ora faahou anei?”—IOBA 14:14.
1, 2. Nafea te rahiraa o te taata e maimi ai i te tamǎrû ia erehia ratou i te hoê taata here na roto i te pohe?
I ROTO i te hoê fare vairaa taata pohe i te oire no New York, te haere noa ra te mau hoa e te fetii, te tahi i muri i te tahi, ma te maniania ore na pihai iho i te afata aita i opanihia o te hoê tamaiti 17 matahiti, i pararai-roa-hia i te mariri ai taata. Te parau ra te metua vahine e mauiui ra na nia iho e na nia iho noa a tahe noa ˈi te roimata e: “Mea oaoa aˈe o Tommy i teie nei. Ua hinaaro te Atua ia haere o Tommy i pihai iho ia ˈna i nia i te raˈi.” Tera ïa tei haapiihia ia ˈna ia tiaturi.
2 Fatata 11 000 kilometera i te atea, i Jamnagar, i Inidia, te tanina ra te matahiapo o na tamaroa tootoru i te mau tâpû raau i nia i te hoê tahuraa auahi no to ratou metua tane i pohe. Na nia ˈˈe i te paapaaina o te auahi, te himene ra te feia faaroo Baramana i te mau parau moˈa Sanskrit: “Ia tamau noa te nephe, o te ore roa ˈtu e pohe, i te tutava i te tapae i to ˈna tiaraa hopea.”
3. Eaha te mau uiraa ta te taata i uiui mai te mau tau mai â?
3 E pohe iho â tatou paatoa. (Roma 5:12) E uiui noa iho â tatou e o te pohe anei te hopea o te mau mea atoa. A feruri ai oia i te ohuraa natura o te mau raau tupu, ua parau Ioba, te hoê tavini haapao maitai i tahito ra a te Atua ra o Iehova, e: “[“Te vai ra hoi te tiaturiraa no te raau,” MN], ia tâpûhia ra, e e tupu faahou te ohǐ, e eita e ore te mea rii apî ra.” E te taata ïa? “Ia pohe te taata nei, e ora faahou anei?” ta Ioba ïa i ani. (Ioba 14:7, 14) I te roaraa o te tau, ua ui te taata i roto i te mau totaiete atoa i teie mau uiraa: Te vai ra anei te ora i muri aˈe i te pohe? Mai te peu e e, mai te aha tera huru ora? No reira, eaha tei haapiihia i te taata ia tiaturi? E no te aha?
E rave rahi pahonoraa, hoê noa tumu parau
4. Eaha ta te taata o te mau haapaoraa e rave rau e tiaturi ra no nia i te ora i muri aˈe i te pohe?
4 E rave rahi feia parau-noa-hia e Kerisetiano e tiaturi nei e i muri aˈe i te pohe, e haere te taata i nia i te raˈi aore ra i te po auahi. Area te feia faaroo Hindu ra, te tiaturi nei ïa i te fa-faahou-raa i roto i te tino ê. Ia au i te tiaturiraa Mahometa, te vai ra te hoê mahana haavaraa i muri aˈe i te pohe, i reira Allah e hiˈopoa ˈi i te oraraa o te taata taitahi e e tuu ai i te hoê taata i roto i te paradaiso aore ra i roto i te po auahi. I te tahi mau fenua, te mau tiaturiraa no nia i te feia pohe, e anoiraa ïa o te mau tutuu o taua vahi ra e tei parau-noa-hia e Kerisetianoraa. I Sri Lanka, ei hiˈoraa, e iriti roa te feia faaroo Buddha e te mau Katolika atoa i te mau opani e te mau haamaramarama ia pohe te hoê taata i roto i to ratou fare, e e tuuhia te afata ma te avae o te taata pohe i mua i te uputa rahi. E tiaturi ratou e e faaohie teie mau raveraa i te revaraa o te varua, aore ra te nephe, o te taata pohe. I rotopu i te mau Katolika e te mau Porotetani e rave rahi i Afirika Tooa o te râ, e peu matauhia te tapoˈiraa i te mau hiˈo ia pohe te hoê taata, eiaha ia hiˈohia ˈtu i roto a ite atu ai i te varua o tei pohe. E 40 mahana i muri aˈe, e faatupu te utuafare e te mau hoa i te oroa no te maueraa o te nephe i nia i te raˈi.
5. Te tuati nei te manaˈo o te rahiraa o te mau haapaoraa i nia i teihea tiaturiraa tumu?
5 Noa ˈtu e ua rau te manaˈo, e au ra e te tuati nei te feruriraa o te rahiraa o te mau haapaoraa no nia i te hoê manaˈo tumu. Te tiaturi nei ratou e te vai ra te hoê taoˈa i roto i te taata—te hoê nephe, te hoê varua, aore ra te hoê tupapau—e mea pohe ore e e tamau noa i te ora i muri aˈe i te pohe o te tino. Fatata tau hanere haapaoraa e mau pǔpǔ faaroo a te Amuiraa faaroo Kerisetiano o te tiaturi nei i te pohe-ore-raa o te nephe. E haapiiraa tumu atoa teie i roto i te haapaoraa ati Iuda. I roto i te haapaoraa Hindu, e niu mau teie tiaturiraa no te haapiiraa o te fa-faahou-raa i roto i te tino ê. E tiaturi te mau Mahometa e e tamau noa te nephe i te ora ia pohe te tino. E haapii te Aborigène no Auteralia, to te faaroo Animisme no Afirika, to te faaroo Shinto e tae noa ˈtu to te faaroo Buddha i te mau manaˈo taa ê rii no nia i taua noâ tumu parau ra.
6. Eaha te feruriraa o te tahi feia ite no nia i te manaˈo e mea pohe ore te nephe?
6 Te pee nei vetahi i te manaˈo taa ê roa, oia hoi e hope te ora ia tae mai te pohe. Ia ratou, e au ra e mea maamaa ia tiaturi e e tamau noa te ora i te pae o te mau manaˈo hohonu e te pae feruriraa i roto i te hoê nephe maramarama ore e aita to ˈna e ihotaata, tei taa ê mai i te tino. Ua papai o Miguel de Unamuno, taata papai buka e taata ite Paniora no te senekele 20 e: “Te tiaturiraa i te pohe-ore-raa o te nephe, o te hiaairaa ïa e peneiaˈe mea pohe ore te nephe, te hiaairaa râ i te reira ma te puai mau e haamoe-roa-hia ˈi te feruriraa e e maamaa-roa-hia ˈi te upoo.” I rotopu i te feia e manaˈo ra mai te reira, te vai ra te mau philosopho tuiroo i tahito ra o Aristote e o Épicure, te taote ra o Hippocrate, te philosopho no Ekosia ra o David Hume, te taata ite Arabia ra o Averroès, e te faatere hau matamua i Inidia i muri aˈe i te tiamâraa, o Jawaharlal Nehru.
7. Eaha te tahi mau uiraa faufaa no nia i te haapiiraa o te pohe-ore-raa o te nephe te tia ia hiˈopoahia?
7 I mua i teie mau manaˈo e mau tiaturiraa tuati ore, e tia ia tatou ia uiui e: E nephe pohe ore mau anei to tatou? Mai te peu e e ere iho â te nephe i te mea pohe ore, nafea ïa teie haapiiraa hape i ô mai ai i roto i te rahiraa o te mau haapaoraa i teie nei mahana? Ihea teie manaˈo i te haamataraa mai? Mea titauhia ia ite tatou i te mau pahonoraa mau e te mauruuruhia i teie mau uiraa no te mea ua taaihia to tatou oraraa a muri aˈe i te reira. (Korinetia 1, 15:19) Na mua roa râ, e hiˈopoa anaˈe nafea te haapiiraa o te pohe-ore-raa o te nephe i te faraa mai.
Te faraa mai teie haapiiraa
8. Nafea to Socrate e to Platon faahitiraa i te manaˈo e mea pohe ore te nephe?
8 Ua parauhia e o te mau philosopho Heleni tuiroo no te senekele 5 H.T.T. o Socrate e o Platon tei roto i te feia matamua i faahiti i te manaˈo e mea pohe ore te nephe. E ere râ raua te feia matamua i haamau i teie haapiiraa. Ua haamaitai noa râ raua i te reira e ua faariro atu ei haapiiraa philosopho, ia farii-maite-hia e te mau pǔpǔ feia ite no taua tau ra e no to muri mai. Inaha, ua tiaturi atoa te Zoroastrisme no Peresia i tahito ra e to Aiphiti hou ia raua, i te pohe-ore-raa o te nephe. Teie ïa te uiraa, Nohea mai teie haapiiraa?
9. Eaha te haapaoraa i ohipa i nia i te ao i tahito ra no Aiphiti, Peresia, e Heleni?
9 “I roto i te ao i tahito ra,” ta te buka ra Te haapaoraa i Babulonia e i Asura (Beretane) ïa i parau, “e itehia te ohiparaa a te haapaoraa Babulonia i nia i to Aiphiti, to Peresia, e to Heleni.” Te faataa faahou ra teie buka no nia i te mau tiaturiraa faaroo Aiphiti e: “Ia hiˈohia te mau taairaa matamua i rotopu i to Aiphiti e to Babulonia, ia au i tei faaitehia e te pǎpǎ El-Amarna, e rave rahi mau â taime to te mau manaˈo e mau peu no Babulonia ôraa ˈtu i roto i te haamoriraa a to Aiphiti.”a E nehenehe atoa e na reira i te parau no te mau hiroa tumu Peresia e Heleni i tahito ra.
10. Eaha te manaˈo o to Babulonia no nia i te ora i muri aˈe i te pohe?
10 Ua tiaturi anei râ to Babulonia i tahito ra i te pohe-ore-raa o te nephe? No nia i te reira, ua papai te orometua haapii ra o Morris Jastrow, Jr, no te Fare haapiiraa tuatoru no Pennsylvanie, Hau amui no Marite, e: “Aita te taata, aita atoa te mau faatere haapaoraa i manaˈo aˈenei [i Babulonia] e nehenehe te hoê mea ora e mou roa. [I roto i to ratou feruriraa], ua riro te pohe ei faahaereraa ˈtu i roto i te tahi atu huru oraraa, e te oreraa e farii i te pohe-ore-raa [o teie nei oraraa], e haapapu noa ˈtu â ïa e eita e nehenehe e ape i te tauiraa e faatupuhia e te pohe i roto i te oraraa.” Oia mau, e tiaturi atoa na to Babulonia e e tamau noa te ora i muri aˈe i te pohe na roto i te hoê huru aore ra i te tahi. E faaite na ratou i te reira na roto i te hunaraa i te mau tauihaa e te taata pohe ia faaohipa ratou i roto i te Ao i muri aˈe i te pohe.
11, 12. I muri aˈe i te Diluvi, teihea te pu o te haapiiraa o te pohe-ore-raa o te nephe?
11 Papu maitai, e nehenehe e faahoˈi roa i te haapiiraa o te pohe-ore-raa o te nephe i Babulonia i tahito ra. Mea faufaa anei te reira? Oia mau, no te mea ia au i te Bibilia, na Nimeroda, te hina a Noa, i faatia i te oire no Babela aore ra Babulonia. I muri aˈe i te Diluvi rahi i te tau o Noa, hoê noa reo e hoê noa haapaoraa ta te taata atoa. E ere noa o Nimeroda i te ‘taata [“patoi,” MN] ia Iehova,’ ua hinaaro atoa râ o ˈna e to ˈna mau taata ‘ia iteahia to ratou iˈoa.’ Na roto i te faatiaraa i te oire e te hoê pare i ǒ, ua haamata aˈera o Nimeroda i te hoê haapaoraa taa ê.—Genese 10:1, 6, 8-10; 11:1-4.
12 Ia au i te tutuu, e pohe ino mau to Nimeroda. I muri aˈe i to ˈna pohe, e hinaaro iho â ïa to Babulonia e faatura rahi ia ˈna ei taata faatia, ei taata patu e ei arii matamua o to ratou oire. I te mea e te hiˈohia ra te atua ra o Mardouk (Merodaka) ei faatia ia Babulonia e e rave rahi arii no Babulonia tei rave i to ˈna iˈoa, te manaˈo ra te tahi feia ite e e faahohoˈaraa o Mardouk no Nimeroda i faarirohia ei atua. (Te mau arii 2, 25:27; Isaia 39:1; Ieremia 50:2) Mai te peu e te reira iho â, ua parare ïa te manaˈo e e ora mai te nephe o te taata i muri aˈe i te pohe, fatata i te tau a pohe ai o Nimeroda. Noa ˈtu râ, te faaite ra te mau api o te aamu e, i muri aˈe i te Diluvi, o Babela aore ra Babulonia te pu no te haapiiraa o te pohe-ore-raa o te nephe.
13. Nafea te haapiiraa o te nephe pohe ore i te parare-roa-raa na te fenua atoa nei, e eaha te faahopearaa?
13 Te faaite atoa ra te Bibilia e ua tapea te Atua i te mau tutavaraa a te feia patu i te pare no Babela na roto i te faahuru-ê-raa i to ratou reo. I te mea e aita ratou i nehenehe e paraparau te tahi i te tahi, ua vaiiho aˈera ratou i ta ratou ohipa e purara ˈtura “i te fenua atoa e ati noa ˈˈe.” (Genese 11:5-9) E tia ia tatou ia haamanaˈo e noa ˈtu e ua tauihia te reo o teie feia patu, aita to ratou feruriraa e to ratou mau manaˈo i taui. Inaha, i te vahi atoa ta ratou i haere, ua afai atoa ratou i to ratou mau manaˈo faaroo na muri ia ratou. Mea na reira ïa te parareraa te mau haapiiraa faaroo Babulonia—tae noa ˈtu te haapiiraa o te pohe-ore-raa o te nephe—e ati aˈe te fenua nei e riro atu ai ei niu o te mau faaroo rarahi o te ao nei. I reira te haamauraahia te hoê hau emepera o te haapaoraa hape, i faataahia ma te tano i roto i te Bibilia mai ia ‘Babulonia Rahi, te metua vahine o te mau faaturi, e no te mau mea faufau o te ao nei.’—Apokalupo 17:5.
Ua tae roa te hau emepera o te haapaoraa hape i te pae Hitia o te râ ma
14. Nafea te mau tiaturiraa faaroo Babulonia i te parareraa i te fenua rahi Inidia?
14 Te parau ra te tahi feia tuatapapa aamu e hau atu i te 3 500 matahiti aˈenei, ua haere rahi te hoê nunaa taata Aryen uouo i te pae apatoerau tooa o te râ i roto i te Peho Indus, e vai ra i teie nei i Pakistan e i Inidia. Mai reira mai to ratou parareraa ˈtu i te mau anavai Gange e i Inidia atoa. Te parau ra te tahi feia aravihi e no roto mai te mau manaˈo faaroo o te feia hahaere i te mau haapiiraa Irania e Babulonia i tahito ra. Ua riro maira taua mau manaˈo faaroo ra ei niu no te faaroo Hindu.
15. Nafea te manaˈo o te hoê nephe pohe ore i te ohiparaa i nia i te haapaoraa Hindu no teie nei tau?
15 I Inidia, ua riro mai te manaˈo o te hoê nephe pohe ore ei haapiiraa o te fa-faahou-raa i roto i te tino ê. Ua farii popou aˈera te feia paari Hindu e faaû ra i te fifi o te ao atoa nei o te ino e te mauiui i rotopu i te taata i te mea e parauhia ra te ture o te Karma, te ture o te tumu e te faahopearaa. Ma te anoi i teie ture e te tiaturiraa o te pohe-ore-raa o te nephe, ua haamau aˈera ratou i te haapiiraa o te fa-faahou-raa i roto i te tino ê, e tei te au aore ra te au ore o to te taata oraraa, e haamaitaihia ˈi aore ra e faautuahia ˈi oia i roto i te oraraa i mua. Te fa a te taata faaroo, o te moksha ïa aore ra te tiamâraa mai roto mai i te tauiui-haere-raa te nephe i te tino no te tapae atu i te tiaraa hopea, aore ra te Nirvana. I te roaraa o te senekele, ua parare te haapaoraa Hindu e te haapiiraa atoa o te fa-faahou-raa i roto i te tino ê. E riro maira teie haapiiraa ei niu no te haapaoraa Hindu no teie nei tau.
16. Eaha te tiaturiraa no nia i te Ao i muri aˈe i te pohe i mana i nia i te feruriraa e te mau peu faaroo o te rahiraa o te taata i Asia Hitia o te râ?
16 Mea na roto mai i te haapaoraa Hindu te faraa mai te tahi atu mau faaroo, mai te mau haapaoraa Buddha, Jaïna, e Sikh. Te tiaturi atoa ra ratou i te fa-faahou-raa i roto i te tino ê. Hau atu â, a faaô atu ai te haapaoraa Buddha i roto i te rahiraa fenua i Asia Hitia o te râ—i Taina, Korea, Tapone, e te tahi atu mau vahi—ua ohipa rahi oia i nia i te hiroa tumu e te haapaoraa a te fenua taatoa. Ua fa maira te mau haapaoraa e haapii ra i te hoê anoiraa o te mau tiaturiraa a te haapaoraa Buddha, e te peu tahutahu, e te peu haamori tupuna. Te mau haapaoraa mana roa ˈˈe, o te Taoïsme ïa, te Confucianisme, e te Shinto. Mea na reira te tiaturiraa e e tamau noa te ora ia pohe te tino i te manaraa i nia i te feruriraa e te mau peu faaroo a te rahiraa o te taata i taua tuhaa o te ao nei.
E te haapaoraa ati Iuda ïa, te Amuiraa faaroo Kerisetiano, e te haapaoraa Mahometa?
17. Eaha ta te mau ati Iuda i tahito ra i tiaturi no nia i te ora i muri aˈe i te pohe?
17 Eaha te manaˈo o te feia e pee ra i te mau haapaoraa ati Iuda, a te Amuiraa faaroo Kerisetiano, e Mahometa no nia i te ora i muri aˈe i te pohe? I rotopu i teie mau haapaoraa, o te faaroo ati Iuda te mea tahito roa ˈˈe. Ua haamata te aˈa o te haapaoraa ati Iuda fatata e 4 000 matahiti aˈenei i te tau o Aberahama—na mua roa ˈˈe Socrate e o Platon a haamau ai i te haapiiraa o te pohe-ore-raa o te nephe. Ua tiaturi te mau ati Iuda i tahito ra i te tia-faahou-raa o te taata pohe e eiaha i te pohe-ore-raa o te taata. (Mataio 22:31, 32; Hebera 11:19) Nafea râ ïa te haapiiraa o te pohe-ore-raa o te nephe i te ôraa i roto i te haapaoraa ati Iuda? Na te aamu ïa e pahono mai.
18, 19. Nafea te haapiiraa o te pohe-ore-raa o te nephe i te ôraa i roto i te haapaoraa ati Iuda?
18 I te matahiti 332 H.T.T., ua haru o Alesanedero Rahi i te pae Hitia o te râ no Ropu, tae noa ˈtu ia Ierusalema. A faahaere ai te feia i mono ia Alesanedero i ta ˈna tabula faariroraa i te mau fenua ei fenua Heleni i mua, ua tupu maira te hoê anoiraa o na peu tumu e piti—te Heleni e te ati Iuda. I muri iho, ua farii aˈera te mau ati Iuda i te manaˈo Heleni, e ua riro mai vetahi ei philosopho.
19 O Philon no Alesanederia, no te senekele matamua o to tatou tau, te hoê o taua mau philosopho ati Iuda ra. E faatura rahi to ˈna ia Platon e ua tutava oia i te faataa i te haapaoraa ati Iuda na roto i te mau parau philosopho Heleni, ma te faaineine i te eˈa na te feia feruri ati Iuda no muri iho. Ua ohipa atoa te manaˈo Heleni i nia i te Talmud, te mau tatararaa papaihia no nia i te mau ture parau vaha a te mau rabi. “E tiaturi na te mau rabi o te Talmud,” ta te hoê ïa buka parau paari (Encyclopaedia Judaica) e parau ra, “e e tamau noa te nephe i te ora i muri aˈe i te pohe.” I muri aˈe, ua tae roa te buka ati Iuda no nia i te mau peu taa ê, mai te Kabbale, i te haapii i te fa-faahou-raa i roto i te tino ê. No reira, na roto atu i te haapiiraa philosopho Heleni, ua ô atu te manaˈo no nia i te pohe-ore-raa o te nephe i roto i te haapaoraa ati Iuda. Eaha te nehenehe e parau no nia i te ôraa ˈtu teie haapiiraa i roto i te Amuiraa faaroo Kerisetiano?
20, 21. (a) Eaha te tiaraa o te mau Kerisetiano matamua no nia i te haapiiraa philosopho a Platon, aore ra Heleni? (b) Nafea te mau manaˈo o Platon e te mau haapiiraa Kerisetiano i te anoiraa?
20 Ua haamata te Kerisetianoraa mau na roto ia Iesu Mesia. No nia ia Iesu, ua papai o Miguel de Unamuno, i faahiti-aˈena-hia e: “E tiaturi oia i te tia-faahou-raa o te tino, ia au i te feruriraa ati Iuda, eiaha râ i te pohe-ore-raa o te nephe, ia au i te feruriraa [Heleni] o Platon.” Teie ta ˈna parau hopea: “Te pohe-ore-raa o te nephe . . . e haapiiraa philosopho tumu ïa a te etene.” Ia au i teie manaˈo, te taa ra ia tatou no te aha te aposetolo Paulo i faaara uˈana ˈi i te mau Kerisetiano o te senekele matamua ia ara i “te parau paari e te haavare faufaa ore a te hoê taata ˈtu, i te parau tutuu a te taata nei, mai te [“mau mea,” MN] rii a teie nei ao ra, aore i au i ta te Mesia ra.”—Kolosa 2:8.
21 Afea e nafea teie ‘haapiiraa philosopho tumu a te etene’ i ô atu ai i roto i te Amuiraa faaroo Kerisetiano? Te haapapu ra te hoê buka parau paari (New Encyclopædia Britannica) e: “Mai te afaraa o te senekele 2 AD, ua haamata aˈera te tahi mau Kerisetiano i matau rii i te haapiiraa philosopho Heleni, i te hinaaro i te faaite i to ratou faaroo na roto i te mau parau philosopho, no to ratou iho oaoa i te pae feruriraa e no te faataui atoa i te mau etene i noaa i te ite. Te haapiiraa philosopho i au maitai aˈe ia ratou, o te haapiiraa ïa a Platon.” Na toopiti philosopho matamua tei ohipa maite i nia i te mau haapiiraa tumu a te Amuiraa faaroo Kerisetiano, o Origène ïa no Alesanederia e o Augustin no Hippone. Ua ohipa roa te mau manaˈo o Platon i nia ia raua toopiti e na raua i faaô i taua mau manaˈo ra i roto i te mau haapiiraa Kerisetiano.
22. Nafea te haapiiraa o te pohe-ore-raa o te nephe i te vai-noa-raa i roto i te haapaoraa Mahometa?
22 Noa ˈtu e mea na roto i te ohiparaa a Platon i tupu ai te manaˈo o te pohe-ore-raa o te nephe i roto i te haapaoraa ati Iuda e te Amuiraa faaroo Kerisetiano, ua haamauhia te reira i roto i te haapaoraa Mahometa mai to ˈna haamataraa mai. Te haapii ra te Coran, te buka moˈa a te haapaoraa Mahometa, e e nephe to te taata o te tamau noa i te ora i muri aˈe i te pohe. E faahiti atoa oia e te fa hopea o te nephe, o te oraraa ïa i roto i te hoê paradaiso i nia i te raˈi anei aore ra te faautuaraa i roto i te hoê po auahi ura. Aita râ e parauhia ra e aita te feia ite Arabia i tamata i te anoi i te mau haapiiraa Mahometa e te haapiiraa philosopho Heleni. Inaha, ua raeahia te ao Arabia i roto i te tahi faito e te ohipa a Aristote. Teie râ, te vai noa ra te tiaturiraa a te haapaoraa Mahometa no nia i te pohe-ore-raa o te nephe.
23. Eaha te mau uiraa puai no nia i te ora i muri aˈe i te pohe e hiˈopoahia i roto i te tumu parau i muri nei?
23 Papu maitai, ua haamau te mau haapaoraa e ati aˈe te ao nei i te hoê anairaa tafifi o te mau tiaturiraa no nia i te Ao i muri aˈe i te pohe, i niuhia i nia i te haapiiraa e mea pohe ore te nephe. E ua raea, ua faatere e ua faatîtî atoa taua mau tiaturiraa ra tau miria taata. I mua i teie mau mea atoa, e turaihia tatou ia ui e: E nehenehe anei e ite mai i te parau mau no nia i te tupu ia pohe tatou? Te vai ra anei te ora i muri aˈe i te pohe? Eaha te manaˈo o te Bibilia? E tuatapapa mai tatou i te reira i roto i te tumu parau i muri nei.
[Nota i raro i te api]
a O El-Amarna, o te hoê ïa haapueraa huˈahuˈa o te oire ra Akhetaton i Aiphiti, i parauhia e ua patuhia i te senekele 14 H.T.T.
E nehenehe anei outou e faataa?
◻ Eaha te tumu parau matauhia i roto i te mau tiaturiraa no nia i te ora i muri aˈe i te pohe a te rahiraa o te mau haapaoraa?
◻ Nafea te aamu e te Bibilia e faaite ai e o Babulonia te pu no te haapiiraa o te pohe-ore-raa o te nephe?
◻ Nafea te tiaturiraa Babulonia i te hoê nephe pohe ore i te ohiparaa i nia i te mau haapaoraa no Hitia o te râ?
◻ Nafea te haapiiraa o te pohe-ore-raa o te nephe i te ôraa i roto i te haapaoraa ati Iuda, te Amuiraa faaroo Kerisetia-no, e te haapaoraa Mahometa?
[Hohoˈa i te api 12, 13]
Na roto i te haruraa a Alesanedero Rahi, ua anoi te mau hiroa tumu Heleni e ati Iuda
Ua tamata o Augustin i te anoi i te haapiiraa philosopho a Platon e te Kerisetianoraa
[Faaiteraa i te tumu]
Alesanedero: Musei Capitolini, Roma; Augustin: From the book Great Men and Famous Women