Te ora i muri aˈe i te pohe—Eaha ta te Bibilia e parau ra?

“E repo hoi oe, e e hoˈi faahou atu â oe i te repo.”—GENESE 3:19.

1, 2. (a) Eaha te mau manaˈo taa ê e vai ra no nia i te Ao i muri aˈe i te pohe? (b) Eaha te tia ia tatou ia hiˈopoa no te faataa eaha ta te Bibilia e haapii ra no nia i te nephe?

“EITA te haapiiraa tumu ore o te haamauiuiraa mure ore e tû e te tiaturiraa i te here o te Atua no te mau mea ta ˈna i poiete. . . . Te tiaturiraa i te faautuaraa mure ore o te nephe no te mau hape o na matahiti rii, ma te ore e horoa ˈtu i te hoê ravea faatitiaifaroraa, e faaûraa ïa i te mau titauraa atoa o te maramarama,” o ta te philosopho Hindu o Nikhilananda ïa i parau.

² Mai ia Nikhilananda, e rave rahi taata i teie mahana aita e afaro nei e teie haapiiraa no nia i te haamauiuiraa mure ore. Hoê â tupuraa no vetahi atu â o te fifihia ra i te taa maite i te mau tiaturiraa mai te tapaeraa i te Nirvana e te tahoêraa ˈtu i te natura. Tae noa ˈtu i rotopu i te feia e parau ra e ua niuhia ta ratou mau tiaturiraa i nia i te Bibilia, mea taa ê te mau manaˈo no nia i te huru mau o te nephe e eaha te tupu i nia i te reira ia pohe tatou. Eaha mau râ ta te Bibilia e haapii ra no nia i te nephe? No te ite mai i te reira, e titauhia ia hiˈopoa tatou i te mau auraa o te mau parau Hebera e Heleni tei hurihia na roto i te parau ra “nephe” i roto i te Bibilia.

Te nephe ia au i te Bibilia

3. (a) Eaha te parau i hurihia na roto i te parau ra “nephe” i roto i te mau Papai Hebera, e eaha te auraa tumu o taua parau ra? (b) Nafea te Genese 2:7 e haapapu ai e e nehenehe te parau ra “nephe” e au i te taata taatoa?

³ Te parau Hebera i hurihia na roto i te parau ra “nephe,” o neʹphesh ïa, e e itehia te reira e 754 taime i roto i te mau Papai Hebera. Eaha te auraa o te parau ra neʹphesh? Ia au i Te titionare o te Bibilia e te haapaoraa (Beretane), e “au pinepine [te reira] i te mea ora taatoa, i te taata taatoa.” Ta te faataaraa ïa a te Bibilia no nia i te nephe e haapapu ra i roto i te Genese 2:7: “A hamani ai te Atua ra o Iehova i te taata i te repo fenua nei, ua haapuai ihora oia i te aho ora i roto i tana apoo ihu ra, riro aˈera te taata ei [“nephe,” MN] ora.” A tapao e ua “riro” te taata matamua ei nephe. E tapao faaite ïa aita to Adamu e nephe; e nephe oia iho—mai te hoê taata e riro mai ei taote, e taote ïa. No reira, te faataa ra te parau ra “nephe” i ǒ nei i te taata taatoa.

4. Eaha te parau i hurihia na roto i te parau ra “nephe” i roto i te mau Papai Heleni Kerisetiano, e eaha te auraa tumu o taua parau ra?

⁴ Te vai ra te parau i hurihia na roto i te parau ra “nephe” (psy·kheʹ) hau atu i te hoê hanere taime i roto i te mau Papai Heleni Kerisetiano. Mai te parau ra neʹphesh, e pinepine teie parau i te au i te taata taatoa. Ei hiˈoraa, a hiˈo na i te mau pereota i muri nei: “Ua horuhoru roa [“to ˈu nephe,” MN].” (Ioane 12:27) “E roohia ihora [“te mau nephe,” MN] atoa e te mǎtaˈu.” (Ohipa 2:43) “Ia auraro maite te [“nephe,” MN] atoa i te feia mana toroa ra.” (Roma 13:1) “E haamahanahana ˈtu i te [“mau nephe i hepohepo,” MN].” (Tesalonia 1, 5:14) “I ora ˈi e toofanu pue taata i te moana, oia hoi na [“nephe,” MN] toovau ra.” (Petero 1, 3:20) No reira, e au maite te parau ra psy·kheʹ, mai te parau ra neʹphesh atoa, i te taata taatoa. Ia au i te taata ite ra o Nigel Turner, “e au [teie parau] i te huru iho o te taata, te taata iho, te tino materia ma te rûaḥ [varua] o te Atua i haapuaihia i roto. . . . E haapapu-noa-hia e o te taata taatoa.”

5. E nephe anei te mau animala? A faataa na.

⁵ Te vahi anaanatae i roto i te Bibilia, e au te parau ra “nephe” eiaha noa i te taata i te animala atoa râ. Ei hiˈoraa, ia faatia oia i te poieteraa o te mau mea ora o te moana, te parau ra te Genese 1:20 e ua faaue aˈera te Atua e: “Ia rahi te [“mau nephe,” MN] ora nee haere i raro i te moana.” E i te mahana poieteraa i muri aˈe, ua parau te Atua e: “Ia fanau mai te fenua nei i te mau [“nephe,” MN] ora ma to ratou ra huru, te mau puaa, te mau mea e nee haere, e te mau manu avae maha o te fenua ra, ma to ratou ra huru.”—Genese 1:24; a faaau e te Numera 31:28.

6. Eaha te nehenehe e parau no nia i ta te Bibilia faaohiparaa i te parau ra “nephe”?

⁶ No reira, e au te parau ra “nephe” mai tei faaohipahia i roto i te Bibilia, i te hoê taata aore ra te hoê animala aore ra i te ora e fanaˈohia e te hoê taata aore ra te hoê animala. (A hiˈo i te tumu parau tarenihia i nia nei.) Mea ohie roa te faataaraa a te Bibilia no nia i te nephe, mea tano noa, e aita i faateimahahia e te mau haapiiraa philosopho e te mau tiaturiraa niu ore tafifi a te taata. Teie ïa te uiraa ru e tia ia pahonohia, Ia au i te Bibilia, eaha te tupu i nia i te nephe ia pohe te taata?

Ua moe te hiroa o tei pohe

7, 8. (a) Eaha ta te mau Papai e faaite ra no nia i te huru o te feia pohe? (b) A horoa na i te mau hiˈoraa no roto mai i te Bibilia e faaite ra e e nehenehe te nephe e pohe.

⁷ Mea maramarama maitai te huru o tei pohe i roto i te Koheleta 9:5, 10, te taio nei tatou e: “Aita te feia i pohe e ite ra i te hoê aˈe mea . . . Aore e imiraa, aore e opuaraa, aore e ite, aore e paari, i roto i te apoo.” (Moffatt) No reira, te pohe, o te hoê ïa vairaa ma te ora ore. Ua parau te papai salamo e ia pohe te hoê taata, ‘e hoˈi oia i to ˈna ra repo; mou roa ˈtura ta ˈna i opua i taua mahana ra.’ (Salamo 146:4) Inaha, ua moe te hiroa o tei pohe, aita ratou e ohipa ra.

⁸ Ia faautua oia ia Adamu, ua parau atu te Atua e: “E repo hoi oe, e e hoˈi faahou atu â oe i te repo.” (Genese 3:19) Hou te Atua a hamani ai ia ˈna i te repo fenua e a horoa ˈi i te ora na ˈna, aita Adamu e vai ra. Ia pohe oia, hoˈi atura o Adamu i taua huru ra. Ta ˈna utua, o te pohe ïa—eiaha râ te faahaereraa i roto i te hoê basileia ê atu. Eaha ïa tei tupu i nia i to ˈna nephe? I te mea e i roto i te Bibilia, e au pinepine noa te parau ra “nephe” i te hoê taata, ia parau tatou e ua pohe Adamu, te parau ra ïa tatou e ua pohe te nephe ra o Adamu te iˈoa. Peneiaˈe mea huru ê rii teie parau i te hoê taata e tiaturi i te pohe-ore-raa o te nephe. Teie râ, te parau ra te Bibilia e: “O [“te nephe,” MN] tei rave i te hara ra, o te pohe ïa.” (Ezekiela 18:4) Te faahiti ra te Levitiko 21:1 i “te [“nephe,” MN] pohe” (te hoê “tino pohe,” Bible de Jérusalem). E ua faauehia te mau Nazira eiaha e haafatata ˈtu “i te hoê [“nephe,” MN] pohe” (“te hoê tino pohe,” Lamsa).—Numera 6:6.

9. Eaha ta te Bibilia e hinaaro ra e parau ia parau oia e ‘a haere ai te nephe’ o Rahela “i rapae”?

⁹ Eaha râ no nia i te Genese 35:18 (MN) e faahiti ra i te ati pohe o Rahela, tei tupu a fanau ai oia i te pitiraa o ta ˈna tamaiti? Te taio nei tatou e: “A haere ai to ˈna nephe i rapae (no te mea ua pohe oia) mairi ihora oia i to ˈna iˈoa o Benioni; mairi ihora râ ta ˈna metua tane ia ˈna o Beniamina.” Te parau ra anei teie irava e e mea ora to roto ia Rahela tei reva ia pohe oia? Aita roa ˈtu. A haamanaˈo na e e nehenehe atoa te parau ra “nephe” e faaauhia i te ora ta te hoê taata e fanaˈo ra. Inaha, i roto i teie tupuraa, te nephe o Rahela, o to ˈna noa ïa “ora.” No reira te tahi mau Bibilia e huri ai i te parau ra “a haere ai to ˈna nephe i rapae” mai teie “a haere ê atu ai to ˈna ora” (Knox), “a huti ai oia i to ˈna aho hopea” (Bible de Jérusalem), e “a faarue ai to ˈna ora ia ˈna” (Bible in Basic English). Aita e faaiteraa no nia i te hoê tuhaa huru ê o Rahela tei ora mai ia pohe oia.

10. Eaha te auraa e ua “hoˈi maira” te nephe o te tamaiti a te vahine ivi i faatia-faahou-hia, i roto “ia ˈna”?

¹⁰ Hoê â atoa e te tia-faahou-raa o te tamaiti a te hoê vahine ivi, tei faatiahia i roto i Te mau arii 1, pene 17. I roto i te irava 22, te taio nei tatou e a pure ai o Elia i nia iho i te tamaiti apî, “ua faaroo maira Iehova i te pure a Elia ra; e ua hoˈi maira te [“nephe,” MN] o taua tamaiti ra ia ˈna, e ora ihora oia.” I ǒ nei faahou â, te parau ra “nephe,” o te “ora” ïa. Inaha, te taio nei tatou i roto i te hoê Bibilia (The New American Standard Bible) e: “Ua hoˈi faahou te ora o te tamarii i roto ia ˈna e ua ora faahou mai nei oia.” Oia mau, o te ora, eiaha râ te hoê mea itea-ore-hia, tei hoˈi mai i roto i te tamaiti. E au maite te reira i ta Elia i parau atu i te metua vahine o te tamaiti ra e: “Inaha, ua ora to tamaiti [te taata taatoa].”—Te mau arii 1, 17:23.

E te varua ïa?

11. No te aha te parau ra “varua” e ore ai e au i te hoê tuhaa o te hoê taata o te taa ê i te tino a ora ˈi i muri aˈe i te pohe?

¹¹ Te parau ra te Bibilia e ia pohe te hoê taata, e ‘[haere] to ˈna varua [i rapae], e hoˈi oia i to ˈna ra repo.’ (Salamo 146:4; MN) Teie anei te auraa e te reva mau nei te hoê varua i faarue i te hoê tino a ora noa ˈi i muri aˈe i te pohe o te hoê taata? Eita hoi e nehenehe no te mea te parau nei te papai salamo i muri aˈe e: “Mou roa ˈtura ta ˈna i opua i taua mahana ra” (“hope roa ˈtura to ˈna feruriraa taatoa,” The New English Bible). Eaha ˈtura ïa te varua, e nafea oia ‘e haere ai i rapae’ i te hoê taata i te taime a pohe ai oia?

12. Eaha te auraa o te mau parau Hebera e Heleni i hurihia na roto i te parau ra “varua” i roto i te Bibilia?

¹² I roto i te Bibilia, te auraa tumu o te parau i hurihia na roto i te parau ra “varua” (Hebera, ruʹach; Heleni, pneuʹma), e “aho” ïa. Inaha, no te parau “te haere nei hoi to ˈna varua i rapae,” te faaohipa nei te huriraa Bibilia a R. A. Knox i te parau “te faarue nei te aho i to ˈna tino.” (Salamo 145:4) E au râ te parau “varua” hau atu â i te hutiraa i te aho. Ei hiˈoraa, ia faataa oia i te haamouraahia te ora o te taata e o te animala i te tau o te Diluvi ra, te parau ra te Genese 7:22 (MN) e: “O te mau mea atoa te ohipa ra te aho o te puai ora [aore ra, varua; Hebera, ruʹach] i roto i ta ˈna apoo ihu, te mau mea atoa i nia i te vahi mǎrô, pohe ihora ïa.” No reira, e nehenehe te “varua” e faaauhia i te puai ora e ohipa ra i roto i te mau mea ora atoa, te taata e te animala, e o te atuatuhia na roto i te hutiraa i te aho.

13. Nafea te varua e hoˈi ai i te Atua ra ia pohe te hoê taata?

¹³ Eaha ïa te auraa ia parau te Koheleta 12:7 e ia pohe te hoê taata, “e hoˈi . . . te varua i te Atua i horoa maira”? Teie anei te auraa e te reva mau ra te varua na roto atu i te reva i pihai iho i te Atua? Aita roa ˈtu te hoê manaˈo mai teie e faahitihia ra. I te mea e o te varua te puai ora, “e hoˈi” ïa oia “i te Atua” mau ra, teie ïa te auraa, tei te Atua anaˈe te tiaturiraa o taua taata ra no te hoê ora no a muri aˈe. O te Atua anaˈe te nehenehe e faahoˈi mai i te varua, aore ra te puai ora, no te faahoˈi faahou mai i te hoê taata i te ora. (Salamo 104:30) Te opua anei ra râ te Atua i te na reira?

“E tia faahou mai â oia”

14. Eaha ta Iesu i parau e i rave no te tamahanahana i na tuahine o Lazaro i muri aˈe i te poheraa to raua tuaane?

¹⁴ I te oire rii no Betania, e 3 kilometera i te atea i te pae hitia o te râ ia Ierusalema, te oto ra Maria raua o Mareta i te pohe oioi o to raua tuaane o Lazaro. Ua oto atoa o Iesu, no te mea mea here roa na ˈna ia Lazaro e to ˈna na tuahine. Nafea Iesu e nehenehe ai e tamahanahana i na tuahine? E ere ïa na roto i te faatiaraa ˈtu ia raua i te tahi aamu tafifi, na roto râ i te faaiteraa ˈtu i te parau mau. Ua parau noa ˈtu Iesu e: “E tia faahou mai ïa to tuaane.” Haere atura Iesu i te menema ra, e faatia maira ia Lazaro—ma te faahoˈi i te ora i roto i te hoê taata i vai na i roto i te pohe a maha mahana i te maoro!—Ioane 11:18-23, 38-44.

15. Eaha te pahonoraa a Mareta i ta Iesu i parau e i rave?

¹⁵ Ua maere anei Mareta i te parau a Iesu e e “tia faahou mai” Lazaro? E au ra e aita, no te mea ua pahono atu oia e: “Ua ite au e, e tia faahou mai â oia ia tae i te tia-faahou-raa i te mahana hopea ra.” Ua tiaturi aˈena oia i te parau tǎpǔ o te tia-faahou-raa. Ua na ô atura Iesu ia ˈna e: “Tei ia ˈu te tia-faahou-raa e te ora, o te faaroo ia ˈu ra, pohe noâ oia e ora â ïa.” (Ioane 11:23-25) Te faufaaraa o te semeio o te tia-faahou-raa o Lazaro, o te haapuairaa ïa i to ˈna faaroo e te faatupuraa i te faaroo i roto ia vetahi ê. (Ioane 11:45) Eaha mau na te auraa o te parau ra “tia-faahou-raa”?

16. Eaha mau na te auraa o te parau ra “tia-faahou-raa”?

¹⁶ E huriraa te parau “tia-faahou-raa” no te parau Heleni ra a·naʹsta·sis, teie ïa te auraa mau “te hoê tia-faahou-raa mai i nia.” Ua huri te feia huri parau Hebera o te reo Heleni, i te parau a·naʹsta·sis na roto i te hoê parau oia hoi “ora-faahou-raa o tei pohe” (Hebera, techi·yathʹ ham·me·thimʹ).a Inaha, te tia-faahou-raa, o te faatiaraa mai ïa i te taata mai roto mai i te tiaraa ora ore o te pohe—te haamau-faahou-raa i te tabula ihotaata o te taata ia ohipa faahou oia.

17. (a) No te aha eita roa ˈtu te tia-faahou-raa o te taata i te mea fifi no te Atua ra o Iehova e no Iesu Mesia? (b) Eaha te fafau ta Iesu i horoa no nia i te feia e vai ra i roto i te mau menema haamanaˈoraa?

¹⁷ No te mea e mea paari hope oia e e mea maitai roa to ˈna feruriraa, mea ohie roa no te Atua ra o Iehova ia faatia faahou i te hoê taata. Te haamanaˈoraa i te tabula ihotaata o tei pohe—to ratou mau huru taata, to ratou aamu, e te mau tapao atoa o to ratou tiaraa taata—e ere ïa i te mea fifi no ˈna. (Ioba 12:13; a faaau e te Isaia 40:26.) Hau atu â, mai ta te ohipa i tupu i nia ia Lazaro e faaite ra, e hinaaro mau e e aravihi atoa to Iesu Mesia i te faatia faahou i tei pohe. (A faaau e te Luka 7:11-17; 8:40-56.) Inaha, ua parau Iesu e: “Te fatata mai nei hoi te hora e faaroo ai te feia atoa i roto i te [“mau menema haamanaˈoraa,” MN] ra i tana [to Iesu] reo, e e haere mai i rapae.” (Ioane 5:28, 29) Oia mau, ua fafau Iesu Mesia e e faatia-faahou-hia te feia atoa e vai ra i roto i te haamanaˈoraa o Iehova. Papu maitai, ia au i te Bibilia, e pohe te nephe e te ravea no te pohe, o te tia-faahou-raa ïa. Tau miria taata i ora e i pohe. O vai i rotopu ia ratou tei roto i te haamanaˈoraa o te Atua e tiai ra i te tia-faahou-raa?

18. O vai te faatia-faahou-hia?

¹⁸ E faatiahia te feia i pee i te hoê oraraa parau-tia ei tavini no Iehova. Teie râ, tau mirioni o te tahi atu mau taata tei pohe ma te ore e faaite e e auraro anei ratou i te mau ture parau-tia a te Atua. Aita ratou i ite i te mau titauraa a Iehova aore ra aita i navai te taime no te faatupu i te mau tauiraa i titauhia. Tei roto atoa ratou i te haamanaˈoraa o te Atua e no reira e faatiahia ratou, no te mea te fafau ra te Bibilia e: “E tia-faahou-raa to tei pohe, te feia parau-tia e te feia parau-tia ore.”—Ohipa 24:15.

19. (a) Eaha te orama ta te aposetolo Ioane i noaa no nia i te tia-faahou-raa? (b) Eaha te ‘hurihia i roto i te roto auahi,’ e eaha te auraa o taua parau ra?

¹⁹ Ua ite te aposetolo Ioane i te hoê orama faahoruhoru no nia i te feia i faatiahia mai e tia noa ra i mua i te terono o te Atua. A faataa ˈi oia i te reira, ua papai oia e: “E ua tuu maira te miti i te feia i pohe i roto ia ˈna ra, e ua tuu maira te [pohe] e hade i te feia i pohe i roto ia raua ra, e haavahia ihora ratou atoa i ta ratou mau ohipa. E hurihia ˈtura te [pohe] e hade i roto i te roto auahi. O te piti teie o te pohe [te roto auahi].” (Apokalupo 20:12-14; MN) A feruri na eaha te auraa o te reira! E tuuhia mai te feia pohe atoa e vai ra i roto i te haamanaˈoraa o te Atua i rapae i te Hade, aore ra Sheol, te menema o te huitaata. (Salamo 16:10; Ohipa 2:31) I reira “te pohe e hade” e hurihia ˈi i roto i tei parauhia “te roto auahi,” o te faahohoˈa i te haamou-roa-raa. E ore roa te menema o te huitaata.

Te tiaturiraa hoê roa!

20. E faatia-faahou-hia te mau mirioni taata i pohe i roto i teihea huru vahi?

²⁰ Ia faatia-faahou-hia te mau mirioni taata, eita ratou e faahoˈi-faahou-hia mai i te ora i nia i te hoê fenua aita e taata faahou. (Isaia 45:18) E ara mai ratou i roto i te hoê vahi i faanehenehe-maitai-hia e e ite mai ratou e ua faaineinehia te mau nohoraa, te ahu, e te maa e rave rahi na ratou. (Salamo 67:6; 72:16; Isaia 65:21, 22) Na vai e rave i teie mau faaineineraa atoa? Papu maitai, e titauhia ïa ia ora te taata i roto i te ao apî hou a haamata ˈi te tia-faahou-raa i nia i te fenua. O vai râ hoi?

21, 22. Eaha te tiaturiraa hoê roa e vai ra i mua i te feia e ora nei i teie “anotau hopea”?

²¹ Te faaite ra te tupuraa o te mau parau tohu e te ora nei tatou i te “anotau hopea” o te faanahoraa o te mau mea.b (Timoteo 2, 3:1) Fatata roa i teie nei, e faaô mai te Atua ra o Iehova i roto i te mau ohipa a te taata no te faaore i te ino i nia i te fenua. (Salamo 37:10, 11; Maseli 2:21, 22) I te reira taime, eaha te tupu mai i nia i te feia e tavini ra i te Atua ma te haapao maitai?

²² Eita Iehova e haamou i te feia parau-tia e te feia ino atoa. (Salamo 145:20) Aita roa ˈtu oia i na reira aˈenei, e eita oia e na reira ia tamâ oia i te fenua i te mau ino atoa. (A faaau e te Genese 18:22, 23, 26.) Inaha, te faahiti ra te buka hopea o te Bibilia no nia i te “feia rahi roa, e ore roa e pau ia taio, no te mau fenua atoa, e te mau opu atoa, e te mau nunaa atoa, e te mau reo atoa,” e haere maira mai roto mai i “te ati rahi ra.” (Apokalupo 7:9-14) Oia mau, e rave rahi taata e ora mai mai roto mai i te ati rahi i reira te ao ino e vai nei e hope ai, e e ô atu ratou i roto i te ao apî a te Atua. I reira te huitaata faaroo e nehenehe ai e fanaˈo maite i te faanahoraa faahiahia a te Atua no te faatiamâ i te taata i te hara e te pohe. (Apokalupo 22:1, 2) No reira, e ore roa te “feia rahi roa” e farerei i te pohe. Auê ïa tiaturiraa hoê roa e!

E ora aita e pohe

23, 24. Eaha te tia ia outou ia rave no te fanaˈo i te ora aita e pohe i roto i te Paradaiso i nia i te fenua?

²³ E nehenehe anei tatou e tiaturi i teie tiaturiraa maere mau? Oia mau! Ua faaite o Iesu Mesia iho e te vai ra te hoê taime e ora noa te taata ma te ore roa e pohe faahou. Hou rii oia a faatia faahou ai i to ˈna hoa o Lazaro, ua parau Iesu ia Mareta e: “E te taata ora atoa nei e faaroo ia ˈu ra, e ore roa ˈtu ïa e pohe.”—Ioane 11:26.

²⁴ E hinaaro anei outou e ora e a muri noa ˈtu i roto i te Paradaiso i nia i te fenua? Te ru ra anei outou i te ite faahou i to outou feia here? “Te mou nei hoi teie nei ao, e ta to te ao atoa e hinaaro nei; o tei haapao râ i to te Atua ra hinaaro, e tia ïa i te oraraa e a muri noa ˈtu,” ta te aposetolo Ioane ïa e parau ra. (Ioane 1, 2:17) Teie te taime no te haapii eaha te hinaaro o te Atua e no te faaoti e ora ia au i te reira. I reira noa ïa outou, e tau mirioni taata ê atu e rave aˈena ra i te hinaaro o te Atua, e nehenehe ai e ora e a muri noa ˈtu i roto i te Paradaiso i nia i te fenua.

[Nota i raro i te api]

Te haamanaˈo ra anei outou?

◻ Eaha te auraa tumu o te mau parau na roto i na reo matamua i hurihia e “nephe”?

◻ Eaha te tupu ia pohe te nephe?

◻ Ia au i te Bibilia, eaha te ravea no te pohe?

◻ Eaha te tiaturiraa hoê roa i mua nei no te feia haapao maitai i teie mahana?

[Tumu parau tarenihia i te api 15]

Te “nephe” ei ora o te hoê mea ora

I te tahi taime, e au te parau ra “nephe” i te ora e fanaˈohia e te hoê taata aore ra te hoê animala. Eita râ te reira e faaore i te faataaraa a te Bibilia i te nephe ei taata aore ra ei animala. Ei faahohoˈaraa: E parau tatou e te ora ra te hoê taata, te auraa ra e e taata ora ïa oia. E parau atoa paha tatou e te fanaˈo ra oia i te ora. Na reira atoa, ua riro te hoê taata ora ei nephe. Inaha, te ora ra oia, e nehenehe te “nephe” e parauhia mai te hoê mea ta ˈna e fanaˈo ra.

Ei hiˈoraa, ua parau te Atua ia Mose e: “Ua hope hoi te mau taata i titau mai [“i to oe nephe,” MN] e taparahi ra i te pohe.” Papu maitai, te imi ra te mau enemi o Mose e taparahi ia ˈna. (Exodo 4:19; a faaau e te Iosua 9:24; Maseli 12:10.) Ua faaohipa Iesu i taua parau ra mai teie a parau ai e: “[Ua haere mai] te Tamaiti a te taata nei . . . [e] horoa i to ˈna [nephe] ei hoo no te taata e rave rahi.” (Mataio 20:28; MN; a faaau e te Mt 10:28.) I roto i te mau tupuraa atoa, te auraa o te parau ra “nephe,” oia ïa te “ora o te hoê mea ora.”

[Hohoˈa i te api 15]

E mau nephe anaˈe ratou pauroa

[Faaiteraa i te tumu]

Colibri: U.S. Fish and Wildlife Service, Washington, D.C./Dean Biggins

[Hohoˈa i te api 17]

Ua faaite Iesu e o te tia-faahou-raa te ravea no te pohe

[Hohoˈa i te api 18]

“E te taata ora atoa nei e faaroo ia ˈu ra, e ore roa ˈtu ïa e pohe.”—Ioane 11:26