Te pohe-ore-raa o te nephe—Te faraa mai teie haapiiraa
“Aore e tumu parau i taaihia i to ˈna feruriraa i haapeapea hau atu â i te taata i te tumu parau no nia i to ˈna huru i muri aˈe i te pohe.”—“ENCYCLOPÆDIA OF RELIGION AND ETHICS.”
UA PARIHIA te hoê taata ite e orometua haapii 70 matahiti i te parau-tia ore e te haaviivii i te feruriraa o te mau taurearea na roto i ta ˈna haapiiraa. Noa ˈtu â e ua vauvau oia i te hoê oreroraa parururaa aravihi i ta ˈna haavaraa, ua faaoti te hoê pǔpǔ tia haava faatia pae e ua hape oia e ua faautua aˈera ia ˈna i te utua pohe. Tau hora noa na mua ˈˈe a haapohehia ˈi oia, ua horoa te orometua haapii paari na te mau pǐpǐ e haaati ra ia ˈna, i te hoê anairaa parau haapapuraa e mea pohe ore te nephe e eiaha te pohe ia mǎtaˈuhia.
2 E ere te taata i haavahia i te hoê taata ê maori râ o Socrate, philosopho Heleni tuiroo no te senekele 5 H.T.T.a Ua faatia ta ˈna pǐpǐ o Platon i teie mau tupuraa i roto i te mau buka ra Apology e Phaedo. Ua parauhia e o Socrate e o Platon tei roto i te feia matamua i faahiti i te manaˈo e mea pohe ore te nephe. E ere râ raua te feia matamua i haamau i teie haapiiraa.
3 Mai ta tatou e ite mai, no mua roa ˈtu â te haamataraa mai te manaˈo o te pohe-ore-raa o te taata. Ua haamaitai noa râ o Socrate e o Platon i te reira e ua faariro atu ei philosophia, ia farii-maite-hia e te mau pǔpǔ feia ite no taua tau ra e no to muri mai.
Mai ia Pythagore e tae roa ˈtu i te mau pyramide
4 Te tiaturi atoa ra to Heleni no mua ˈtu ia Socrate e o Platon e e ora noâ te nephe i muri aˈe i te pohe. Ua haapapu o Pythagore, te hoê taata tuatapapa i te matematika tuiroo Heleni no te senekele 6 H.T.T., e mea pohe ore te nephe e e nehenehe oia e tauiui i te tino. Na mua ˈˈe ia ˈna, ua manaˈo o Thalès no te oire no Mileto, o tei manaˈohia e oia te philosopho Heleni matamua, e te vai ra te hoê nephe pohe ore eiaha noa i roto i te taata, te animala, e te tiare, i roto atoa râ i te mau taoˈa mai te mau auri ovahine, i te mea e e nehenehe te reira e huti i te auri. Te parau ra to Heleni i tahito ra e e taitaihia te mau nephe o tei pohe na nia i te anavai ra Styx e tae atu ai i te hoê basileia rahi i raro i te fenua piihia te ao o tei pohe. I reira, e faaoti te mau haava e e haamauiuihia anei te mau nephe i roto i te hoê fare tapearaa patu teitei aore ra e fanaˈo i te oaoa rahi i roto i te Élysée.
5 I Irania aore ra Peresia, i te pae hitia o te râ, ua fa mai te hoê peropheta o Zoroastre te iˈoa i te senekele 7 H.T.T. Ua haamau oia i te hoê huru haamoriraa i matauhia i muri mai ei Zoroastrisme. O te haapaoraa ïa a te Hau emepera Peresia, oia te hau rahi roa ˈˈe o te ao hou te hau Heleni a riro mai ai ei puai rahi. Te parau ra te mau papai a te Zoroastrisme e: “I roto i te Pohe ore te nephe o te Feia parau-tia e vai noa ˈi i roto i te Oaoa, e haamauiuihia râ te nephe o te Feia haavare. E na Ahura Mazda [oia hoi “te hoê atua paari”] teie mau Ture i faaue na roto i To ˈna mana arii.”
6 Tei roto atoa te haapiiraa o te pohe-ore-raa o te nephe i te haapaoraa Irania na mua ˈtu i te Zoroastrisme. Ei hiˈoraa, e aupuru te mau opu fetii no Irania i tahito ra i te mau nephe o tei pohe, na roto i te pûpûraa na ratou i te maa e te ahu e hinaarohia e ratou i roto i te ao i raro i te fenua.
7 Te tiaturiraa i te ora i muri aˈe i te pohe, e mea faufaa roa ïa i roto i te haapaoraa a to Aiphiti. E parau na to Aiphiti e e haavahia te nephe o te taata pohe e Osiris, te atua rahi o te ao i raro i te fenua. Ei hiˈoraa, te faaite ra te hoê parau i papaihia i nia i te gima, i manaˈohia e no te senekele 14 H.T.T., ia Anubis, te atua no tei pohe, o te aratai ra i te nephe o te papai parau ra o Hunefer i mua ia Osiris. I nia i te hoê faito, e tuuhia te mafatu o te papai parau, o te faahohoˈa i to ˈna haava manaˈo, i te hoê pae, e te huruhuru manu ta te ruahine no te parau mau e te parau-tia e tamau i nia i to ˈna upoo, i te tahi pae. Na Thoth, te tahi atu â atua, e papai i te faito e roaa mai. No te mea aita te mafatu o Hunefer i teiaha i te hara, mea mâmâ aˈe oia i te huruhuru manu, e e fariihia o Hunefer ia haere i roto i te basileia o Osiris e ia roaa ia ˈna te pohe ore. Te faaite atoa ra te gima i te hoê mea ora mehameha ovahine e tia noa ra i pihai iho i te faito e te ineine i te haapau i tei pohe ia ore to ˈna mafatu ia manuïa i roto i te tamataraa. E rave atoa na to Aiphiti i te faanoˈanoˈaraa i te mau tino pohe e e vaiiho ratou i te mau tino o te mau pharao i roto i te mau pyramide rarahi, no te mea e tiaturi ratou e ua taaihia te oraraa mai o te nephe i te vai-maitai-raa o te tino.
8 Inaha e rau te mau nunaa i tahito ra i mau i te hoê haapiiraa—te pohe-ore-raa o te nephe. No roto anei teie haapiiraa i te hoê â pu i te noaaraa mai ia ratou?
Te vahi no reira mai
9 “I roto i te ao i tahito ra,” ta te buka ra Te haapaoraa i Babulonia e i Asura (Beretane) ïa i parau, “e itehia te ohiparaa a te haapaoraa Babulonia i nia i to Aiphiti, to Peresia, e to Heleni.” Te faataa faahou ra teie buka e: “Ia hiˈohia te mau taairaa matamua i rotopu i to Aiphiti e to Babulonia, ia au i tei faaitehia e te pǎpǎ El-Amarna, e rave rahi mau â taime to te mau manaˈo e mau peu no Babulonia ôraa ˈtu i roto i te haamoriraa a to Aiphiti. I Peresia, te itehia ra ma te hape ore e mea rahi te mau tiaturiraa a to Babulonia i roto i te haamoriraa a Mithra . . . E rave rahi mau haapiiraa ati Sema i anoihia i roto i te pueraa aai no Heleni i tahito ra e i roto atoa i te haamoriraa a to Heleni, ta te feia ite ïa e farii maite nei i teie nei e, mai te mea ra eita e nehenehe e mârôhia. Te rahiraa o teie mau haapiiraa ati Sema, e mau haapiiraa Babulonia ïa.”b
10 Aita anei râ te manaˈo o to Babulonia no nia i te tupu i muri aˈe i te pohe e taa ê rahi ra i to Aiphiti, to Peresia, e to Heleni? A rave na, ei hiˈoraa, i te Aamu o Gilgamesh no Babulonia. E tere maimiraa i te pohe ore to te aito e paari noa ˈtura, o Gilgamesh, tei haapeapea rahi no nia i te parau no te pohe, aita râ oia i manuïa. Ua faaitoito te hoê potii hoo uaina ia ˈna, ta ˈna i farerei i roto i to ˈna tere, ia fanaˈo maite i to ˈna oraraa nei, no te mea eita oia e ite mai i te ora mure ore ta ˈna e imi ra. Te poroi o teie aamu taatoa, eita ïa e nehenehe e ape i te pohe e e moemoeâ noa te tiaturiraa i te pohe-ore-raa. Te faaite ra anei te reira e eita to Babulonia e tiaturi i te Ao i muri aˈe i te pohe?
11 Ua papai te orometua haapii ra o Morris Jastrow, no te Fare haapiiraa tuatoru no Pennsylvanie, Hau amui no Marite, e: “Aita te taata, aita atoa te mau faatere haapaoraa i manaˈo aˈenei [i Babulonia] e nehenehe te hoê mea ora e mou roa. [I roto i to ratou feruriraa], ua riro te pohe ei faahaereraa ˈtu i roto i te tahi atu huru oraraa, e te farii-ore-raa i te pohe-ore-raa, e haapapu noa ˈtu â ïa e eita e nehenehe e ape i te tauiraa e faatupuhia e te pohe i roto i te oraraa.” Oia mau, e tiaturi atoa na to Babulonia e e tamau noa te ora i muri aˈe i te pohe na roto i te hoê huru aore ra i te tahi. E faaite na ratou i te reira na roto i te hunaraa i te mau tauihaa e te taata pohe ia faaohipa ratou i roto i te Ao i muri aˈe i te pohe.
12 Papu maitai, e nehenehe e faahoˈi roa i te haapiiraa o te pohe-ore-raa o te nephe i Babulonia i tahito ra. Ia au i te Bibilia, te hoê buka tano mau i te pae aamu, na Nimeroda, te hina a Noa,c i faatia i te oire no Babela aore ra Babulonia. I muri aˈe i te Diluvi rahi i te tau o Noa, hoê noa reo e hoê noa haapaoraa. Na roto i te faatiaraa i te oire e te hoê pare i ǒ, ua haamata aˈera o Nimeroda i te hoê haapaoraa apî. Te faataa ra te Bibilia e, i muri aˈe i te faahuru-ê-raahia te reo i Babela, ua purara haere aˈera te feia manuïa ore i patu i te pare e ua rave atura ratou i te mau haamataraa apî ma te hopoi i ta ratou haapaoraa na muri ia ratou. (Genese 10:6-10; 11:4-9) Mai reira mai to te mau haapiiraa a te haapaoraa Babulonia parareraa na te ao atoa nei.
13 Ia au i te tutuu, e pohe ino mau to Nimeroda. I muri aˈe i to ˈna pohe, e hinaaro iho â ïa to Babulonia e faatura rahi ia ˈna ei taata faatia, ei taata patu e ei arii matamua o to ratou oire. I te mea e, te hiˈohia ra te atua ra o Mardouk (Merodaka) ei faatia ia Babulonia, te manaˈo ra te tahi feia ite e e faahohoˈaraa o Mardouk no Nimeroda i faarirohia ei atua. Mai te peu e te reira iho â, ua parare ïa te manaˈo e e ora mai te nephe o te taata i muri aˈe i te pohe, fatata i te tau a pohe ai o Nimeroda. Noa ˈtu râ, te faaite ra te mau api o te aamu e, i muri aˈe i te Diluvi, o Babela aore ra Babulonia te pu no te haapiiraa o te pohe-ore-raa o te nephe.
14 Nafea ïa teie haapiiraa i te riroraa mai ei haapiiraa tumu a te rahiraa o te mau haapaoraa o to tatou tau? E tuatapapa te pene i muri nei i to ˈna ôraa ˈtu i roto i te mau haapaoraa no te pae Hitia o te râ ma.
[Nota i raro i te api]
a H.T.T. oia hoi “Hou to Tatou Tau.” T.T. “o to Tatou Tau,” parau-noa-hia A.D., no Anno Domini, oia hoi “i roto i te matahiti o te Fatu.”
b O El-Amarna, o te hoê ïa haapueraa huˈahuˈa o te oire ra Akhetaton i Aiphiti, i parauhia e ua patuhia i te senekele 14 H.T.T.
c A hiˈo i te buka ra Te Bibilia—Parau na te Atua aore ra na te taata?, mau api 37-54, neneihia e te Watchtower Bible and Tract Society of New York, Inc.
[Uiraa haapiiraa]
1-3. Nafea to Socrate e to Platon faahitiraa i te manaˈo e mea pohe ore te nephe?
4. Hou ia Socrate, eaha te mau manaˈo o to Heleni no nia i te Ao i muri aˈe i te pohe?
5, 6. Eaha te manaˈo o to Peresia no nia i te nephe?
7, 8. Eaha te tiaturiraa a to Aiphiti i tahito ra no nia i te nephe o te ora mai ia pohe te tino?
9. Eaha te haapaoraa i ohipa i nia i te ao i tahito ra no Aiphiti, Peresia, e Heleni?
10, 11. Eaha te manaˈo o to Babulonia no nia i te ora i muri aˈe i te pohe?
12-14 (a) I muri aˈe i te Diluvi, teihea te pu o te haapiiraa o te pohe-ore-raa o te nephe? (b) Nafea taua haapiiraa ra i te parare-roa-raa na te ao atoa nei?
[Hohoˈa i te api 6]
Te hiˈoraa o to Aiphiti i te mau nephe i roto i te ao i raro i te fenua
[Hohoˈa i te api 7]
Ua haapapu o Socrate e mea pohe ore te nephe