Te faatia ra te feia poro i te Basileia

Pororaa ‘i te taime au e i te taime au ore’

E RAVE rahi tausani taata tei faaruru i te mau fifi rahi, i te tupuraa mai te tamaˈi i te fenua Bosnie-Herzégovine. I roto i taua taime tamataraa ra, ua rave te mau Ite no Iehova i te mau tutavaraa no te afai i te tahi tauturu e te hoê tiaturiraa i te mau taata. I muri nei, e faataahia te tahi mau parau no roto mai i te hoê rata ta te hoê Ite o tei tavini i Sarajevo no te hoê taime, i papai.

“Mea fifi roa te oraraa i ǒ nei, teie râ te farii maitai ra te mau taata i te parau mau o te Bibilia. E hiˈoraa maitai roa te mau Ite no ǒ nei i te pae o te faaoromai. I te pae materia, mea veve roa ratou, i te pae varua râ mea maitai roa ïa. Tei roto te rahiraa o te mau taurearea o te amuiraa i te taviniraa ma te taime taatoa. Te faaitoito nei teie nei itoito i te mau taata poro apî, e e ere i te mea maere ia horoa ratou e 60 hora aore ra hau atu i te avaˈe hoê no te taviniraa, mai te avaˈe matamua a haamata ˈi ratou i roto i te pororaa.

“Hau atu â i te pororaa i tera e tera fare, ua tamata atoa matou i te tahi mau ravea ê atu no te farerei i te taata. Ei hiˈoraa, e mau faahopearaa maitatai mau tei noaa ia matou i to matou opereraa i te mau papai Bibilia i roto e rave rahi mau menema o te oire.

“Ua poro-atoa-hia i roto i te mau fare maˈi. I roto i te tuhaa no te pae o te rapaauraa i te mafatu o te hoê fare maˈi no Sarajevo, ua farii te taote rahi i te A ara mai na! o te 8 no Titema 1996 e teie hoi te tumu parau ‘Maˈi mafatu—Eaha te ravea?’ Ua ani mai o ˈna i te tahi atu mau vea hau no te horoa ˈtu i te mau taote ê atu. I muri iho, ua faatiahia te mau Ite e haere e farerei i te feia maˈi o ta ˈna tuhaa. Ei faahopearaa, i roto hau rii atu i te hoê hora, ua operehia hau atu i te 100 vea i tera e tera roˈi. E rave rahi feia maˈi tei parau e, a tahi ra te mau taata e haere mai ai no te hiˈo ia ratou i te fare maˈi no te afai mai i te tauturu e te tiaturiraa.

“I te tahi atu â taime, ua poro-atoa-hia te tuhaa no te rapaauraa i te mau tamarii ma te faaohipa i te tahi mau tumu parau o te mau vea tano maitai no te mau tamarii. Ua farii atoa te taote rahi i te tahi mau buka Ta ˈu Buka Aamu Bibilia no te piha taioraa. I teie nei, e taio te mau mama i te tahi mau aamu Bibilia i ta ratou mau tamarii o ta ratou e haere maira e hiˈo i te mau mahana atoa. Ua rave-atoa-hia te tahi mau faanahoraa no te haere e farerei i teie taote i to ˈna fare.

“Te vai ra i Sarajevo e mau tausani faehau a te OTAN [Organisation du Traité de l’Atlantique Nord] no te mau nunaa e rave rahi. Ua poro-maitai-atoa-hia ratou. I te tahi mau taime, e haere matou i tera e tera pereoo tupita ma te faaohipa i te buka rairai iti Une bonne nouvelle pour toutes les nations e tae noa ˈtu te mau vea Te Pare Tiairaa e A ara mai na! na roto e rave rahi mau reo. Ua operehia hau atu i te 200 vea i roto i te mau fare a te nuu Italia. Mea maere mau, e rave rahi mau faehau Italia o tei parau e a tahi ra ratou e tauaparau ai e te mau Ite no Iehova. Mea tano maitai ïa ua farerei matou ia ratou i Sarajevo.

“I te hoê mahana, ua tapea te hoê pereoo tupita i te hiti purumu. Ua patoto vau i te opani e ta ˈu fare amarara, e ua haere mai te hoê faehau i rapae. Ua pûpû vau ia ˈna i te hoê Pare Tiairaa e teie hoi te upoo parau ‘Te mau vea o te hau—O vai ratou?’ Ua hiˈo mai teie faehau ia ˈu e ani maira, ‘E Ite no Iehova oe, e ere anei?’ I to ˈna iteraa e e Ite no Iehova vau, ua parau mai oia ia ˈu e, ‘Eita ta ˈu e nehenehe e tiaturi, tei ǒ nei atoa outou! Te vai ra anei te hoê vahi i nia i te fenua aita e Ite no Iehova?’”

Ua faaitoito te aposetolo Paulo e: “E faaite hua oe i te parau, ia onoono maite â, i [“te taime au e te taime au ore,” MN].” (Timoteo 2, 4:2) Mai to ratou mau hoa faaroo e ati aˈe i teie nei ao, te na reira ra te mau Ite no Iehova i Sarajevo, e tae noa ˈtu i tera e tera roˈi e i tera e tera pereoo tupita!