Te ôraa ˈtu te manaˈo i roto i te haapaoraa ati Iuda, te Amuiraa faaroo kerisetiano, e te haapaoraa Mahometa
“Ua riro atoa te haapaoraa ei ravea e farii ai te taata e, ia tae i te hoê mahana, e pohe iho â ratou, na roto anei i te fafau no te hoê oraraa maitai aˈe i muri mai i te hunaraa, te fanau-faahou-raa anei, aore ra toopiti atoa ra.”—GERHARD HERM, TE HOÊ PAPAI BUKA HELEMANI.
NO TE fafau i te hoê oraraa i muri aˈe i te pohe, e titau mau â te mau haapaoraa atoa i te tiaturiraa e e nephe pohe ore to te taata e mea na roto i te pohe e nehenehe ai oia e haere atu i roto i te tahi atu basileia aore ra e maue atu i roto i te tahi atu mea ora. Mai tei haapapuhia i roto i to mua ˈtu pene, e tuhaa faufaa roa te tiaturiraa i te pohe-ore-raa o te taata i roto i te mau haapaoraa no te pae Hitia o te râ ma mai te taime iho â a fariihia ˈi te reira. Eaha râ ïa no te haapaoraa ati Iuda, te Amuiraa faaroo kerisetiano, e te haapaoraa Mahometa? Nafea teie haapiiraa i te riroraa mai ei mea faufaa roa i roto i teie mau faaroo?
Te fariiraa te haapaoraa ati Iuda i te mau tiaturiraa a to Heleni
2 Ua haamata te aˈa o te haapaoraa ati Iuda fatata a 4 000 matahiti aˈenei i te tau o Aberahama. Ua haamatahia i te papai i te mau papai moˈa Hebera i te senekele 16 H.T.T. e ua faaotihia i te taime a haapapu ai o Socrate e o Platon i te haapiiraa niu ore o te pohe-ore-raa o te nephe. Ua haapii anei teie mau Papai i te pohe-ore-raa o te nephe?
3 Te pahono mai ra te Encyclopaedia Judaica e: “I muri aˈe noa i te tau o te Bibilia i haamauhia ˈi te tiaturiraa taa maitai e te papu atoa o te pohe-ore-raa o te nephe . . . tei riro mai ei hoê o te mau ofai tihi a te mau faaroo ati Iuda e kerisetiano.” Te parau atoa ra oia e: “E hiˈohia te ihotaata mai te hoê taatoaraa i te tau o te Bibilia. Inaha, aita te nephe i faataa-ê-hia i te tino.” Te tiaturi ra te mau ati Iuda matamua i te tia-faahou-raa o tei pohe, e e tia “ia faataa-ê-hia te reira i te tiaturiraa i . . . te pohe-ore-raa o te nephe,” ta taua buka parau paari ra ïa e haapapu ra.
4 Nafea ïa teie haapiiraa i te riroraa mai ei “hoê o te mau ofai tihi” o te haapaoraa ati Iuda? Te pahono mai ra te aamu. I te matahiti 332 H.T.T., ua haru o Alesanedero Rahi i te rahiraa o te mau fenua no te pae Hitia o te râ no Ropu na roto i te haruraa e au i te uira. I to ˈna taeraa ˈtu i Ierusalema, ua farii mahanahana ˈtu te mau ati Iuda ia ˈna. Ia au i te taata tuatapapa aamu no te senekele matamua o Flavius Josèphe, ua tae roa ratou i te faaite atu ia ˈna i te parau tohu i roto i te buka a Daniela, i papaihia hau atu i te 200 matahiti na mua ˈˈe, o te faataa papu ra i te mau haruraa a Alesanedero i roto i to ˈna tiaraa ‘arii no Iavana,’ aore ra Heleni. (Daniela 8:5-8, 21) Ua faahaere te feia i mono ia Alesanedero i ta ˈna tabula faariroraa i te mau fenua ei fenua Heleni, i mua, ma te haaparare maite i te reo, te mau peu tumu, e te philosophia Heleni na te mau vahi atoa o te hau emepera. Eita ïa e nehenehe e ape faahou i te anoiraa o na peu tumu e piti—te Heleni e te ati Iuda.
5 I te omuaraa o te senekele 3 H.T.T., ua haamatahia te huriraa matamua o te mau Papai Hebera na roto i te reo Heleni, o tei piihia te Septante. Mea na roto i te reira te mau Etene e rave rahi i faatura ˈi e i matau ai i te haapaoraa ati Iuda, e ua tae roa vetahi i te riro atu i taua haapaoraa ra. I te tahi aˈe pae, te haamata ra ïa te mau ati Iuda i te haamatau i te feruriraa Heleni, e ua riro mai vetahi ei mau philosopho, te hoê ïa ohipa apî roa ia ratou. O Philon no Alesanederia, no te senekele matamua o to tatou tau, te hoê o taua mau philosopho ati Iuda ra.
6 E faatura rahi to Philon ia Platon e ua tutava oia i te faataa i te haapaoraa ati Iuda na roto i te mau parau philosophia Heleni. “Na roto i te haamauraa i te hoê anoiraa taa ê o te philosophia a Platon e te haapiiraa tumu a te Bibilia,” ta te buka ra Heaven—A History ïa e parau ra, “ua faaineine o Philon i te eˈa na te feia feruri kerisetiano [e ati Iuda atoa].” Eaha to Philon tiaturiraa no nia i te nephe? Te parau râ taua buka ra e: “No ˈna, e faahoˈi te pohe i te nephe i to ˈna tiaraa matamua, hou te fanauraa. I te mea e no ǒ mai te nephe i te ao varua ra, e riro te ora i roto i te tino ei tupuraa poto noa e mea pinepine te oaoa ore.” I roto i te feia feruri ati Iuda i tiaturi na i te pohe-ore-raa o te nephe, te vai ra o Isaac Israeli, te taote ati Iuda tuiroo no te senekele 10, e o Moses Mendelssohn, te hoê philosopho ati Iuda no Helemani no te senekele 18.
7 Te hoê buka i ohipa hohonu atoa i nia i te feruriraa e te oraraa ati Iuda, o te Talmud ïa—te hoê buka i haapoto i tei parauhia te ture parau-vaha-hia, ma te mau manaˈo e te mau faataaraa no nia i taua ture ra i amuihia mai i muri aˈe, tei haaputuhia e te mau rabi mai te senekele 2 T.T. mai e tae noa ˈtu i te Anotau no Ropu. “E tiaturi te mau rabi o te Talmud,” ta te Encyclopaedia Judaica ïa e parau ra, “e e tamau noa te nephe i te ora i muri aˈe i te pohe.” Te parau atoa ra te Talmud e e haere mai tei pohe e farerei i te feia ora. “Peneiaˈe no te peeraa i te haapiiraa a Platon,” ta te Encyclopædia of Religion and Ethics ïa e parau ra, “i tiaturi ai [te mau rabi] i te vai-aˈena-raa o te nephe.”
8 I muri aˈe, ua tae roa te buka ati Iuda no nia i te mau peu taa ê, te Cabale, i te haapii i te fa-faahou-raa i roto i te tino ê. No nia i teie tiaturiraa, te na ô ra te buka ra The New Standard Jewish Encyclopedia e: “E au ra e ua haamata teie manaˈo i Inidia. . . . I roto i te Kabbale, e ite-na-mua-hia te reira i roto i te buka Bahir, e i muri aˈe, mai te Zohar e haere mai ai, ua farii-noa-hia e te feia peu taa ê, ma te riro mai ei mea faufaa roa i roto i te tiaturiraa e te mau buka a te mau Hassidim.” I Iseraela i teie mahana, mea farii-rahi-hia te fa-faahou-raa i roto i te tino ê ei haapiiraa ati Iuda.
9 No reira, ua ô atu te manaˈo no nia i te pohe-ore-raa o te nephe i roto i te haapaoraa ati Iuda na roto atu i te philosophia Heleni, e i teie mahana, ua fariihia te manaˈo e te rahiraa o te mau tuhaa o taua haapaoraa ra. Eaha te nehenehe e parau no nia i te ôraa ˈtu teie haapiiraa i roto i te Amuiraa faaroo kerisetiano?
Te fariiraa te Amuiraa faaroo kerisetiano i te mau manaˈo o Platon
10 Ua haamata te Kerisetianoraa mau na roto ia Iesu Mesia. No nia ia Iesu, ua papai o Miguel de Unamuno, te hoê taata ite Paniora tuiroo no te senekele 20, e: “E tiaturi oia i te tia-faahou-raa o te tino, ia au i te feruriraa ati Iuda, eiaha râ i te pohe-ore-raa o te nephe, ia au i te feruriraa [Heleni] o Platon. . . . E nehenehe e itehia te mau haapapuraa i roto i te mau buka tatararaa tia atoa.” Teie ta ˈna parau hopea: “Te pohe-ore-raa o te nephe . . . , e philosophia tumu ïa a te etene.”
11 Afea e nafea teie “philosophia tumu a te etene” i ô atu ai i roto i te Kerisetianoraa? Te haapapu ra te New Encyclopædia Britannica e: “Mai te afaraa o te senekele 2 AD, ua haamata aˈera te tahi mau Kerisetiano i matau rii i te philosophia Heleni, i te hinaaro i te faaite i to ratou faaroo na roto i te mau parau philosophia, no to ratou iho oaoa i te pae feruriraa e no te faataui atoa i te mau etene i noaa i te ite. Te philosophia i au maitai aˈe ia ratou, o te haapiiraa ïa a Platon.”
12 Toopiti philosopho matamua mai teie tei ohipa maite i nia i te mau haapiiraa tumu a te Amuiraa faaroo kerisetiano. Te hoê, o Origène no Alesanederia (area matahiti 185-254 T.T.), e te tahi, o Augustin no Hippo (354-430 T.T.). No nia ia raua, te parau ra te New Catholic Encyclopedia e: “Na roto noa ia Origène i te pae Hitia o te râ e te Peata ra o Augustin i te pae Tooa o te râ, te haamauraahia e e taoˈa varua te nephe e e manaˈo philosophia e au i to ˈna iho naturaraa.” I nia i teihea niu o Origène e o Augustin i haamau ai i to raua manaˈo no nia i te nephe?
13 E pǐpǐ o Origène na Clément no Alesanederia, “te Metua matamua i rave tahaa mai i te tutuu Heleni no nia i te nephe,” ta te New Catholic Encyclopedia ïa e parau ra. Papu maitai e ua ohipa maite te manaˈo o Platon no nia i te nephe, i nia ia Origène. “Ua faaô atu [o Origène] i te anairaa rahi o te mau haapiiraa no nia i te nephe, ta ˈna i rave mai ia Platon ra, i roto i te haapiiraa tumu kerisetiano,” ta te taata tuatapapa i te faaroo ra o Werner Jaeger ïa i papai i roto i te vea ra The Harvard Theological Review.
14 Te hiˈo ra te tahi mau taata no te Amuiraa faaroo kerisetiano ia Augustin mai te taata feruri rahi roa ˈˈe i tahito ra. Hou oia a riro atu ai i te “Kerisetianoraa” i te 33raa o to ˈna matahiti, mea anaanatae roa na Augustin i te philosophia e ua riro mai oia ei Néoplatoniste.a I to ˈna riroraa mai ei Kerisetiano, ua mau noa ia ˈna te manaˈo o te Néoplatonisme. “I roto i to ˈna feruriraa te anoi-maite-raahia te haapaoraa o te Faufaa Apî e te tutuu philosophia Heleni a Platon,” ta te buka ra The New Encyclopædia Britannica ïa e parau ra. Te faˈi ra te New Catholic Encyclopedia e ta Augustin “haapiiraa [no nia i te nephe], o tei riro mai ei haapiiraa tumu i te pae Tooa o te râ ma e tae roa i te hopea o te senekele 12, no roto mai ïa te rahiraa . . . i te Néoplatonisme.”
15 I te senekele 13, ua tui te roo o te mau haapiiraa a Aristote i Europa, maoti iho â râ te tano-maitai-raa i roto i te reo Latino o te mau ohipa a te feia ite Arabia tei horoa rahi i to ratou manaˈo no nia i te mau papai a Aristote. Ua putapû roa te hoê taata ite Katolika o Thomas Aquinas te iˈoa i te manaˈo o Aristote. Maoti te mau papai a Aquinas i ohipa maite ai te mau manaˈo o Aristote i nia i te haapiiraa a te ekalesia, hau atu â i to Platon. Aita râ teie ohipa i faahuru ê noa ˈtu i te haapiiraa no nia i te pohe-ore-raa o te nephe.
16 Te haapii ra o Aristote e mea taai-maite-hia te nephe i te tino e e ore oia e tamau noa i te ora i muri aˈe i te pohe e, mai te peu e te vai ra te hoê taoˈa mure ore i roto i te taata, e puai feruriraa ïa ite-ore-hia i te mata, aore to ˈna e ihotaata. Aita teie hiˈoraa i nia i te nephe i tuati i te tiaturiraa a te ekalesia e e ora mai te nephe o te taata ia pohe oia. No reira o Aquinas i taui ai i te hiˈoraa o Aristote no nia i te nephe, a parau ai e e nehenehe e haapapuhia te pohe-ore-raa o te nephe na roto i te haaferuriraa. Inaha, ua vai maite noa te tiaturiraa a te ekalesia no nia i te pohe-ore-raa o te nephe.
17 I te mau senekele 14 e 15, te omuaraa o te Renaissance, ua hoˈi faahou mai te anaanatae no te haapiiraa a Platon. Ua tae roa te utuafare tuiroo ra Medici i Italia i te tauturu i te haamau i te hoê pu aivanaa i Florence, no te faateitei i te haapiiraa i te philosophia a Platon. I te mau senekele 16 e 17, ua iti mai te anaanatae no te haapiiraa a Aristote. E aita te Reforomatio no te senekele 16 i faatupu i te tauiraa i roto i te haapiiraa no nia i te nephe. Noa ˈtu â e ua aimârô te mau Porotetani no te Reforomatio i nia i te haapiiraa o te vahi tamâraa hara, ua farii ratou i te manaˈo o te utua aore ra te haamaitairaa mure ore.
18 Inaha, te vai maite ra te haapiiraa o te pohe-ore-raa o te nephe i roto i te mau haapaoraa atoa a te Amuiraa faaroo kerisetiano. Ma te haapapu i te reira, ua papai te hoê taata ite Marite e: “Te haapaoraa, no te rahiraa o te taata o to tatou iho nunaa taata, e au ïa i te pohe ore, e aita ˈtu ai. O te Atua te taata e horoa i te pohe ore.”
Te pohe ore e te haapaoraa Mahometa
19 Ua haamata te haapaoraa Mahometa i to Muḥammad piiraahia ei peropheta fatata i te 40raa o to ˈna matahiti. E tiaturi te feia faaroo Mahometa e ua faataehia mai te mau faaiteraa ia ˈna ra i te roaraa e 20 e tae atu i te 23 matahiti, mai te matahiti 610 T.T. e tae atu i to ˈna poheraa i te matahiti 632 T.T. Ua papaihia teie mau faaiteraa i roto i te Coran, te buka moˈa a te haapaoraa Mahometa. I te taime a fa mai ai te haapaoraa Mahometa, te ô atura ïa te haapiiraa a Platon no nia i te nephe i roto i te haapaoraa ati Iuda e te Amuiraa faaroo kerisetiano.
20 E tiaturi te mau Mahometa e no roto mai to ratou faaroo i te amuiraa o te mau faaiteraa i horoahia i te mau Hebera e te mau Kerisetiano haapao maitai i tahito ra. E faahiti te Coran i te mau Papai Hebera e Heleni atoa. No nia râ i te haapiiraa o te pohe-ore-raa o te nephe, e taa ê te Coran i taua mau papai ra. E haapii te Coran e e nephe to te taata o te tamau noa i te ora i muri aˈe i te pohe. E faahiti atoa oia no nia i te tia-faahou-raa o tei pohe, te hoê mahana haavaraa, e te fa hopea o te nephe—te oraraa i roto i te hoê paradaiso i nia i te raˈi anei aore ra te faautuaraa i roto i te hoê po auahi ama.
21 E tiaturi te mau Mahometa e e haere te nephe o tei pohe i roto i te Barzakh, aore ra “Aua,” “te vahi aore ra te tiaraa i reira te taata e faaea ˈi i muri aˈe i te pohe e na mua ˈˈe i te Haavaraa.” (Sourate 23:99, 100, Te Coran Moˈa [Beretane], nota i raro i te api) Mea araara maitai te nephe, i reira oia e farerei ai i tei parauhia te “Faautuaraa o te Menema” mai te peu e mea ino te taata aore ra e ite ai i te oaoa mai te peu e mea haapao maitai oia. E tia atoa râ ia haamauiui-rii-hia te feia haapao maitai no te mau hara rii ta ratou i rave a ora ˈi ratou. I te mahana haavaraa e tia ˈtu ai te taata taitahi i mua i to ˈna fa hopea, o te hopearaa ïa o taua area no ropu ra.
22 Ua fa mai te manaˈo o te pohe-ore-raa o te nephe i roto i te haapaoraa ati Iuda e te Amuiraa faaroo kerisetiano na roto mai ia Platon, ua haamauhia râ taua tiaturiraa ra i roto i te haapaoraa Mahometa i to ˈna iho â haamataraa. Aita râ e parauhia ra e aita te feia ite Arabia i tamata i te anoi i te mau haapiiraa Mahometa e te philosophia Heleni. Inaha, ua raea-maitai-hia te ao Arabia e te ohipa a Aristote. E ua faataa maitai e ua haamau te feia ite Arabia tuiroo, mai ia Avicenne e o Averroès, i te manaˈo o Aristote. Na roto râ i to ratou tamataraa i te faatuea i te manaˈo Heleni e te haapiiraa Mahometa no nia i te nephe, ua haamau mai nei ratou i te mau haapiiraa tumu ore taa ê. Ei hiˈoraa, ua parau o Avicenne e mea pohe ore te nephe o te taata. I to ˈna aˈe râ pae, ua mârô ïa o Averroès e eita. Noa ˈtu râ teie mau manaˈo, te vai noa ra te tiaturiraa a te haapaoraa Mahometa no nia i te pohe-ore-raa o te nephe.
23 Papu maitai ïa e te haapii paatoa ra te haapaoraa ati Iuda, te Amuiraa faaroo kerisetiano, e te haapaoraa Mahometa i te pohe-ore-raa o te nephe.
[Nota i raro i te api]
a Te hoê taata e pee i te Néoplatonisme, te hoê tatararaa apî o te philosophia a Platon i haamauhia e Plotin i te senekele 3 i Roma.
[Uiraa haapiiraa]
1. Ua haamau te rahiraa o te mau haapaoraa i ta ratou fafau no te ora i muri aˈe i te pohe i nia i teihea tiaturiraa tumu?
2, 3. Ia au i te Encyclopaedia Judaica, ua haapii anei te mau papai Hebera moˈa no nia i te pohe-ore-raa o te nephe?
4-6. Nafea te haapiiraa o te pohe-ore-raa o te nephe i riro mai ai ei “hoê o te mau ofai tihi” o te haapaoraa ati Iuda?
7, 8. (a) Nafea te Talmud e faataa ˈi i te nephe? (b) I muri aˈe, eaha ta te mau buka ati Iuda no nia i te mau peu taa ê, i parau no nia i te nephe?
9. Eaha te hiˈoraa o te rahiraa o te mau tuhaa o te haapaoraa ati Iuda no teie tau, no nia i te pohe-ore-raa o te nephe?
10. Eaha te parau hopea a te hoê taata ite Paniora tuiroo no nia i te tiaturiraa o Iesu no nia i te pohe-ore-raa o te nephe?
11. Afea te philosophia Heleni i te haamataraa i te faaô atu i roto i te Kerisetianoraa?
12-14. Eaha te ohipa i ravehia e Origène e o Augustin i roto i te anoiraa i te philosophia a Platon i roto i te Kerisetianoraa?
15, 16. Ua taui anei te anaanataeraa i te mau haapiiraa a Aristote no te senekele 13, i te tiaraa o te ekalesia no nia i te haapiiraa o te pohe-ore-raa o te nephe?
17, 18. (a) Ua faatupu anei te Reforomatio no te senekele 16, i te hoê tauiraa i nia i te haapiiraa no nia i te nephe? (b) Eaha te tiaraa o te rahiraa o te mau haapaoraa o te Amuiraa faaroo kerisetiano no nia i te pohe-ore-raa o te nephe?
19. Afea te haamauraahia te haapaoraa Mahometa, e na vai?
20, 21. Eaha ta te haapaoraa Mahometa e tiaturi no nia i te Ao i muri aˈe i te pohe?
22. Eaha te mau manaˈo taa ê no nia i te fa hopea o te nephe ta te tahi feia philosopho Arabia i vauvau?
23. Eaha te tiaraa o te haapaoraa ati Iuda, te Amuiraa faaroo kerisetiano, e te haapaoraa Mahometa no nia i te tumu parau o te pohe-ore-raa o te nephe?
[Hohoˈa i te api 14]
Ua aratai te ohipa haruraa fenua a Alesanedero Rahi i te anoiraa o te mau peu tumu Heleni e ati Iuda
[Hohoˈa i te api 15]
Ua tamata o Origène, i nia, e o Augustin i te anoi i te philosophia a Platon e te Kerisetianoraa
[Hohoˈa i te api 16]
Ua parau o Avicenne, i nia, e mea pohe ore te nephe o te taata. Ua mârô o Averroès e eita