Tauturuhia e to ratou Hoa rahi roa ˈˈe

HOÊ auhoaraa o te tauturu taa ê ra i te mau Ite no Iehova. O to ratou ïa taairaa faufaa roa e to ratou Hoa rahi roa ˈˈe, te Atua ra o Iehova. (A faaau e te Iakobo 2:23.) Te tauturu nei oia ia ratou i roto i te mau tamataraa rahi o te faaroo.

Ua aruehia te faatiaraa no nia i te taiva ore a te mau Ite i raro aˈe i te mau faatereraa haavî e e rave rahi feia hiˈopoa. Te hoê o ratou o Jiří Krupička ïa, te hoê orometua i te pae no te haapiiraa philosopho e no te mau ite aivanaa o te natura o tei horo mai na Tekolovakia mai i te matahiti 1968 i muri aˈe i te faaearaa e rave rahi matahiti i roto i te mau aua tapearaa taata a te mau communistes. I roto i ta ˈna buka Renesance rozumu (Fa-faahou-raa o te maramarama), te faataa ra oia i te mauiui e te tiaraa papu a te mau Ite tei tapeahia no to ratou tiaraa amui ore.

I raro aˈe i te faatereraa communiste, ua faautuahia e rave rahi mau Ite i te fare auri no to ratou faaroo. Noa ˈtu e ua tapeahia ratou, ua patoi ratou i te eru i te uranium no te mau tamaˈi. (Isaia 2:4) Te faataa ra o Krupička i te hoê tupuraa o ta ˈna i ite i roto i te hoê o taua mau eruraa ra i te matahiti 1952. Ua ite o ˈna e piti taata e tia noa ra mai te mau tii pape paari ra te huru i te tau toetoe rahi. Ua tapoˈi te mau tura auri i to raua upoo e te tuhaa i nia o to raua tino.

Te papai ra o Krupička e: “Ua tia noa raua i reira i roto i te mau ahu mau auri motumotu mai te aahiata mai â. Mea nafea raua i te neheneheraa e tia maoro noa e te mau avae tei toetoe roa? Na roto i te puai o te faaroo. Mea tahito e te tutae auri te mau tura. Ua tupai puai te hoê taata ino mau i nia i to raua upoo e to raua tapono e ua tumotu te hiti tura tei parari i te pereue e te iri o te hoê o raua, e ua tahe te toto na roto mai i to ˈna rima ahu.

“Ua faatapea te tiai i ta matou pǔpǔ i mua ia raua, e ua horoa te raatira i te hoê oreroraa parau poto na matou. Te patoiraa i te rave i te ohipa, o ta ˈna i parau, e orureraa hau ïa e e faautuahia ïa. Eita te tahi paraparau faufaa ore no nia i te tamaˈi e te taparahiraa taata e tauturu i teie feia patoi, teie mau enemi o te faatereraa socialiste.”

Ua rave te raatira i te hoê auri e ua tupai oia i nia i te hoê o te mau tura. Ua topa te taata i roto mai e te tura o tei tapoˈi noa i to ˈna upoo. Ua mau roa te ohipa i tupu i muri iho i roto i te feruriraa o Krupička.

Te faataa ra oia e: “Ua faaroohia te himene mai roto mai i te mau tura. Te mau taˈiraa reo mǎrû, te hoê pure tei muhuhia i te Atua, o te nehenehe e faaroo i te mau mea atoa i te mau vahi atoa—te himene atoa mai roto mai i te mau tura uranium tahito e te tutae auri. E faaroo puai aˈe oia i te reira i te himene a te hoê pǔpǔ himene i roto i te hoê fare pure rahi.”

I te 1 no setepa 1993, ua haamanahia te ohipa a te mau Ite no Iehova i te Repubilita no Tekolovakia i mua i te ture. Te oaoa nei te mau Ite no Tekolovakia i teie nei i te faatupu i ta ratou ohipa haapiiraa kerisetiano ma te tiamâ. Oia, te oaoa nei ratou i te faaite ia vetahi ê no nia ia Iehova, to ratou Hoa rahi roa ˈˈe.

[Hohoˈa i te api 7]

Te feia i ruru mai i te Repubilita no Tekolovakia