Ua hau atu 259 Ite no Iehova na te ao nei tei tapeahia no to ratou faaroo. Teie te tapura o te avaˈe Fepuare 2026.
Ia au i te irava ture 18 o te Parau faaau a te mau nunaa rau no nia i te tiaraa tivira e poritita o te taata, e tiaraa faufaa te tiamâraa e manaˈo, e pee i to ˈna manaˈo haava e e maiti i ta ˈna haapaoraa. Tera râ i te tahi mau fenua, aita te tiamâraa o te mau Ite no Iehova i faaturahia. Ua tapeahia ratou ma te tano ore e ua hamani-ino-atoa-hia no to ratou faaiteraa i to ratou faaroo aore ra aita ratou i farii i te rave i te tau faehau no to ratou manaˈo haava.
Crimée
I Eperera 2017, aita noa te faatereraa Rusia i faaore i te mau parau haamanaraa a te mau Ite no Iehova, ua faaite atoa râ i to ratou hinaaro e faaore roa i te feia o te haamori ra ma te hau i to ratou Atua. Ua tae roa teie patoiraa uˈana i Crimée. Ua rave te faatereraa e rave rahi paheruraa e tapearaa. I teie nei, 14 Ite no Iehova tei roto i te fare tapearaa no te mea ua parihia ratou i te faanahoraa i te ohipa a te tahi pǔpǔ orure hau.
A taumi no te ite i te tapura o te mau Ite no Iehova atoa tei tapeahia no to ratou faaroo i Crimée.
Érythrée
I 1994, ua faaore te peretiteni Afwerki i te tiaraa huiraatira o te mau Ite no Iehova i Érythrée no to ratou oreraa e maiti no te tiamâraa o te fenua i te matahiti 1993 e no to ratou atoa oreraa i farii i te rave i ta ratou tau faehau. Mai reira mai, ua haafifihia te oraraa o te mau Ite no Iehova, ua tapeahia, ua hamani-ino-hia, ua tuuhia i te fare tapearaa ma te ore e haavahia e tei roto atoa te mau vahine, te feia ruhiruhia e te mau tamarii. I teie taime, 64 Ite no Iehova tei roto i te fare tapearaa. Aita hoê aˈe o ratou i haavahia aore ra i faautuahia.
A taumi no te ite i te tapura o te mau Ite no Iehova atoa tei tapeahia no to ratou faaroo i Érythrée.
Rusia
I Eperera 2017, ua faaoti te Tiripuna teitei Rusia i te opani e i te faaore i te mau haamanaraa i horoahia i te mau Ite no Iehova no te mea ua amuihia ratou i roto i te tapura o te mau pǔpǔ taata orure hau. Ua opani e ua haruhia ta ratou mau vahi haamoriraa e ta ratou mau papai. I muri iho, ua tapeahia te mau Ite no Iehova tataitahi. Ua tomo te mau mutoi i roto i to ratou fare e pinepine i te faariaria na roto i ta ratou mau uiraa e ua tapea-roa-hia vetahi. I teie taime, 158 Ite no Iehova tei tapeahia hou a haavahia ˈi, tei faahepohia ia rave i te ohipa teimaha aore ra tei roto i te fare tapearaa no te rave i ta ratou tau faautuaraa.
A taumi no te ite i te tapura o te mau Ite no Iehova atoa tei tapeahia no to ratou faaroo i Rusia.
Singapour
I Singapour, te faahepo ra te faatereraa ia rave te tane ta ratou tau faehau e aita ratou e nehenehe e patoi i te reira no to ratou tiaraa amui ore, aita anaˈe e tapeahia ratou fatata piti matahiti e te afa. Noa ˈtu e rave rahi matahiti to te Hau amui aniraa i te faatereraa Singapour ia farii ia mono te tane i ta ratou tau faehau i te ohipa tivira, aita râ tera faatereraa i farii atura e faaau i nia i te parururaa i te tiaraa o te taata. I teie taime, 11 taurearea Ite no Iehova tei tapeahia no te mea aita ratou i farii i te rave i ta ratou tau faehau no to ratou faaroo. No e 5 taeae, teie te piti o te taime ratou i tapeahia ˈi.
A taumi no te ite i te tapura o te mau Ite no Iehova atoa tei tapeahia no to ratou faaroo i Singapour.
Korea apatoa
I te 26 no Atopa 2020, a tahi roa te hau Korea apatoa e farii ai e tiamâraa to te taata ia rave i te ohipa tivira no te mono i te tau faehau. Tera râ, ua itehia mea etaeta e mea roa atoa tera faanahoraa, e toru hoi matahiti e titauhia. E ere i te mea tano no te mea ua tataipitihia tera taime ia faaauhia i te tau faehau. Noa ˈtu ua horohia teie faaotiraa, i 2024 ua haapapu te tiripuna o te pǎpǎ ture no Korea apatoa e mea mana tera faaotiraa. Ua farii te rahiraa o te mau Ite no Iehova i te rave i te ohipa tivira noa ˈtu e ere i te mea ohie. Tera râ, ua patoi 14 taeae i teie ravea monoraa. Hoê tei roto i te fare tapearaa e e rave rahi aita i haavahia ˈtura. E nehenehe te tiripuna e faautua ia tapeahia ratou.
A taumi no te ite i te tapura o te mau Ite no Iehova atoa tei tapeahia no to ratou faaroo i Korea apatoa.
Ukraine
Fatata a 30 matahiti i teie nei to te mau Ite no Iehova i Ukraine fanaˈoraa i te hoê ture ia nehenehe ratou e rave i te hoê ohipa tivira no te mono i te tau faehau. A haamata ˈi te tamaˈi i Ukraine i te 24 no Fepuare 2022, aita te ravea monoraa e mana faahou e ua faahepohia te mau taata ia haere i te tamaˈi. Ia ore ratou e na reira, e horohia e e tapeahia ratou. I teie taime, e ono Ite no Iehova tei roto i te fare tapearaa e e pae o tei tapeahia a tiai noa ˈi ta ratou haavaraa. Ua faaite e toru taata titorotoro a te Hau amui i to ratou haapeapearaa no te mea aita te ravea monoraa e te hoê ohipa tivira i haamanahia e te faatereraa Ukraine i faaturahia a tupu ai te tamaˈi.
A taumi no te ite i te tapura o te mau Ite no Iehova atoa tei tapeahia no to ratou faaroo i Ukraine.
“A haamanaˈo i te feia i roto i te fare tapearaa, mai te huru ra e ua tapeahia outou e o ratou.”—Hebera 13:3 .