Mai te aha te huru o te mau Ite no Iehova?

Eita matou e amui i te tahi atu mau pǔpǔ faaroo e e faanahonahoraa nunaa rau matou. Noa ˈtu tei Marite ta matou pu rahi, te ora ra te rahiraa o te mau Ite no Iehova i te tahi atu mau fenua. Ua hau atu vau mirioni matou e haapii ra i te Bibilia i te taata i roto 230 tiahapa fenua. Te haapao nei ïa matou i ta Iesu i parau: ‘E parau-haere-hia te evanelia o te Basileia nei e ati noa ˈˈe teie nei ao, ia ite te mau fenua atoa.’—Mataio 24:14.

Noa ˈtu eaha te fenua, e auraro maite matou i te ture. Eita râ e amui i te mau ohipa poritita. E na reira matou no te haapao i ta Iesu aratairaa no te mau Kerisetiano: “E ere outou i to teie nei ao.” Eita ïa matou e turu i te mau ohipa poritita aore ra te tamaˈi. (Ioane 15:19; 17:16) No reira i te Piti o te tamaˈi rahi, ua tapeahia, hamani-ino-hia e haapohehia te mau Ite no Iehova no to ratou tiaraa amui ore. Ua papai te tahi epikopo tahito no Heremani: “Ua tano mau ratou i te parau o ratou te feia tiaraa amui ore rahi roa ˈˈe i raro aˈe i te faatereraa Nazi a Adolf Hitler.”

Eita râ matou e faataa ê ia matou i te huiraatira. Ua pure Iesu i te Atua no ta ˈna mau pǐpǐ ma te na ô: “Aore au i pure ia oe e ia hopoi ê atu oe ia ratou i teie nei ao.” (Ioane 17:15) E ite ïa oe ia matou ia rave i te ohipa, ia hoohoo e ia haere i te haapiiraa.