Ua manuïa te opereraa i te api parau Te parau apî o te Basileia

“NO TE aha e rave rahi fifi i roto i te oraraa?—E tupu anei te hoê paradaiso e aita e fifi faahou?” O te upoo parau ïa o Te parau apî o te Basileia No. 34, e api parau e maha api o tei operehia na te ao nei na roto e 139 reo i te mau avaˈe eperera e me o te matahiti i mairi aˈenei. “Hoê o te mau ohipa faahiahia roa ˈˈe i tupu i teie matahiti,” mea na reira to te mau Ite no Jamaïque faataaraa i teie opereraa. “E tumu oaoaraa rahi no te mau taeae,” o ta te mau Ite no Beletita ïa i parau. I te Repubilita no Tekolovakia, a tahi ra te mau Ite no Iehova i nehenehe ai e apiti i roto i te opereraa o Te parau apî o te Basileia. Te faataa ra te amaa e: “Ua faatupu teie opereraa i te manaˈo itoito e te aau tae.” Tera atoa te mau manaˈo i faarooroohia i roto e rave rahi atu â mau fenua.

E poroi taa ê ta Te parau apî o te Basileia No. 34 i faatae i te feia e autâ nei e e auê nei i mua i te mau ohipa faufau e ravehia nei na nia i te iˈoa o te haapaoraa. (Ezekiela 9:4) E poroi tamahanahanaraa ta ˈna no te feia tei arepurepu te oraraa i te “ati rahi” o teie nei tau, aita hoi to ratou e mana i nia iho. (Timoteo 2, 3:1) Ma te faahiti i te Bibilia, ua faaite te api parau e fatata roa te mau fifi o te oraraa i te faatitiaifarohia. E mea papu te hoê paradaiso aita e fifi faahou. (Luka 23:43) E rave rahi mau taata o tei taio i te api parau Te parau apî o te Basileia o tei papu te manaˈo i ta ˈna poroi. Ua parau te hoê taata no Togo i te hoê Ite e: “Eita te mau parau o ta outou i vauvau e nehenehe e patoihia.”

Ma te feaa ore, ua huti te opereraa i teie api parau Te parau apî o te Basileia i te ara-maitai-raa i roto i te hoê faito matau-ore-hia. I Danemata, ua pahono atu te hoê taata i te hoê Ite o tei pûpû mai i te api parau e: “No hoˈi noa maira vau mai Marite mai. Na mua ˈˈe au a hoˈi mai ai, ua horoa mai te hoê taata i teie api parau ta outou. E i to ˈu taeraa mai i ǒ nei, era faahou â teie api parau na roto i te reo danemata!”

Ua turuhia te opereraa ma te aau tae

Ua apiti te mau Ite no Iehova na te ao nei i te ohipa opereraa i te api parau ma te aau tae. Auteteria, Salvador, Haïti, Honegeria, Italia, Taratoni, vetahi noa ïa teie o te mau fenua e rave rahi o tei tapao i te numera teitei roa ˈˈe o te feia poro i roto i te mau avaˈe a operehia ˈi te api parau Te parau apî o te Basileia.

I te fenua Zambie, ua haapii te hoê tiaau haaati i ta ˈna tamahine e toru matahiti ra o Deborah, nafea ia pûpû i te mau papai na te mau fare. I te tau opereraa i te api parau Te parau apî o te Basileia No. 34, ua vaiiho o Deborah hau atu i te 45 api parau. Ua haamata to ˈna metua vahine i te mau haapiiraa bibilia e vetahi mau taata o tei farii i te api parau Te parau apî o te Basileia i operehia e Deborah.

I Afirika Apatoa, ua pûpû te hoê taurearea tamahine i te api parau i te hoê hoa haapiiraa o Cashia to ˈna iˈoa. Ua taio o Cashia i te api parau e ua na ô maira: “Auê te faahiahia e—e ora e a muri noa ˈtu i roto i te paradaiso i nia i te fenua nei! Eaha hoi aita vau i faaitehia mai i te reira parau na mua ˈˈe?” Ua haamatahia ˈtura te hoê haapiiraa bibilia. I roto i tera iho hebedoma, tae mai nei ta Cashia te tahi atu api parau. Na to ˈna hoa papai rata katolika, e faaea ra i Kupero, i hapono mai i te piti o te api parau. Ua faataa mai to ˈna hoa papai rata ia Cashia no te aha e mea hape te mau haapiiraa a te Ekalesia katolika e ua faaite maira e te opua ra o ˈna e haapii i te Bibilia e te mau Ite no Iehova. Papu maitai e ua haapuai mau â te reira i te manaˈo o Cashia e tamau noa i ta ˈna haapiiraa.

I te fenua Helevetia, ua apiti atu te hoê tamaroa hoê ahuru matahiti i to ˈna metua vahine i roto i te ohipa opereraa i te api parau. Ua horoa ˈtu oia i te hoê api parau na te hoê vahine apî e ua faaitoito oia ia ˈna ia taio maitai atu. Ua ani te vahine apî i te tamaroa ahiri e te tiaturi mau ra oia i te hohoˈa i nia i te api rapaeau—oia hoi te ora mure ore i nia i te fenua nei. Eaha ta te tamaroa i pahono atu? “E, papu maitai.” Ua faaite maira te vahine e te imi noa ra oia i te faaroo mau no te mea ua rahi roa te mau tuea-ore-raa i roto i ta ˈna iho haapaoraa. I te hoˈiraahia ˈtu oia e farerei, ua haamatahia ˈtura te hoê haapiiraa bibilia.

Te mau pahonoraa oioi

I te tahi mau taime, ua faatupu te api parau Te parau apî o te Basileia i te mau pahonoraa oioi no ǒ mai i te feia o tei taio i ta ˈna poroi. I muri aˈe i to ˈna taioraa i te api parau, ua faˈi ihora te hoê tamahine 11 matahiti no Beletita i te hoê Ite no Iehova e ua eiâ oia i roto i te hoê fare toa. Aita te metua vahine o teie tamahine i hinaaro e ia faaitehia teie ohipa, tera râ, ua putapû roa te haava manaˈo o te tamahine iti i te mea o ta ˈna i taio, e ua onoono oia i te haere e farerei i te fatu o te fare toa. Ua farii ihora te metua vahine e vaiiho i ta ˈna tamahine ia hoˈi atu i te fare toa e te Ite. Ua hitimahuta roa te fatu fare toa i to te tamahine faˈiraa i ta ˈna hapa. I to ˈna iteraa e na te api parau Te parau apî o te Basileia i turai ia ˈna ia na reira, ua rave ihora oia i te hoê na ˈna no te ite e eaha te poroi puai mau i roto. Te haere nei te tamahine i mua i roto i ta ˈna haapiiraa bibilia.

Te faatia ra te hoê Ite no Cameroun o tei vaiiho i te hoê api parau Te parau apî o te Basileia i te hoê taata e: “I to matou hoˈiraa ˈtu, ua oti aˈena ia ˈna i te renihia te api parau e mea rahi ta ˈna mau uiraa. Ua mauruuru oia i te mau pahonoraa i horoahia ˈtu e ua na ô maira e: ‘E parau mau roa o te haapaoraa atoa te tumu i peapea ˈi te huitaata nei. Mea rahi te mau mea o ta ˈu i taa na roto i ta outou api parau, tera râ, te hinaaro nei au e ite hau atu â.’” Te haapii tamau nei oia i te Bibilia i teie nei.

I te fenua Uruguay, ua vaiiho te hoê Ite e poro ra na te mau fare i te hoê api parau i te hoê taata. Ua haere noa ˈtura te Ite e poro na te mau fare e ati aˈera ia ˈna taua tuhaa ra e ua tae atura oia i te opani na muri mai i te fare o taua taata ra. Ua maere roa oia i te iteraa e te tiai ra teie taata ia ˈna e te api parau i roto i te rima. Ua oti aˈena ia ˈna i te taio e te hinaaro ra oia i te tahi atu mau haamaramaramaraa. Ua haamatahia ˈtura te hoê haapiiraa i reira iho.

Ua turu te taata i te opereraa

I te fenua Tapone, ua haafatata ˈtu te hoê taurearea Ite i te hoê taata e 50 matahiti paha to ˈna, e ua faaite atura i te api parau. Ua ani maira teie taata: “Eaha ta oe e rave e teie nei api parau ia farerei oe i te feia matapo?” Ua farii ihora te Ite e aita o ˈna i ite. Ua parau maira teie taata ia tiai maa taime iti e ua haere atura i roto i to ˈna fare. Ua hoˈi maira oia e te hoê api parau Te parau apî o te Basileia e ua na ô maira: “Ua noaa aˈena ta ˈu api parau. Ua manaˈo vau e e mau parau anaanatae roa e te faufaa mau to roto, no reira, ua huri au i teie api parau na roto i te papai Braille [papai na te feia matapo]. A rave i teie huriraa no te feia matapo.” Ua horoa teie taata e rave rahi mau hora no te huri i te api parau Te parau apî o te Basileia na roto i te papai Braille ia ore te feia matapo ia erehia i ta ˈna poroi.

I te fenua Slovaquie, i te mea e ua au roa te hoê taata i te api parau, ua nenei oia e 20 hohoˈa, e na ˈna iho i opere i teie mau neneiraa peni ereere e uouo. Ua vaiiho te hoê taata poro no Helevetia i te api parau Te parau apî o te Basileia na te hoê utuafare e ua haere atura oia e poro i te mau nohoraa i nia ˈtu o te fare tahua e faaeahia ra e taua utuafare ra. I to ˈna pouraa mai, ua farerei ihora oia i te hoê tamaroa iti no taua utuafare ra, o tei ani mai e 19 api parau. I te fare haapiiraa a teie tamaroa, ua anihia te mau tamarii ia papai no nia i te mau fifi e te maimiraa i te mau ravea. Ua hinaaro oia i te hoê api parau Te parau apî o te Basileia na to ˈna mau hoa haapiiraa tataitahi.

Aita hoê i erehia

Ua tutava te feia o tei apiti i roto i te opereraa ia ore te tahi taata ia erehia. I Taratoni, ua tere atu e piti Ite i te tuhaa fenua o te hoê opu fetii atea no te opere i te api parau Te parau apî o te Basileia. I roto i to raua tere, ua ite aˈera raua i te hoê eˈa iti e au ra e aita e haerehia ra e te taata, tera râ, ua faaoti raua e haere noa ˈtu e hiˈo ahiri e e taata te faaea ra i te hopea o teie eˈa. Ua vaiiho atura raua i to raua pereoo, e ua haere noa ˈtura raua na raro na nia i taua eˈa ra, ma te taahi na roto i te mau anavai pape e tae roa ˈtu i te hoê fare. Hoê tane e ta ˈna vahine e faaea ra i reira, aita raua i faaroo aˈenei i te parau no te mau Ite no Iehova, e ua farii ihora raua i te hoê api parau Te parau apî o te Basileia. I muri iho, ua hoˈi atura na feia poro e farerei i teie nau feia e ua maere roa raua i te iteraa e ua tataihia te purumu e ua patuhia te tahi mau eˈaturu iti ia tae roa to raua pereoo i te fare. Ua haamatahia ˈtura te hoê haapiiraa bibilia tamau.

I te fenua Polonia, ua haere te hoê Ite na raro mahemo atu i te hoê vahi paturaa fare no te pûpû i te api parau Te parau apî o te Basileia i te hoê taata. Ua mataitai noa te mau rave ohipa ia ˈna a mahemo ai oia i te vahi paturaa. Inaha, ua pii maira te hoê rave ohipa ia ˈna, ma te ani atu ia haamanaˈo mai ia ratou. I to ˈna haafatataraa ˈtu ia ratou, ua faaea ˈtura ratou i ta ratou ohipa e ua faaroo maitai mai ratou i te tatararaa no nia i te api parau. Ua farii ratou i te mau api parau Te parau apî o te Basileia e te tahi mau vea e i muri iho, ua rave atoa ratou i te mau buka i te hoˈiraahia ˈtu ratou e farerei.

E mau hanere mirioni api parau Te parau apî o te Basileia No. 34 o tei operehia na roto e rave rahi mau reo. Ua faatupu aˈena ta ˈna poroi i te mana puai. E rave rahi o tei haapii e mea papu te hoê paradaiso aita e fifi faahou. Te pure nei tatou e ia tamau noâ te feia aau tia i te pahono i te poroi e ia ô atoa ratou i te pae hopea i roto i “te feia mǎrû” o te ‘parahi i te fenua, e o te oaoa i te rahi o te hau ra.’—Salamo 37:11.

[Tumu parau tarenihia i te api 31]

A tamau noa i te opere i te mau vea!

I te mau avaˈe eperera e me 1995, ua ravehia te hoê opereraa manuïa rahi i te api parau Te parau apî o te Basileia No. 34. I roto i taua nau avaˈe ra, ua opere-rahi-atoa-hia te mau vea Te Pare Tiairaa e te A ara mai na! Ei hiˈoraa, te faatia ra te hoê taeae no te Repubilita no Tekolovakia e, i te avaˈe eperera ra, ua opere oia e 250 api parau Te parau apî o te Basileia e e 750 vea. I Guadeloupe, ua maitihia te mahana maa 15 no eperera ei mahana opereraa vea taa ê. Fatata te taatoaraa o te feia poro no taua fenua ra o tei apiti i roto i te taviniraa i taua mahana ra! Ua naeahia i te fenua Slovaquie te hoê numera teitei apî i te pae no te opereraa vea i te avaˈe eperera ra. Ua tae atoa mai te mau tabula mai te reira te huru no ǒ mai e rave rahi atu mau fenua.

No te aha tatou e ore ai e faariro atoa i te mau avaˈe eperera e me 1996 ei mau avaˈe taa ê no te opere i te vea? E nehenehe te mau amuiraa e faanaho i te mau mahana opereraa vea taa ê. E nehenehe te feia poro e rave i te taviniraa pionie tauturu. Na roto i teie mau ravea e vetahi atu â, e faaitoitohia te ohipa opereraa vea, e e tamau-noa-hia te poroi faufaa roa i faaitehia e te api parau Te parau apî o te basileia No. 34 i te haapararehia. I reira, mai tei tupu i te matahiti i mairi aˈenei, e riro mau â o Iehova i te haamaitai i te aau itoito o ta tatou e faaite.—Timoteo 2, 4:22.