Ia anaana to outou maramarama!

UA TAE te taime tiai-maoro-hia ia ite mata roa ˈtu te taata ruhiruhia ra i te Mesia i tǎpǔhia mai! Ua faaitehia mai o Simeona e te Atua e “eita oia e pohe vave ia ite râ oia i te Mesia o [Iehova] ra.” (Luka 2:26) Auê râ te putapû e i to Simeona tomoraa ˈtu i roto i te hiero e ua tuu maira o Maria raua o Iosepha i te aiû iti o Iesu ra i roto i to ˈna rima! Ua arue ihora oia i te Atua i te na ôraa e: “E te Fatu, e tuu oe i to tavini i teie nei ma te hau . . . ua ite aˈenei hoi tau mata i te Ora na oe . . . e tiarama ei haamaramarama i te Etene, e ei hanahana no to oe ra taata no Iseraela.”—Luka 2:27-32; a faaau e te Isaia 42:1-6.

Ua riro mau â Iesu, mai to ˈna bapetizoraa i te 30raa o to ˈna matahiti e tae atu i to ˈna poheraa, ei “tiarama” no te ao nei. Mea nafea ïa? Ua faaanaana oia i te maramarama i te pae varua na roto i te pororaa i te Basileia o te Atua e Ta ˈna mau opuaraa. Ua faaite tahaa atoa oia i te mau haapiiraa faaroo hape e ua haapapu maitai oia i te mau ohipa a te pouri. (Mataio 15:3-9; Galatia 5:19-21) Ua tano ïa o Iesu i te na ôraa e: “O vau te maramarama o teie nei ao.”—Ioane 8:12.

Ua pohe Iesu i te matahiti 33 o to tatou tau. Ua pohe atoa anei te maramarama i reira? Aita roa ˈtu! A vai noa ˈi oia i nia i te fenua nei, ua faaue atu Iesu i ta ˈna mau pǐpǐ e: “To outou maramarama, ia anaana ïa i mua i te aro o te taata nei.” (Mataio 5:16) No reira ˈtura, i muri aˈe i te poheraa o Iesu, ua tamau noa ta ˈna mau pǐpǐ i te faaanaana i te maramarama.

Ia au i te hiˈoraa o Iesu, te faaanaana nei te mau kerisetiano i teie mahana i te maramarama o Iehova na roto i te raveraa i te ohipa pororaa. ‘Ua au to ratou haerea i te tamarii maramarama,’ ma te riro ei mau hiˈoraa anaana i te pae no te oraraa kerisetiano.—Ephesia 5:8.