Opereraa api parau taa ê: 20 no Atopa–16 no Novema!
1 Mai te Monire 20 no Atopa, e no e maha hebedoma taatoa i te maoro, e apiti tatou i te hoê opereraa taa ê o te api parau apî E hinaaro anei oe e ite i te parau mau? Te tiaturihia ra e e faarahi tera opereraa taa ê na te ao atoa nei i te anaanatae i te tumu hoê roa o te parau mau.—Ioa. 17:17.
2 Te horoa ra te api parau i te mau pahonoraa bibilia poto i na uiraa faufaa roa e ono: “Te tapitapi mau ra anei te Atua ia tatou?” “E ore anei te tamaˈi e te mauiui?” “Eaha te tupu mai ia pohe tatou?” “E tiaturiraa anei to tei pohe?” “E nafea vau e pure ai e e faaroohia ˈi e te Atua?” e “E nafea vau e oaoa ˈi i te oraraa nei?” Aita roa ˈtu te mau haapaoraa a te Amuiraa faaroo Kerisetiano i horoa i te mau pahonoraa mauruuru i teie mau uiraa. Ua uiui atoa te taata e rave rahi, e ere hoi i te Kerisetiano, i te reira, aita râ ratou i ite e e itehia te mau pahonoraa taa maitai i roto i te Bibilia. Ia anaanatae-rahi-hia ïa teie poroi e tia ˈi.
3 A rave hope i ta oe tuhaa fenua: A tutava i te poro rahi i tera fare i tera fare mai te peu e nehenehe. Mai te peu e e tuhaa fenua rahi ta oe, e faaitoito paha te mau matahiapo ia oe ia vaiiho i te hoê api parau i te mau fare aita e taata i te taime matamua. A haamanaˈo i te horoa i te tahi api parau i te feia tapiri, te fetii, te mau hoa ohipa aore ra hoa haapiiraa, e te feia ta oe e farerei tamau ra. Peneiaˈe e nehenehe oe e faanaho i ta oe ohipa no te riro mai ei pionie tauturu i Atopa aore ra i Novema. E tamarii aore ra e piahi Bibilia anei ta oe o te haere maitai ra i mua i te pae varua e o te faaî ra paha i te mau titauraa no te apiti ia tatou i teie opereraa ei taata poro bapetizo-ore-hia? Mai te peu e e, a faaara ˈtu ïa i te mau matahiapo.
4 Eaha te parau: Ia raea e rave rahi atu â taata i te poroi, e mea maitai aˈe ia haapoto noa i ta oe faaiteraa. A ui noa ˈtu i te mau fatu fare hoê o na uiraa e ono e vai ra i te api matamua e a faaite atu i te pahonoraa i roto i te api parau. E nehenehe te feia poro e faatano i ta ratou faaiteraa i te mau hinaaro o te tuhaa fenua. Ia faaite te tahi taata i te anaanatae, a tapao i te reira e a hoˈi faahou e hiˈo ia ˈna. I te mau hopea hebedoma, e nehenehe e pûpûhia te mau vea apî e te api parau. Ia hope te opereraa i te 16 no Novema, e pûpû tatou i te buka Bibilia haapii. E faaohipahia te mau api parau e toe mai mai te tahi atu mau api parau e vai ra.
5 A haamata i te hoê haapiiraa bibilia: Ua nenei-taa-ê-hia teie api parau no te tauturu ia tatou ia haamata i te mau haapiiraa bibilia. Ia hoˈi oe farerei i te hoê taata tei faaite i te anaanatae, e nehenehe oe e ani atu ia ˈna eaha te parau mau bibilia tei tamahanahana aore ra tei tamǎrû ia ˈna? A faaite atu i te api hopea i reira i faaitehia ˈi ta tatou faanahoraa no te haapii i te Bibilia, e a horoa ˈtu i te buka Bibilia haapii. Ia nehenehe, a hiˈopoa poto noa hoê aore ra e piti paratarafa o te pene e horoa ra i te haamaramaramaraa hau i nia i te tumu parau ta ˈna i maiti.
6 Te imi nei Iehova i te feia e haamori ia ˈna “ma te varua e te parau mau.” (Ioa. 4:23) Ia apiti ïa tatou paatoa i teie opereraa taa ê no te tauturu ia vetahi ê ia ite i te parau mau!