Te faatia ra te feia poro i te Basileia

Te mau enemi tahito tahoêhia no te tavini ia Iehova

“TE TAIME matamua i faaroo ai au i te parau no nia i te mau Ite no Iehova, i te taime ïa a riro ai au ei tiai e ta ˈu mauhaa tamaˈi i Bosnie,” o ta Branko ïa e faataa ra.a

E tiai na o Branko i te hoê fare maˈi i reira te mau taata pepe e rapaauhia ˈi. Te haapii ra te hoê o te mau taote i te Bibilia e te mau Ite, e i te hoê po raveraa ohipa, ua faataa oia ia Branko i te rahiraa o te mau mea o ta ˈna i haapii no nia i te Bibilia.

Ua haaputapû roa te mau mea o ta Branko i faaroo i taua po ra ia ˈna e ua faarue oioi oia i ta ˈna mau mauhaa. Ua haere oia e farerei i te mau Ite, ma te hinaaro e haapii hau atu â. Tau taime i muri iho, i muri aˈe i to ˈna tereraa ˈtu i te tahi atu fenua no Europa, ua imi o Branko i te hoê Piha no te Basileia e ua haere oia i te hoê putuputuraa a te amuiraa no Yugoslavia a te mau Ite no Iehova. I reira to Branko farereiraa ia Slobodan.

No Bosnie atoa o Slobodan e ua tavini oia ei rima tauturu i roto i te hoê â tamaˈi e to Branko—i roto râ i te pǔpǔ enemi. Ua aro o Slobodan no te mau Serbes i te mau Croates. I te taime a farerei ai raua, ua riro mai o Slobodan ei Ite no Iehova. Ua pûpû oia i te hoê haapiiraa bibilia ia Branko, to ˈna enemi tahito. A haere ai te haapiiraa i mua, ua haapii hau atu â o Branko no nia ia Iehova, e ua rahi to ˈna here i te Atua. Ua turai te reira ia Branko ia pûpû i to ˈna oraraa no te Poiete. I te avaˈe atopa 1993 ua faataipe oia i to ˈna pûpûraa na roto i te bapetizoraa i roto i te pape.

Mea nafea o Slobodan i te riroraa mai ei Ite no Iehova? Ua faarue oia i te vahi tamaˈiraa i Bosnie tau taime na mua ˈtu. Ua taio oia i te tahi mau buka a te mau Ite, i te taime noa râ a haere mai ai e piti nau Ite i to ˈna fare i te omuaraa o te matahiti 1992 i reira ïa to ˈna anaanatae i te Parau a te Atua i te rahiraa. O vai tei haere mai e farerei ia Slobodan, no te pûpû atu i te hoê haapiiraa? O Mujo ïa, no Bosnie atoa oia o tei paari râ ei mahometa. A haere ai te haapiiraa bibilia i mua, ua horoa amui o Mujo e o Slobodan, e enemi hoi raua na mua ˈˈe, i te tahi taime i te mau mahana atoa no te haapaari i to raua faaroo tataitahi.

Ua haapohe te tamaˈi i Yugoslavia tahito tau hanere tausani taata. Te tavini nei râ o Branko, o Slobodan, e o Mujo i teie nei ei mau taata poro i te parau apî maitai ma te taime taatoa i roto i te hoê â amuiraa a te mau Ite no Iehova. Ua haapaiuma ratou i te feii i te pae no te nunaa e te iri, e i teie nei te imi nei ratou i te hau ma te auraro i te Poiete ra o Iehova.

Na te aha râ i faatupu i teie mau tauiraa? Na to ratou here ia Iehova, to ratou faatura i te Bibilia, e to ratou hinaaro mau e faaohipa i te parau mau a te Bibilia i roto i to ratou oraraa. Mai ta te mau Papai Moˈa e parau ra, “e mea ora hoi te parau a te Atua, e te puai rahi . . . e te hiˈopoa hoi i te manaˈo e te opua o te aau ra.”—Hebera 4:12.

[Nota i raro i te api]