Afea te mǎtaˈu e hope ai?

E HAAMAERE anei teie tupuraa ia outou e ua fanaˈo te hoê taata o tei ora a 2 000 matahiti i teie nei i te vai-maitai-raa? Ma te faaite i te faufaaraa o te here, ua faataa o Iesu Mesia i te hoê parabole faahiahia mau: “Te hoê taata no Ierusalema i te haereraa i Ieriko, roohia ihora i te nǎnǎ eiâ haru, taratarahia ihora tana ahu e ratou, e paruparu ihora oia, haere atura, faarue ihora ia ˈna; ua fatata i te pohe.” Noa ˈtu e aita na taata ratere e piti i tâuˈa i te taata i roohia i te ati, ua faaite te hoê taata no Samaria i te aroha. O vai hoi o te aupuru nei i te feia e roohia i te ati i teie nei mahana? Eaha te tamǎrûraa i te mǎtaˈu ta tatou e nehenehe e tiai?—Luka 10:30-37.

A parau noa ˈi e te tiaturi ra ratou i te Atua, te manaˈo ra e rave rahi taata e e tia ia faaetaeta te taata i te ture e i te faanahoraa. Tera râ, e faaore anei te mau faautuaraa fare auri etaeta aore ra e rave rahi atu â mau mutoi aufau-maitai-hia i te ohipa ino mau? Te tiaturi mau ra anei outou e e faaore te mau faanahoraa a te hau, noa ˈtu ta ratou mau tutavaraa haavare ore no te horoa i te tahi vai-maitai-raa, i te mau ohipa mai te rave-hua-raa i te raau taero, te taparahiraa taata faanahohia, e te veve? Eita râ to tatou poia e to tatou poiha i te parau-tia e vai faufaa ore noa.—Mataio 5:6.

Te parau ra te Salamo 46:1 e: “O te Atua to matou haapuraa e to matou etaeta, e tauturu fatata ia roohia e te ati ra.” E ite tatou e e ere teie mau parau ei mau parau rohipehe nehenehe noa.

Mai ta outou i ite, te faaite ra te mau ravea haaparareraa parau apî i te mau mahana atoa i te taparahiraa tumu ore e tupu ra i roto i te mau tamaˈi tivila e te mau aroraa a te feia totova. I roto i te tahi mau tuhaa o te ao nei, ua matauhia i te haapoe i te mau tamarii hinaaro-ore-hia aore ra i te mau ite. No te aha i iti roa ˈi te faufaa o te ora? Noa ˈtu e e rave rahi mau tumu o teie huru haavîraa uˈana, te vai ra te hoê tumu te tia mau ia tapea.

Ia au i te Parau a te Atua, te Bibilia, “te vai noa nei to te ao atoa i raro aˈe i taua varua ino ra.” (Ioane 1, 5:19) Inaha, ua faahohoˈa o Iesu Mesia i te Diabolo ra o Satani eiaha noa mai te hoê taata haavare, mai te hoê râ “taparahi taata.” (Ioane 8:44) Ma te faahema i te huitaata na roto e rave rau mau ravea, te turai ra teie taata varua puai i te maraaraa o te haavîraa uˈana i teie nei mahana. “E ati râ hoi to te fenua e to te tai, tei raro atu na hoi te diabolo ia outou na; e riri rahi hoi to ˈna, no te mea ua ite oia e maa taime poto to ˈna e toe nei,” ta te Apokalupo 12:12 e parau ra. Auaa râ, e monohia teie faanahoraa ino e te mau “raˈi apî e te fenua apî . . . , i te vai-mau-raa o te parau-tia ra.”—Petero 2, 3:13.

Hau atu i teie tiaturiraa faahiahia mau o te hoê ao apî, eaha te tauturu o ta tatou e fanaˈo i teie nei â?

Hou a hiˈo ai i te pahonoraa e tia no te reira, e mea maitai ia haamanaˈo e aita e haapapuraa e e paruruhia te mau kerisetiano mau atoa i te ohipa ino. Ua faataa te aposetolo Paulo i te tahi mau fifi atâta ta ˈna iho i faaruru. Ua faaruru oia i “te ati i te pape tahe, e te ati i te nǎnǎ eiâ, e te ati i te taata i to ˈu iho fenua, e te ati i te etene, e te ati i roto i te oire, e te ati i te medebara, e te ati i te miti.” (Korinetia 2, 11:26) Ua ora mai râ o Paulo i taua mau ati ra. Hoê â huru i teie nei mahana; na roto i te vai-ara-raa, e nehenehe â tatou e amo i ta tatou mau hopoia mai tei matauhia. E tuatapapa anaˈe na tatou i te tahi mau mea o te riro ei tauturu.

Mai te peu e te ora ra te hoê taata i roto i te hoê vahi atâta, e nehenehe te haerea maitai e riro ei paruru, i te mea e te hiˈopoa maite ra te mau taata ia vetahi ê. Noa ˈtu e te opua nei e te rave nei te mau taata eiâ i te ohipa ino, e rave rahi o te faariro nei ia ratou iho ei mau taata mai te matauhia. Eiaha e haavahavaha i te ohipa o ta ratou e rave ra, e eiaha e tamata i te ite e eaha ta ratou tuhaa i roto. No reira, e araihia ïa outou i te tahooraa. A tapea noa i roto i te feruriraa e te tamata ra te feia eiâ i te ite e o vai o tei hoo i te tahi taoˈa apî aore ra o vai o tei haere e ratere e aita ïa e taata i to ratou fare, no reira a ara i te parau o ta outou e faaite ra ia vetahi ê.

Ua ite e rave rahi mau Ite no Iehova e ua paruruhia ratou no to ratou roo ei mau tavini. Ua faaite pinepine te feia ohipa ino e te faatura nei ratou i taua mau huru kerisetiano ra, o te pûpû nei ia ratou ma te maiti ore i te huru o te taata no te tauturu i te mau taata i roto i te oire. E ere te mau Ite iho ei feia taparahi taata aore ra ei feia eiâ, aita atoa ratou e ‘imi peapea nei ia vetahi ê,’ no reira e ere ratou i te hoê haamǎtaˈuraa.—Petero 1, 4:15.

Te vai-maitai-raa i roto i te ao apî a te Atua

Mea peapea roa na tatou i ‘te rahi o te ino’ tohuhia e Iesu Mesia, maoti râ i te ahoaho rahi roa, e nehenehe tatou e tiaturi e fatata roa te Atua i te faaore i teie faanahoraa ino. Hau atu i te tohu i te hoê pororaa na te ao atoa nei o “te evanelia o te basileia,” ua faahaamanaˈo o Iesu i ta ˈna mau pǐpǐ e: “Area te mau papu e tae noa ˈtu i te hopea ra, oia te ora.”—Mataio 24:12-14.

E nehenehe tatou e tiaturi papu e e haamouhia te feia o te aro atu ia vetahi ê, i te tahi taime ma te ino uˈana. Te parau ra te Maseli 22:22, 23 e: “Eiaha e rave i ta te taata veve, no te mea e veve; e tei ati ra, eiaha e hamani-ino-hia ïa i te haavaraa: na Iehova hoi e faatia mai ia ratou i ta ratou parau, e e rave uˈana oia i te feia i rave uˈana ia ratou.” E haamou o Iehova i te feia ohipa ino, mai te feia eiâ, te feia taparahi taata, e te feia faufau i te pae taatiraa o te tino. Hau atu, eita o ˈna e haamoe i te feia o tei roohia i taua mau ati ra. E pahono oia i te mau mea i erehia e ratou e e horoa faahou oia i to ratou oraora-maitai-raa.

Oia mau, e fanaˈo te feia o tei ‘faarue i te parau ino e o tei rave i te parau maitai’ i te ora mure ore na roto anei i te oraraa mai i te ati rahi e piri maira aore ra na roto i te tia-faahou-raa mai te feia pohe. “E parahi te feia parau-tia i nia i te fenua, e parahi tamau â ratou i reira.” (Salamo 37:27-29) E tupu mau teie mau haamaitairaa no te tusia hoo a Iesu. (Ioane 3:16) Eaha râ te huru o te oraraa i roto i te Paradaiso haamau-faahou-hia?

E oaoaraa mau te oraraa i raro aˈe i te Basileia o te Atua. Te tohu ra o Iehova e: “E parahi hoi to ˈu ra mau taata i roto i te fare mau e te peapea ore, e tia i roto i te parahiraa ora, e te vahi hauti-ore-hia mai.” (Isaia 32:18) E faatitiaifaro te feia atoa o te fanaˈo i te ora mure ore i to ratou huru taata. Eita e itehia te taata ino aore ra parau-tia ore, eita atoa e itehia te hoê taata o te hamani-ino-hia e teie huru taata. Te parau ra te peropheta Mika e: “E parahi râ ratou o te taata atoa i raro aˈe i ta ˈna iho vine, e i raro aˈe i ta ˈna iho suke, e aore roa e taata e haamǎtaˈu mai ia ratou.” (Mika 4:4; Ezekiela 34:28) Auê ïa taa-ê-raa e te mau vahi atâta i teie nei mahana e!

[Tumu parau tarenihia i te api 6]

A ARA

Te ohipa nei e rave rahi feia ohipa ino ma te taime taatoa, ma te faariro i te ohipa ino ei ohipa na ratou. E ohipa ratou na roto i te mau pǔpǔ e piti aore ra e toru taata, noa ˈtu e hoê anaˈe iho taata o te faatoro i te hoê pupuhi i nia iho ia outou. Te papu-rahi-hia ra e te taata ohipa ino apî roa ˈˈe, o ˈna ïa te mea atâta roa ˈˈe. Eaha ta outou e nehenehe e rave mai te peu e te roohia ra outou i te ati?

A faaea hau noa ia ore te taata eiâ e iriâ tauê—no to ˈna aravihi ore e nehenehe o ˈna e haapohe. Mai te peu e e Ite no Iehova outou, a faaite atu ia ˈna. Teie râ, ia ineine noa outou i te farii i te ohipa ta te taata eiâ e hinaaro ra. Mai te peu e e faataere outou, e rahi roa ˈtu â te atâtaraa. I muri iho, e nehenehe outou e manaˈo e mea maitai ia ani e e faahoˈihia te mau parau haapapuraa i te ihotaata aore ra te moni aufau i te pereoo faauta.

Mea pinepine eita outou e nehenehe e faataa e o vai te taata ohipa ino. Ua riro vetahi mau taata eiâ ei feia pupuhi raau taero aore ra ei feia ohipa ino aravihi, vetahi pae ra te hinaaro noa nei ratou e tamaa. I roto i te mau huru tupuraa atoa, eiaha e rave rahi i te moni i nia iho ia outou. Eiaha e tamau i te mau piru ite-rahi-hia, te mau tapea rima auro, aore ra te mau uati moni rahi. A haere e a tere mai te matauhia e outou, ma te faaite ore i te mǎtaˈu. Eiaha e tiatonu i to outou mata i nia i te mau taata mai te huru ra e te hinaaro ra outou e hiˈopoa ia ratou. Ia tupu te mau pupuhiraa i roto i te aroâ, a taoto atu i raro; e nehenehe te mau ahu e puˈahia i muri iho.—Te hoê mutoi tahito no Rio de Janeiro.

[Hohoˈa i te api 5]

A faaea hau noa e ia ineine noa outou i te farii i te ohipa ta te taata eiâ e hinaaro ra. Mai te peu e e faataere outou, e rahi roa ˈtu â te atâtaraa