Nafea outou ia ora i roto i te hoê vahi atâta mau?

“TE MǍTAˈU nei au i te mau taime atoa. Te riaria nei au i roto i te piha utaraa taata. Te riaria nei au i roto i to ˈu pereoo. Te riaria nei au i roto i to ˈu piha nohoraa. Te vai nei te taparahiraa taata i te mau vahi atoa. Te eiâ-noa-hia nei te mau taata,” ta Maria e parau ra. Te manaˈo ra anei outou mai teie vahine faaipoipo no Beresilia, ma te mǎtaˈu i roto i to outou vahi, i te po iho â râ?

Mea au roa ia taio i te mau aamu mutoi huna, i roto râ i te oraraa mau, aita e ite-pinepine-hia ra te faahopearaa oaoa. E nehenehe te hoê ohipa ino e vai noa ma te faatitiaifaro-ore-hia. Aore ra ia tupu te taparahiraa taata, e ora noa te hoê taata aita e tane, e metua tane, aore ra e tamaiti faahou, aita e vahine, e metua vahine, aore ra e tamahine faahou. Te maraa ra anei te taparahiraa taata ino mau i roto i to outou vahi? Te hiaai ra anei outou i te hoê vahi hau mau i reira to outou utuafare e nehenehe ai e vai ora noa? Aore ra, mai te peu e e tia iho â ia outou ia faaamu i ta outou mau tamarii i roto i te hoê vahi tei î i te ohipa ino, eaha ta outou e nehenehe e rave no te ora mai?

Parau mau, te vai nei â te tahi mau oire e aita i rahi te ohipa ino. I roto e rave rahi mau fenua, te ora noâ ra te mau taata i roto i te mau oire rii hau aore ra peapea ore. Te taui oioi nei râ te mau huru tupuraa i roto atoa i te mau vahi tei faarirohia na ei mau vahi ohipa ino ore. Ei hiˈoraa, i Beresilia e 50 matahiti te maoro i teie nei, e ora na e 70 taata i nia i te hanere o te huiraatira i roto i te mau mataeinaa. I teie nei e 70 taata i nia i te hanere o te ora nei i roto i te mau oire. Ua riro atoa te itearaa o te ohipa ei haamaraaraa i te mau fifi o te mau oire, mai te taparahiraa taata e te haavîraa uˈana. Noa ˈtu e te ora ra outou i roto i te hoê vahi atâta aore ra aita, e tia ia outou ia haere i te ohipa aore ra i te fare haapiiraa e ia rave e rave rahi mau ohipa i rapae i te fare.

Ma te faˈi i te “maˈi tamau o te riaria uˈana,” te faahiti ra te hoê raatira mutoi no Rio de Janeiro ei mau tumu te tia-ore-raa totiale e te taparahiraa taata faanahohia no te reira. Te manaˈo atoa ra o ˈna e te faaitoito ra te mau vea e te afata teata i te parareraa o te mǎtaˈu, “ma te haa i nia i te feruriraa o te huiraatira na roto i te mau parau apî peapea mau.” Te turu atoa ra te raau taero, te toparaa o te utuafare, e te haapiiraa hape a te haapaoraa i te maraaraa o te haavahavaharaa i te ture. E eaha ïa te tupu i muri aˈe mai? E turai anei te faaiteraa i te mau hohoˈa ino mau, faaitihia i roto i te mau buka e te mau hohoˈa teata ei faaanaanataeraa manaˈo, i te mau taata ia tâuˈa ore ia vetahi ê? E riro anei te mau vahi faarirohia ei mau vahi ohipa ino ore ei vahi atâta?

I te mea e e ere roa ˈtu te haavîraa uˈana i te hoê ohipa arearea no te taata e roohia i te reira, mea puai mau to tatou hinaaro e ia paruruhia tatou. Eita e maerehia e ia ani te huiraatira e roohia i te reira e rave rahi atu â mau mutoi i roto i te mau aroâ e i te mau faautuaraa fare auri etaeta aore ra te faautuaraa pohe atoa! Noa ˈtu te atâtaraa, te hoo nei vetahi i te mau pupuhi no te paruru ia ratou iho. Te hinaaro nei vetahi e ia faaetaeta te mau mana faatere i te ture no te hooraa i te mau pupuhi. Noa ˈtu râ e te faaite ra te mau parau apî peapea e te uˈana noa ˈtura te ohipa ino, eiaha e ahoaho. Inaha, aita e rave rahi mau taata o te mau oire rarahi mai ia Johannesburg, Mexico, New York, Rio de Janeiro, e São Paulo i eiâhia aˈenei. E tuatapapa anaˈe na tatou e mea nafea te mau taata ia faaruru atu i roto i te hoê vahi atâta mau.

Te tapearaa i te hoê haerea maitai

No nia i te hoê vahi tei î i te ohipa ino, te faataa ra te hoê taata papai no nia i “te aravihi taa ê e te tutuu ore o te mau tausani taata no Beresilia o tei faatupu i te tahi tura e peu maitai noa ˈtu te mau huru tupuraa fifi mau o te oraraa.” I muri aˈe i te oraraa e 38 matahiti te maoro i Rio de Janeiro, te parau ra o Jorge e: “Te ape nei au i te tahi mau aroâ e mau vahi e eita vau e haere atu e hiˈopoa haere. Te ape atoa nei au i te faaea i roto i te aroâ i te po e eita vau e faaite rahi roa i te mǎtaˈu. Noa ˈtu e te ara nei au, e hiˈo vau i te mau taata mai te huru ra e e feia haavare ore ratou, ma te faatura ia ratou.”

Oia mau, a ape i te ahoaho faufaa ore. A haapao i ta outou iho mau ohipa. Eiaha roa ˈtu e faaiti i te tupuraa e e nehenehe te mǎtaˈu uˈana e haa i nia i te mau uaua uira, o te turai atoa i te mau taata haerea maitai ia ohipa ma te feruri ore. No nia i ta ˈna ohipa i roto i te mau vahi atâta, te faaite ra o Odair e: “Te tamata nei au i te faatupu i te manaˈo maitai, ma te faatupu ore i roto i to ˈu feruriraa te mǎtaˈu o te mau mea ino o te nehenehe e tupu no te mea e faatupu faufaa ore te reira i te ahoaho rahi e te riaria uˈana. Te tamata nei au i te faatura i te mau taata atoa.” Hau atu i te vai-ara-raa e i te faaatea-ê-raa i te feia huru ê mau, te faaite ra o ˈna i te tahi atu tauturu no te haavî i te mau manaˈo horuhoru o te hoê taata: “Hau atu i te reira, te tiaturi nei au i te Atua ra o Iehova, ma te haamanaˈo e aore e ohipa moe i mua i to ˈna mata e te mea atoa e tupu mai, aita ïa o ˈna i farii.”

Teie râ, aita hoê noa ˈˈe taata e hinaaro nei e ora i roto i te mǎtaˈu tamau. Hau atu, o vai o te patoi mai e e mea ino te mǎtaˈu uˈana e te hepohepo no te oraora-maitai-raa i te pae o te mau manaˈo hohonu e i te pae tino? No reira, eaha te tiaturiraa no te feia e mǎtaˈu ra e e taparahihia ratou i te hoê taime? I te mea e te riaria nei e rave rahi e e tupu te ohipa ino roa ˈˈe i te tau i mua, e ite anei tatou i te hopea o te haavîraa uˈana? Te titau manihini nei matou ia outou ia taio i te tumu parau i muri iho, “Afea te mǎtaˈu e hope ai?”