Manava i te tairururaa “Te mǎtaˈu paieti”!

E, TE fatata maira te tau o te mau tairururaa mataeinaa a te mau Ite no Iehova no te matahiti 1994. Mai te avaˈe tiunu 1994 e tae atu i te avaˈe tenuare 1995, e faaroohia te porotarama e toru mahana o te tairururaa i roto i te mau hanere oire na te ao nei—i Marite Apatoerau na mua, i muri iho i Europa Hitia e Tooa o te râ, i Asia, i Marite no Ropu e no Apatoa, i Afirika, Auteralia, e te mau motu.

Auê ïa upoo parau haaputapû i te manaˈo e—“Te mǎtaˈu paieti”! E ere te mehameha ino o te hoê taata e faaruru ra i te pohe, o te mǎtaˈu râ i te Atua, e mǎtaˈu o te horoa mai i te hau o te feruriraa e te oaoa. Te na ô ra te maseli a te Bibilia e: “Te utua o te faahaehaa e te mǎtaˈu ia Iehova, o te taoˈa rahi ïa, o te tura ïa, o te ora ïa.” (Maseli 22:4) Nafea te mǎtaˈuraa i te Atua ia faatupu i ‘te taoˈa rahi, te tura, e te ora’? E ite-papu-hia te reira ia vauvauhia te upoo parau o te tairururaa i roto i taua e toru mahana ra o tei î i te mau oreroraa parau, te mau tatararaa, te mau faahiˈoraa, e te hoê darama.

Ua papai te aposetolo Paulo e ‘eiaha e faarue i to tatou haaputuputuraa.’ (Hebera 10:25) Te haafaufaa nei te mau Ite no Iehova i te reira, e te putuputu nei ratou e toru taime i te hebedoma no te haapiiraa e te haamoriraa i roto i te amuiraa. Teie râ, e mea taa ê te tairururaa mataeinaa o te matahiti. Te tiai nei ratou i te reira ma te ru e tera ta ratou paraparauraa e rave rahi avaˈe na mua ˈˈe. Te titau manihini atu nei matou ia outou, noa ˈtu eaha ta outou haapaoraa, ia apiti mai ia ratou i ta ratou tairururaa e ia fanaˈo i te auhoaraa mahanahana kerisetiano e te mau haamaramaramaraa pae varua faufaa roa. E oaoa roa te hoê melo no te amuiraa a te mau Ite no Iehova no to outou vahi i te faaite mai ia outou e ihea roa e afea râ te tairururaa fatata roa ˈˈe i to outou vahi e faatupuhia ˈi.