Te faatiamâraa i te faaiteraahia mai o Iesu Mesia
“E oaoa râ . . . ia faaitehia mai to ˈna hanahana, ia hiemateoa outou ma te oaoa rahi.”—PETERO 1, 4:13.
1. Mea nafea Iehova i te haamaitairaa i ta ˈna mau tavini?
UA HAAMAITAI Iehova i ta ˈna mau Ite e te mau ô e rave rahi. Ei Orometua haapii rahi no tatou, ua haamaramarama mai oia ia tatou e te ite rahi no nia i to ˈna hinaaro e ta ˈna opuaraa. Na roto i to ˈna varua moˈa, ua faatupu oia i roto ia tatou i te aravihi no te amo i te maramarama ma te mǎtaˈu ore. Te faaite maira te aposetolo i faauruahia ra o Paulo i roto i te Korinetia 1, 1:6, 7 e: “E ua faaite-papu-hia te parau o te Mesia i roto ia outou na. E aita aˈenei outou i mairi i muri i te mau maitai atoa nei, i te tiairaa i to tatou Fatu ia Iesu Mesia i te [faaiteraahia] mai.”
2. Eaha te tiaturiraa oaoa ta te ‘faaiteraahia mai o to tatou Fatu ra o Iesu Mesia’ e hopoi mai?
2 ‘Te faaiteraahia mai o to tatou Fatu ra o Iesu Mesia’—eaha ïa te auraa? E tano te reira no te tau i reira o Iesu e faaitehia mai ai ei Arii hanahana, o te ohipa mai no te haamauruuru i ta ˈna mau pǐpǐ haapao maitai e no te faatupu i te tahooraa i nia i te feia paieti ore. Mai ta te Petero 1, 4:13 e faaite ra, e taime teie no te mau kerisetiano faatavaihia e te varua o tei mau maite e to ratou mau hoa taiva ore ia ‘oaoa e ia umere,’ no te mea e tapao te reira no te hopea o te faanahoraa o te mau mea a Satani.
3. Nafea tatou ia mau papu, mai ta to tatou mau taeae no Tesalonia i rave?
3 A fatata mai ai teie taime, i roto i to ˈna riri, te faarahi nei o Satani i te faateimaharaa i nia ia tatou. Mai te hoê liona uuru ra, te tamata nei oia i te amu ia tatou. E tia ia tatou ia mau papu! (Petero 1, 5:8-10) Ua faaoromai to tatou mau taeae no Tesalonia tahito, mea apî roâ ratou i roto i te parau mau, i te mau ati hoê â huru e te farereihia nei e te mau Ite no Iehova e rave rahi i teie mahana. No reira, mea faufaa roa te mau parau a te aposetolo Paulo ia ratou no tatou nei. Ua papai oia e: “E mea tia hoi i te Atua ia faautua i te feia i pohe ai outou na i te pohe; area ia outou i tei hamani-ino-hia ra, o te ora ïa ta ˈna e tuu mai no tatou atoa nei, ia fa mai te Fatu ra o Iesu mai te raˈi mai, ma tana mau melahi mana atoa ra, ma te auahi ura ra, i te tuuraa mai i te pohe i te feia aore i ite i te Atua, e tei ore i faaroo i te evanelia o to tatou Fatu o Iesu Mesia ra.” (Tesalonia 2, 1:6-8) E, e tae mai te tamǎrûraa!
4. No te aha e ua tano te haavaraa i nia i te mau upoo faatere haapaoraa o te faatupuhia i te faaiteraahia mai o Iesu?
4 I te tau o Paulo, ua faatupuhia te rahiraa o te ati e te mau upoo faaroo ati Iuda. Oia atoa i teie mahana, mea pinepine te patoiraa i nia i te mau Ite no Iehova mea au na ratou te hau, i te faatupuhia e te feia e faahua parau nei e e tia ratou no te Atua, te mau upoo faatere iho â râ a te amuiraa faaroo kerisetiano. Te faahua parau nei ratou e ua ite ratou i te Atua, teie râ, te patoi nei ratou i te Atua ‘hoê o Iehova’ a te Bibilia, ma te mono ia ˈna e te hoê Toru Tahi taa-ore-hia. (Mareko 12:29) Aita ratou e auraro ra i te parau apî maitai no nia i to tatou Fatu o Iesu, ma te tiaturi e na te faatereraa taata nei e afai mai i te tamǎrûraa e ma te patoi i te parau apî maitai o te Basileia parau-tia e haere maira a te Mesia. E tia ia haamouhia teie feia patoi atoa i te pae faaroo i te tau o ‘te faaiteraahia mai te Fatu ra o Iesu mai te raˈi mai’!
Te “haerea mai” o Iesu Mesia
5. Nafea te faaiteraahia mai o Iesu i te faahohoˈaraahia i roto i te Mataio 24:29, 30?
5 Ua faataa-papu-hia mai teie faaiteraahia e Iesu i roto i te Mataio 24:29, 30. Ma te faataa mai i te mau tuhaa huru rau o te tapao o to ˈna vairaa mai e te hopea o te faanahoraa o te mau mea, te na ô ra oia e: “E haapourihia te mahana, e ore hoi te marama e anaana mai, e mairi mai hoi te mau fetia o te raˈi, e e pau hoi te mana o te raˈi i te ueuehia.” I taua taime ra, “ei reira e itea mai ai te tapao no te Tamaiti a te taata i nia i te raˈi ra.” “Ei reira” te mau nunaa o te fenua nei “e oto ai, ia hiˈo ratou i te Tamaiti a te taata [te Arii Mesia a te Atua] i te haerea mai na nia i te ata o te raˈi ra, ma te mana e te hanahana rahi.” E tano teie “haerea mai,” o er·khoʹme·non na roto i te reo Heleni, no te faraa mai o Iesu ei Taata tahoo a Iehova.
6, 7. Mea nafea te parau “e ite te mau mata atoa ia ˈna” e tupu ai, e o vai te faahitihia ra i roto?
6 Te faataa-atoa-hia ra teie “haerea mai” e te aposetolo Ioane i roto i te Apokalupo 1:7, i reira oia e parau e: “Inaha, te haere mai na oia i roto i te ata.” Parau mau, eita teie mau enemi e ite roa ˈtu ia Iesu e to ratou mata mau, inaha, te auraa o “te ata” oia hoi e haere mai oia ma te itea-ore-hia no te faatupu i te haavaraa. Mai te peu e e tia i te mau taata ia hiˈo atu i to ˈna hanahana no te raˈi ra e te mata paruru-ore-hia, e matapohia ïa ratou, mai ia Saulo, i nia i te purumu e aratai i Damaseko ra, i te mataporaahia i to Iesu tei faahanahanahia faraa mai ia ˈna i roto i te anaparaa uira rahi.—Ohipa 9:3-8; 22:6-11.
7 Te faaite ra te faatiaraa a te Apokalupo e “e ite te mau mata atoa ia ˈna, e te feia atoa i patia ia ˈna ra: e e auê te mau opu atoa o te ao nei ia ˈna.” Te auraa e e taa i te feia patoi i nia i te fenua i roto i te haamouraa ta Iesu e ninii mai i nia ia ratou e te haere maira oia ma te puai e te hanahana rahi ei Mauhaa na Iehova. No te aha teie mau enemi e parauhia ˈi e “te feia atoa i patia ia ˈna ra”? No te mea e au to ratou haerea hiˈo ino i nia i te mau tavini a Iehova i teie mahana, i to te feia hamani ino ia Iesu. Oia mau, e ‘auê ratou i te oto ia ˈna.’
8. Eaha te faaararaa ta Iesu e ta Paulo i horoa no nia i te haamouraa taue?
8 Mea nafea taua mahana tahooraa a Iehova e tae mai ai? I roto i te parau tohu a Luka pene 21, te faataa ra o Iesu i te mau tupuraa ahoaho o tei riro ei tapao no to ˈna vairaa mai mai te matahiti 1914 mai â. I muri iho, i te mau irava 34 e te 35, te faaara ra o Iesu e: “E ara râ ia outou, o te teimaha outou i te rahi o te maa e te taero, e te peapea o teie nei ao, a roohia mai ai outou e taua mahana ra aore i manaˈohia. E roohia mai hoi to te ao atoa nei i te reira mai te marei ra.” Oia mau, e tae mai taua mahana tahooraa ra a Iehova ma te hitimahuta, e te oioi! Te haapapu ra te aposetolo Paulo i te reira i roto i te Tesalonia 1, 5:2, 3, i te na ôraa e: “Te haere maira taua mahana o te Fatu ra, mai te haerea mai o te eiâ i te po ra. E parau hoi te taata e, E hau, e aita e ino, ei reira ra ratou e roohia-noa-hia mai ai e te pohe oioi.” I teie nei atoa, te faahiti nei te mau nunaa i te parau no te hau e te ino ore e te faaau nei ratou i te haapuai i te mau Nunaa Amui no te faahau i te mau vahi arepurepu na roto i te ravea o te puai a te nuu.
9. ‘Ua nehenehe te maramarama’ no vai, e no te aha?
9 I roto i te mau irava 4 e te 5, te na ô râ te aposetolo ia tatou e: “Area outou, e te mau taeae, aore ïa i roto i te pouri, a roohia mai ai outou e taua mahana mai te eiâ ra. E tamarii anaˈe outou no te maramarama, e tamarii no te ao; e ere tatou i to te po, e to te pouri.” Te oaoa nei tatou i te riroraa ei mau tamarii no te maramarama—e feia amo i te maramarama i mua i te feia e titau nei i te hau e te ino ore mau i roto i te ao apî a te Atua. I roto i te Salamo 97:10, 11, te taio nei tatou e: “O outou o tei hinaaro ia Iehova ra, ia riaria outou i te ino; te tiai ra oia i te varua o to ˈna feia moˈa ra; e te faaora ra oia ia ratou i te rima o te paieti ore ra. Ua ueuehia te maramarama na te feia parau-tia ra, e te oaoa na te feia i tia te aau ra.”
Te tupuraa o te mau ohipa
10. Eaha te poroi faaite-atea-hia te tia ia tatou ia pee no nia i te mahana tahooraa a te Atua? (Apokalupo 16:15)
10 E tupu te mau ohipa i roto i teihea faanahoraa ia haamata anaˈe te ati rahi? E hiˈo anaˈe na tatou i te Apokalupo pene 16. A tapao na, ia au i tei faataahia i te mau irava 13 e tae atu i te 16, e e haaputuputu te mau varua viivii e te demoni i te mau nunaa o te fenua atoa i Aramagedo, te tamaˈi o te mahana rahi o te Atua Mana Hope ra. I reirâ, te haapapuhia ra te fatataraa mai o te mahana tahooraa mai te eiâ ra te huru, e te faaarahia ra tatou ia vai ara noa—ia tapea noa i te mau ahu pae varua o te tapao ia tatou no te faaoraraa. Ua tae mai te taime no te haavaraa i te mau nunaa o te fenua, te mau fenua, e—te tahi atu taata. O vai ïa tera?
11. Mea nafea te vahine o te Apokalupo 17:5 e faaite ai e o vai o ˈna?
11 O te hoê ïa vahine taipe o tei tamata i te faariro ia ˈna ei vahine “tiaraa teitei.” Te faataahia ra oia i roto i te Apokalupo 17:5 mai te hoê “mea aro, o Babulonia rahi, o te metua vahine o te mau faaturi, e no te mau mea faufau o te ao nei.” E ere faahou râ o ˈna i te hoê mea aro no te mau Ite no Iehova. Ua haapapu-maitai-hia e o ˈna te hau emepera o te haapaoraa hape na te ao nei, e o te mau pǔpǔ faaroo a te amuiraa faaroo kerisetiano te tuhaa rahi roa ˈˈe. Mea faufau roa i mua i te aro o Iehova to ˈna faaôraa ˈtu i roto i te mau ohipa politita, to ˈna ‘taeroraa i te toto o te feia moˈa’ na roto i te hamani-ino-raa i te mau kerisetiano mau, e to ˈna hararaa i te toto o “te feia atoa i taparahihia i teie nei ao,” e tae noa ˈtu hau atu i te hoê hanere mirioni feia i pohe i roto i te mau tamaˈi o teie anaˈe senekele e 20.—Apokalupo 17:2, 6; 18:24.
12. No te aha te mau pǔpǔ faaroo a te amuiraa faaroo kerisetiano e faautuahia ˈi?
12 Te mea ino roa ˈtu â, ua tuu te mau pǔpǔ faaroo a te amuiraa faaroo kerisetiano i te vahavaha i nia i te iˈoa o te Atua o ta ratou e parau ra ma te haavare e e tia ratou no ˈna. Ua haapii ratou i te mau tatararaa philosopho no Babulonia e no Heleni maoti hoi i te Parau a te Atua viivii ore e e tuhaa ta ratou i roto i te toparaa morare o te mau nunaa atoa na roto i te fariiraa i te mau huru oraraa faatia noa o te ofati nei i te mau faaueraa tumu a te Bibilia. Te faautuahia ra te feia tapihoo nounou i rotopu ia ratou e te mau parau a Iakobo 5:1, 5: “E tena na, e te feia taoˈa rarahi na, a oto, a auê, i to outou mau pohe rarahi e fatata mai ia outou na. Ua parahi outou i te ao nei ma te navenave, e te taiata; ua haaporia outou ia outou iho, mai tei te mahana taparahiraa puaa ra.”
I raro e o Babulonia Rahi!
13. Mea nafea te haamataraa o te ati rahi e tae mai ai, e eaha te titauraa ru e haapapuhia ra i roto i te Apokalupo 18:4, 5?
13 E haamata te ati rahi na roto i te tupuraa o te haavaraa a Iehova i nia ia Babulonia Rahi. Te faataa papu ra te Apokalupo 17:15-18 i te “manaˈo” o te Atua—e aratai i na “tara hoê ahuru,” te mau nuu puai no roto mai i te “puaa” o te mau Nunaa Amui, ia taparahi ia ˈna. “E na tara hoê ahuru ta oe i hiˈo ra, e te puaa ra, e faufau ïa i taua faaturi ra, e e pau oia ia ratou i te haru, e e veve roa [e e vai tahaa roa], e e amu i to ˈna tino, e e tutui ia ˈna i te auahi. Ua tuu hoi te Atua i te manaˈo i roto i to ratou aau ia rave ratou i to ˈna hinaaro.” Eita e maerehia ia faaoto te hoê reo no te raˈi mai i te hoê faaararaa ru i roto i te Apokalupo 18:4, 5: “A haere ê mai na outou i rapae, e au mau taata e, ia ore outou ia riro ei rave atoa i ta ˈna ra mau hara, ia ore outou ia pohe atoa i to ˈna ra mau pohe. Ua taea hoi te raˈi i ta ˈna ra mau hara, e ua manaˈo te Atua i ta ˈna ra mau parau-tia ore.” Te tamau noa nei teie pii i te haapararehia: A tâpû i te mau taairaa atoa e te haapaoraa hape, hou e maoro roa ˈi!
14. O vai te oto i nia i te haamouraa o Babulonia Rahi, e no te aha?
14 Nafea te ao nei ia hiˈo i te haamouraa o Babulonia Rahi? Ma te faaea i te atea ê, e oto te feia politita tia ore—“te mau arii o te ao nei”—i nia ia ˈna no te mea ua ite ratou i roto i te roaraa o te mau senekele i te navenave i roto i ta raua faaturi i te pae varua. Te oto e te auê atoa ra te feia nounou i te pae tapihooraa i nia ia ˈna, “te mau hoo taoˈa o te ao nei . . . o tei taoˈahia ia ˈna ra.” E tia noa atoa ˈtu ratou i te atea ê ia ˈna, i te na ôraa e: “Auê te oire rahi nei e, auê, o tei ahu i te ahu hua, e te uraura, e te uteute, o tei faaunauna hoi i te auro, e te ofai maitatai, e te poe e! O teie nei taoˈa rahi hoi i te pau roa i te hora hoê nei e!” E haamou-roa-hia te unauna o te mau ahu ekalesiatiko e te nehenehe o te mau fare pure rarahi o te ao nei! (Apokalupo 18:9-17) Teie râ, e oto anei te mau taata atoa i nia ia Babulonia Rahi?
15, 16. Eaha te tumu e oaoa ˈi te nunaa o te Atua?
15 Te pahono ra te Apokalupo 18:20, 21 e: “A oaoa ia ˈna, e to te raˈi ê, e o outou hoi, e te mau aposetolo moˈa e te mau peropheta; ua tahoo hoi te Atua ia ˈna ia outou.” Mai te hoê ofai rahi e taorahia i roto i te miti, “mai te reira atoa te oire rahi ra o Babulonia i te huri-uˈana-hia i raro, e e ore roa e itea-faahou-hia ˈtu.”
16 Auê ïa tumu no te oaoa e! Te haapapu ra te Apokalupo 19:1-8 i te reira. E maha taime te pii, “Haleluia, [e au mau taata e!]” i te faaroohia mai te raˈi mai. Te arue nei na Haleluia matamua e toru ia Iehova no te mea ua faatupu oia i te haavaraa tia i nia i te vahine faaturi faufau ra, o Babulonia Rahi. Aita faahou te hau emepera o te haapaoraa hape na te ao nei! E na roto mai te reo i te terono o te Atua, i te na ôraa e: “E haamaitai i to tatou Atua, o outou atoa o to ˈna ra mau tavini o outou hoi o tei mǎtaˈu ia ˈna ra, o te taata rii, e te feia rarahi.” Auê ïa haamaitairaa e i te apitiraa ˈtu i roto i teie himene!
Te faaipoiporaa o te Arenio
17. Ia faaauhia te Apokalupo 11:17 e 19:6, i roto i teihea mau huru tupuraa e piti, o Iehova e haamata ˈi i te faatere ei Arii?
17 Te faahiti nei te maharaa o te Haleluia i te tahi atu tumu parau: “Haleluia[, e au mau taata e]: tei [ia Iehova] tei te Atua Puai hope ra te hau [ei arii].” Aita râ anei teie parau e faahiti-atoa-hia ra i roto i te Apokalupo 11:17? Te taio nei tatou i reira e: “E haamaitai matou ia oe, e [Iehova], e te Atua Mana Hope, . . . no te mea, ua faatupu oe i to oe mana rahi, e ua riro te hau ia oe.” E. Teie râ, te faahiti ra te Apokalupo 11:17 i to Iehova haamauraa i te Basileia Mesia i te matahiti 1914 no “te tavana i te mau fenua atoa ma te sepeta auri ra.” (Apokalupo 12:5) Tei roto te Apokalupo 19:6 i te anairaa parau o te haamouraa o Babulonia Rahi. Ia haamouhia te haapaoraa e au i te vahine faaturi ra, e faatiamâhia te tiaraa Atua o Iehova. E riro te haamoriraa ia ˈna ei Atua e ei Arii Hau aˈe i te haamauhia i teie nei e a muri noa ˈtu!
18. E iriti te haamouraa o Babulonia Rahi i te eˈa no teihea poroi oaoa?
18 I reira ïa te poroi oaoa ra e piihia ˈi: “E oaoa tatou, e ia rahi atu â te oaoa, e e haamaitai hoi ia [Ia]: ua tae hoi i te faaipoiporaa a te Arenio, e ua faanehenehe ta ˈna vahine ia ˈna iho. E ua tuuhia ia ˈna te ahu i te ahu hua teatea e te anaana: e taua ahu hua ra, o te parau-tia ïa a te feia moˈa ra.” (Apokalupo 19:7, 8) Aita i haapapuhia e afea râ te feia faatavaihia e vai noa mai i nia i te fenua e fanaˈo ai i to ratou tia-faahou-raa i nia i te raˈi. Teie râ, e papu tatou ia au i te anairaa irava i ǒ nei e e riro to ratou apitiraa ˈtu i roto i te faaipoiporaa o te Arenio, o Iesu Mesia, ei taime oaoa, e hau atu â i te mea e ua ite mata roa ˈtu ratou i te faahaehaaraahia te vahine faaturi faufau ra, o Babulonia Rahi.
E haamouhia te ao a Satani
19. Eaha te tahi atu tupuraa e faataahia ra i roto i te Apokalupo 19:11-21?
19 E fa faahou mai te puaahorofenua teatea i faahiti-na-mua-hia i te Apokalupo 6:2. Te taio nei tatou i roto i te Apokalupo 19:11 e: “O tei parahi i nia ihora [i te puaahorofenua teatea], ua parauhia oia, e Haapao mau ta ˈna e Te Parau mau, e haava oia, e te tamaˈi hoi i te tamaˈi ma te parau-tia ra.” E horo ïa te “Arii o te mau Arii, e te Fatu o te mau Fatu” no te tairi i te mau nunaa e no te taataahi i “te neneiraa uaina ra o te hoturaa rahi o te riri o te Atua Puai hope ra.” Aita e faufaa ia haaputuputu “te mau arii o te ao nei, e ta ratou mau nuu” no te aro i te tamaˈi o Aramagedo. E faaoti Tei parahi i nia i te puaahorofenua teatea i ta ˈna haruraa. Aita hoê aˈe mea e toe i te faanahonahoraa a Satani i nia i te fenua.—Apokalupo 19:12-21.
20. Eaha te roohia i te Diabolo iho?
20 Eaha ïa no te Diabolo iho? I roto i te Apokalupo 201-6, te faataahia ra o Iesu Mesia mai “te hoê melahi i te pouraa mai mai te raˈi mai, e tei ia ˈna te taviri o te abuso ra, e e fifi rahi auri tei tana rima.” E haru oia i te teni, te Ophi tahito ra, oia hoi o te Diabolo ra o Satani, e ruuruu oia ia ˈna a taora ˈtu ai ia ˈna i roto i te abuso, e e opani oia e e tuu oia i te tapao i nia iho ia ˈna. I te mea e ua tiavaruhia o Satani e eita ta ˈna e nehenehe faahou e haavare i te mau nunaa, e haamata te Faatereraa hanahana Tausani Matahiti a te Arenio e ta ˈna vahine faaipoipo. E ore roa te roimata oto ra! E ore roa te pohe no ô mai ia Adamu ra! Aita e mihi, e auê, e mauiui faahou! “Ua mou te mau mea tahito ra.”—Apokalupo 21:4.
21. A tiai ru ai tatou i te faaiteraahia mai o Iesu Mesia, eaha te tia ia tatou ia opua papu?
21 A tiai ru ai tatou i te faaiteraahia mai o to tatou Fatu ra o Iesu Mesia, ia faaitoito tatou e tia ˈi, i te faaiteraa ia vetahi ê i te mau parau tǎpǔ aroha o te Basileia a te Atua. Fatata roa te faatiamâraa! E haere anaˈe tatou i mua, eiaha e faaea i te haere i mua, ei mau tamarii haamaramaramahia a te Fatu Mana Hope ra o Iehova!
Ei haamanaˈoraa
◻ Na te aha e faaite ra e ua fatata roa te faaiteraahia mai o Iesu Mesia?
◻ Nafea te mahana tahooraa a Iehova e tae mai ai?
◻ Nafea te ‘feia e here ra ia Iehova’ ia hiˈo i te huru tupuraa o te ao nei?
◻ E tupu te mau ohipa ia au i teihea faanahoraa ia tairi mai te ati rahi?
[Hohoˈa i te api 23]
E haere mai o Iesu ‘e te ata ra,’ ma te itea-ore-hia, no te faatupu i te haavaraa
[Hohoˈa i te api 25]
Fatata roa te haapaoraa hape, te faanahoraa ino a Satani, e o Satani iho i te hiˈa