Te mau ohipa rahi atu â i te tau o te vairaa mai o te Mesia
“Ei reira te arii e parau aˈe ai i tei tana rima atau ra, A haere mai outou, e te feia i faaorahia e tau Metua, e parahi i te basileia i haapaohia no outou mai te hamaniraa mai o te [ao] nei ra.”—MATAIO 25:34.
1. I roto i teihea auraa te pa·rou·siʹa o te Mesia i riro ai mai “te anotau ra ia Noa ra”?
TE VAIRAA mai o te Mesia—ohipa tiai-maoro-hia! Ua tae mai te tau mai “te anotau ra ia Noa ra,” o ta Iesu i faahiti ia au maite i ‘te hopea o te faanahoraa o te mau mea,’ i te matahiti 1914 ra. (Mataio 24:3, 37) Eaha râ te auraa o te vairaa mai o te Mesia, aore ra pa·rou·siʹa, no te toea faatavaihia o “te tavini haapao maitai e te paari”? (Mataio 24:45) Oia hoi, e tia ia ratou ia rohi hau atu â ei feia amo i te maramarama! E mau ohipa faahiahia mau o te tupu! E haamata te hoê ohipa haaputuputuraa aita i tupu aˈenei.
2. Eaha te tamâraa i tupu ia au i te Malaki 3:1-5?
2 Na mua râ, mea titauhia ia tamâhia teie mau kerisetiano faatavaihia. Mai ta Malaki 3:1-5 i tohu na, ua haere mai te Atua ra o Iehova e ta ˈna “vea a te faufaa,” o Iesu Mesia, e hiˈopoa i te hiero i te pae varua i te tau uaaraa tiare o te matahiti 1918. E haamata te haavaraa e “te utuafare o te Atua.” (Petero 1, 4:17) Ua tohu te Malaki 3:3 e: “E parahi mai oia [Iehova] mai te tamâ e te haamaitai i te ario ra: e na ˈna e tamâ i te tamarii a Levi, e haamaitai hoi ia ratou mai te auro e te ario ra.” E tau te reira no te haamaitairaa e te tamâraa.
3. No te aha e mea faufaa e ia tupu te tamâraa pae varua?
3 Na roto i teie haavaraa, o tei naeahia i to ˈna faito puai roa ˈˈe i te matahiti 1918, ua tamâhia te toea o te pǔpǔ a te tavini i te viivii o teie nei ao e to te pae faaroo. No te aha o Iehova i tamâ ˈi ia ratou? No te mea, ua ohipa te reira i nia i to ˈna hiero i te pae varua. O te faanahoraa ïa tei faaauhia i te hiero no te haamoriraa ia Iehova na nia i te niu o te tusia taraehara o Iesu Mesia. Ua hinaaro o Iehova e ia riro to ˈna hiero ei vahi mâ ia nehenehe te mau tiaa rahi o te feia haamori e tiaturi e ora i nia i te fenua e afaihia mai i reira, e ite ïa ratou i te hoê vahi i reira to ˈna tiaraa arii mana hope e faaturahia ˈi, i reira to ˈna iˈoa atua e faaraahia ˈi, e i reira ta ˈna mau ture parau-tia e aurarohia ˈi. No reira, e mauruuru ïa ratou ia Iehova e e apiti ratou i roto i te faaiteraa i ta ˈna mau opuaraa faahiahia.
Te mau hopoia ê atu
4, 5. (a) Mea nafea te hoê uiraa a Iesu Mesia e tamata ˈi i te taata taitahi o te pǔpǔ a te tavini i teie mahana? (b) Mea na roto i teihea mau ravea e taahia ˈi te auraa o te mau parau “tavini haapao maitai e te paari” e ‘ta ˈna feia tavini’? (c) Eaha te hopoia ta Iesu i horoa na ta ˈna tavini?
4 I te matahiti 1919, ua nehenehe te pǔpǔ a te tavini tei tamâhia e titau i te mau ohipa tei faarahihia. I te matahiti 1914 ra, ua noaa mai ia Iesu Mesia, to ratou Fatu, te Basileia i nia i te raˈi. I to ˈna hoˈiraa mai i to ˈna feia haapao i to ˈna utuafare ra no te hiˈopoa i ta ˈna mau “tavini” atoa, ua faatoroahia oia i to ˈna tura arii, o tei ore i noaa ia ˈna i to ˈna oraraa mai i nia i te fenua nei. Eaha ta ˈna i ite? Te ohipa ra anei te pǔpǔ a te tavini no te haapao i te mau faufaa a te Fatu? Mai tei faaitehia i roto i te Mataio 24:45-47, ua ui o Iesu i te hoê uiraa o tei titau i te pǐpǐ faatavaihia tataitahi ia hiˈopoa i to ˈna iho pûpûraa i te Mesia a Iehova: “O vai hoi te tavini haapao maitai e te paari, ta to ˈna ra fatu i faatavana i to ˈna utuafare [te feia tavini] ei hopoi atu i ta ratou maa i te hora mau ra? E ao to te reira tavini, to tei roohia mai e to ˈna ra fatu te na reira ra. Oia mau ta ˈu e parau atu ia outou nei, e faariro oia ia ˈna ei tiaau i te mau taoˈa atoa na ˈna ra.”
5 Ma te papu maitai, eita teie faataaraa a Iesu no nia i ta ˈna tavini haapao maitai e tano no te hoê anaˈe iho taata. Eita, tera râ, te tano ra no te amuiraa haapao maitai tei faatavaihia a te Mesia i roto i to ˈna taatoaraa, oia hoi ei pǔpǔ. Te utuafare [aore ra feia tavini], o te mau pǐpǐ faatavaihia ïa a te Mesia tei rave-tataitahi-hia. Ua ite o Iesu e e hoo mai oia i teie feia faatavaihia e to ˈna iho toto, ua tano ïa oia i te faahiti ia ratou i roto i to ratou taatoaraa ei tavini na ˈna. Te parau ra te Korinetia 1, 7:23 no ratou e: “Ua tauihia outou [ia rave-taatoa-hia ratou] i te taui; eiaha outou ia riro ei tavini no te taata.” Ua faaue Iesu i te pǔpǔ o ta ˈna tavini ia faaanaana i to ratou maramarama no te huti mai e no te faariro i te tahi atu mau pǐpǐ e ia faaamu mǎrû noa i ta ˈna feia tavini na roto i te horoaraa ˈtu i te maa pae varua i te taime mau ra.
6. Mea nafea te tavini i te haamauruururaahia i muri aˈe i te hiˈopoaraa a Iesu?
6 Mai te tau a haamata ˈi te vairaa mai o te Mesia e tae roa mai i te matahiti 1918, ua tutava te pǔpǔ o te tavini, noa ˈtu e te au-ore-raahia mai ratou, te hamani-ino-raa, e tae noa ˈtu i te huananeraa, no te horoa i te maa i te feia tavini i te taime mau ra. Te reira ta te Fatu i ite i te haamataraa o ta ˈna hiˈopoaraa. Ua mauruuru te Fatu ra o Iesu, e i te matahiti 1919, ua parau atura oia e e ao to taua pǔpǔ haapao maitai e te fariihia o te tavini ra. Eaha te haamauruururaa oaoa a te tavini no te raveraa i ta to ˈna Fatu i faaue mai ia ˈna ia rave? Ua haere to ˈna toroa i nia! Oia, ua horoahia te mau hopoia rahi atu â no te faahaereraa i te mau faufaa a to ˈna Fatu i mua. I te mea e e Arii te Fatu i teie nei i nia i te raˈi, mea faufaa roa ˈtu â ïa ta ˈna mau taoˈa i nia i te fenua nei.
7, 8. (a) Eaha ‘te mau taoˈa atoa’ a te Fatu? (b) Eaha te titauhia i te tavini ia haapao anaˈe oia i teie mau taoˈa?
7 Eaha ïa taua mau “taoˈa atoa” ra? O te mau faufaa pae varua atoa ïa i nia i te fenua o tei fatuhia mai e te Mesia ia au i to ˈna mana ei Arii i nia i te raˈi. Te vai ra ïa i roto, te hopoia e faariro i te mau taata ei pǐpǐ na te Mesia, e te haamaitairaa rahi e ohipa ei mau tia no te Basileia haamauhia a te Atua i mua i te mau nunaa atoa o te ao nei.
8 Ua titau teie toroa teitei aˈe e hiˈopoa i te mau taoˈa atoa a te Fatu e ia horoa te pǔpǔ o te tavini hau atu â i te taime e te ara-maite-raa no te rave i te ohipa a te Basileia, e oia atoa, ia faarahi atu â i te mau fare e titauhia no taua ohipa ra. Mea rahi atu â hoi ta ˈna tuhaa ohipa i teie nei—te fenua atoa nei.
Te haaputuputuraa i te mau mamoe
9. Eaha tei noaa mai na roto i te aanoraa te mau ohipa a te tavini?
9 Ma te auraro, ua faaaano atu â te pǔpǔ o te tavini haapao maitai e te paari a te Mesia i ta ˈna mau ohipa. Eaha te faahopearaa? Ua haaputuputuhia mai te mau melo hopea o te 144 000 feia faatavaihia. Ua riro maira te orama a Ioane tei papaihia i roto i te Apokalupo 7:9-17 ei tupuraa mau, te putapû e te tamahanahana. Mai te matahiti 1935 iho â râ, ua oaoa te pǔpǔ a te tavini i te iteraa i te tupu-papu-raa o teie orama. E ati noa ˈˈe te fenua nei, te haaputuputu maira “te feia rahi roa” e mau mirioni taata, na te hiti i te hiero i te pae varua o Iehova ei feia haamori ia ˈna. Ua parau te melahi a Iehova ia Ioane e eita te hoê taata e nehenehe e taio i teie feia rahi roa. Oia hoi te auraa e aita i tuuhia te hoê otia i te numera o te feia ta te pǔpǔ o te tavini e afai mai i te hiero a Iehova i te pae varua. A matara noa ˈi te uputa, e tamau noa te ohipa haaputuputuraa ia ratou.
10. Ua faaô te tavini i roto i teihea ohipa aroha i teie mahana?
10 E hopoia faufaa mau ta te pǔpǔ o te tavini haapao maitai no te haapaoraa i te mau “mamoe ê atu” o te maraa tamau noa ra, ua ite hoi ratou e mea here roa na te Fatu, o Iesu, i teie mau taata e au i te mamoe ra no roto i te mau nunaa atoa. E nǎnǎ ratou na ˈna. (Ioane 10:16; Ohipa 20:28; Petero 1, 5:2-4) No to ratou here i te Fatu e i te mau mamoe, te haapao nei te pǔpǔ o te tavini ma te oaoa i te mau hinaaro i te pae varua o te feia rahi roa.
11-13. Eaha te parau tano roa ta te peretiteni a te Taiete Watch Tower i faahiti no nia i te ohipa a te tavini?
11 E, i roto i te tuhaa rahi o te hopoia e amo i te maramarama a te tavini, te vai ra te haaputuputuraa i teie mau tavini o te Basileia a te Atua i nia i te fenua nei. Ma te faataa i te mau ohipa e rahi noa ra a te tavini haapao maitai, ua parau o F. W. Franz, o ˈna te peretiteni i taua taime ra a te Taiete Watch Tower, na mua noa ˈˈe i to ˈna poheraa i te avaˈe titema 1992 e:
12 “Ua faaohipa o Iesu Mesia i te faanahonahoraa ma te hau atu i te faahiahia i te mau taime atoa, ia au i ta ˈu i ite i roto i na matahiti e 99 o to ˈu oraraa. E ere na te hoê noa taata e aratai ra i te faanahonahoraa, o te Fatu râ o Iesu Mesia. No te mea ua manuïa oia ma te rahi e ma te faahiahia i roto i te hoê faito hau atu i ta tatou i manaˈo. I teie mahana, te vai ra ia tatou nei te hoê faanahonahoraa o tei parare na te ao atoa nei. Te ohipa nei oia i te Afa Apatoerau e te Afa Apatoa o te fenua, i te pae Hitia o te râ e i te pae Tooa o te râ. Hoê noa taata o te nehenehe e haapao i teie parareraa rahi mau â—te Tamaiti a te Atua, na ˈna e mana nei i nia i te pǔpǔ o te tavini haapao maitai e te paari. Ua faaî oia i ta ˈna mau hopoia, e te reira te tumu o te parareraa hau aˈe i te faahiahia o ta tatou i ite aˈenei.
13 “E ere teie ohipa na te hoê anaˈe taata. E faanahonahoraa teotaratia ta tatou, e te ohipa nei oia ia au i te hoê aveia teotaratia, ia au i te huru raveraa arataihia e te Atua. Aita hoê taata, e tae noa ˈtu te taata iho i haamau i te Watch Tower Bible and Tract Society, e nehenehe e parau aore ra e parauhia e na ˈna te hopoia o te ohipa i ravehia na te fenua atoa nei. Mea faahiahia mau te reira.” Aita anei te feia atoa no roto i te feia rahi roa e farii ra ma te aaurotahi i teie mau manaˈo o te taeae Franz o tei pohe? Oia mau, ua hau atu to ratou mauruuru no te mau ohipa aano atu â a te tavini haapao maitai.
Te feia auraro i te Basileia
14, 15. (a) Eaha ta Iesu i faahohoˈa i roto i te parabole o te mau taleni (Mataio 25:14-30)? (b) Ma te tano roa, eaha to muri iho i roto i te Mataio pene 25?
14 I roto i te Mataio pene 25, te faataa ra te parabole a Iesu no nia i te mamoe e te puaaniho i teie ohipa haaputuputuraa rahi i te feia e auraro i te Basileia o te Atua i nia i te fenua. I roto i te parabole na mua ˈtu, no nia i te mau taleni, te faahohoˈa ra o Iesu e e tia i te mau pǐpǐ faatavaihia e tiaturi nei e faatere e o ˈna i roto i ta ˈna Basileia i nia i te raˈi, ia ohipa no te faarahi i ta ˈna mau taoˈa i nia i te fenua. Ma te tano roa, i roto i te parabole i muri iho, te faataa ra o Iesu i te mea e titauhia i te feia e hinaaro ra e riro ei feia auraro i to ˈna Basileia o te raˈi ra.
15 A tapao na i ta ˈna mau parau i roto i te Mataio 25:31-33: “Ia tae maira te Tamaiti a te taata ma ta ˈna hanahana, e te mau melahi moˈa atoa ra, ei reira oia e parahi ai i nia iho i to ˈna terono hanahana; e e haaputuhia to te mau fenua atoa i mua i to ˈna aro: e na ˈna e faataa ia ratou mai te tiai mamoe e faataa i te mamoe i te puaaniho ra: e e tuu oia i te mamoe i tana rima atau, e te puaaniho i te rima aui.”
16. Mea nafea te mau nunaa e haaputuputuhia ˈi e te mau taata e faataa-ê-hia ˈi?
16 Ua tae mai o Iesu i roto i to ˈna hanahana i te matahiti 1914. Ma te haamata i te ohipa, e ta ˈna mau melahi atoa, ua aro aˈera oia e ua tiavaru atura i to ˈna mau enemi demoni mai nia mai i te raˈi. E tauturu te mea e tupu i muri iho i roto i ta ˈna parabole ia tatou ia taa e te faahohoˈa ra to Iesu parahiraa i nia i te hoê terono hanahana i te hoê tiaraa haavaraa i roto i te tau o to ˈna vairaa mai. Te auraa o te haaputuputuraahia te mau nunaa atoa i mua ia ˈna, oia hoi e ohipa Iesu i nia i te mau nunaa mai te hoê nǎnǎ na ˈna ra, ia au i te hoê auraa parau. E nǎnǎ teie, e amui ra i te mau mamoe e te mau puaaniho. Peneiaˈe e titauhia te afa mahana no te faataa i te mau mamoe e te mau puaaniho i roto i te hoê nǎnǎ mau, area te ohipa faataa-ê-raa i te taata e tiamâraa to ratou no te maiti i nia i te fenua ra, mea maoro atu â ïa. No te mea ua niuhia teie faataa-ê-raa i nia i te haerea o te taata tataitahi.
17. No te aha e mea faufaa roa te huru tupuraa i teie mahana no te mau taata atoa?
17 I roto i te parabole, te tuu nei te Arii-Tiai mamoe i te feia e au i te mamoe i to ˈna rima atau e te feia e au i te puaaniho i to ˈna rima aui. Te rima atau, o te hoê ïa haavaraa ma te faahopearaa maitai—te ora mure ore. Te rima aui ra, o te hoê ïa haavaraa au ore—o te haamouraa mure ore. E mau faahopearaa faufaa mau to te faaotiraa a te Arii i roto i teie tuhaa.
18. No te aha e ore te huru ite-ore-hia o te Arii e riro ei otoheraa no te taata?
18 Eita te huru ite-ore-hia o te Tamaiti a te taata e faatere ra i roto i to ˈna vairaa mai, aore ra pa·rou·siʹa, e riro ei otoheraa no te taata. Te rahi noa ˈtura te feia e au i te mamoe o te apiti mai nei i teie mahana i te pǔpǔ a te tavini i roto i te pororaa i te parau apî maitai o te Basileia o te Atua na te ao atoa nei, ma te faaanaana i to ratou maramarama. Oia mau, ua naeahia ta ratou faaite-haere-raa i te mau poro atoa o te fenua nei.—Mataio 24:14.
19. Eaha te mau huru maitatai o te pǔpǔ a te mau mamoe o te faahohoˈahia ra i roto i te parabole o te mamoe e te puaaniho?
19 No te aha te Arii-Tiai mamoe e haamauruuru ai i te feia no roto i te pǔpǔ o te mau mamoe e te hoê oraraa oaoa no a muri aˈe? No to ratou turu rotahi i te ohipa pororaa i te Basileia e te hamani maitai o ta ratou e faaite nei i nia i to ˈna mau taeae faatavaihia, ta Iesu e hiˈo nei mai te mea e te ravehia ra i nia ia ˈna iho. No reira, e parau atu te Tamarii arii ra a te taata ia ratou e: “A haere mai outou, e te feia i faaorahia e tau Metua, e parahi i te basileia i haapaohia no outou mai te hamaniraa mai o te [ao] nei ra.”—Mataio 25:34; 28:19, 20.
Te tautururaa i te Arii
20, 21. Eaha te haapapuraa ta te mau mamoe e horoa ra e te tia nei ratou i te pae o te Basileia?
20 A tapao na e ia titau te Arii i teie mau mamoe ia fanaˈo i te tufaa a te Basileia o te Atua i nia i te fenua, e maere ratou. E ani atu hoi ratou ia ˈna e: ‘E te fatu, afea matou i te raveraa i teie mau mea atoa no oe?’ E pahono mai oia e: “Oia mau ta ˈu e parau atu ia outou nei, O outou i na reira i te hoê taeae iti haihai roa i roto i tau mau taeae nei, ua na reira mai ïa outou ia ˈu.” (Mataio 25:40) I to Iesu faraa mai i mua ia Maria Magadala i te mahana o to ˈna tia-faahou-raa, ua faahiti oia i to ˈna mau taeae pae varua i to ˈna parauraa ˈtu ia ˈna e: “E haere râ oe i tau mau taeae ra.” (Ioane 20:17) I te tau o to ˈna vairaa mai itea-ore-hia, o te hoê noa toea iti o te mau 144 000 o te mau taeae o Iesu o te ora noâ i nia i te fenua.
21 I te mea e mea itea-ore-hia o Iesu i nia i te raˈi, mea na roto ïa i te tahi atu arai to te feia e au i te mamoe e rave ai i teie mau ohipa aroha i nia ia ˈna. Te ite nei ratou ia ˈna i nia i to ˈna terono na roto noa i to ratou mata o te faaroo. Te mauruuru nei Iesu i te mau tutavaraa atoa o ta ratou e rave nei no te turu i to ˈna mau taeae i te pae varua, o te riro ei feia aiˈa apiti no ˈna i nia i te raˈi. Te faariro nei oia i te mea e ravehia i nia i to ˈna mau taeae mai te mea e te ravehia ra i nia ia ˈna iho. Te hamani maitai nei te feia e au i te mamoe ma te aau tae i te mau taeae o te Mesia no te mea te farii nei ratou i teie tiaraa to ratou. Te taa ra ia ratou e ua riro te mau taeae o Iesu i te pae varua ei mau tia no te Basileia o Iehova, e te hinaaro nei ratou e horoa i te haapapuraa e te rave nei ratou i to ratou tiaraa i pihai iho ia ratou i te pae o taua Basileia nei.
22. Mea nafea te pǔpǔ o te mau mamoe ia haamauruuruhia? (A faaau e te Apokalupo 7:14-17.)
22 Ua ite ê na Iehova e e fa mai teie pǔpǔ e au i te mamoe ra i teie tau o te vairaa mai o ta ˈna Tamaiti, e ua faaherehere oia i te hoê haamauruururaa faahiahia roa no ratou! E fanaˈo te feia rahi roa i te mau haamaitairaa o te hau i nia i te fenua i roto i te Faatereraa Tausani Matahiti oaoa a te Arii o Iehova, o Iesu Mesia.
23. Mea nafea te mau mamoe ia tauturu i te mau taeae o te Arii ma te ite?
23 Ia hiˈopoa tatou i te mau parau tohu a te Bibilia e tano i te tau o te vairaa mai o te Mesia, e oia atoa te parabole a Iesu no nia i te mamoe e te puaaniho, eaha ta tatou e ite ra? Teie ïa: E ere na roto i te hamani-maitai-raa ma te taa ore aore ra ma te tupuraa matapo i te hoê o te mau taeae pae varua o te Arii, te hoê taata e riro mai ai ei mamoe tiaraa parau-tia i mua i te Atua e ta ˈna Arii. Ua ite te feia no roto i te pǔpǔ o te mau mamoe e eaha ta ratou e rave ra, noa ˈtu e eita ratou e ite mata roa ˈtu i te Arii e faatere ra. Te faaitoito nei ratou i te tauturu i te mau taeae o te Arii eiaha i te pae materia anaˈe, i te pae varua atoa râ. Nafea? Na roto i te tururaa ia ratou i roto i te pororaa i te parau apî maitai o te Basileia o te Atua e te faatereraa i te mau haapiiraa bibilia no te faariro i te taata ei pǐpǐ no te Mesia. No reira, i teie mahana ua hau atu i te maha mirioni feia poro e amo ra i te maramarama o te Basileia o te Atua.
Te mau ohipa faarahihia
24. Eaha te mau ohipa aroha tei faariro i te pǔpǔ o te tavini ei feia oaoa roa ˈˈe i i nia i te fenua i teie mahana?
24 E faahiti anaˈe na vetahi o te mau ohipa maitatai a te pǔpǔ o te tavini haapao maitai. A tahi, ua faatoroahia te pǔpǔ o te tavini i nia i te mau taoˈa atoa a te Fatu—te mau faufaa o to ˈna Basileia i nia i te fenua—e te haere noa ra teie mau taoˈa i te rahi. A piti, te faaamu nei teie pǔpǔ eiaha noa i te feia tavini faatavaihia, oia atoa râ te feia rahi roa e maraa noa ra o te mau mamoe ê atu e te maa pae varua. A toru, te rave nei te pǔpǔ o te tavini i te upoo i roto i te haaparareraa i te maramarama o te Basileia. A maha, te parareraa rahi roa ˈˈe o ta ˈna mau ohipa, o te haaputuputuraa ïa i te feia rahi roa o te mau mamoe ê atu, ma te aratai atu ia ratou i te hiero pae varua a Iehova ra. A pae, te faanaho nei te pǔpǔ o te tavini, ma te turu rotahi a te feia e au i te mamoe, i te mau fare rarahi no te faanahonahoraa i te mau amaa na te ao nei, e tae noa ˈtu i te pu rahi i te mau Hau amui no Marite. Ua faariro teie mau ohipa aroha atoa i te pǔpǔ a te tavini ei nunaa oaoa roa ˈˈe o te fenua i teie mahana, e ua faariro atoa ratou i te mau mirioni taata ê atu ei feia oaoa. Te haamauruuru nei teie mau taata atoa i te Atua ra o Iehova e ia Iesu Mesia, o tei aratai i te mau ohipa faarahihia a te tavini paari!
25. Mea nafea te mau mamoe ia tamau noa i te turu i te pǔpǔ o te tavini, e eaha to ratou tiaturiraa?
25 Te ohipa puai nei te pǔpǔ o te tavini i teie nei no te haapao i ta ˈna mau hopoia no ǒ mai i te Atua ra. Mea iti roa te taime e toe ra hou te “ati rahi” e tupu ai! (Mataio 24:21) Auê te faufaa e, e ia faaea noa te feia tei riro ei mamoe no te Atua i te pae atau fariihia a to ˈna Arii-Tiai mamoe! No reira, ia tamau noa tatou i te turu ma te itoito i te tavini haapao maitai e te paari, e tia ˈi. Mea na roto noa i te na reiraraa e nehenehe ai te mau mamoe atoa i te hoê mahana tei fatata roa mai, e faaroo i teie mau parau oaoa: “A haere mai outou, e te feia i faaorahia e tau Metua, e parahi i te basileia i haapaohia no outou mai te hamaniraa mai o te [ao] nei.”
E nehenehe anei outou e pahono mai?
◻ Eaha te haavaraa matamua e tupu i muri aˈe i te faateronoraahia te Arii?
◻ Mea nafea te Mataio 24:45-47 e tupu ai i teie nei mahana?
◻ No nia i te parareraa o te ohipa, no teihea mea te pǔpǔ o te tavini e te feia rahi roa e mauruuru roa ˈi?
◻ Mea nafea te Mataio 25:34-40 e tupu ai i roto i te pa·rou·siʹa?
[Hohoˈa i te api 16]
Te horoa nei te fatu e na ta ˈna tavini haapao maitai e tiai i ta ˈna mau taoˈa atoa
[Hohoˈa i te api 18]
Ua rave o Iesu i to ˈna terono hanahana no te haava i te mau nunaa e te mau taata