Te mahana o te Fatu ra: Eaha ïa to ˈna auraa no outou?
“E arii hoi oe i rotopu i to mau enemi ra.” — SALAMO 110:2
1-3. a) No te aha te haamataraa te mahana o te Fatu i riro ai ei tau aroraa, e eaha vetahi o te mau re i noaa ia Iesu? b) Mea nafea to Iesu “haereraa e haapau e ia pau atu â”?
I TE MATAHITI 1914 ra to Iesu haamauraahia ei Arii no te Basileia o te Atua e te haamataraa te mahana o te Fatu ra. Ua tia hoi i taua arii apî ra ia faaruru atu i te hoê patoiraa uˈana no ǒ mai i te Diabolo ra ia Satani e to ˈna mau rave ohipa i nia i te fenua nei (Salamo 2:1-6). Ua riro atura ïa te mau matahiti o te Fatu ei anotau aroraa i reira to Iesu ‘ariiraa i rotopu i to ˈna mau enemi’. — Salamo 110:2.
2 E rave rahi mau re faahiahia mau tei noaa i taua Arii apî ra. I muri aˈe i te matahiti 1914, ua tamata o Satani i te “haapau” i te Basileia i fanau-noa-hia ˈtura, ua tiavaruhia mai râ oia mai te raˈi mai ma to ˈna haama rahi (Apokalupo 12:1-12). Noa ˈtu â ïa e ua “haere atura [oia] e tamaˈi atu” i te toea o te mau kerisetiano faatavaihia ra, aita oia i nehenehe e tapea ia ratou ia ‘tia hua i nia’ i te matahiti 1919 ra e i te rave i te “buka [otaro] iti” i roto i te rima o Iesu Mesia (Apokalupo 10:8-11; 11:11, 12; 12:17). Aita atoa oia i nehenehe e tapea i te haaputuputuraa o te mau melo hopea o na 144 000 e tae noa ˈtu i te haaputuputuraa o te feia rahi roa (no roto mai i te mau nunaa atoa), teie ‘e haamori nei ia ˈna i te rui e te ao, i roto i te hiero o Iehova’. — Apokalupo 7:1-3, 9-15.
3 Oia mau, mai te matahiti 1914 maira, ua “haere atura [Iesu] e haapau atu”. E rave rahi â râ ohipa te tia ia ˈna ia rave: e tia ia ˈna “ia haapau atu â”. E tiâ ia ˈna ia faaore roa i te amuiraa o te mau mea a Satani e vai nei i roto i te ao taatoa nei (Apokalupo 6:1, 2; 19:11-21). Eaha ïa te auraa taua ohipa ra no tatou tataitahi?
Te tataratararaahia te ahu o Babulonia i mua i te taatoaraa
4. Mea nafea to te Apokalupo faataaraa mai i te haapaoraa hape?
4 E haamata te haamouraa o te ao a Satani na roto i te faaore-roa-raahia te haapaoraa hape. Te faataa maira te Apokalupo i te faatereraa o te mau haapaoraa hape i roto i te ao taatoa nei — e tae noa ˈtu te amuiraa faaroo kerisetiano — i raro aˈe i te mau huru o te hoê vahine faaturi, o Babulonia Rahi, te vai ra hoi to ˈna mau auraa e te mau arii o te fenua nei e teie e faataero nei i te huitaata na roto i ta ˈna mau peu faaturi. Ua unuhi roa atoa taua vahine faaturi nei, e auê hoi te haama e! i te toto, oia mau i te toto o te mau tavini a te Atua (Apokalupo 17:1-6). Te faataa atoa ra te Apokalupo i te haamouraa o taua vahine ruau faaturi hairiiri mau ra. Te taa maitai atura ïa ia tatou e eaha te auraa o to ˈna hopea ia tuatapapa tatou i te ohipa i roohia i nia i te tahi atu vahine faaturi faaroo i te senekele 7 hou to tatou nei tau.
5, 6. No te aha te Ierusalema taiva i faarirohia ˈi ei vahine faaturi, e no to ˈna haerea, eaha ïa te haavaraa ta Iehova i faatupu i nia ia ˈna?
5 Taua vahine faaturi ra o te oire ïa o Ierusalema. Ua nehenehe hoi oia e riro ei pû no te haamoriraa a Iehova i nia i te fenua nei, ua na ô atura râ te Atua ia ˈna e: “Ua hara oe i te toto i manii ia oe ra.” (Ezekiela 22:4). Ua tia atoa hoi ia ˈna ia riro ei mea viivii ore i te pae varua, ua faaturi râ oia ma te amui atu i te mau nunaa. No reira ˈtura Iehova i parau ai ia ˈna e: ‘Auê au i te riri ia oe e, oe i rave i taua mau mea nei, i te ohipa a te vahine taiata, e te faahepo.’ — Ezekiela 16:30; 1-21; Iakobo 4:4.
6 No reira, ua faahiti aˈera o Iehova i te haavaraa i muri nei i nia i taua vahine faaturi ra i te na ôraa ˈtu e: “E teie nei, inaha, e haaputuputu vau i te feia atoa i hinaaro ia oe ra, tei mauruuru ia oe ra, e te feia atoa [te mau nunaa] ta oe i hinaaro ra, (...) e na ratou e tatara i to mau ahu ra, a rave ai i to mau taoˈa maitatai ra, a faarue noa ˈtu ai ia oe ma te vai-tahaa-noa aore e tapoˈi. E na ratou e tutui i to mau fare i te auahi.” (Ezekiela 16:37, 39, 41; 23:25-30). Te haapii maira te Tuatapaparaa ia tatou e i te matahiti 607 hou to tatou nei tau, ua haere atura to Babulonia e haru ia Ierusalema e ua tataratara aˈera i to ˈna ahu e inaha ua vai tahaa noa aˈera. Ua hopoi aˈera ratou i to ˈna mau taata e ta ˈna mau taoˈa i Babulonia. Ua haamouhia taua oire ra, ua tutuihia to ˈna hiero e ua vai ano noa maira te fenua. — Paraleipomeno 2, 36:17-21.
7. Eaha te faahopearaa e roohia i nia ia Babulonia Rahi?
7 E ite atoa o Babulonia Rahi i te hoê hopea mai te reira te huru. Teie hoi te faaararaa ta te Apokalupo e horoa maira: Te mau “arii” e vai nei, oia hoi te feia faatere o ta Babulonia Rahi i faaturi atu i te pae varua, e riro ïa ratou i te “faufau i taua faaturi ra, e e pau oia ia ratou i te haru, e e veve roa, e e amu i to ˈna tino, e e tutui ia ˈna i te auahi”. (Apokalupo 17:2, 16.) Te ohipa i roohia i nia ia Ierusalema tahito ra, e riro ïa i te tauturu ia tatou ia ite i te auraa o taua mau parau ra. E haamouhia te haapaoraa hape e te mau faatereraa i ‘hinaaro’ ia ˈna i mutaa ihora. E haruhia ta ˈna mau taoˈa atoa e e riro oia i te tutuihia, e te haamou-roa-hia. Tera te hopea faufau mau te tia mau iho â ia roohia i nia i taua faanahoraa ra!
Te haapoiriraa te mau raˈi
8. Eaha te huru anotau o te ati rahi i nia i te huitaata nei?
8 E tapao te haamouraa o Babulonia Rahi i te omuaraa o te “ati rahi” i faaite-atea-hia mai e Iesu (Mataio 24:21; Apokalupo 7:14). No nia i taua tau ra, teie ta tatou e taio i roto i te Apokalupo: “Hiˈo atura vau e vahihia aˈera e ana te ono o te tapao taati ra, e inaha, e aueue rahi to te fenua, ereere atura te mahana, mai te ahu paau huruhuru ra, e riro atura te marama mai te toto ra. E ua mairi maira te mau fetia o te raˈi i raro i te fenua nei.” (Apokalupo 6:12, 13). Te faahohoˈa ra taua aueueraa fenua rahi i te “aueueraa fenua i Iseraela” ta Ezekiela i faaite atea mai (Ezekiela 38:18, 19; Ioela 3:14-16). O te haamouraa hopea ïa o te amuiraa iino o te mau mea nei. E tupu anei te hoê tauiraa i nia i te mahana, i te avae e i te mau fetia i taua taime ra?
9, 10. Eaha te parau tohu a Ezekiela i nia ia Aiphiti, e mea nafea te reira i te tupuraa?
9 Ma te faaite mai i te haamouraa e fatata maira i te roohia i nia ia Aiphiti, nunaa puai e vai ra i te pae tooa o te râ o Iseraela, te na ô ra o Ezekiela e: “E vehî au i te mau raˈi, ia tinai au ia oe ra, e te mau fetia ra e faaahuhia e au i te ahu ereere; e tapoˈi atoa vau i te mahana i te ata, e ore hoi te marama e anaana mai. E te mau mea anaana maramarama o te raˈi ra, e faaahu vau i te ahu ereere ia oe; e tuu hoi au i te pouri i nia i to fenua, te na reira maira te Fatu ra o Iehova.” — Ezekiela 32:7, 8.
10 Aita te mau raˈi iho i haapouri a haamouhia ˈi o Pharao e ta ˈna mau nuu. Area te oraraa o a muri aˈe o Aiphiti ra, te reira tei haapouri mau. Mai ta Carl Keil, te hoê taata tuatapapa bibilia e parau ra, “te pouri e itehia mai [ia topa te faatereraa a Pharao] o te mau huru tupuraa ino mau ïa”. Aita aˈera te fenua Aiphiti i roto faahou i te anairaa o te mau puai rahi o te ao nei e ua topa aˈera hoi i muri iho i raro aˈe te faatereraa a te mau puai rahi i faatere na i roto i te ao taatoa nei. I to tatou nei mau mahana, na te nunaa arabia e faatere ra i te tuhaa rahi o te puai tahito o Pharao e faatere na i mutaa ihora i roto i te ao taatoa nei.
11. a) Te faahohoˈa ra te ohipa i roohia i nia ia Aiphiti i te aha? b) E riro te oraraa no a muri aˈe ei oraraa pouri mau no te ao o Satani i te tau o te ati rahi, i roto i tei hea auraa?
11 No te taata ra o Carl Keil, e auraa aano roa ˈtu â to te parau tohu a Ezekiela. Teie hoi ta ˈna i papai: “Ua riro te huriraahia taua puai rahi ra [o Aiphiti] ei tapao, ei faaiteraa e e hurihia te mau puai paieti ore atoa i te mahana o te haavaraa hopea ra, i raro.” E parau mau hoi taua parau ra. Inaha mai ta te Apokalupo e faaite maira, ia tupu te ati rahi e riro te mau tiaturiraa no te oraraa a muri aˈe o te huitaata patoi i te Atua i te pouri, mai tei farereihia i Aiphiti. Mai te huru ra ïa e aita te mahana e horoa faahou maira i to ˈna maramarama i te ao, e aita te maramarama o te avae e te marama o te mau fetia e turama faahou i te raˈi o te rui ra. Te feia e ore e farii i te faahanahana i te Arii i haamauhia e Iehova, e riro ïa ratou i te pohe e eita hoi ratou e hunahia ma te tura ia haere mai Tei parahi i nia i te puaahorofenua teatea ra no te haapau e ia pau atu â (Apokalupo 19:11, 17-21; Ezekiela 39:4, 17-19). Eita ˈtura ïa e maerehia ia tuô te feia paieti ore “i te mau mouˈa e te mau mato, A mairi mai i nia iho ia matou, e huna ia matou ia moe ê atu i te mata o tei parahi i nia iho i te terono ra, e te riri o te Arenio ra: ua tae hoi i te mahana rahi no to ˈna ra riri, e o vai te taata e mau?” — Apokalupo 6:16, 17; Mataio 24:30.
Te hoê tamaˈi aita e faaearaa
12. Mea nafea o Satani ia faaite mai i to ˈna riri ia Iesu Mesia i te mahana o te Fatu?
12 E te mau kerisetiano, tei roto ïa ratou i tei hea huru tupuraa i te mahana o te Fatu ra? Ua mauiui rahi hoi ratou i te tamaˈi aita e faaearaa i rotopu ia Satani e Tei parahi i nia i te puaahorofenua teatea ra. I te mea hoi e eita ta Satani e nehenehe e aro mai ia Iesu iho, ua tuu maira oia i to ˈna riri taatoa i nia i te toea o te mau kerisetiano faatavaihia e, i muri aˈe, i nia i te feia rahi roa o te mau mamoe ê atu tei haaputuputu mai i pihai iho ia ratou. Mai ta Iesu i faaara mai ia ratou, e riro taua mau kerisetiano ra i te “ririhia (...) e te mau fenua atoa i [to ˈna] iˈoa”. (Mataio 24:9.) Te aro nei Satani ia ratou ma te faaohipa i te mau mauhaa atoa e vai ra ia ˈna ra, e tae noa ˈtu i te mau haavîraa a te mau tiaa rahi taata, i te tuuraa ia ratou i roto i te fare auri, i te haamauiuiraa ia ratou e te taparahiraa ia ratou. — Timoteo 2, 3:12.
13. Nafea o Satani i te faaohiparaa i te huru haavarevare i roto i ta ˈna aroraa i te nunaa o te Atua?
13 E faaohipa atoa o Satani i te huru haavarehavare (Ephesia 6:11). Na roto i “te marei o te [taoˈa]” ra, e aratai o ˈna vetahi mau kerisetiano ia ore ratou e haere rahi i roto i te taviniraa moˈa, aore ra ia faarue roa i te reira (Mataio 13:22; Timoteo 1, 6:9, 10). E faaitoito oia i te tahi pae ia rave i te hoê haerea viivii e te tia ore (Korinetia 1, 5:1, 2). E rave oia e ia riro roa te rahiraa o te mau taata i te mau “peapea o teie nei ao” no te tamata i te ‘faateimaha’ ia ratou. (Luka 21:34.) E hauti oia i nia i te mau au-ore-raa o tera huru taata e tera huru taata aore ra te huru patoi no te faafariu ê i te tahi atu mau kerisetiano “i te mau mea i hau i te maitai ra”. — Philipi 1:10; Korinetia 1, 1:11, 12; Iakobo 4:1-3.
14, 15. Nafea te re i nia ia Satani e nehenehe ai e noaa ia tatou?
14 E tia i te mau kerisetiano ia atuatu i te faaoromai ia tae i te mahana o te Fatu ra. E topa vetahi pae, e e riro te toparaa taitahi ei re iti na Satani (Petero 1, 5:8). Teie râ, eita e moehia i te rahiraa taua parau tǎpǔ ra a Iesu e na ô ra e: “Area te mau papu e tae noa ˈtu i te hopea ra, oia te ora.” (Mataio 24:13). Ma te tauturuhia e Iehova, e noaa ia ratou i te re e e faaoaoa ratou i to ˈna mafatu. — Maseli 27:11; Ioane 1, 2:13, 14.
15 Aita hoê noa ˈˈe o tatou e hinaaro nei e ia oaoa o Satani, ia ite mai oia e ua faarue tatou ia Iehova! E pee anaˈe na i te aˈoraa a Paulo, e e rave anaˈe na ei mauhaa na tatou te parau mau, te parau-tia e te faaroo a poro noa ˈi tatou i te parau apî maitai ma te itoito e ma te haapii, no te tapea i te hoê faaroo paari mau. E pure anaˈe na ma te tuutuu ore e ia vai ara noa na tatou. Ia na reira tatou, e ore ïa tatou e roohia i te “faainoraa, i te mahana o to tatou Fatu o Iesu Mesia ra”. (Korinetia 1, 1:8; Ephesia 6:10-18; Tesalonia 1, 5:17; Petero 1, 4:7.) E hopoi mai ïa te mahana o te Fatu i te mau haamaitairaa e rave rahi no tatou nei.
E rave rahi mau haamaitairaa i te pae no te taviniraa
16. No te aha i faauehia mai ai ia Ioane eiaha e papai i te mau parau e faahitihia e na patiri e hitu ra, eaha hoi te auraa o te reira no te mau kerisetiano faatavaihia, i te matahiti 1919 ra?
16 I roto i te Apokalupo 10:3, 4, te parau ra o Ioane e ua faaroohia te reo o “na haruru patiri e hitu”. Te hinaaro ra oia e papai i ta ratou mau parau, te na ô ra râ oia e, “ite atura vau i te hoê reo no te raˈi mai, i te na ôraa mai ia ˈu e, A taati na i te mau mea a te mau patiri e hitu i parau iho nei eiaha e papaihia.” Mai te huru ra ïa e, aitâ i tae atura te taime no te faaite i te reira. Area o Ioane ra, ua faauehia maira ïa oia e rave i te otaro iti e a amu atu ai. Mai te huru ra ïa na patiri e hitu, te auraa ra o te mau opuaraa taatoa ïa a Iehova (Salamo 29:3; Ioane 12:28, 29; Apokalupo 4:5). I te matahiti 1919, a amu ai te mau kerisetiano faatavaihia i te otaro iti ei faahohoˈaraa, aitâ te taime i tae mai atura e noaa ˈi ia ratou i te hoê maramarama papu no nia i te mau opuaraa a Iehova (hiˈo Daniela 12:8, 9). Teie râ, ua haere ratou i mua ma te itoito ia au te maramarama i noaa ia ratou, e ua faaite aˈera hoi ratou e e nehenehe mau â e horoahia ˈtu ia ratou i te tahi atu â mau haamaramaramaraa.
17. A horoa mai na i te tahi mau haamaramaramaraa ta Iehova i horoa i to ˈna nunaa mai te matahiti 1919 mai.
17 E i muri iho, i roto i te roaraa o te mau matahiti, ua horoa-mǎrû-hia maira ia ratou ra i te hoê ite papu atu â no nia i te hinaaro o Iehova. Ei hiˈoraa, ua papu aˈera ia ratou e te faataa-ê-hia ra te mau mamoe o te parabole a Iesu i te mau puaaniho, na mua ˈˈe ia Aramagedo (Mataio 25:31-46). Ua taa ia ratou e te faatupu ra te fanauraahia te Basileia, i te matahiti 1914 ra i te Apokalupo pene 12. Ua papu maitai aˈera hoi ratou i te faufaaraa o te iˈoa o Iehova, e ua ite aˈera ratou i te huru mau o te feia rahi roa e faahitihia ra i roto i te Apokalupo pene 7. Auê ïa tiaturiraa ta teie mau haamaramaramaraa i horoa mai no te nunaa o te Atua e! — Maseli 4:18; Petero 2, 1:19.
18. Eaha te mau haamaitairaa faahiahia mau i te pae no te taviniraa te horoahia ˈtu i te nunaa o Iehova i te mahana o te Fatu, e eaha ïa ta te reira e haapapu maira ia tatou?
18 I taua atoa area ra, ua horoa mai Iehova i te tahi mau haamaitairaa faahiahia mau i te pae no te taviniraa na ta ˈna mau tavini i nia i te fenua nei. I roto i te hoê orama, ua ite aˈera o Ioane i te mau melahi ia poro i te parau apî maitai mure ore i te mau taata, ia faaite atu ia ratou i te toparaa o Babulonia Rahi e ia faaara ˈtu ia ratou e ia haapao maitai ratou i te tapao o te puaa (Apokalupo 14:6-10). Ma te papu maitai, te faatere ra te mau melahi i te mau haamaitairaa i te pae no te taviniraa ta te Atua e horoa mai nei, tera râ i nia i te fenua nei, na te mau taata, te mau Ite a Iehova, e faaite nei i taua mau poroi nei i te huitaata. Ua ite atoa o Ioane ia Iesu ia “ooti i te fenua nei”. (Apokalupo 14:14-16.) Teie râ, na roto i te ravea o te ohipa pororaa i te Basileia e te faariroraa i te mau taata ei pǐpǐ, ohipa e ravehia nei e te mau melo i nia i te fenua nei o taua Basileia ra o Iesu e faatupu ai i taua ohipa ootiraa ra (Mataio 24:14; 28:19, 20). Auê ïa haamaitairaa ta tatou i te tahoêraa ˈtu i te mau melahi e ia Iesu Mesia iho i roto i taua ohipa faaararaa ra e! Ia faatupu tatou i te reira, e papu maitai ïa ia tatou e te tahoê atura tatou i te mau melahi haapao maitai o te faanahonahoraa rahi i nia i te raˈi e te ite-ore-hia e te mata taata nei a Iehova.
Te paruru a te Atua
19. a) Na te aha e tapao i te uˈana-roa-raa te riri o Satani i te nunaa o te Atua? b) E noaa te re ia vai i te aroraa hopea ra?
19 A fatata noa mai ai te hopea o teie nei ao, e fariu rahi mai ïa o Satani i to ˈna manaˈo i nia i te mau kerisetiano. Te faataa maira te mau pene 38 e 39 o te buka Ezekiela, i reira o Satani e parauhia ˈi o Goga no Magoga nafea râ taua ino no ˈna ra ia hoˈi mai i nia ia ˈna iho. Mai ta taua parau tohu i faauruahia e te Atua e haapii maira ia tatou, e aro mai o Satani ma te uˈana i te nunaa o Iehova, no te tamata i te faaore roa ia ˈna. E nehenehe anei oia e na reira? Teie te pahonoraa a te Apokalupo: “E na tara auahuru ta oe e hiˈo ra [te mau “arii” aore ra faatere o to tatou nei tau] (...) e tamaˈi mai ratou i te Arenio ra, e e pau ratou i te Arenio: o te Fatu hoi oia o te mau fatu atoa ra, e te Arii o te mau arii atoa ra: e to ˈna atoa ra paeau, e feia parauhia ïa, e te maitihia, e te haapao mau.” (Apokalupo 17:12, 14). Ma te papu maitai e upootia mai te mau kerisetiano mau ia ore ratou e taiva i to ratou Arii rahi tei noaa ia ˈna te re. Area te mau puai o Goga ra, e haamou-roa-hia ïa ratou. — Ezekiela 39:3, 4, 17-19; Apokalupo 19:17-21.
20. Eaha te mau haamaitairaa ta te mahana o te Fatu e hopoi mai na te mau kerisetiano haapao maitai i te tau o te ati rahi?
20 Te auraa o te mahana o te Fatu ra o te ora ïa no te nunaa o te Atua. E parahiraa papu i nia i te raˈi te noaa i te mau kerisetiano faatavaihia e ora nei â i nia i te fenua nei i te tau o te ati rahi, e e riro mau â ratou i te tapea i to ratou haapao maitai e tae roa ˈtu i to ratou poheraa (Apokalupo 7:1-3; Timoteo 2, 4:6-8). Area te mau melo o te feia rahi roa, o ratou atoa te ora mai, e na Iesu “e aratai (...) ia ratou i te mau pape ora pihaa ra; e na te Atua e horoi hua i to ratou roimata”. (Apokalupo 7:14, 17.) Auê ïa haamaitairaa no to ratou faaoromai e to ratou haapao maitai e!
21. Eaha te ohipa e tupu i nia i te fenua nei i te mahana o te Fatu i muri aˈe i te ati rahi?
21 I reira hoi tatou e tomo atu ai i roto i te hoê tuhaa faahiahia mau o te mahana o te Fatu oia hoi: te Faatereraa hoê tausani matahiti a Iesu Mesia (Apokalupo 20:6, 11-15). E na roto mai te pape ora, i faaitehia i roto i te buka Apokalupo e i roto i te buka a Ezekiela, i te terono o Iehova e tahe atu ai i te huitaata ra. E faateiteihia te mau taata e inu i te reira i nia i te huru tiaraa taata tia roa (Ezekiela 47:1-12; Apokalupo 22:1, 2). Aita e taata faahou i Hade, e e rave rahi atoa miria taata pohe te nehenehe e inu i te pape o taua anavai ra. — Ioane 5:28, 29.
22. Eaha te mau ohipa faufaa roa ta te huitaata nei e ite ia hope te Faatereraa hoê tausani matahiti a te Mesia?
22 Ia hope te tausani matahiti, e faateiteihia te huitaata nei i nia i te huru taata tia roa. O te taime au ïa te reira no Satani no te fa mai i to ˈna faraa hopea i nia i te fenua nei. I reira â, e tamata oia i te haavare i te mau taata, e apee atoa ˈtu hoi vetahi pae ia ˈna ia tae i taua tau ra. E parauhia ratou ma te taa maitai “Goga e o Magoga”, no te mea hoê huru feruriraa ino to ratou e to “te taata e rave rahi [o Goga]” e faahitihia ra i roto i te parau tohu a Ezekiela. E ore roa râ ta ratou orureraa, ia hurihia o Satani iho e ta ˈna mau demoni i roto i te roto auahi taipe ra (Apokalupo 20:7-10; Ezekiela 39:11). O te hoê oraraa oaoa mau ïa te tiai maira i te feia e tapea i to ratou haapao maitai i roto i taua tamataraa hopea ra, e e riro te mau taata tei noaa ia ratou i te huru taata tia roa i te tahoê i te faanahonahoraa tia mau a te Atua ra o Iehova i roto i te ao nei, ia riro atoa hoi oia iho “i nia i te mau mea atoa i te mau vahi atoa”. — Korinetia 1, 15:24, 28; Apokalupo 20:5.
23. Ia au i te anotau ta tatou e ora nei, eaha te aˈoraa a Paulo te tia ia tatou tataitahi ia apee?
23 Auê ïa haamaitairaa rahi ta tatou e tamata ia faaoromai tatou e! Eiaha ia moehia ia tatou e tei roto tatou i te mahana o te Fatu. Ua haamata ê na te tahi mau ohipa faahiahia mau i te tupu. No reira, e tano maitai atura ïa teie mau parau a Paulo e na ô ra e: “E eiaha tatou e rohirohi i te parau maitai, ei te tau mau ra hoi tatou e ooti ai ia ore tatou ia toaruaru.” (Galatia 6:9). Oia mau, ‘eiaha na tatou e rohirohi i te parau maitai’ i te mahana o te Fatu ra. Ia faaoromai tatou, e riro ïa taua mahana ra i te horoa mai na tatou tataitahi i te mau haamaitairaa mure ore.
E ite anei outou i te pahono mai?
◻ E haamata te haamouraa o te ao a Satani na nia i te aha?
◻ Nafea o Iesu ia “haere e haapau e ia pau atu â” i to ˈna mau enemi?
◻ Nafea o Satani i te faatupuraa i te hoê aroraa aita e faaearaa i nia i te mau Ite o Iehova i te mahana o te Fatu ra?
◻ Eaha te mau haamaitairaa faahiahia mau ta te nunaa o te Atua i tamata mai te matahiti 1919 maira?
◻ Ia hiˈohia te anotau ta tatou e ora nei, eaha ïa ta outou iho i opua e rave?
[Hohoˈa i te api 26]
Te horoa maira te ohipa i roohia i nia ia Ierusalema tahito i te hoê hohoˈa no te ohipa e fatata roa i te roohia i nia ia Babulonia Rahi.