27 MEPHIBOSETA
Aita oia i riri i te ohipa tano ore ta ˈna i faaruru
E MOOTUA Mephiboseta na te hoê arii puai e e tamaiti atoa na te tahi taata itoito e taiva ore. Tera râ i te paeraa o to teie tamaiti matahiti, ua tupu te tahi ati. Ua pepe to ˈna papa ruau o Saula i te tamaˈi e ua haapohe o ˈna ia ˈna iho. I roto i taua noa â tamaˈi ua pohe to ˈna papa o Ionatana. I to te vahine tei hii ia Mephiboseta faarooraa i tera parau peapea, ua rave oia i te tamaiti e ua horo ma te mǎtaˈu. Ua marua te tamaiti, ua pepe maitai to ˈna na avae e ua pirioi i te roaraa o to ˈna oraraa.
E au ra aita Mephiboseta i inoino no te mau ati ta ˈna i faaruru. Ua horoa Makira te hoê Iseraela i te tahi nohoraa no ˈna. I muri aˈe, ua haamanaˈo te arii Davida e ua fafau o ˈna i to ˈna hoa ia Ionatana e aupuru i te mau mero o to ˈna utuafare. (Sam. 1, 20:14-17) Ua faaue te arii ia tiihia Mephiboseta.
Ua mǎtaˈu roa Mephiboseta, no roto mai hoi o ˈna i te utuafare o te arii ino ra o Saula. Ua manaˈo paha oia e te hinaaro atoa ra Davida e haapohe ia ˈna. Noa ˈtu râ, ua auraro oia e ua haere e hiˈo i te arii. Ua paraparau Davida ia ˈna ma te mǎrû, ua faahoˈi atu i te mau faufaa a Saula e ua parau: “E tamaa noa oe i ta ˈu amuraa maa.” No to ˈna mauruuru rahi, ua ani Mephiboseta no te aha te arii i hamani maitai ai i te hoê taata haihai. E ua faaau atoa ia ˈna i te hoê urî pohe!
Ei pirioi mai to ˈna tamariiraa mai, ua ere Mephiboseta i tei herehia e ana, ua taivahia e ua faaruru o ˈna i te ohipa tano ore
Tau taime râ i muri aˈe, ua tupu faahou te tahi fifi. Ua orure hau Abasaloma te tamaiti a Davida, ua titauhia i te arii ia horo ê ia Ierusalema. Ua haere Ziba te tavini a Mephiboseta e tauturu ia Davida, ua vaiiho râ oia i to ˈna fatu i Ierusalema. Aita ta Mephiboseta e nehenehe e pee ia Davida, ua faaite râ o ˈna i to ˈna taiva ore e to ˈna oto. Aita oia i atuatu faahou i to ˈna huruhuru taa e huruhuru utu mai ta te hoê taata oto e rave. Aita te orure hau o Abasaloma i manuïa e ua hoˈi Davida i Ierusalema ma te hau. Tera râ, ua riri Davida ia Mephiboseta. No te aha?
I to Ziba tautururaa ia Davida, ua haavare oia i te arii e ua parau, ua taiva o Mephiboseta tei faaea i Ierusalema no te mea ua opua o ˈna e riro mai ei arii. A feruri na i ta Davida i manaˈo. Aita i maoro ua taiva ta ˈna iho tamaiti ia ˈna, oia atoa Ahitophela, to ˈna hoa e taata aˈo tiaturihia. No reira paha oia i manaˈo ai e ua taiva atoa te tahi atu taata ia ˈna. Ua faaue Davida ia horoahia te faufaa a Mephiboseta, te fenua o te arii Saula na Ziba.
I to Mephiboseta faarooraa i te parau haavare a Ziba, ua haere oia e farerei i te arii tei inoino ma te tiaturi e e faaite oia ia Davida eaha mau na tei tupu. Ua ani o Davida no te aha aita Mephiboseta i faarue ia Ierusalema e o ˈna. Ua faataa ˈtu Mephiboseta i te tumu ma te haamanaˈo i te arii, ‘e pirioi to ˈna’ e ma te faaite e ua haavare o Ziba ia ˈna. Ua ite paha o Davida e ua faaite Mephiboseta i to ˈna oto, na roto i te atuatu-ore-raa i to ˈna huruhuru taa e huruhuru utu. Te faaite ra te reira, e ua oto o ˈna e aita oia i opua i te riro mai ei arii i te taime aita o Davida. Noa ˈtu ua riri o Davida, aita oia i hinaaro faahou e faaroo ia Mephiboseta. I muri iho, ua faaoti oia i te faahoˈi hoê noa tuhaa o ta ˈna faufaa. Ua parau oia e e tatuhaa Mephiboseta e o Ziba i te fenua o Saula.
Ua riri anei o Mephiboseta e tatuhaa i ta ˈna faufaa i ta ˈna tavini o tei haavare no nia ia ˈna? Aita. (Deut. 19:18, 19) Noa ˈtu te mau ohipa tano ore ta ˈna i faaruru, aita oia i inoino, i riri e i haaparuparu ia ˈna. Ua itoitohia râ oia no te mea ua tiatonu o ˈna i nia i te mau ohipa faufaa roa ˈˈe, oia hoi te faaoreraa i te hapa a vetahi ê e te tamataraa i te faatupu i te hau e o ratou.
Te faaite ra ta ˈna pahonoraa ia Davida i to ˈna haehaa: “E nehenehe o [Ziba] e rave pauroa ˈtu, e ere i te mea faufaa faahou i teie nei e ua hoˈi mai to ˈu fatu te arii i to ˈna aorai ma te hau.” Te haapeapea ra teie taata haehaa no te arii ta Iehova i maiti. Aita o ˈna i vaiiho i te haavare aore ra te eiâraa i ta ˈna faufaa, e faaere i te oaoa e te hau e te Atua. Peneiaˈe, aita roa ˈtu teie taata i faaohipa aˈenei i te hoê ˈoˈe i te aroraa, tera râ ua rahi aˈe to ˈna itoito i te tahi atu taata!
A taio i te aamu Bibilia:
A aparau:
Mea nafea to Mephiboseta faaiteraa i te itoito?
A faahohonu atu â
1. Hou Mephiboseta a afaihia ˈi i mua ia Davida, ua ora oia i ‘te fare o Makira.’ Na te aha e haapapu e e taata taiva ore e farii maitai o Makira? (Sam. 2, 9:3, 4; it “Makira” No 2)
2. No te aha Mephiboseta i faaau ai ia ˈna i “te hoê urî pohe”? (Sam. 2, 9:8; it “Urî” par. 5) A
PhotoStock-Israel/Photodisc via Getty Images
Hohoˈa A: I Iseraela tahito, ua riro te mau urî ei animara viivii o te amu i te mau toetoea
3. Eaha ta tatou i ite no nia ia Mephiboseta o te faaite ra aita oia i hinaaro e riro mai ei arii no te mono ia Davida? (w02 15/2 14 par. 11, nota) B
Hohoˈa B: Peneiaˈe, ua faaite o Ionatana ia Mephiboseta o vai ta Iehova i maiti ei arii
4. Mea nafea to Iehova haamaitairaa ia Mephiboseta i muri aˈe i te mau tupuraa i papaihia i roto i teie aamu? (it “Mephiboseta” No 2 par. 3)
A feruri i te mau haapiiraa
E rave rahi o te roohia i te hepohepo rahi aore ra i te tahi atu mau fifi o ta to ratou mau taeae e tuahine e ore paha e taa maitai. Eaha te mau haapiiraa tamahanahana ta ratou e fanaˈo i te hiˈoraa o Mephiboseta?
I muri aˈe i to Davida vareraa i ta Ziba i parau, ua horoa o ˈna i te mau faufaa a Mephiboseta. No te aha e ere i te haerea paari ia rave oioi i te mau faaotiraa i nia noa i te hoê parau? C
Hohoˈa C
E nafea oe ia pee i te itoito o Mephiboseta i roto i to oe oraraa?
A huti mai i te haapiiraa
Eaha ta teie aamu e haapii mai no nia ia Iehova?
E nafea teie aamu e tuati ai i te opuaraa a Iehova?
Eaha ta ˈu e hinaaro e ani ia Mephiboseta i te tia-faahou-raa?
A haapii hau atu â
E hiˈo tatou e nafea ia pee i te hiˈoraa o Mephiboseta ia manaˈo tatou e ua ravehia te ohipa tano ore i nia ia tatou.
Ia manaˈo te hoê tamarii e aita vetahi e au ra ia ˈna, e nafea te metua e faaohipa ˈi i te aamu o Mephiboseta no te tauturu ia ˈna?