Ua aˈohia te arii

‘MEA nafea te hoê taata maitai i te raveraa i te hara ino mau?’ Tera paha ta te peropheta Natana i ui a haere noa ˈi i te aorai o to ˈna hoa ra te arii Davida. Tau taime na mua ˈtu, ua faaue Iehova ia Natana ia faaite ia Davida i te hoê ohipa faahiahia no a muri aˈe: E haere mai te Mesia na roto i te huaai o Davida! (Sam. 2, 7:4, 12, 13) I teie nei râ, ua rave Davida i te hara ino mau e ua hinaaro Iehova ia aˈo Natana ia ˈna.

Ua huna Davida i ta ˈna ohipa, tera râ ua ite Iehova i te reira. Ua parau roa te Atua ia Natana i tei tupu. I te hoê po, ua hahaere o Davida i nia i te tafare e ua ite i te hoê vahine o te hopu ra i te pape. Ua ite te arii e “mea haviti roa” oia, e ua faaue ia tiihia o ˈna. Ua ite te arii, e vahine Bate-seba a ta ˈna faehau taiva ore o Uria te ati Heta. Tera râ, ua faaturi Davida e o ˈna. Tau taime i muri aˈe, ua faaara Bate-seba ia Davida e ua hapû o ˈna. Ua tamata Davida i te huna i ta ˈna hara. Ua faaue Davida ia Uria ia faarue atu i ta ˈna mau faehau e ia hoˈi i pihai iho i ta ˈna vahine. (A hiˈo atoa i te Samuela 1, 21:5.) Aita râ o Uria i farii i ta ˈna aniraa e faarue te nuu, ua opua ïa Davida e tuu ia Uria i te hoê vahi e haapohehia ˈi oia i te aroraa. Ua manuïa taua opuaraa ino mau. I muri iho ua pohe Uria, e ua faaipoipo Davida ia Bate-seba.

Te na ô ra te Bibilia: ‘Aita roa Iehova i au i te ohipa ta Davida i rave.’ I muri iho, ua faaue te Atua mau i ta ˈna peropheta ra o Natana, ia aˈo ia Davida e ia faaite i ta ˈna hara. A haere ai Natana i te arii ra, ua uiui anei o ˈna eaha te huru o Davida? I te mea e ua haapohe o Davida ia Uria, eaha paha ta te arii e rave i nia ia Natana no to ˈna faaiteraa i ta ˈna hara e aˈoraa ia ˈna? Ua hinaaro o Natana e haaferuri ia Davida e e tauturu ia ˈna ia taa e mea ino mau te ohipa ta ˈna i rave. Mea papu ua pure te peropheta no nia i te reira. Ua haere oia i te arii ra ma te feruri i te hoê faahohoˈaraa.

Ua faatia o Natana ia Davida i te faahohoˈaraa no nia i na piti tane o te hoê oire. Te taata matamua, e taata taoˈa mea rahi ta ˈna mamoe e puaatoro. Te tahi atu, e taata veve hoê noa mamoe mea here roa na ˈna. Ua aupuru maite atoa o ˈna i tera mamoe. I te hoê mahana, ua haere mai te hoê ratere i ǒ te taata taoˈa, ua hinaaro oia i te hoê mamoe no te tamaa. Aita o ˈna i maiti hoê o ta ˈna iho mamoe. ‘Ua rave râ oia i te fanauˈa mamoe a te taata veve,’ ua tupai e ua tunu i te reira na ta ˈna manihini. I te otiraa ta Natana aamu, ua riri o Davida! Ua parau oia: “Te horeo nei au i te ora o te Atua ra o Iehova, mea tano ia pohe tera taata!” Ua riri o Davida no te mea aita teie taata taoˈa i ‘faaite i te aumihi.’

Ua maiti maitai o Natana i ta ˈna faahohoˈaraa. E tiai mamoe Davida na mua ˈtu, mea riri roa na ˈna i te mau tupuraa tano ore. Aita ïa Natana i mǎtaˈu i te parau roa ˈtu ia Davida: “O oe taua taata ra!” Ua huru ê roa o Davida. Ua faataa Natana i te mau ohipa ta Davida i rave, o ta Iehova atoa i ite. Ua faaite te peropheta i te faaotiraa a Iehova: E tupu te fifi e te ati mai roto mai te utuafare o Davida e rave rahi matahiti. Eaha ïa ta Davida i pahono?

Ua parau te arii: “Ua hara vau ia Iehova.” Ua oto e ua tatarahapa roa Davida. Ua oaoa Natana i te faaite ia Davida i to Iehova aroha hamani maitai ia ˈna. Ua parau Natana: “Te faaore ra Iehova i ta oe hara. Eita oe e pohe.” Tera râ, ua mauiui rahi o Davida no te hara ta ˈna i rave e o Bate-seba. Ua pohe ta raua tamaiti. E rave rahi matahiti, ua faaruru te utuafare o Davida e rave rahi fifi.

Noa ˈtu teie mau tupuraa ua taiva ore noa o Davida. Ua papai Davida e rave rahi himene no nia i te tatarahapa e te faaoreraa Iehova i te hara. (Salamo 32 e 51) Ua maitai faahou te auhoaraa o te arii e o Iehova e ua faaroo atoa oia i te mau aˈoraa a te peropheta Natana tae roa ˈtu i te hopea o to ˈna oraraa. Ua pohe Davida ei tavini taiva ore na Iehova. (Arii 1, 9:4) Mea papu ua oaoa Natana i to ˈna aˈoraa ma te itoito i te arii tei rave i te hara.

A taio i te aamu Bibilia:

• Samuela 2, 11:1–12:18

A aparau:

Mea nafea to Natana faaiteraa i te itoito?

A faahohonu atu â

1. 1. Ei taata papai Bibilia o Natana, tera râ aita tatou i ite no nia i to ˈna mau tupuna e to ˈna oraraa. Eaha ta te reira e faaite mai ra no nia ia ˈna? (w12 15/2 25 par. 2-3)

   Ta oe pahonoraa

2. 2. No te ati Heta Uria. No te aha ïa to roto oia i te nuu faehau a Davida? (w24.04 31)

   Ta oe pahonoraa

3. 3. Ua tohu o Natana e faaruru te utuafare o Davida e rave rahi fifi. Mea nafea teie parau tohu i te tupuraa? (it “Davida” par. 29)

   Ta oe pahonoraa

4. 4. Mea nafea to Natana faaiteraa i te itoito i to te arii Davida paariraa mai? (w12 15/2 25 par. 1) A

   Ta oe pahonoraa

   

A feruri i te mau haapiiraa

• Eaha ta te hiˈoraa o Natana e haapii mai ia tauturu tatou i te hoê hoa o te rave i te hape ino mau?

  Ta oe pahonoraa

• E nafea tatou e pee ai i te hiˈoraa o Natana ia haaferuri tatou i te hoê taata? B

  Ta oe pahonoraa

  

• I roto i teihea ˈtu â tuhaa e nehenehe ai oe e pee i te itoito o Natana?

  Ta oe pahonoraa

A huti mai i te haapiiraa

• Eaha ta teie aamu e haapii mai no nia ia Iehova?

  Ta oe pahonoraa

• E nafea teie aamu e tuati ai i te opuaraa a Iehova?

  Ta oe pahonoraa

• Eaha ta ˈu e hinaaro e ani ia Natana i te tia-faahou-raa?

  Ta oe pahonoraa

A haapii hau atu â

Mea nafea te mau ohipa a Davida i te haamauiuiraa ia ˈna, to ˈna mau hoa, to ˈna utuafare e ia Iehova te Atua?

A haamanaˈo e nafea ia faaite i te here: Ma te ore e imi i to ˈna iho maitai (1:14)

A haapii no te aha i manuïa ˈi te aˈoraa a Natana.

“A faaite i te haehaa ia aˈohia oe” (“Ohipa haapiiraa no te mau tamarii e taurearea” anairaa natirara)