Ua manaˈo ê na anei oe e mea ê roa oe?

TERA ta te hoê taata e manaˈo ia ore vetahi atu e farii ia ˈna. Peneiaˈe mea taa ê to ˈna iri, to ˈna nunaa, ta ˈna huru paraparau aore ra ta ˈna huru raveraa ohipa. Ua manaˈo ê na anei oe e mea ê roa oe?—a

Tera te manaˈo o te hoê taata, o Mephiboseta to ˈna iˈoa. E hiˈo anaˈe o vai o ˈna e no te aha o ˈna i manaˈo ai mai tera. Mai te peu e tera atoa to oe manaˈo, mea rahi ta oe e haapii mai ia Mephiboseta.

O Ionatana te papa o Mephiboseta. E hoa rahi oia no Davida. Hou Ionatana a pohe ai i te tamaˈi, ua parau oia ia Davida: ‘A haapao i ta ˈu mau tamarii.’ Riro mai nei Davida ei arii. Tau matahiti i muri aˈe, haamanaˈo aˈera oia i ta Ionatana mau parau. Te ora noa ra Mephiboseta. Ua marua oia i to ˈna tamarii-rii-raa. Aita ˈtura oia e nehenehe e haere maitai faahou. Te taa ra anei ia oe no te aha oia i manaˈo ai e mea ê roa o ˈna?—

Ua hinaaro Davida i te maitai no te tamaiti a Ionatana. Ua faanaho ïa Davida i te hoê fare no Mephiboseta i pihai iho ia ˈna i Ierusalema e ia tamaa oia i ta ˈna airaa maa. Ua faataahia Ziba e ta ˈna mau tamaiti e tavini, no te tavini ia Mephiboseta. Ua faatura mau â Davida i te tamaiti a Ionatana! Ua ite anei oe eaha tei tupu i muri iho?—

Ua tupu te peapea i to Davida utuafare. Ua patoi Abasaloma ia Davida, to ˈna iho papa, e ua tamata i te riro ei arii. Ua horo ê atura Davida no te ora ˈtu. Ua hinaaro Mephiboseta e apee i te feia rahi tei na muri ia Davida. Ua ite teie mau hoa o Davida e o ˈna te arii mau. Aita râ i tae ia Mephiboseta no te mea aita oia e nehenehe e haere maitai.

Parau atura Ziba ia Davida e ua faaea Mephiboseta i ǒ no to ˈna hinaaro puai e riro ei arii. Ua tiaturi Davida i tera haavare! Ua horoa ïa oia i te mau mea atoa a Mephiboseta no Ziba. Aita i maoro, upootia mai nei Davida i te tamaˈi i nia ia Abasaloma e hoˈi mai nei i Ierusalema. Faaroo aˈera Davida i te faatiaraa a Mephiboseta. Faaoti atura Davida ia horoa Ziba i te afa o te faufaa no Mephiboseta. I to oe manaˈo, eaha ta Mephiboseta i rave?—

Aita o ˈna i amuamu e mea tano ore te faaotiraa a Davida. Ua ite Mephiboseta e e hinaaro te arii i te hau no te rave maitai i ta ˈna ohipa. Parau atura ïa oia e e nehenehe ta Ziba e tapea pauroa. Ua hoˈi mai Davida te tavini a Iehova i Ierusalema ei arii, tera te mea faufaa roa ˈˈe no Mephiboseta.

Ua mauiui mau Mephiboseta. Pinepine o ˈna i te manaˈo e mea ê roa oia. Ua here râ Iehova ia ˈna e ua haapao ia ˈna. Eaha te haapii mai?— Noa ˈtu e e rave tatou i te mea maitai, e parau paha vetahi i te mau mea haavare no nia ia tatou. Ua parau Iesu: “Ia riri mai to te ao ia outou ra, a haamanaˈo e o vau ta ratou i riri mai na, hou i riri mai ai ia outou.” Ua haapohe roa hoi te taata ia Iesu! E nehenehe tatou e papu e ia rave tatou i te mea maitai, e here te Atua mau ra o Iehova e ta ˈna Tamaiti ra o Iesu ia tatou.