Eaha te rave ia rahi roa te haapeapearaa?

Eiaha e haapeapea no ananahi

“Eiaha roa ïa e haapeapea no ananahi, no te mea e haapeapearaa ê to ananahi.”—MATAIO 6:34.

Te auraa: I te mau mahana atoa, e haapeapea iho â tatou. Eiaha râ e rave mai i to ananahi mau haapeapearaa no teie mahana. Tera mahana to ˈna fifi.

• E nehenehe te haapeapea rahi e faatupu i te ahoaho. A tamata na: A tahi, a farii e e haapeapea iho â tatou aita râ e faufaa ia tapitapi noa ia rahi roa ˈtu â te reira. A piti, a haamanaˈo aita e faufaa ia haapeapea rahi no te mau mea aita paha e tupu mai ta tatou i manaˈo.

Eiaha e titau hau atu

“Area te paari no nia mai, e mea . . . au noa.” —IAKOBO 3:17.

Te auraa: Eiaha e titau te mea tia roa no oe iho e no vetahi.

• A faatupu te feruriraa faahaihai e te huru au noa. A ite te vai ra to oe mau taotiaraa e to vetahi atoa. Ia na reira oe, e iti mai ïa te haapeapearaa e e maitaihia te ohipa. I roto i te mau taime fifi, mea maitai ia ataata rii no te tauturu ia oe ia faatupu noa i te hoê feruriraa maitai i nia i tera tupuraa.

A tapao te tumu e haapeapea ˈi oe

“E faaea hau noa te taata haroˈaroˈa.”—MASELI 17:27.

Te auraa: Ia toaruaru anaˈe to tatou aau aita to tatou feruriraa e afaro faahou. A vai hau noa.

• A tapao eaha te mea e haapeapea ra ia oe, e to oe huru i mua i tera tupuraa. Ei hiˈoraa, ia hepohepo oe a tapaopao to oe mau manaˈo, to oe huru e te ohipa ta oe e rave ra. Na te reira e tauturu ia oe ia ite eaha te rave ia hepohepo anaˈe oe. A feruri mea nafea ia ape te mau tupuraa o te haapeapea ra ia oe. E mai te peu e nehenehe a faanaho maitai to oe oraraa e to oe taime.

• Peneiaˈe a taui ta oe hiˈoraa i te hoê tupuraa. Aita paha te mea e haapeapea ra ia oe e haapeapea i te tahi. Tei te huru hiˈoraa. E hiˈopoa anaˈe ïa e toru manaˈo tauturu:

  1. Eiaha e ru ia faatupu i te mau manaˈo oti noa. Mai te peu te tiai ra oe i te hoê vahi taata e e tâpû mai nei te hoê i mua ia oe, e inoino paha ïa oe, a parau ai aita e ite i te peu. Teie nei râ, e tumu tano paha o ˈna i na reira ˈi. Mea maitai aˈe ia feruri oe mai tera.

  2. A hiˈo i te vahi maitai o te hoê tupuraa. Ei hiˈoraa, te tiai ra oe i te taote aore ra i te tauraa manureva, e nehenehe paha oe e rave i tera taime no te taio aore ra no te hiˈo ta oe mau rata uira. Aita ïa oe e fiu i te tiai.

  3. A hiˈo atea. A ui ia oe iho: “Teie fifi, e rahi anei ananahi aore ra teie hebedoma i mua?” Mea maitai ia faataa te mau haapeapearaa haihai i te mau fifi rahi.

Ia naho maitai ta oe ohipa

“Ia ravehia . . . te mau mea atoa ma te au e te naho maitai.”—KORINETIA 1, 14:40.

Te auraa: A tamata i te tapea i te hoê oraraa naho maitai.

• Mea au roa ia naho to tatou oraraa. No reira, eiaha e vaiiho no ananahi te ohipa ta oe e nehenehe e rave i teie mahana, a rahi roa ˈi te ohipa e te haapeapearaa. E tamata anaˈe na manaˈo tauturu e piti:

  1. A haamau i te hoê tapura ohipa au noa e a rave mai ta oe i faaoti.

  2. A hiˈopoa te tumu oe e vaiiho ai te ohipa no ananahi e a taui.

A vai aifaito noa

“Mea au aˈe hoê apu rima î i te faafaaearaa i e piti apu rima î i te ohipa rohirohi e te aˈuaˈuraa mataˈi.”—KOHELETA 4:6.

Te auraa: No te mea e ohipa noa te hoê taata, eita o ˈna e fanaˈo i te mau mea i noaa mai maoti “e piti apu rima î i te ohipa rohirohi.” Aita hoi to ˈna e taime e e puai faahou no te faaoaoa ia ˈna no te ohipa rohirohi ta ˈna i rave.

• A tapea i te hoê feruriraa au noa no nia i te ohipa e te moni. E ere te auraa mea rahi ta oe moni mea oaoa roa ïa oe e aita to oe mau haapeapearaa. Mea hape tera manaˈo. Te parau ra hoi te Koheleta 5:12: “No te rahi râ o ta ˈna mau taoˈa e ore ai e topa te taoto o te taata taoˈa rahi.” No reira, a ora noa ia au i te moni e vai ra ia oe.

• A rave i te taime no te faafaaea e no te tamǎrû i te tino. Ia rave anaˈe oe i te mau mea ta oe e au, e iti mai ïa te hepohepo. Teie râ, a ape i te mau faaanaanataeraa faufaa ore mai te mataitai-rahi-raa i te afata teata.

• A vai aifaito noa i te faaohiparaa i te mau ravea apî. Ei hiˈoraa, a faaiti i te taime i te hiˈo-noa-raa i ta oe mau rata uira, i te hapono i te poroi vini e i te haere-pinepine-raa i nia i te mau reni faahoaraa. Mea hau aˈe ia vaiiho te ohipa i te vahi raveraa ohipa.

A haapao maitai i to ea

“E faufaa to te faaetaetaraa tino.”—TIMOTEO 1, 4:8.

Te auraa: E maitaihia te ea ia faaetaeta pinepine i te tino.

• A rave i te mau ohipa e maitai ai to oe ea. Ei hiˈoraa, e nehenehe te faaetaetaraa i te tino e haamaitai i to oe huru e feruriraa e e ohipa maitai atoa to oe tino i mua i te mau haapeapearaa. A amu i te maa maitai e eiaha e haapae i te reira. A rave atoa i te taime no te taoto maitai.

• A haapae i te mau peu ino mai te puhipuhiraa i te avaava, te raveraa te raau taero e te inu-hua-raa i te ava. I te roaraa o te tau, mai te peu e tamau noa oe i te rave i tera mau peu e rahi roa mai te hepohepo, e maˈi-atoa-hia e e pau te moni.

• A haere e hiˈo i te taote ia rahi roa anaˈe te hepohepo. Mea tano ia farii e hinaaro iho â tatou i te tauturu.

A faaohipa maitai to oe taime

“Ia taa maitai ia outou eaha te mea faufaa roa ˈˈe.”—PHILIPI 1:10.

Te auraa: A hiˈopoa eaha te mea faufaa roa ˈˈe.

• A faanaho maitai ta oe ohipa. E tauturu te reira ia ite eaha te mea faufaa roa ˈˈe, eaha ta oe e faataime, eaha te ohipa ta oe e horoa na te tahi e rave aore ra eaha ta oe e haapae roa.

• I te hebedoma, a tapaopao mea nafea oe e faaohipa ˈi to oe taime. I muri iho, a feruri e nafea ia faaohipa maitai aˈe i tera taime. A na reira ˈi, e iti mai ïa te haapeapearaa.

• A rave i te taime no te faafaaea rii. A na reira ˈi, e itoitohia oe e e iti mai te hepohepo.

A ani i te tauturu

“E teimaha te aau o te taata no te ahoaho, e oaoa râ oia i te hoê parau maitai.”—MASELI 12:25.

Te auraa: E nehenehe te mau parau maitai e faaitoito e e tamahanahana.

• A paraparau i te hoê taata o te taa maitai i to oe huru. E nehenehe oia e tauturu ia oe ia ite i te hoê ravea ta oe i ore paha i manaˈo. Te faaiteraa to oe mau manaˈo horuhoru, e nehenehe te reira e tauturu ia oe ia maitai mai.

• A ani i te tauturu. E nehenehe anei e vaiiho i te ohipa na te tahi atoa e rave?

• Ia hepohepo oe no te huru o te hoê hoa ohipa, a hiˈo e nafea oe i roto i tera tupuraa. Ei hiˈoraa, e nehenehe oe e faaite ma te mǎrû to oe mau manaˈo. (Maseli 17:27) Mai te peu eita e haere, a faaiti mai ïa i to taime e o ˈna.

A imi i te aratairaa a te Atua

“E oaoa te feia e hiaai ra i te mau mea pae varua.”—MATAIO 5:3.

Te auraa: No te taata, eita e navai noa i te maa, te ahu e te nohoraa. Te vai atoa râ te hinaaro i te pae varua. No te oaoa, mea faufau ia ite tera hinaaro e ia haamâha i te reira.

• E tauturu mau te pure. Te titau manihini ra te Atua ia “huri . . . i to outou mau ahoaho atoa i nia ia ˈna, no te mea te haapeapea mai ra oia no outou.” (Petero 1, 5:7) Maoti te pure e te feruri hohonu e roaa mai te hau o roto.—Philipi 4:6, 7.

• A taio te tahi tumu parau o te faafatata ˈtu ia oe i te Atua. No roto mai i te Bibilia te mau aratairaa itehia i roto i teie vea, tei papaihia no te haamâha i to tatou mau hinaaro i te pae varua. I roto atoa e itehia ˈi “te paari mau e te aravihi ia feruri.” (Maseli 3:21) E nehenehe anei oe e haamau i te fa e taio i te Bibilia? No te haamata, e au paha oe i te taio i te buka Maseli.