NA TE AO NEI

Na te ara

“E pinepine, no te haapao ore, fatata 3 mirioni aiû te pohe i roto i te avaˈe matamua i te mau matahiti atoa. Ua hau atu hoê i nia i te toru o teie mau aiû o te pohe i te mahana matamua o to ratou oraraa.”—Save the Children International.

Beretane

Ia au i te pu o te ea a te Hau Beretane, ua maraa te numera o te feia i pohe no te mataˈi ino i roto 15 tuhaa oire i Lonedona i 2011. I parauhia na o te mori diesel te mea maitai aˈe e te mea iti aˈe i te haaviivii i te mataˈi. Tera râ, o te faaohiparaa o tera mori no te pereoo te tumu i viivii ai e 91 i nia i te hanere o te mataˈi i roto i tera mau tuhaa oire.

Rusia

Ia au i te hoê hiˈopoaraa a te tahi taiete uiuiraa manaˈo i 2013 (Public Opinion Foundation), e 52 taata no Rusia i nia i te hanere tei parau e e Kerisetiano Orthodoxe ratou, aita râ i taio noa ˈˈe i te tahi tuhaa o te Bibilia e e 28 i nia i te hanere tei parau e aita ratou e pure tamau ra.

Afirika

Ia au i te tahi faatiaraa a te hoê fare moni i te ara, ua iti te maa e ua rahi atu â te taata veve no te tahi fifi ta te mau taata faaapu i faaruru. Tei Afirika te afaraa o te mau vahi e nehenehe e faaapu i nia i to tatou fenua, e 202 mirioni tâ ïa. E 25 noa i nia i te hanere o te reira tei faaohipahia no te faaapu.

Marite

Ua mono e rave rahi fare haapiiraa i te mau buka neneihia i te mau matini uira. Ua tuuhia te mau buka atoa, porotarama taa ê e te tahi atu mau ravea haruharuraa e mataitairaa hohoˈa i roto. Noa ˈtu e mea mâmâ te matini, te feruri noa nei vetahi i te faaotiraa i ravehia.