Ia tupu te ati

I TE hoê mahana, e faaruru iho â te taata atoa e rave rau ati, oia atoa te feia mea rahi ta ratou taoˈa.

TE NA Ô RA TE BIBILIA:

“E ore e haapaohia e tei te avae oioi te hemo e hemo ai, e tei te etaeta e riro ai te re; e tei te feia paari e noaa ˈi te maa, e tei te feia haapao maitai te taoˈa, e tei te aravihi te itehia mai; e tau râ e te tiaia noa to te taata atoa ra. Aore roa e taata i ite i ta ˈna e roohia mai.”—Koheleta 9:11, 12.

Eita ïa oe e uiui e faaruru anei oe i te ati, e na ô râ mai te aha to oe huru ia tupu te reira. A feruri na, eaha to huru:

• ia ere oe i te faufaa i muri aˈe i tahi ati natura?

• ia roohia oe i te maˈi aita e rapaauraa?

• ia pohe tei herehia e oe?

Te tiaturi ra te mau Ite no Iehova, te feia i pia i teie vea, e nehenehe te Bibilia e tauturu ia oe eiaha noa ia faaoromai i te ati, ia noaa atoa râ i te tiaturiraa papu. (Roma 15:4) E hiˈopoa anaˈe e toru tupuraa o te faaite ra i te reira.