Te papai mai nei te feia taio

Faˈiraa i te mau hara Te tavini nei au ei matahiapo a te amuiraa, e te hinaaro nei au e faaite i to ˈu mauruuru no te tumu parau ra “Te uiui nei te mau taurearea . . . E tia anei ia ˈu ia faˈi i ta ˈu hara?” (8 no Tenuare 1997) Ua turai teie tumu parau e rave rahi feia apî ia faˈi i te mau hara ino roa ta ratou i rave na tau taime i teie nei. E mea oaoa ia ite e i muri aˈe i to ratou fanaˈoraa i te tauturu here, ua haapapu faahou teie feia apî i to ratou mau taairaa e o Iehova. Ua faaoti ratou e ia vai mâ noa ratou.

O. B., Italia

Fare tutu anaanatae Mauruuru no te tumu parau ra “E vahi anaanatae mau te fare tutu.” (8 no Tenuare 1997) Ua fanaˈo atoa vau i te mau aparauraa i roto i te fare tutu. A hohore noa ˈi au i te oniani e a utere noa ˈi i te umara putete, e haapii mai na to ˈu metua vahine ia ˈu ia here ia Iehova e e faaitoito mai na oia ia ˈu ia tavini taatoa ia ˈna. Ua riro mau â teie mau aparauraa i roto i te fare tutu ei mea faufaa roa i te mau taime fifi e patoi mai ai to ˈu metua tane ia mâua no te faaroo. I teie nei, te oaoa nei mâua to ˈu metua vahine e ua riro mai to ˈu metua tane ei tavini na Iehova. Ua haapii atoa vau e nafea ia faaineine e rave rahi maa au ia amu!

A. M. M., Italia

Te fifi rahi o Maggy Mauruuru no te neneiraa i te tumu parau ra “Te fifi rahi o Maggy e ta ˈu haamaitairaa.” (8 no Titema 1996) E mea fifi no ˈu ia ore e taˈi i to ˈu taioraa i te faatusiaraa ta teie metua vahine i rave i te mau mahana hopea o to ˈna oraraa, ia nehenehe hoi ta ˈna tamahine e fanauhia mai ma te oraora maitai. Ua au atoa vau i te parauraa ta ˈna tane e ua iti mǎrû noa to ˈna mauiui a paraparau noa ˈi oia no nia i te pohe o ta ˈna vahine—e ape paha tatou i te tauaparau no nia i te reira e te mau fetii o te taata i pohe. Te tiaturi nei au e farerei ia Maggy i te tia-faahou-raa.

L. S. C., Paniora

Te faaite maira te tumu parau e nafea tatou, i roto i te amuiraa, ia faaite i te tapitapi mau no te tahi. Ua horoa te mau hoa kerisetiano i te maa na te tane a Maggy e rave rahi avaˈe te maoro, e te ahu atoa no ta ˈna aiû. Auê ïa haapiiraa no tatou e ia rave hau atu â i te horoa-noa-raa i te tahi rata aore ra te taniuniuraa!

P. L., Hau Amui no Marite

Te hinaaro nei au e haamauruuru ia outou ma te mafatu taatoa no teie tumu parau. Ua pohe ta ˈu vahine i roto i te hoê ati purumu e toru hebedoma i muri aˈe i te poheraa o Maggy, ma te vaiiho mai ia ˈu e e vau tamarii. Te taa ra ia ˈu i te mauiui ta Lorne Wilkins i ite, e e ite noa nei â paha. Mauruuru no te neneiraa i teie mau huru faatiaraa no matou. Ua riro mau â te reira ei turu e ei faaitoitoraa no te feia atoa e faaruru ra i teie mau huru fifi rahi.

B. B., Farani