O vai te metua? O vai te tamarii?
TE AUTÂ nei te hoê orometua vahine haapii i te pae feruriraa no Kalifonia, i te mau Hau Amui no Marite, e ua ino te mana faatere a te mau metua i te mau matahiti i mairi aˈenei. “I roto i ta ˈu piha toroa,” o ta ˈna ïa e papai ra, “ua ite roa vau e rave rahi aparauraa i rotopu i te mau metua e te mau tamarii, e au ra e piti taata paari tei paraparau na, e ere râ i te hoê tamarii e te hoê metua. Ua ravehia te mau faaauraa parau, o te itehia ra i roto i ta tatou mau taiete rahi roa ˈˈe, no nia i te mau mea atoa, mai te taime e haere ai te tamarii e taoto, e tae noa ˈtu i nia i te tuhaa moni tamarii e te mau ohipa i te fare. I te tahi mau taime, mea fifi ia ite e o vai te metua e o vai te tamarii.”
Te horoa ra te Bibilia i te mau aˈoraa aifaito na te mau metua. Te faaara ra oia ia ratou no nia i te fifi e faaite i te huru etaeta roa, o te faariri ra i ta ratou tamarii, o te faahepohepo ra e o te haaparuparu ra paha ia ˈna. (Kolosa 3:21) Tera râ, te faaara atoa ra oia i te mau metua no nia i te tahi atu huru—te faatia-rahi-noa-raa ïa, na roto i te haapaeraa i to ratou mana faatere. Te na ô ra te Maseli 29:15 e: “O te tamaiti râ ia faarue-taue-noa-hia ra, e riro te metua vahine i te haama.” Te na ô atoa ra te tahi atu maseli a te Bibilia e: “O tei rave faaherehere i tana tavini mai te riiriiraa mai â, e riro oia [“i roto i to ˈna oraraa i muri iho ei taata aau mehara ore,” MN].” (Maseli 29:21) Noa ˈtu e te parau ra teie irava no nia i te hoê tavini, e tano maitai atoa teie faaueraa tumu no te mau tamarii.
Te mau metua e faaere nei i ta ratou mau tamarii i te aratairaa e te aˈo e titauhia, te faaruru nei ratou, i te pae hopea, i te mau faahopearaa iino—te hoê utuafare vî ore. Auê hoi te maitai rahi ia faaohipa i te mau aˈoraa a te Bibilia! Parau mau, te titauhia ra te mau tutavaraa no te na reira, tera râ, e nehenehe te reira e horoa mai i te mau haamaitairaa no te oraraa taatoa. Te na ô ra te Bibilia e: “E haapii i te tamaiti i tana eˈa ia haere ra; e ia paari oia ra, e ore e faarue i taua eˈa ra.”—Maseli 22:6.