Te papai mai nei te feia taio

Te faataaraa Te papai atu nei au no te faaite i to ˈu mauruuru hohonu no te mau tumu parau “Te haapaoraa i te tamarii—Eaha te manaˈo aifaito?” (8 no Titema 1997) I muri aˈe i to ˈu faataaraa, e mau fifi tei farereihia no te faaoti e ehia rahiraa taime e tia i ta ˈu tane matamua ia farerei i ta mâua tamahine. Ua manaˈo ta ˈu tane apî e e tia ia opani taua farereiraa ra i te rahiraa o te taime. Teie râ, ua haamaramarama te A ara mai na! i teie tumu parau na roto i te haapaoraa na mua roa i te maitairaa o te tamarii eiaha râ te mau manaˈo horuhoru o te mau metua aore ra o te mau metua apî.

L. C., Galles

Te vai ra ta ˈu hoê tamahine, ta ˈu tamarii otahi roa, tei faataa-ê-roa-hia ia ˈu nei i te faaotiraahia e te tiribuna e e ora oia i pihai iho i to ˈna metua tane. No reira, e au ra e ua papai-roa-hia mai teie tumu parau no ˈu. Ua riro te reira ei haamaitairaa ia ite e te horoa maira Iehova na tatou i ta tatou “maa i te hora mau ra.”—Mataio 24:45.

D. B., Helevetia

Ua haamauruuru vau ia Iehova ma te roimata ia ˈu i ite i te api matamua o te A ara mai na!, no te mea tei roto na vau i te hoê aroraa ia au i te ture no te haapaoraa i te tamarii e piti matahiti i te maoro. Ua riro na te reira ei tupuraa horuhoru mau. Ua mauruuru mau vau i te haamaramaramaraa, te huru poroi maramarama maitai i te vauvauraahia mai teie tuhaa.

A. F., Hau Amui no Marite

Ua faataa ta ˈu nau metua, a vai tamariirii noa ˈi au. Ua uiui na vau ma te taˈi e o vai ta ˈu e pee. No reira, e nehenehe outou e feruri i to ˈu mauruuru rahi i te mau tumu parau no nia i teie tuhaa. Ua mauruuru roa vau e te vauvau nei outou teie fifi ma te tâuˈa i te manaˈo o te tamarii.

K. D., Yugoslavia

Te peu mahu Ua oaoa roa vau i te taeraa mai ta ˈu A ara mai na! o te 8 no Titema 1997 e te tumu parau “Ia au i te Bibilia: E tia anei i te mau Kerisetiano ia riri i te mau mahu?” Mea papai-maitai-hia te reira e ua aifaito-maitai-hia te mau haamaramaramaraa no nia i teie tuhaa e ere roa ˈtu i te mea ohie.

L. W., Hau Amui no Marite

Te haumani Ua horoa vau na to ˈu paoti ohipa i te hoê vea o teie tumu parau “Te haumani anei ra outou i ta outou ohipa?” (8 no Tenuare 1998) I te poipoi aˈe, i te ohipa, ua parau mai oia ia ˈu e mea maitai roa te tumu parau. Ua opere oia i to ˈu mau hoa rave ohipa e ua vaiiho atoa oia te hoê api o teie tumu parau i roto i ta matou vahi faafaaearaa. Ua tae mai ta outou tumu parau i te taime au ra!

V. L., Hau Amui no Marite

Mauruuru no te haamaramaramaraa anaanatae roa. E 17 matahiti to ˈu e te rave nei au i te ohipa ma te taime taatoa. Ua horoa mai teie tumu parau i te aˈoraa maitai roa e mea nafea vau ia anaanatae hau atu â i ta ˈu ohipa. Mauruuru!

E. A., Italia

Mauruuru roa no teie tumu parau. Tei roto vau i te pitiraa o te matahiti o te haapiiraa toroa e te haamata ra vau i te haumani, aita vau i oaoa faahou i ta ˈu ohipa. Ua tauturu mai teie tumu parau ia ite faahou i te oaoa i roto i ta ˈu ohipa.

I. F., Helemani

Moscou Mauruuru no teie tumu parau “O Moscou—Te oroa o te 850raa o to ˈna matahiti.” (8 no Tenuare 1998) Mea putapû mau te farii maitai e te huru auhoa o te feia no Rusia. Ua ite au i teie tupuraa i nia ia ˈu iho i te matahiti 1989, i to te 3 000 feia no Rusia haereraa mai no te tairururaa Kerisetiano i Polonia. E mea putapû atoa te api hopea o teie vea, o te faaite mai i te hoê tuahine Rusia e poro ra i roto i te mataeinaa no Rusia. Ia faatia hau atu â Iehova e rave rahi feia paraparau i te reo Rusia ia riro mai e feia haamori ia ˈna!

I. L., Helemani

Te aamu o te oraraa Ua haaputapû mau te tumu parau ra “Ua tano noa iho â te hoani” i to ˈu mafatu. (8 no Tenuare 1998) E ono tamarii ta Wei Tung Chin, e ta ˈu atoa. Ua tahe to ˈu roimata a faatia noa ˈi o ˈna to ˈna aamu. Ua ite au e ua teoteo oia i ta ˈna mau tamarii e i to ratou utuafare. Aita ta ˈu iho e maha tamarii i faariro i te Kerisetianoraa ei eˈa no to ratou oraraa. Peneiaˈe i te hoê mahana e ite atoa vau i to ˈna oaoa.

E. H., Hau Amui no Marite