Te papai mai nei te feia taio

Arairaa i te ati e te animala rata I roto i te tumu parau ra “Ta outou urî—E hohoni anei i te tamarii?” (8 no Tiurai 1997), ua parau outou e e faataoto i te urî i roto i te fare tutu. I roto râ i te mau tumu parau na mua ˈtu, ua parau outou e eiaha tatou e vaiiho i te mau urî i roto i te mau vahi faaineineraa maa no te tahi mau tumu i te pae o te vai-mâ-raa.

R. H., Paniora

Te haamauruuru atu nei matou no teie manaˈo. Te tuu ra ta matou tumu parau i te tapao i nia i te parururaa i te mau tamarii, e aita e parauhia ra no nia i te mau tapitapiraa no te vai-mâ-raa. Te faaitoito nei râ matou i te feia taio ia hiˈo i te tumu parau ra “Nafea ia amu i te maa maitai?” (22 no Tiunu 1989 [Farani]), o te na ô ra e: “A faaatea ê atu i te mau animala rata e vetahi atu i te mau vahi faaineineraa maa.” E riro paha te hoê fare urî i rapaeau aore ra te hoê piha i rapaeau i te fare tutu, ei vahi taotoraa tano aˈe no te hoê urî.—ED.

Te oraraa i te fenua i raro aˈe Te hinaaro nei au e haamauruuru rahi roa no te tumu parau mahanahana e te oraora no nia ia Auteralia, oia hoi “Mea taa ê te oraraa i te fenua i raro aˈe.” (8 no Atopa 1997) Noa ˈtu e ua taio rahi na vau i te mau mea au roa e te anaanatae o teie fenua, ua tauturu mai ta outou tumu parau ia ˈu ia taa e e tia ia tatou ia haamauruuru ia Iehova no ta ˈna mau mea faahiahia i poiete.

L. K., Helemani

Paradaiso aita e fifi faahou Ua au roa vau i te mau tumu parau ra “Te hoê paradaiso aita e fifi faahou—Afea?” (8 no Atopa 1997) Ua pohe to ˈu mama ruau hou vau a fanauhia mai ai. Ua pohe oia i te mariri ai taata. I roto râ i te Paradaiso, aita ïa e maˈi faahou. Ua faaitoito mai teie tumu parau ia ˈu ia tapea i to ˈu haapao maitai ia nehenehe hoi au e farerei ia ˈna i roto i te Paradaiso.

M. J., Trinité

Kilimanjaro Ua au mau â vau i te tumu parau ra “O Kilimanjaro—Te tapoˈi o Afirika.” (8 no Setepa 1997) Ua ite au i te Mouˈa ra o Kilimanjaro i te avaˈe Tenuare 1994, i to ˈu haereraa i te hoê tairururaa na te mau nunaa atoa a te mau Ite no Iehova i Kenya. Ua putapû roa vau i to ˈu iteraa ˈtu ia ˈna e ua haamauruuru vau ia Iehova no ta ˈna ohipa faahiahia ei Poiete here no tatou.

E. J., Hau Amui no Marite

E ere i to teie nei ao Ua au roa vau i te tumu parau ra “Ia au i te Bibilia: ‘E ere i to teie nei ao’—Eaha ïa te auraa?” (8 no Setepa 1997) I muri aˈe i to ˈu haapiiraa i taua tumu parau ra, ua faaoti atura vau e eiaha e parau faahou “feia no teie nei ao” no te faataa i te mau taata e ere i te mau Kerisetiano. Inaha, e 30 matahiti i teie nei, aita vau iho i riro atura ei Kerisetiano. Ahiri te taata matamua o tei faaite mai ia ˈu i te Bibilia i faaahaaha mai, eita roa ˈtu ïa vau e hinaaro faahou e paraparau i te hoê Ite!

B. G., Hau Amui no Marite

Paradaiso aita e fifi faahou E iva matahiti to ˈu, e te hinaaro nei au e haamauruuru ia outou no te tumu parau ra “Te hoê paradaiso aita e fifi faahou—Fatata roa i te tupu.” Ua haaputapû mau â te tumu parau ia ˈu, no te mea ua faarue mai to ˈu papa i te oire, e i te po e mǎtaˈu na mâua to ˈu mama i te iriti i te haamaramarama no te mea e nehenehe te hoê taata e tomo mai i roto i to matou fare. No reira i to ˈu taioraa e te tǎpǔ ra o Iehova i te faaore roa i te ohipa ino e te haavîraa uˈana, ua topa ˈtura to ˈu hau.

D. M., Hau Amui no Marite