Te haere tia ra te haapaoraa hape i to ˈna haamouraa!

NO TE ite e ua fatata roa anei te hopea o te mau haapaoraa o te ao nei, e hiˈopoa anaˈe na i te hoê o te mau parau tohu faufaa roa ˈˈe a te Bibilia. No nia ïa i te hoê vahine taipe miterio i faataahia i roto i te buka hopea o te Bibilia, te Apokalupo.

E nehenehe anei ta outou e faahohoˈa i te hoê vahine o tei faatere ei arii vahine i nia i te mau nunaa, ma te mana i nia i te oraraa o te mau miria taata i te roaraa o te aamu—te hoê vahine moni o tei ahuhia i te ahu uraura e te uteute haviti mau, tei faanehenehehia ma te unauna rahi i te auro, te mau ofai maitatai, e te mau poe? E iˈoa roa tei papaihia i nia i to ˈna rae, e parau aro: “O Babulonia Rahi, o te metua vahine o te mau faaturi, e no te mau mea faufau o te ao nei.” Aita e feaaraa inaha, ua tapaohia oia e to ˈna huru oraraa huehue e te taiata, e ua “faaturi” oia e te mau arii o te ao nei. Ua taea-roa-hia te raˈi i ta ˈna ra mau hara. Te parahi ra oia i nia iho i te hoê puaa taehae uteute, e hitu afii e auahuru tara.—Apokalupo 17:1-6; 18:5.

Mai te peu e e nehenehe ta outou e faahohoˈa i teie vahine, te ite ra ïa outou i te vahine matamua i roto i te tupuraa i tohuhia mai, ta te aposetolo a Iesu ra o Ioane i ite i roto i te hoê orama tei faataehia mai e te hoê melahi. Ua faataa mai oia ma te oraora maitai i teie tupuraa i roto i te mau pene 17 e te 18 o te Apokalupo. A taio i teie mau pene i roto i ta outou iho Bibilia. E nehenehe ïa outou e pee i te tereraa o te mau ohipa mai te faaiteraahia mai e o vai teie vahine miterio e tae roa ˈtu i to ˈna haamouraa.

Te iteraa e o vai te vahine faaturi

E noaa mai te hoê haamaramaramaraa no te ite e o vai oia, na roto i na mea e piti te parahihia ra e te arii vahine faaturi i roto i te hoê auraa taipe. I roto i te Apokalupo 17:18, te faataahia ra oia mai “taua oire rahi ra ïa, o tei hau i te mana i nia iho i te hui arii o te ao nei.” Mea na reira oia ia parahi i nia iho “i te pape e rave rahi,” “e mau nunaa ïa, e mau [pǔpǔ] rarahi taata ïa, e mau fenua ïa, e mau reo ěê ïa,” ia au i te Apokalupo 17:1, 15. Ia au i te irava 3 o taua pene ra, te parahi atoa ra oia i nia iho i te hoê puaa taehae e hitu afii—i roto i te Bibilia, e faaohipa-pinepine-hia te mau puaa ei taipe no te mau hau, aore ra faanahonahoraa, politita o te ao nei.

Te faaite ra ïa te reira e, e taipe te vahine faaturi ra o Babulonia Rahi no te hoê hau emepera hanahana rahi, o te faatere ra i nia i te tahi atu mau hau e ta ratou mau tavini. Oia ïa te hau emepera a te mau haapaoraa hape o te ao nei.

I roto i te aamu, ua matau-maitai-hia te mana o te mau raatira faaroo i te pae no te faatereraa e te mau ohipa politita a te hau. Te na ô ra Te buka parau paari a te ao nei (Beretane) e: “I muri aˈe i te toparaa o te Hau emepera Roma no te pae Tooa o te râ [i te senekele 5], ua rahi aˈe te mana o te pâpa i to te tahi atu taata i Europa. . . . E mana politita to te pâpa e e mana pae varua atoa. I te matahiti 800, ua faakorona te Pâpa Léon III i te faatere Farani ra o Charlemagne [Charles Rahi] ei emepera no to Roma. . . . Ua faatumu o Léon III i te tiaraa o te pâpa no te faatiamâ i te mana o te hoê emepera i mua i te ture.”

Ua haapapu-faahou-hia te mana o te Ekalesia Katolika e o ta ˈna mau “hui arii” i nia i te mau faatere, na roto i te hiˈoraa o te karadino ra o Thomas Wolsey (1475?-1530). Te parauhia ra e, oia “te taata mana roa ˈˈe i Beretane i roto e rave rahi matahiti.” I raro aˈe i te faatereraa a te Arii Henri VIII, “na ˈna ˈtura i faatere i te mau ohipa atoa a te hau. . . . Ua ora oia ma te unauna e au i to te arii ra e ua oaoa-roa-hia oia i to ˈna mana.” Te na ô faahou ra te buka parau paari e: “Ua faaohipa te karadino Wosley i to ˈna mau aravihi rahi ei tia hau e ei faatere, i roto iho â râ i te faanahonahoraa i te mau taairaa o Beretane e te mau hau ěê, na Henri VIII.”

Te tahi atu hiˈoraa tuiroo no te mana Katolika i roto i te mau ohipa no teie nei ao a te hau, o te Karadino Richelieu ïa no Farani (1585-1642), “hau atu i te 18 matahiti, . . . na ˈna mau i faatere ia Farani.” Te na ô ra te buka i faahitihia i nia nei e: “E hiaai nounou tiaraa rahi to ˈna e ua titau atura oia i te hoê toroa teitei aˈe.” Ua faatoroahia oia ei karadino i te matahiti 1622 “e o ˈna ˈtura te mana faatere i roto i te hau Farani.” E au ra e, e taata rohi oia, inaha “na ˈna i aratai tino roa ˈtu i te nuu i te haruraahia te oire no La Rochelle.” Te na ô faahou ra te tumu parau e: “Te anaanatae rahi o Richelieu, o te mau taairaa ïa e te mau hau ěê.”

Te ite-papu-hia ra te apiti-tamau-raa o te Vaticana e te mau mana politita na roto i te mau parau faaite e pia-tamau-hia ra i roto i te vea a te Vaticana ra L’Osservatore Romano, no nia i te mau tia a te mau hau ěê o te haere mai e faaite i to ratou toroa i mua i te pâpa. Oia mau, te vai ra ta te Vaticana te hoê faanahoraa Katolika taiva ore o te faaara tamau mai i te pâpa no nia i te mau ohipa politita e a te mau hau e tupu ra na te ao nei.

E rave rahi atu â hiˈoraa o te nehenehe e horoahia no te faaite i te mana puai o te mau raatira faaroo—to roto e to rapae i te Amuiraa faaroo kerisetiano—i roto i te mau ohipa politita a teie nei ao. I te mea e te parahi ra te vahine faaturi taipe i nia iho i “te pape e rave rahi” (oia hoi ‘te mau nunaa, te mau pǔpǔ rarahi taata, e te mau fenua’) e i nia iho i te puaa taehae (oia hoi te mau hau politita atoa o te ao nei), te faahaamanaˈo atoa maira te reira e mea taa ê e mea puai aˈe to ˈna mana i nia i te mau nunaa, te mau fenua, e te mau hau, i te hoê noa mana politita. E hiˈo anaˈe na eaha te huru o to ˈna mana.

Te hoê tuhaa o te iˈoa roa i nia i to ˈna rae, “o Babulonia Rahi” ïa. E faahaamanaˈoraa te reira ia Babulonia no tahito ra, tei haamauhia e Nimeroda tau 4 000 matahiti i teie nei, e taata “haharu rahi [oia] i mua i te aro o Iehova,” te Atua mau. (Genese 10:8-10) I te mea e ua mairihia oia i teie nei iˈoa, te auraa ïa e e hohoˈa rahi atu â oia no Babulonia no tahito ra, e hoê â to ˈna mau tapao. Eaha ïa mau tapao? Ua parare te haapaoraa miterio, te mau peu tumu viivii, te haamoriraa idolo, te tahutahu, te peu hiˈo fetia, e te tiaturiraa haavare, na roto ia Babulonia no tahito ra—e mau peu anaˈe ïa tei opanihia e te Parau a Iehova.

Te na ô ra te hoê titionare (The New International Dictionary of New Testament Theology) e, i te senekele 18 hou to tatou tau, ua faarirohia o Mardouk ei “atua o te oire no Babulonia, e oia ˈtura te atua rahi o te pueraa atua e 1 300 no Sumeria e no Akadia. Ua tahoê mai oia i te mau peu tumu faaroo atoa i roto i te hoê anaˈe faanahoraa. . . . I roto i te Gen. 11:1-9, te faahapahia ra te paturaa o te hiero iti rahi no Babulonia, ei tapao no te teoteo o te taata o tei opua e ia naea-roa-hia te raˈi ia ratou.”

No reira, o Babulonia no tahito atura te pu mau o te haapaoraa hape, o tei haaviivii roa i te ao atoa nei i te roaraa o te tau. Ua parare te mau peu faaroo a Babulonia, te mau haapiiraa faaroo, te mau peu tumu, e te mau taipe na te mau fenua atoa o te ao nei e te itehia ra te reira i roto i te anoiraa o te mau tausani rahiraa haapaoraa o te ao nei. Ua hiti mai e ua mairi te mau basileia e te mau hau emepera politita, ua ora mai râ te haapaoraa a Babulonia.

No te aha to ˈna haamouraa i fatata roa mai ai?

Mai tei faataa-pinepine-hia na mua ˈˈenei i roto i teie vea, te faaite ra ma te hape ore te mau parau tohu a te Bibilia e te mau tupuraa o tei faaaueue i te ao nei mai te matahiti 1914 mai â, e te ora nei tatou i te tau “hopea o teie nei ao.” (Mataio 24:3) Te auraa ra, te fatata oioi maira te hopea o te faanahoraa o te ao nei tei au i te hoê puaa ra, e oia atoa te hopea o te “puaa uteute” ahuru tara, te parahihia ra e te vahine faaturi i teie nei. (Apokalupo 17:3) Oia mau, te faahohoˈa ra teie puaa i te amuitahiraa politita e tahoê ra fatata i te mau nunaa atoa o te fenua nei—oia hoi te mau Nunaa Amui. Te auraa o te hopea i tohuhia mai oia ïa, e faaore-roa-hia te faatereraa faaamahamaha e te paieti ore i nia i te huitaata nei. Teie râ, eaha ˈtura ïa no te arii vahine faaturi e parahi ra i nia i te puaa?

Te faataa ra te melahi a te Atua e: “Na tara hoê ahuru ta oe i hiˈo ra, e te puaa ra, e faufau ïa i taua faaturi ra, e e pau oia ia ratou i te haru, e e veve roa, e e amu i to ˈna tino, e e tutui ia ˈna i te auahi. Ua tuu hoi te Atua i te manaˈo i roto i to ratou aau ia rave ratou i to ˈna hinaaro, e ia au ratou, e ia horoa i to ratou mana arii i te puaa ra, e ia hope te parau a te Atua i te tupu.”—Apokalupo 17:16, 17.

No reira, te faaite ra te parau tohu e, na mua iti noa ˈˈe te puaa taehae politita e haamouhia ˈi, e haamata oia i te riri i te vahine e parahi ra i nia iho ia ˈna e e aro atu oia ia ˈna. No te aha? E au ra e e manaˈo te mau faatere e te mau hau e te haamǎtaˈuhia ra to ratou puai e to ratou mana, na teie haapaoraa faanahohia e faaô ra i roto i ta ratou mau ohipa. Ma te tupu taue noa, turaihia e te hoê puai vî ore, e faatupu ratou i te “manaˈo” o te Atua, ta ˈna faaotiraa, na roto i te raveraa i ta ˈna haavaraa i nia i te hau emepera faaturi e te faatahe toto a te haapaoraa hape na te ao nei.a—A faaau e te Ieremia 7:8-11, 34.

E tae mai te hopea o te mau haapaoraa hape o teie nei ao i te taime e manaˈohia ˈi e e mea puai e mea mana ratou. Oia, te faaite ra te parau tohu e na mua noa ˈˈe te vahine faaturi e haamouhia ˈi, te parau noa ra oia i roto i to ˈna aau e: “Te parahi arii vahine nei au, e ere au i te ivi, e ore au e ite i te oto.” (Apokalupo 18:7) Teie râ, e tae mai to ˈna haamouraa ma te faahitimahuta i te mau miria o to ˈna mau tavini. O te hoê ïa o te mau tupuraa manaˈo-ore-hia e te ahoaho roa ˈˈe o te aamu taata nei.

Mai te faraa mai o te Babulonia no tahito ra, ua faatupu te mau haapaoraa hape i te mana rahi i nia i te huitaata nei na roto i ta ratou mau raatira e to ratou mau taata turu; ta ratou mau haapiiraa faaroo, ta ratou mau peu tumu, e ta ratou mau raveraa; ta ratou mau rahiraa fare unauna rahi no te haamoriraa; e ta ratou mau taoˈa faufaa aita e faaauraa. Eita ratou e moe ma te itea-ore-hia. No reira, aita te melahi tei faauehia ia afai i te poroi haavaraa i nia i te vahine faaturi, i huna i ta ˈna parau ia ˈna i faaite e: “E râ tahi-noa-hia to ˈna pohe, o te pohe, e te oto, e te oˈe, e e pau roa oia i te auahi: e puai hoi to te Fatu, to te Atua, o te faautua ia ˈna ra.” No reira, e tae mai te haamouraa o Babulonia Rahi mai te uira e anapa taue mai te amoraa mata ra, inaha “e râ tahi-noa-hia to ˈna pohe.”—Apokalupo 18:8; Isaia 47:8, 9, 11.

Teie atura te uiraa ta te poroi puai a te melahi e faatupu, E toe mai anei te tahi haapaoraa, e mai te peu e e, teihea ïa e no te aha? Eaha ta te parau tohu e faaite ra? E tuatapapahia mai te reira i roto i te tumu parau i muri nei.

[Nota i raro i te api]

[Tumu parau tarenihia i te api 14]

Te utua toto a te Amuiraa faaroo kerisetiano i Afirika

I roto i te Apokalupo 18:24, te na ô ra te Bibilia e tei roto ia Babulonia Rahi te itearaahia te toto o “te feia atoa i taparahihia i teie nei ao.” A feruri na i te mau tamaˈi i tupu no te mau feiiraa i te pae faaroo e no te mea aita te mau raatira faaroo i manuïa i te arai i te reira. Te hoê hiˈoraa i tupu iho nei e haapapu ra i te reira, o te haapoheraa nunaa ïa i Rwanda, e 500 000 rahiraa taata o tei taparahihia—hoê i nia i te toru, e tamarii ïa.

Te faataa ra te taata papai Kanada ra o Hugh McCullum i te parau no Rwanda e: “Ua parau te hoê perepitero Hutu i Kigali [Rwanda] e, aita i taahia e no te aha te ekalesia i ore ai i manuïa i te faaite i te aveia i te pae morare. E tiaraa faufaa roa hoi to te mau epikopo i roto i te totaiete no Rwanda. Ua ite ratou e te fatata maira te ati na mua roa ˈˈe te mau haapoheraa i haamata ˈi. E nehenehe hoi te mau pupiti a te fare pure e riro ei ravea ia nehenehe fatata te huiraatira taatoa e faaroo i te hoê poroi puai o te nehenehe hoi e arai i te haapoheraa nunaa. Tera râ hoi, ua mamû noa te mau raatira.”

I muri aˈe i te haapoheraa ino roa ˈˈe i tupu i te matahiti 1994 ra, ua parau o Justin Hakizimana, matahiapo a te ekalesia, i roto i te hoê putuputuraa iti i ravehia i roto i te hoê fare pure Presbytérien no Kigali e: “Ua haere apipiti noa te ekalesia e te politita a Habyarimana [te peretiteni no Rwanda]. Aita matou i faahapa i te ohipa i tupu no te mea ua ino roa matou. Aita hoê o ta matou mau ekalesia, te Katolika iho â râ, i faahapa noa ˈˈe i te mau haapoheraa taata.”

Ua parau o Aaron Mugemera, orometua a te ekalesia, i te tahi atu putuputuraa i ravehia i Rwanda i muri aˈe i te haapoheraa nunaa e: “Mea haama roa no te ekalesia. . . . Ua taparahi-pohe-hia te taata i ǒ nei mai te matahiti 1959 mai â. Aita hoê i faahapa i te reira. . . . Aita matou i tia mai no te faahapa tahaa i te reira no te mea ua riaria matou, e no te mea e tiaraa maitai roa to matou.”

[Hohoˈa i te api 15]

Te mana nei teie “vahine faaturi” i nia i te ao atoa nei

[Faaiteraa i te tumu]

Globe: Mountain High Maps® Copyright © 1995 Digital Wisdom, Inc.