Vaticana II—Haamaitairaa aore ra ati?

MATAHITI 1962 i te Vaticana. I mua i te hoê epikopo tei maere roa, te tatara ra te pâpa i te hoê haamaramarama i roto i to ˈna aorai i Vaticana. Ia ˈna i na reira, te faaite ra hoi te pâpa Ioane XXIII eaha ta ˈna e titau ra i te Piti o te Apooraa i te Vaticana (1962-65), oia hoi: te faaôraa mai i te mataˈi apî i roto i te Ekalesia katolika, te hopoiraa mai i te hoê aggiornamento, i te faatanotanoraa i te mau manaˈo hopea.

Eaha te mau tauiraa ta te apooraa i hopoi mai i roto i te ekalesia? Te faufaa noa râ teie uiraa, inaha te tuatapapahia nei â hoi te parau no te Vaticana II e ta ˈna mau faahopearaa i teie mahana.

‘Te parau mau i roto i te tahi atu mau haapaoraa’

Ua hinaaro te pâpa Ioane XXIII i te mau tauiraa—e ua ite-papu-maitai-hia hoi te reira. Ua titauhia te feia tuatapapa i te parau no te Atua tei riro te mau manaˈo matamua i te ore roa ˈtu e fariihia tau matahiti na mua ˈtu, i te Apooraa no Vaticana, ei feia aravihi. Ua titau-atoa-hia te mau tia orthodoxes e porotetani ei feia hiˈopoa.

E tauiraa papu maitai tei tupu maoti taua tiaraa apî ra i roto i te parau no te tiamâraa i te pae faaroo e i te pae o te haava manaˈo. E rave rahi senekele te maoro to te ekalesia oreraa e farii papu i taua mau manaˈo ra; ua faariro te pâpa Gregory XVI, no te senekele 19, i te reira ei mau manaˈo “maamaa.” Tera râ, i te matahiti 1964, ua haamau te pae rahi o te apooraa i te hoê ture e farii ra e e tiamâraa to te taata tataitahi no te maiti i ta ˈna iho haapaoraa. Mai te vea ra Notre Histoire e haapapu ra, ua hau aˈe te reira i te tiamâraa iho: “Mai taua taime ra, ua fariihia aˈera hoi e e itehia ˈtu te tahi parau mau i roto i te tahi atu mau haapaoraa.”

I muri aˈe i te Vaticana II, ua tamau â te ekalesia i roto i ta ˈna huru haaraa tiamâ rahi mau no nia i te tahi atu mau haapaoraa. Ma te haapapu mai i te reira, ua haere atura te Pâpa Ioane Paulo II e farerei e rave rahi taime i te arii Hassan II no Morocco, te hoê teie aratai varua mahometa. Ua tere atoa ˈtu o ˈna i roto i te hoê ekalesia porotetani e i te hoê sunago i Roma. Te haamanaˈo ra e rave rahi mau katolika i te rururaa i tupu i te matahiti 1986 ra i Assise, i te fenua Italia i reira te Pâpa Ioane Paulo II i te titauraa i te mau tia o te mau haapaoraa rarahi o te ao nei, ia tahoê mai ia ˈna no te pure e ia tupu mau iho â te hau.

Vaticana II—E ati?

No vetahi pae, ua riro te “hutiraa i te mataˈi” haumǎrû e titauhia ra e te Pâpa Ioane XXIII mai te hoê mataˈi toetoe roa. No te turu i to ratou manaˈo, ua faahiti ratou i te hoê oreroraa tuiroo mau i reira te Pâpa Paulo VI, tei mono mai ia Ioane XXIII, i te faahitiraa e ua ô mai “te au auahi a Satani” i roto i te ekalesia. Te faataa ra te buka La Réception de Vatican II e, ia ˈna i faahiti i ta ˈna parau, “mai te huru ra ïa e te faatuati ra o [Paulo VI] i te puai i haamauhia e te apooraa i te ravea patoi i te mau maitai o te ekalesia.”

E rave rahi mau taata haere pure teie e turu nei i teie manaˈo. Te faaite ra te hoê titorotororaa i ravehia aita i maoro aˈenei e ua hau atu i te afaraa o te mau katolika i Farani teie e manaˈo nei e “ua rahi roa ta te ekalesia i te pae no te faatupuraa i te mau tauiraa.” Te faahapa nei te feia patoi i te Vaticana II i te ekalesia, i te mea e aita oia i tapea noa i to ˈna tiaturiraa i ta ˈna mau peu tutuu, ua vaiiho râ oia i te mau ravea apî o teie nei tau ia haaviivii ia ˈna. Te parau ra ratou e ua turu papu te ekalesia i te mau tauiraa i faaaueue i te totaiete o te pae Hitia o te râ e o tei faatupu i te ati i roto i te ekalesia.

Vaticana II—E haamaitairaa?

No te tahi pae, e ere te apooraa te tia ia faahapahia. Te parau ra ratou e te mau tapao matamua o te paruparu i roto i te ekalesia, ua ite-ê-na-hia hoi na mua ˈtu i te Vaticana II. Te haapapu ra te vea farani ra La Croix e: “Te ereraahia i te mau perepitero e te oreraa te taata e hinaaro i te tiaraa perepitero i roto i te mau fenua i te pae Hitia o te râ ma, e nehenehe e parau e te tumu o te ati ïa e itehia nei i roto i te totaiete taata e o ta ˈna atoa hoi mau faahopearaa i nia i te mau pǔpǔ taata kerisetiano: Ua rahi roa te mau kerisetiano e vaiiho nei ia ratou ia paremo roa i roto i te mau huru feruriraa e te mau manaˈo o teie nei tau.”

Te manaˈo atoa nei vetahi pae e mea faufaa roa te mau tauiraa i faaauhia mai e te Vaticana II. Te na ô ra te tahi atu papai vea o te vea ra La Croix e: “E riro paha te taata . . . i te uiui e eaha ˈtu â pai ïa te huru o te ekalesia ahiri oia i haamau noa i to ˈna manaˈo i roto.” E inaha, e rave rahi mau taata tuatapapa manaˈo katolika tei faataa mai e ua riro te ekalesia ei faanahonahoraa e faaohipa ra i te mau taata tia ore, e ua na roto mai oia i te fifi i mutaa ihora e e na roto atu â oia i te fifi. Teie te manaˈo ta Gilles, i faahitihia ˈtu na te parau i roto i te tumu parau na mua ˈtu, e horoa ra: “Ia hiˈo tatou i te mau fifi o te ekalesia, e parauhia mai hoi ia tatou e ua tano te ekalesia i te ropuraa o to ˈna ati i to ˈna apîraa ra e e ore atu iho â.”

Noa ˈtu e o te Vaticana II te tumu no te mau tauiraa tano aore ra tano ore, e mana faufaa roa to ˈna i nia i te mau katolika mai ta tatou e ite mai i roto i te tumu parau i mua nei.

[Hohoˈa i te api 6]

Ua faatia te Vaticana Piti i te mau tauiraa e te arepurepuraa

[Faaiteraa i te tumu]

UPI/Bettmann Newsphotos