Te hoê ‘tapitapiraa hohonu’—No te aha?

UA FAAITE te pâpa Ioane-Paulo II i to ˈna “hepohepo” i mua i te amahamaharaa i faatupuhia e te pǔpǔ tapea i te tutuu a te arii epikopo Lefebvre. Ua parau oia e e “oto rahi” to te Ekalesia.

Ua faaite te perepitero katolika o Joaquín Ortega, papai parau tauturu a te apooraa epikopo paniora, i to ˈna peapea i te na ôraa e: “Ua riro roa te ‘haapaoraa katolika mai te hoê fare toa’. E maiti te taata tataitahi i te mea e tano ia ˈna mai te huru ra e e maa punu anaˈe ta tatou mau haapiiraa.”

Area te arii epikopo Lefebvre ra, te haapapu ra oia e ua haavare te apooraa Vaticana II i te Ekalesia katolika tumu na roto i te iritiraa i te uputa i te mau tauiraa. Te manaˈo ra oia e ua faaaueue te apooraa i te tiaturiraa o te mau katolika e manaˈo ra e tei roto ratou i te Ekalesia mau.

Ua faataa poto mai te International Herald Tribune i te mau manaˈo o te arii epikopo tapea i te tutuu e to te feia e turu ra ia ˈna: “No te feia o te pǔpǔ tapea i te tutuu, e tia ia maiti: tei roto anei te Ekalesia i te hape na mua ˈtu i te apooraa aore ra ua hape oia i teie nei. Te parau nei ratou e ahiri e ua hape oia na mua ˈtu i te apooraa, peneiaˈe paha ua hape atoa oia i nia i te tahi atu mau haapiiraa. ‘Tei ǒ nei matou no te faaite i to matou ati-maite-raa ˈtu i te Ekalesia o te mau tau atoa’, o ta te arii epikopo ïa i parau.”

Teie râ, i to ratou aˈe pae, e rave rahi mau katolika haavare ore teie e aniani nei ahiri e ua niuhia te mau haapiiraa e te mau peu a te Ekalesia na mua ˈtu ia Vaticana II i nia i te parau mau aore ra i nia i te hape.

Te tapitapiraa i rotopu i te mau katolika manaˈo tiamâ

E rave rahi mau katolika manaˈo tiamâ teie e haapeapea nei e ia haafifi te ohipa Lefebvre i te mea o ta ratou e faariro nei ei mau ravea faaapî i faaotihia i Vaticana II. Te mǎtaˈu nei ratou i te tahi mau faahitiraa parau haamanahia a te Vaticana. Mai te mau parau hoi a te karadino Ratzinger, taata tiai i te pueraa haapiiraa katolika, taata haapao i te rururaa vaticana o tei matauhia i roto e maha senekele i raro aˈe i te iˈoa ra Amuiraa Moˈa a te Tiribuna rahi katolika.

Ua parau hoi te karadino Ratzinger, taata teitei no te Amuiraa no te haapiiraa o te faaroo, i Roma e: “E tupu noa te mau amahamaharaa mai te peu e ua faaea tatou i te ora e i te here i te tahi mau parau mau e te tahi mau faufaa o te faaroo kerisetiano.” Te mǎtaˈu nei te mau katolika farii i te mau tauiraa e te faahiti ra te karadino i ǒ nei i te parau no te mau ‘parau mau e te mau faufaa’ i haapaohia na i roto i te Ekalesia na mua ˈtu ia Vaticana II.

Ma te faahiti i teie mau manaˈo haapeapea, teie ta te hoê tumu parau a te vea ra Le Monde, oia hoi “Te hoo o te hoê amahamaharaa”, i faataa: “O vai tei ite ahiri e aita te Vaticana, ma te ore paha e ite aore ra e faˈi, e farii ra i te ‘tapea-maite-raa i te peu tutuu ma te tuu ia Lefebvre i te hiti’? (...) Aita anei [te Vaticana] e haa ra i teie mahana ia roaa faahou mai te mau upoo faatere haapaoraa e te feia faaroo e titau ra e tapea i te mau peu tumu, e ia haapapu iho â râ i te mana e te mau faufaa o te haapaoraa katolika, i te mau vahi atoa i reira te reira e patoi-tahaa-hia ˈi, i Europa Tooa o te râ e i Marite Apatoerau iho â râ?”

Te feia tuatapapa i te parau faaroo orure hau

I te avae tenuare 1989, ua nenei 163 feia tuatapapa i te parau faaroo katolika no te Repubilita no Helemani tooa o te râ, no te mau Pays-Bas, no Auteteria e no Helevetia, i te hoê parau tei matauhia i teie nei i raro aˈe i te iˈoa ra Parau no Cologne. I roto i te mau hebedoma i muri iho, ua apiti atoa mai te mau hanere feia tuatapapa i te parau faaroo katolika no te tahi atu mau fenua, mai ia Italia. Ua haamata teie orureraa hau rahi i muri aˈe to te Vaticana nominoraa ia au i to ˈna iho manaˈo i te hoê ekalesiatiko tapea i te peu tumu i nia i te tiaraa faatere o te tuhaa epikopo no Cologne, ma te ore hoi e fariihia mai e te mau huimana no taua vahi ra. Teie râ, aita noa te patoiraa i niuhia i nia i te nominoraahia te tahi mau epikopo tapea i te peu tumu, i nia atoa râ i te mau faatitiaifaroraa — te haamamûraa — ta te Vaticana i faahepo i te feia tuatapapa i te parau faaroo o te faahohoˈa ra i “te manaˈo faaroo i haapapuhia na te apooraa Vaticana II”. Ua patoi atoa te feia tuatapapa i te parau faaroo orure hau i te tiaraa o te pâpa no te faahepo i to ˈna manaˈo “i te pae no te mau haapiiraa faaroo”, no nia iho â râ i te faataimeraa i te fanau.

Ei pahonoraa, ua haapapu maitai te karadino Ratzinger e te feia e patoi nei i te tiaraa o te Vaticana no nia i te faataimeraa i te fanau e te faataaraa, te horoa nei ïa ratou i te hoê faataaraa hape no nia i te parau no te “haava manaˈo” e te “tiamâraa” e te ofati atoa ra i te haapiiraa tumu a te Ekalesia. Hau atu, ua faahaamanaˈo atoa oia i te mau ekalesiatiko teitei no Marite Apatoerau e eita e tia ia ratou ia farii i te “taˈi ahoahoa” a te feia tuatapapa i te parau faaroo ia faahema i ta ratou haapiiraa.

Te feaaraa o te mau katolika e rave rahi

I to ˈna uiuiraahia na te vea ra Le Monde, ua parau te hoê taata katolika tuatapapa i te parau faaroo katolika no Farani e: “Mea hape roa ia tiaturi e (...) no te mau taata tuatapapa parau faaroo anaˈe teie fifi. E mau auvaha anaˈe hoi ratou no te hoê tapitapiraa hohonu roa ˈtu â e haafifi nei e rave rahi mau katolika.”

E rave rahi mau katolika haavare ore teie e aniani nei mai te peu e ‘aita anei’ te arii epikopo orure hau o Marcel Lefebvre, noa ˈtu e ua hurihia o ˈna i rapae, ‘i pau i te hoê aroraa, tera râ, i upootia i te tamaˈi’. Inaha, te faatiahia ra te tahi mau mea i to ˈna mau taata ia hoˈi faahou mai ratou i roto i te nǎnǎ. Te faatupu-faahou-hia ra te pureraa na roto i te reo latino i roto e rave rahi mau fare pure, e te faatoroahia ra te mau epikopo tapea i te peu tumu. Teie te uiraa a te feia tapea i te tutuu: ‘No te aha te arii epikopo Lefebvre i hurihia ˈi i rapae inaha tei roto noâ te mau perepitero holane e haamaitai nei i te mau “faaipoiporaa” i rotopu i te mau mahu aore ra te mau perepitero no Marite Apatoa e faaitoito nei i te orureraa hau na roto i te haapiiraa faaroo no nia i te faatiamâraa, i te Ekalesia?’

E rave rahi mau katolika teie e feaa nei i mua i teie huru tupuraa. Ua papai te hoê o ratou, te hoê taata Farani, i teie parau i roto i te vea katolika ra La Croix: “Te mauiui nei te mau kerisetiano mai ia ˈu nei, i te mea e aita te mau taata [no roto i te mau amahamaharaa a te Ekalesia] e manuïa ra i te tauaparau e i te faaafaro i ta ratou parau; te faarue nei hoi vetahi i te faaohiparaa i te faaroo e tae roa ˈtu i te Ekalesia iho ma te maniania ore.”

Oia mau, aita teie mau taata e taa ra e no te aha te Ekalesia o ta ratou hoi e faariro ra ei Ekalesia mau i amahamaha ˈi mai teie te huru. Te aniani atoa ra te perepitero René Laurentin e: “No te aha râ teie mau amahamaharaa i rotopu i te mau kerisetiano?” A hiˈopoa na i te tahi mau tumu o teie mau amahamaharaa.

[Parau iti faaôhia i te api 25]

“No te feia tapea i te tutuu, e tia ia maiti: tei roto anei te Ekalesia i te hape na mua ˈtu i te apooraa aore ra ua hape oia i teie nei.” — International Herald Tribune.