Ia au i te Bibilia . . .

Tei rotopu te Mesia ia tatou nei!

“TE HAERE maira o Mandela! Te haere maira o Mandela!” o tei himenehia na ïa e te mau tamarii no Soweto, i Afirika Apatoa. Ua faariro-rahi-hia te matararaa mai o Nelson Mandela mai roto mai i te fare tapearaa i te 11 o te avaˈe febuare o te matahiti 1990 ra, ei haamataraa no te tahi tauiraa i Afirika Apatoa. Tera râ, e rave rahi matahiti te maoro na mua ˈˈe oia e matara mai ai mai roto mai i te fare tapearaa, ua vai noa mai to ˈna mana. Tei roto noâ oia i te fare tapearaa, ua aro puai oia i roto i te hoê “aroraa uˈana no te faaore i te parau no te faataa-ê-raa i te pǔpǔ taata ereere.” Mai ta te hoê vea e piahia na roto i te ao nei e faaite ra, aita na matahiti e 27 fare tapearaa i “faaiti mai i to ˈna mana—aore ra i ta ˈna haaraa.” Te faahohoˈa maitai ra to ˈna matararaa mai mai roto mai i te fare tapearaa i te taa-ê-raa i rotopu i te hoê haerea mai e te hoê vairaa mai.

Oia atoa, ei faahitiraa i te parau no te mauraa o Iesu Mesia i to ˈna mana arii, ua faataa maitai te mau taata papai bibilia o te senekele matamua i te hoê taa-ê-raa i rotopu i to ˈna haerea mai e to ˈna vairaa mai. E itehia te vairaa mai o Iesu Mesia ei Arii e rave rahi matahiti hou aˈe to ˈna “haerea mai na nia i te ata o te raˈi ra, ma te mana e te hanahana rahi.” (Mataio 24:30) E na mua mai hoi te vairaa mai itea-ore-hia o te Mesia (Heleni, pa·rou·siʹa) i to ˈna haerea mai (Heleni, erʹkho·mai) no te faatupu i te haavaraa i nia i te hoê ui orure hau e te paieti ore atoa.

Pa·rou·siʹa—Eaha mau na to ˈna auraa?

Te auraa o te parau heleni ra pa·rou·siʹa, “te vairaa mai ïa i pihai iho” e “ua riro ei parau haamanahia no te tere o te hoê taata tiaraa teitei, te mau arii aore ra te mau emepera e tere i roto i te hoê mataeinaa.” Te na ô ra te Theological Dictionary of the New Testament e: “Te turu ra te parau [Parousia] i te parau no te vairaa e itehia te ohipa.” E no nia i te vairaa mai o Iesu Mesia, te na ô ra te buka ra The Parousia e: “Aitâ te mau Papai i faahiti aˈenei i te parau no te ‘piti o te Parousia.’ Noa ˈtu eaha to ˈna huru, o te hoê ohipa taa ê teie, tei ore aˈenei i tupu na mua ˈtu. O te hoê teie vairaa mai taa ê mau e tei hau aˈe hoi i te tahi atu mau tupuraa no nia ia ˈna, i mua i te taata nei.”

Ma te faataa mai i te parau no nia i te mau parau tohu a Iesu ei pahonoraa i te mau uiraa i uihia mai na e te mau aposetolo i nia i te Mouˈa Olive, ua papai te orometua ra o A. T. Robertson i roto i te Word Pictures in the New Testament e ua “[faaohipa o Iesu] i te parau no te haamouraahia te hiero e o Ierusalema, tei tupu i nia i taua ui ra i te matahiti 70 hou to tatou tau, ei taipe no te piti o to ˈna haerea mai e no te hopea o teie nei ao . . . aore ra tupu-roa-raa te hopea. Eaha mau na taua mau uiraa ra, e e eaha ta Iesu i pahono atu?

Te tapao no te vairaa mai te Mesia

Mai tei faaitehia i roto i te Mataio 24:3, ua ui atura te mau aposetolo e: “[E faaite mai na oe ia matou, afea taua mau ohipa nei e tupu ai, e eaha te tapao no to oe vairaa mai e te hopea o te amuiraa o te mau mea nei]?” I roto i ta ˈna pahonoraa, ua horoa mai Iesu i ta ˈna mau pǐpǐ ra i te hoê tapao o te riro ei haapapuraa no to ˈna vairaa mai itehia e te mata taata nei, i roto i to ˈna mana arii. E itehia i roto i taua tapao taatoa ra i te mau tamaˈi rarahi, te parareraa te oˈe, te mau aueueraa fenua riaria mau, te maˈi, e te maraaraa te ohipa taparahi taata e te mǎtaˈu. E riro te tau no te vairaa mai te Mesia ei taime ahoahoraa e te aehuehuraa i roto i te ao nei. Eita hoi te mau faatereraa taata e te mau aratai o te ao nei e manuïa i roto i te hoê amuiraa e topa noa ˈtura.—Mataio 24:7, 12; Luka 21:11.

Ei haapapuraa i te parau mau o te mau parau tohu a Iesu, te na ô ra te tahi tuatapaparaa politita a te orometua ra o John Meisel e: “E hope hoi te hoê anotau faufaa roa, e e monohia na te hoê anotau tei riro ta ˈna faanahoraa i te ore e taa-maitai-hia.” I muri aˈe i to ˈna faataaraa mai i te parau no te poheraa te faatereraa parauhia autahoê, te toparaa te faatereraa totiare, e te au-ore-raa hoi te faatereraa ona, te na ô râ te orometua ra o Meisel e: “E rave rahi mau opuaraa a te taata nei e vai ra i roto i te aorai o te mau maimiraa totiare e te tia ia araihia.” Eaha ïa to te reira auraa? “Aita ïa te mau manaˈo o te ao o teie nei tau e manuïa nei e te titau ra e ia monohia.”

Te vairaa mai o te Mesia

Noa ˈtu te mau huru tupuraa peapea mau o te hoê ao e ino noa ˈtura, ua haamata te vairaa mai o Iesu i roto i to ˈna tiaraa arii a 75 matahiti i teie nei e ua itehia i roto i te hoê auraa papu maitai e te tia.a E maoti te pau i faatupuhia e na tamaˈi rahi e piti, ua haa te Arii i faakoronahia ra, o Iesu Mesia, i roto i te parau no te faatupuraa i te hoê nunaa taata apî—te hoê nunaa no te iˈoa o Iehova “no roto mai i te mau nunaa atoa e te mau opu atoa e te mau reo atoa.” Ua faaitoito te vairaa mai te Mesia ma te haa, i te ohipa pororaa na te ao taatoa nei e te hoê porotarama haapiiraa tei haaputapû i te mau milioni taata mafatu parau-tia e te farii maitai. Ua faaitoitohia ratou e tia i te pae o te Basileia o Iehova i tuuhia i roto i te rima o Iesu Mesia.—Apokalupo 7:9, 10.

Ia au i te mau haapapuraa e rahi noa ˈtura e itehia ra i te mau mahana atoa, ua tupu papu mau â te tapao e rave rahi o ˈna tuhaa no nia i te vairaa mai te Mesia, e mea faufaa mau â ia vai ara te mau kerisetiano e te faaruru nei ratou i te hopearaa o to tatou nei tau. O teie te taime no te “[faarahi atu â i to tatou ara-maite-raa]” i nia i te parau no te faakoronaraahia te Arii ra o Iesu Mesia. (Hebera 2:1) Teie ta ˈna e faaara maira ia tatou nei: “E tena na, e ara outou, tamau maite â i te pure, ia au ia outou te ora i teie nei mau mea iino e fatata mai nei, e ia tia maite outou i mua i te aro o te Tamaiti a te taata nei.”—Luka 21:36.

[Nota i raro i te api]