‘Eiaha e parau e eiaha’

TE NA ô ra te Koheleta 9:11 e: ‘Te roohia nei tatou paatoa i te tau e te mau huru tupuraa manaˈo-ore-hia.’ O ta matou ïa i farerei i te hopea o te avaˈe novema 1986. E toru matahiti e te afa to Tiarah, hoê o ta mâua e toru tamarii, a roohia ˈi oia i te maˈi o ta matou i manaˈo e e puta toetoe e te hota tamau. Ua afai atura mâua ia ˈna i te taote tamarii, o tei tono atu ia matou i te tahi atu taote. Ua manaˈo atoa oia e ua putahia o Tiarah i te toetoe, e ua roo-atoa-hia oia i te tahi taheraa toto i roto i te ouma, aita râ e faufaa ia haapeapea. Ua horoa mai o ˈna i te tahi atu raau hota, e te mau raau aro maˈi.

Ua ino roa o Tiarah. Ua naeahia te fiva i te 41° C, ua pihae oia, ua taviriviri to ˈna opu e ua mauiui to ˈna ouma. Ua patahia to ˈna mau mahaha i te radio, e ua faarahihia te faito raau aro maˈi. Ua taniuniu mai te vahine utuutu maˈi ia mâua no te faaite i te mau faahopearaa o te radio: ia au i te manaˈo o te mau taote, ua roohia o Tiarah i te maˈi mahaha ino roa. Tei roto to ˈna fiva i te faito e 42 e te 43° C, e ua topa roa ˈtura to ˈna faito toto faauta mataˈi ora i nia i te 2, faito raro roa. I te 16 no titema, ua tapeahia o Tiarah i te fare maˈi.

Ei mau Ite no Iehova, te auraro nei matou i te faaueraa i horoahia i te mau kerisetiano i roto i te Ohipa 15:29, oia hoi ‘e haapae i te toto.’ Teie râ, aita matou i haapeapea rahi roa no te uiraa o te toto: e taata aravihi mau te taote a Tiarah i roto i teie tuhaa, e ua ite maitai oia e eita matou e farii i te pâmuraa toto. I te taime a ô ai ta mâua tamahine i te fare maˈi, ua faahaamanaˈo oioi atu mâua i te taote i to matou tiaraa i nia i te toto; e ua pahono maira oia e: “E, te taa ra ia ˈu ta outou mau tiaturiraa, teie râ, eiaha e haapeapea.”

I te fare maˈi, ua ravehia i nia ia Tiarah te mau radio, te mau hiˈopoaraa mafatu e te mau tamataraa i te toto, e ua afaihia ˈtura o ˈna i roto i te hoê piha. Ua faaea noa mâua i pihai iho ia ˈna e tae roa ˈtu i te taime a varea ˈi oia i te taoto. I te poipoi aˈe, ua faaitehia mai ia ˈu e e maˈi mahaha iho â to ˈna, mea ino roa to ˈna huru e e tia ia tapeahia o ˈna i te fare maˈi e 10 e tae atu i te 15 mahana. Tei roto to ˈna faito fiva i te 43° C, e ua haapeapea mau â te reira i te mau taote. I muri aˈe i te taio-faahou-raahia te mau radio, te hiˈopoaraa mafatu e te mau tamataraa toto, ua faaoti aˈera ratou e rave faahou i te mau hiˈopoaraa apî. Ia au i te mau faahopearaa i noaa mai, aita o Tiarah i roohia i te maˈi mahaha, tera râ, te vai ra te hoê puu i nia i te hoê mahaha.

Ua faahitihia te parau no te toto

Mea ê roa ïa te huru tupuraa i teie nei. Ua rave-faahou-hia e rave rahi mau hiˈopoaraa, e tae noa ˈtu te hoê tamataraa no te maˈi tutoo, aita râ teie maˈi i itehia mai. Ua ravehia i nia ia Tiarah te mau hiˈopoaraa aravihi oia hoi te mau échographies, te mau scanners e te mau radio huru rau. Ua faaite mai te radio hopea i te hoê haapêraa ino mau o te mahaha atau. Area te mahaha aui ra, e au ra e ua paruparu roa; mea faufaa roa hoi oia, no te mea na ˈna e tauturu ra ia Tiarah ia huti i te aho. Ua faahiti-faahou-hia te uiraa no nia i te pâmuraa toto. I to Tiarah ôraa ˈtu i te fare maˈi, ua tarima mâua i te mau parau faatiamâraa huru rau no te faatiamâ i te fare maˈi i te mau hopoia atoa no to matou patoiraa i te toto. I te mea e te haamǎtaˈuhia ra te ora o ta mâua aiû i teie nei, ua manaˈo te mau taote e te taui mâua i ta mâua faaotiraa.

I te mea e aita mâua i fati, ua taui ihora te mau mea atoa. Ua pari aˈera te mau faatere o te fare maˈi ia mâua ei metua tia ore, ma te faaara mai e e titau ratou i te mau tiribuna i te parau faatia no te pâmu i te toto. E rave atoa ratou i te mau faanahoraa ia iritihia mâua i te hopoia e haapao i ta mâua na tamarii e piti. Ia noaa mai ia ratou i te faaueraa a te tiribuna, e tatara ratou i te mahaha tei maˈihia. Ua faataa faahou atura mâua e aita mâua e patoi ra i te mau ravea rapaauraa e, mai te peu e eita mâua e faatia i te toto, e farii râ mâua i te mau raau monoraa e ere i te toto.

Aita râ e faufaa. Aita te mau taote i hinaaro e faaroo i ta mâua parau. Ua haamata ihora ratou i te faahepo ia mâua na roto i te pariraa ia mâua ei metua ino mau i mua i te aro o te mau melo atoa o te pǔpǔ rapaauraa e no taua vahi ra, i te mau taote, te feia tamâ fare e tae noa ˈtu te mau vahine utuutu maˈi. I muri iho, e haere mai teie mau taata e hiˈo ia mâua e e ani mai ratou e no te aha mâua e vaiiho noa ˈi i ta mâua tamahine ia pohe. Ua faaara ˈtura mâua ta ˈu tane i te mau taote e e imi mâua i te tahi atu taote e te hoê fare maˈi o te farii i te haapao ia Tiarah e i te rapaau ia ˈna ma te ore e faaohipa i te toto. Ua pahono maira ratou e eita hoê fare maˈi e farii i ta mâua aiû ia hiˈohia to ˈna huru. Ua faahaamanaˈo atura vau ia ratou i teie nei parau: Eiaha e parau e eiaha.

‘Noa ˈtu e e pohe au, eita vau e hinaaro i te toto’

Ua faataa ˈtura vau i te ohipa e tupu ra ia Tiarah, ua faaite atoa vau i te parau a te mau taote, te manaˈo o Iehova no nia i teie tumu parau e te ohipa o ta mâua i opua e rave: e imi i te hoê taote e te hoê fare maˈi o te rapaau ia ˈna ma te ore e faaohipa i te toto. Noa ˈtu e mea apî roa o ˈna, ua taa maitai ia Tiarah. Te hinaaro ra oia e auraro ia Iehova. Noa ˈtu e e pohe oia, eita o ˈna e hinaaro i te toto. Aita vau i nehenehe e tapea i to ˈu roimata i to ˈu faarooraa i ta ˈu tamahine, tei pohehia i te maˈi, ia rave o ˈna iho i ta ˈna faaotiraa. Ua taa ˈtura ia ˈu i reira i te faufaaraa ia haamata i te haapii i te Bibilia i te mau tamarii mai to ratou aruaruraa mai â; e no reira, noa ˈtu e e toru matahiti e te afa noa to ˈna, ua parau mai o Tiarah na roto i ta ˈna iho mau parau i to ˈna hinaaro e auraro maite ia Iehova noa ˈtu eaha te ohipa e tupu.—Ephesia 6:4; Timoteo 2, 3:15.

No te tatara mai ia Tiarah i te fare maˈi hou te tiribuna e faaue ai i te pâmuraa toto, ua paraparau atu ta ˈu tane e te hoê o te mau matahiapo o te amuiraa. Ua faaara ˈtura teie matahiapo i te hoê taote, o tei parau e e hiˈo o ˈna e eaha ta ˈna e nehenehe e rave. Ua faaara faahou te reira i to matou tiaturiraa.

Ua faaea noa vau i te fare maˈi mai te po mai â a tapeahia ˈi o Tiarah i te fare maˈi. Ua rohirohi roa vau, i te pae tino e i te pae feruriraa atoa. Ua ite ta ˈu tane i te reira, e ua faahepo maira o ˈna ia ˈu ia hoˈi au i te fare. O ˈna ïa te faaea i pihai iho ia Tiarah i taua po ra. Ua hoˈi atura vau i te fare, aita râ to ˈu taoto i topa. Ua tamâ ˈtura vau i te fare, ua taniuniu atu vau i to ˈu mau metua e ua tauaparau atoa vau e te tahi atu mau hoa Ite no Iehova. I te pae hopea, ua varea ˈtura vau i te taoto—ehia maororaa, aita ïa vau i ite—e tae roa ˈtu i te taime i taˈi mai ai te niuniu. Ua riaria roa vau i te pahono, ma te manaˈo e o ta ˈu paha tane e faaara maira e ua pohe o Tiarah.

Ua pahono atura vau. O te taote ïa ta te matahiapo i paraparau atu. Te faaite maira o ˈna e ua itehia mai te hoê taote o te farii i te faatura i to matou tiaraa no nia i te toto e i te haapao ia Tiarah noa ˈtu to ˈna huru atâta mau. Ua rave atoa oia i te mau faanahoraa i titauhia no te taui i te fare maˈi! Ua haamauruuru atu vau ia ˈna ma te taˈi. I to ˈu vaiihoraa ˈtu i te niuniu, ua tuturi roa ˈtura vau no te haamauruuru ia Iehova.

I muri aˈe e 10 mahana i roto i te fare maˈi matamua, ua ô atura o Tiarah i roto i te hoê fare maˈi no te tahi atu tuhaa no New York, e haapao ra i te rapaauraa i te mau maˈi o te mahaha i nia i te tamarii. I to ˈna taeraa ˈtu i reira, te tiaihia ra o Tiarah. Ua ravehia ˈtura te mau scanners, te mau radio, te mau échographies, te mau hiˈopoaraa mafatu e te mau tamataraa toto. Ua tuatapapa-atoa-hia te pueraa parau i faataehia mai e te fare maˈi matamua. I muri aˈe i taua mau hiˈopoaraa atoa, ua faaoti aˈera to matou taote apî, te hoê taote aravihi i te pae no te mau mahaha, e mea hape mau â i te pae rapaauraa ia rave i te hoê pâmuraa toto e e riro te tino o Tiarah i te patoi i teie pâmuraa.

Ua ora roa mai oia ma te ore e faaohipa i te toto

I roto i teie fare maˈi, ua fanaˈo o Tiarah i te mau rapaauraa faahiahia mau tei horoahia mai e te hoê pǔpǔ aravihi no te rapaau i te mau maˈi o te mahaha i nia i te mau tamarii apî roa. Ua ani mai te mau taote i to mâua manaˈo e ua faataa mai ratou i te mau ravea e faaohipahia. Ua faataoto-noa-hia te hoê vaehaa o Tiarah. I muri iho, ua iritihia mai te hoê tuhaa o te pape o te iri rairai o te mahaha no te tamata i to ˈna huru i mua i te mau raau aro maˈi taa ê i roto i te piha maimiraa. Ua aro te hoê raau matauhia tei faaohipahia no te rapaau i te mau maˈi o te hutiraa aho, i taua manumanu maˈi ra. Ua patiahia ˈtura e rave rahi mau faito o teie raau i roto ia Tiarah e ua tuuhia ˈtura oia i raro aˈe i te tapoˈi mataˈi ora e 10 mahana. Ua maitai mǎrû noa maira oia.

I to ratou hiˈopoaraa i te mau scanners e te mau radio, ua ite aˈera te mau taote i te hoê puu i raro mai i te mahaha atau. Te faaiti ra te raau aro maˈi i te pape e haaati ra i te mahaha, aita râ o ˈna e aro ra i te puu. Inaha, te hamani faahou ra te puu i te pape, e inaha, ua opua aˈera te mau taote e tatara i taua puu nei. Na mua ˈˈe râ, ua tamau noâ ratou i te rapaauraa e te raau aro maˈi, o ta ratou i apiti atu i te tahi. Ua horoa-atoa-hia i te mau faito auri rahi na Tiarah, e ua tuuhia ˈtura oia e toru mahana i raro aˈe i te patiaraa pape sérum hou e horoa-faahou-hia ˈtu ai i te tabula maa taa ê. Ua maraa ˈtura to ˈna faito toto faauta mataˈi ora i nia i te 5, e i muri iho i te 7. Ua maere roa te feia maimi no nia i te toto e te mau mahaha i teie maitairaa oioi e te tamau; ua parau roa mai hoê e: “Na to outou Atua e tauturu ra ia ˈna.”

I te mea e aita te mau faito raau aro maˈi puai e ohipa ra i nia i te puu iho, ua hiˈopoahia te pape e vai ra i roto. Ua itehia ˈtura e te vai ra te tahi atu raau o te aro ra i taua manumanu maˈi ra. I te mea e e manumanu teie o te faatupu i te mau maˈi o te hutiraa aho, o te itehia i roto i te vaha, ua faataa te taote e peneiaˈe ua momi o Tiarah i teie manumanu e te tahi maa. Ua tomo oia na roto i te mau eˈa hutiraa aho a pou roa ˈtu ai i roto i te mahaha. No te paruru ia ˈna i te ohipa a te mau raau aro maˈi, ua haaati te manumanu maˈi ia ˈna i te hoê iri rairai, e na te reira ïa i faatupu i te puu. Ia au i te taote, mea varavara roa te reira. No reira, ua manaˈo atura oia e papai roa i te mau mea atoa tei itea mai ia ˈna e te mau ravea i faaohipahia, no te horoa ˈtu i muri iho i te hoê vea a te mau taote.

I muri aˈe i to ˈna faaearaa hoê avaˈe i roto i teie fare maˈi, ua nehenehe atura o Tiarah e hoˈi i te fare. Ua hiˈopoa-noa-hia oia e ua hoˈi faahou atu oia e hiˈo i te taote hoê taime i te hebedoma i roto e toru avaˈe, ma te tamau noa i te rave i te mau faito raau aro maˈi e te auri puai. Aita roa ˈtu râ oia tâpûhia. Ua ora roa mai oia. Aita hoê porao faahou i nia i to ˈna mahaha.

I teie nei, ua riro o Tiarah ei tamahine poro i roto i te amuiraa kerisetiano a te mau Ite no Iehova. I te 14 no febuare 1991, ua horoa oia i ta ˈna tumu parau matamua i te Haapiiraa o te taviniraa teotaratia. Te haamauruuru nei mâua ta ˈu tane ia Iehova i to ˈna haamaitairaa mai i to matou hinaaro papu e patoi i te faaohiparaa i te toto no te auraro i ta ˈna mau faaueraa. Ia tamau noâ tatou paatoa i te arue ia Iehova, no te mea e tia iho â ia na reira. E, mai te peu e e parau mai te hoê taote ia outou i te hoê mahana e eita roa ˈtu outou e ora mai te peu e e patoi outou i te toto, a faahaamanaˈo atu ia ˈna i teie parau: ‘Eiaha e parau e eiaha.’—Faatiahia e Nina Hooks, Brooklyn (New York).