Te hoê mea faufaa aˈe i te moni

“Te mea e ume ra ia tatou ia rohi i teie nei mahana ua niu-taatoa-hia ïa i nia i te utua o te moni.”—Psychology Today.

E MAU opuaraa rahi ta Nancy raua o Howard i muri aˈe i te faaipoiporaa i te matahiti 1989. Ua hinaaro raua i te hoê fare, te hoê aiû, nau pereoo apî, e te hoê tere i te fenua ěê. Ua ravai ta raua moni no te reira. Ma te taue, erehia ˈtura raua i ta raua ohipa. Te moni i tapeahia no te aufau i te hoê noa tuhaa ia hoo anaˈe raua i te fare ua ravehia ïa no te aufau i te fare tarahu.

Ma te haapeapea no a muri aˈe, vaiiho ihora raua i ta raua mau opuaraa—e te fanau-atoa-raa i te tamarii. “E pae matahiti ïa i teie nei,” ta Nancy i parau, “Aita vau e manaˈo nei e e hoˈi faahou mauâ mai mutaa ihora. Ua aramoia roa ïa, e aita vau i papu e ite-faahou-hia te reira.”

Te faahohoˈa maitai maira te reira i te pau rahi ia ere-anaˈe-hia te ohipa! Te faaite atoa râ te reira i te huru papu ore o te moni. Te mea e vai nei, ananahi aita faahou ïa. Mai ta te Bibilia e faaara maite ra: “E tiatonu â oe i to oe mata i te taoˈa ra e aita nei ïa? te rave nei hoi te reira i te pererau, e te maue ê nei mai te aeto i nia i te raˈi ra.”—Maseli 23:5.

Te fariiraa i te huru papu ore o te moni, mea ohie i te parau i te rave. Ua tapao te Psychology Today e “O te moni te faito a te ao nei,” ia au i te huru o te taata no nia i te moni. “E pinepine tatou i te faaau i te faufaa o te mau mea na nia i te moni.” I te manaˈonaˈo-noa-raa e nafea e noaa ˈi te moni ua roo-atoa-hia te feia ona i te mǎtaˈu tamau, te ahoaho e te tahi atu mau maˈi.

Te faufaa o te paari

Te vai nei râ te hoê mea faufaa aˈe i te moni. Te faaite ra te Bibilia i te reira i roto i te Koheleta 7:12: “E haapuraa hoi tei te paari, e haapuraa tei te moni.” E te na ô faahou ra te irava no nia i te paari tei hau aˈe i te moni: “Te maitai o te paari ia noaa, na te reira e horoa mai i te ora i te feia fatu ra.”

Te paari o te aravihi ïa i te faaohipa i te feruriraa tano ia faaruru anaˈe tatou i te mau tupuraa fifi mau. Ia ere-anaˈe-hia tatou i te ohipa, e faaite mai te hoê feruriraa tano e eita e tia ia faitohia te faufaa mau o te oraraa na nia i te tara e te toata. E tauturu atoa te feruriraa tano ia tapea tatou i te mau mea matamua i mua ia tatou.

Eaha ta oe mau mea matamua?

Eaha ta oe e tuu i te parahiraa matamua i roto i to oe oraraa? E mea faufaa aˈe anei ta oe ohipa i to oe faaipoiporaa? Mea faufaa aˈe to fare i ta oe mau tamarii? Mea faufaa aˈe ta oe moni i to oraora-maitai-raa? I te mau mahana atoa ua niuhia ta tatou mau faaotiraa i nia i te mea e ume ra i to tatou feruriraa, te mau mea matamua. Ia faaruru anaˈe tatou i te mau fifi i te pae no te moni, na teie mau mea matamua e aratai i tatou e rave. Ua niuhia ta oe mau mea faufaa i nia i te aha?

Ua parau Iesu e: “E ao to te feia i ite i to ratou mau hiaai i te pae varua.” (Mataio 5:3) A tapao e ua faaite o Iesu e e hiaaihia te mau mea i te pae varua, e ohipa matamua te reira e ere noa i te hoê huru maitai te tia ia titau ia maitai anaˈe te mau mea atoa o te oraraa.

E mea fifi mau ia tuu i te parahiraa matamua teie hiaai i te pae varua ia teimaha anaˈe tatou i te imiraa i te mau mea materia na te utuafare. Te feia râ tei na reira, e oaoa ïa ratou, ta Iesu ïa i parau. I te haapeapearaa ia navai te moni, ua tiamâ ïa ratou i te “ahoaho o te feruriraa” ta te feia i ite ia tuuhia ˈtu te moni i te parahiraa matamua. (Timoteo 1, 6:10, Phillips) E ite atoa teie feia i te tamahanahana i roto i te mau parau a Davida i roto i te Salamo 37:25: “I vai apî na hoi au, e teie nei ua ruhiruhia; aitâ râ vau i ite i te feia parau-tia i te faarueraahia, e to ˈna ra huaai i te aniraa i te maa.”

A haamâha i to oe mau hiaai i te pae varua

Tei roto iho â i te taata te hiaai i te mau mea i te pae varua. E hiaai te taata hau atu i te maa, te ahu, e te fare. E titau hau atu â te taata haapao i ta te varua, ma te ui, ‘Tei i ǒ nei au, no te aha?’ e, ‘Te haere tia ˈtu nei teie nei ao—e to ˈu iho oraraa—ihea?’

Na te mǎtaˈu i te hoê “ati rahi i te pae faanavairaa faufaa” i turai e rave rahi taata ia taa i to ratou hiaai i te pae varua. Te faaite ra te Newsweek e: “Te hooraa ˈtu i te mau buka tohu—tei tatara i te mau tupuraa o teie nei tau ia au i te mau tapao no nia i te hopea o teie nei ao o te Bibilia—ua hau atu ïa i te 50 e te 70 i nia i te hanere i te matahiti i mairi.” Teie nei râ, no te haamâha i te hiaai i te pae varua, e tia i te taata ia titau i te ite mau, eiaha râ i te mau maimiraa a te taata nei.

Te titauhia ˈtu nei oe ia hiˈopoa maite i te Parau a te Atua, te Bibilia Moˈa. Te vai nei i roto te ite paari faufaa no te tauturu ia oe ia faaruru atu i te hepohepo o te oraraa. Hau atu â i te reira, e horoa te Bibilia i te ite mau no nia i te auraa o te “ati rahi” o teie nei mahana. (Timoteo 2, 3:1) A papai atu i te feia nenei i teie vea, e nehenehe e faaterehia i to oe fare te hoê haapiiraa bibilia tamoni ore. Teie te taime tano roa no te imi i te ite paari faufaa no teie nei tau—e te ite mau no a muri aˈe—no roto mai i te Parau a te Atua, te Bibilia.

[Hohoˈa i te api 9]

Ia poiherehia te mau faufaa i te pae varua, e tia ˈi