Te nounou moni—Tumu o te ino rahi
E RIRO te mau ui tataitahi i te parau mai e ua ite ratou i te maimiraa rahi roa ˈˈe o taua taoˈa hinaaro-rahi-hia ra i te ao nei—te moni! E nehenehe ratou tataitahi e faahiti i te mau tamaˈi o ta ratou i aro ia noaa mai te faufaa e te moni, e pinepine e tamau noa te tamaˈi haapao pau roa te moni.
Na te ao nei, e mau mirioni taata o tei taparahihia no te moni. Ua haruhia te mau tamarii e feia moni to ratou mau metua e ua tapeahia ratou no te hoê taui—te moni ta te mau metua e aufau ia faahoˈihia mai ta ratou mau tamarii ma te peapea ore. Ua tavirihia te mau taata ite ore i te moni o ta ratou i haaputu i to ratou oraraa taatoa e te feia taviri aravihi. Ua paheruhia e ua eiâhia te fare o te taata no te moni. Ua piihia te mau taata mǎtaˈu ore e “Enemi numera hoê o te huiraatira” no te mea ua eiâ ratou i te hoê noa fare moni. Aita hoê ui e nehenehe e parau e o ˈna anaˈe tei farerei i teie mau ohipa haama. Aita e ui, ei hiˈoraa, o tei ite i te maimiraa nounou roa ˈˈe i te moni maoti râ te ui o tei ite i te hoê taata hairiiri i te hooraa i to ˈna hoa piri roa, te taata rahi roa ˈˈe i ora aˈenei, no e 30 moni.
I te pae hopea râ o teie ui, ua topa te tapaparaa i teie ravea tauiraa morohi noa, tei faataahia e te hoê papai buka Marite mai “te dala marite mana hope, taua taoˈa rahi ra tei haamorihia na te ao atoa nei,” i roto i te ino-roa-raa. Aita ˈtu ui o tei ite i te mau eiâraa fare moni mǎtaˈu ore roa ˈˈe—e mau mirioni dala marite o tei haruhia mai i te feia haapao moni ma te haamǎtaˈuhia e te pupuhi, eiaha noa e te mau tane e te mau vahine, e te mau taurearea atoa râ. No te mea e ua rahi roa teie mau eiâraa i teie nei, aita ˈtura e tâuˈa-faahou-hia nei e te mau ravea haapuroro parau apî. E rave rahi mau taiete moni o tei topatari no te mea ua faaohipa te mau fatu nounou no ratou iho, ma te ofati hoi i te ture, i te mau mirioni i roto i te afata a te feia vaiiho moni, ua haamâuˈa ratou i te faufaa a te fare moni e ua pau roa atoa te faufaa a te feia vaiiho moni e rave rahi.
Eaha te nehenehe e parauhia no te mau rave ohipa i roto i te mau piha toroa i teie mahana o te taviri nei i te mau mirioni farane i ta ratou mau paoti ohipa no te tamata i te pee i te huru oraraa o te feia moni tuiroo? Mea rahi te parau e nehenehe e papaihia no nia i te feia o te tapuni nei na roto i te mau aroâ pouri no te eiâ i te mau pute moni a te feia hahaere. Eaha atoa no te mau eiâraa mǎtaˈu ore e itehia e e rave rahi mau taata i te ao, te feia e taparahihia e o te eiâhia ta ratou moni i roto i to ratou mau pute? Te autâ nei te feia e ora ra i roto i te tahi mau tuhaa oire: “Eita e parau-faahou-hia, e eiâhia anei au i roto i to ˈu aroâ, tera râ, ehia taime vau e eiâhia ˈi.” E tae roa vetahi i te rave i nia ia ratou i te tahi maa moni iti ta ratou e horoa ˈtu no te tamǎrû i te taata eiâ, ia ore ratou e taparahihia. Tera râ hoi, te ite nei teie ui hopea o te senekele 20 i te maimiraa taehae roa ˈˈe i te moni tei itehia aˈenei i te ao nei.
Te mana o te moni i roto i te utuafare
A hiˈo na i te mau tatamaˈiraa i rotopu i te mau tane e te mau vahine i te mau mahana atoa no te moni. “Na te moni e arato nei i te mau peapea atoa o to tatou oraraa,” o ta te hoê vahine maimi ïa i papai. “E tia ia outou ia ite e mea nafea outou iho e to outou hoa ia faariro e ia faaohipa i te moni mai te peu e te hinaaro ra outou e faaea i te tatamaˈi no te reira tumu,” o ta ˈna ïa e parau ra. Noa ˈtu e mea moni aore ra e mea veve te mau utuafare aore ra tei ropu noa, te farii nei te rahiraa o te feia aravihi e te tumu rahi e tatamaˈi ai te feia faaipoipo, no te moni ïa. “Te maere nei au,” o ta te tahi atu taata maimi e faaite ra, “i te rahiraa tatamaˈiraa no nia i te haamâuˈaraa aore ra te haaputuraa i te moni.” A rave na i te hiˈoraa o te feia moni roa. Mea pinepine e imi te hoa tarani i te haaputu i ta ˈna moni, area te hoa hue ra, e imi ïa oia i te haamâuˈa i ta ˈna. Noa ˈtu e mea navai maitai raua, e tupu te mau tatamaˈiraa—eiaha no te mea e te erehia ra raua i te moni, no te mea râ e te pue noa ra. Te vai ra te feia o te faaipoipo nei no te moni, o te fanaˈo i te huru oraraa hau aˈe i te faahiahia, e o te faataa i muri iho ia aufauhia mai te mau moni tufaa rarahi.
I roto i teie faanahoraa o te mau mea tei maamaahia i te moni, ua riro te moni ei taipe no te mana e te haafaufaaraa ia ˈna iho. E mea pinepine, e tupu mai te inoino ia hau aˈe te moni ohipa a te hoê vahine i ta ta ˈna tane. E mai te peu e mai te reira te huru, e manaˈo paha ta ˈna tane e ua erehia o ˈna i to ˈna mana e to ˈna faufaa. E faura mai te pohehae hairiiri—eiaha no te hoê taata ê atu—teie râ, no taua dala mana hope nounouhia ra, o tei faaamahamaha ia raua. I roto i te aroraa o te moni e te here, mea pinepine e na te moni e upootia.
E na reira noa ïa. Oia mau, “o te nounou moni hoi te tumu o te mau ino atoa nei.” (Timoteo 1, 6:10) Teie râ, ua afai mai te ereraa i te moni i te oto rahi e te mauiui i nia i te feia o tei haafifihia e te mau taata o tei tapapa ia ˈna.
Te moni, te moni i te mau vahi atoa
Te parau-pinepine-hia nei e e titauhia te moni ia noaa mai te moni. A hiˈo na i te mau tino moni rarahi—e rave rahi mirioni—o te haamâuˈahia nei no te faahema i te taata hoo haere ia hoo mai i te mau taoˈa e pûpû-uˈana-hia ra e te feia faatianiani. A hiˈo i roto i ta outou afata rata i te mau poroi faatiani ia tanohia outou i te moni—peneiaˈe o outou te taata e “manuïa e ahuru mirioni.” Eita te taata e anaanatae faahou i te hoê noa mirioni; i teie nei, te hinaarohia ra e ahuru mirioni e hau atu. Mea rahi te taata e tamatahiti nei ia ratou i te mau vea o ta ratou e ore e hinaaro, e o ta ratou hoi e ore e taio, no te mea te mǎtaˈu ra ratou e ia erehia ratou i te tahi hoonaraa moni manaˈo-ore-hia. E rave rahi o te feaa nei i te parau tǎpǔ faatianianiraa, “Eita e faufaa ia hoo ia manuïa oe.”
A hiˈo na i te mau hau no Marite te vai ra ta ratou i teie nei te mau taviriraa e te mau re o te nehenehe e maraa i nia i te mau mirioni dala marite no te feia upootia! E mea iti roa te tahi mirioni. I teie nei tau, e nehenehe e noaa mai e 50 mirioni e tae atu i te 100 mirioni dala marite i te hoê noa taviriraa. E au ra e eita te moni taviriraa e pau. I roto e rave rahi mau fenua, te faaohipahia nei te mau taviriraa a te hau mai te mau ui mai â. Ua haamâuˈa te taata i ta ratou moni ohipa no te hoê hebedoma taatoa no te hoê noa manuïaraa e ia tanohia ratou i te tino moni rahi. Ua erehia te mau utuafare i te maa e te ahu e au—e pûpûhia ˈtu hoi te moni na ‘te atua o te Manuïa.’—Isaia 65:11, Taa.
A tapao na i te mau mirioni taata e manaˈo nei e e tanohia ratou i te mau tino moni rarahi i roto i te mau hautiraa moni. A hiˈo na i te feia o te hauti nei no ta ratou mau moemoeâ i roto i te mau fare pereraa (casino) na te ao nei. Maoti te hoê taueraa kelero, te hutiraa mai i te hoê pere, te taumiraa i te tapearaa o te hoê matini moni, te tiaturi nei ratou e e tupu ta ratou mau moemoeâ. I te mau taime atoa râ, e mea ohie aˈe no teie mau taata ia haru mai e ia tapea i te monoˈi i roto i to ratou rima.
E e haere â te tapaparaa hopea ore i te dala marite morohi noa i mua ma te vitiviti rahi, e tapaparaa hoi i te mataˈi. Noa ˈtu e ua monihia vetahi, ua ite râ ratou e ma te tupu taue noa, i te taime manaˈo-ore-hia, aita faahou. E auraa faufaa roa ïa to te mau parau a te Arii paari ra o Solomona no ratou: “E tiatonu â oe i to oe mata i te taoˈa ra e aita nei ïa? te rave nei hoi te reira i te pererau, e te maue ê nei mai te aeto i nia i te raˈi ra.”—Maseli 23:5.
Huru tupuraa taa ê roa
Te vai ra iho â te feia o tei haamauiui rahi ia ratou iho e i to ratou utuafare na roto i te haamâuˈaraa i ta ratou dala hopea i roto i te hoê hautiraa moni. Mea pinepine e mea veve ratou, e mea iti ta ratou mau ravea, ua hau iti noa ˈˈe ta ratou moni e noaa mai no te hoê oraraa haihai roa. E feia faatau vetahi e mea au aˈe na ratou ia hauti ia noaa mai te moni o ta ratou i ore i rohi. I teie râ mahana, ua roohia te rahiraa o te feia veve o te ao nei i te mau huru tupuraa o te ore e vi ia ratou. E nehenehe te feia o tei noaa noa mai i te ite no te papai i to ratou iˈoa e taiohia i roto i teie rahiraa mirioni taata. No te tahi atu pae e ore e pau ia taio, ua faatopa te mau tabula faanavairaa faufaa o to ratou fenua tei topatari, i ta ratou moni i nia i te faito veve. E te feia atoa tei haere i te haapiiraa teitei, te patoihia nei ta ratou mau aniraa i te ohipa. I te mea e te faaiti nei te mau totaiete rarahi i ta ratou hamaniraa taoˈa no te mea mea rahi aˈe ta ratou taoˈa e hamani nei i tei anihia mai, e mau tausani taata o te erehia nei i te ohipa. Nafea ratou ia faaruru i teie mau huru tupuraa?
E faahemahia paha ratou e te hinaaroraa ia noaa mai te moni na roto i te mau ravea tia ore. E manaˈo paha ratou e, eita e peapea eaha te ravea faaohipahia, ia noaa mai râ ta oe e titau ra. “E rave au i te mau ohipa atoa no te faaamu i to ˈu utuafare” o te hoê ïa haerea matauhia e te feia e farerei nei i te mau fifi i te pae moni. E mea rahi te mau ravea tia ore, te taiataraa no te mau vahine, te eiâraa no te mau tane. E nehenehe anei râ e faatiahia te haerea tia ore, te eiâraa, aore ra te hautiraa moni—te tapaparaa i te moni rohi-ore-hia? Mea rahi o te na reira nei i te manaˈo i roto i teie nei ao.
Te tiaturi ra anei outou i te Poiete Rahi, te Atua ra o Iehova? Ta ˈna aˈoraa, ia huri ïa i ta outou mau hopoia teimaha i nia ia ˈna, ia turui i nia i ta ˈna turu i te taime ati ra. I muri aˈe tau 25 matahiti to ˈna oraraa ei kerisetiano, ua papai te aposetolo Paulo e: “E tia ia ˈu te iti, e e tia ia ˈu te mea rahi; te mau vahi atoa, e te mau mea atoa ra ua pii ïa vau, i te paia e te poia; i te taoˈa rahi e te veve. E tia ia ˈu te mau mea atoa nei i te Mesia, tei tauturu mai ia ˈu ra.” (Philipi 4:12, 13) Ma te feaa ore, aita o Paulo i faaohipa i te mau ravea tia ore i te taime a erehia ˈi oia, tera râ, ua tiaturi oia ia Iehova e ua tauturuhia mai oia.
No reira, mai te peu e e mea veve outou, te erehia ra, eiaha e imi i te moni na roto i te ravea tia ore. Papu maitai, aita e ino ia noaa mai te moni na roto i te haerea tia; ua parau o Iesu iho e “e au hoi i te rave ohipa ta ˈna ra utua.” (Luka 10:7) Aita atoa e ino ia riro ei taata moni. Tera râ, eiaha roa e faaohipa i te tahi ofatiraa morare ia noaa mai te moni e hinaarohia ra. A patu i te mau taairaa e to outou Poiete Rahi, te Atua ra o Iehova, e a turui i nia ia ˈna no te tauturu mai ia outou ia faaruru i te mau hepoheporaa e te mau fifi o te oraraa. “E huri i to outou ahoaho atoa i nia ia ˈna; oia hoi te tiai mai ia outou.”—Petero 1, 5:6, 7.