Te aroraa i te hoê enemi ino mau

“O TE TAMATARAA teimaha roa ˈˈe ïa te reira no to ˈu oraraa, ta Elisabeth ïa i parau. Auê te oaoa e inaha, ua ora roa to ˈu maˈi! Mai te huru ra ïa e, te haamata apî faahou ra to ˈu oraraa. E nehenehe faahou â ta ˈu e hauˈa i te noanoa o te mau roti.” Ua upootia mai teie vahine e 42 matahiti i nia i te hoê enemi o tei parauhia e, i rotopu i te mau fifi atoa o te feruriraa, o ˈna te haamauiui rahi roa ˈˈe — oia hoi, te hepohepo rahi e parauhia e ‘dépression’.

Aita râ o Alexandre i ite i taua faaoraraa ra. I te 33raa o to ˈna matahiti, ua roohia ˈˈera oia i te peapea rahi, aita ˈtura oia i tamaa faahou; e hinaaro noa oia e faaea e o ˈna anaˈe. “Te manaˈo ra oia e ua topa te ao taatoa nei e aita e faufaa faahou ia ora, ta ta ˈna ïa vahine i faataa mai. Te manaˈo ra oia e mea faufaa ore oia.” Ma te tiaturi papu e eita o ˈna e manuïa, haapohe atura Alexandre ia ˈna iho.

Tei roto o Elisabeth e o Alexandre, raua toopiti atoa ra, i na 100 milioni taata i roto i te ao nei teie e roohia nei i te mau matahiti atoa, i te hepohepo rahi. Te roohia nei te hoê marite i nia i te maha e te hoê taata no Canada i nia i te pae, i te hepohepo ino mau i roto i to ratou oraraa. Te parare noa ˈtura teie maˈi i te Repubilita no Helemani tooa o te râ e e ite pinepine-atoa-hia te reira i Afirika. Peneiaˈe, te roohia ra aore ra ua roo-aˈena-hia te hoê o to outou mau hoa aore ra o to outou fetii i taua maˈi ra.

Te faaara mai nei te vahine a Alexandre o tei tutava maite no te tauturu i ta ˈna tane e: “Ia parau mai te hoê taata e te peapea ra o ˈna e te manaˈo ra oia e mea faufaa ore o ˈna, a haapao maitai ïa i ta ˈna mau parau.” Mea fifi aˈe te hepohepo ino mau i te inoino o te ore oioi noa e aore ra te faaturuma-noa-raa. O te hoê ïa enemi ino mau o te nehenehe e haapohe i te hoê taata e e faariro mai ia ˈna ei huma aore ra e haapepe roa ia ˈna. Tei te ite-papu-raahia taua maˈi ra, te pohe aore ra te ora o te hoê taata.

“Te hoê pepe i roto i to ˈu roro”

Te farerei nei te mau taata atoa i te mau tupuraa mai te moeraa te tahi taata i herehia, te mau manuïa-ore-raa e te oreraa te mau mea i opuahia e tupu. Ua riro te oto ei pahonoraa tano i taua mau fifi ra. I roto i to ˈna feruriraa, e haapao noa ïa te hoê taata ia ˈna iho, e rapaau oia i to ˈna iho mau pepe e i te pae hopea, e aro atu o ˈna i te oraraa mau, i muri aˈe i to oe fariiraa mai i te tupuraa apî. E parau oe ia oe iho e e maitai atu â te mau mea ananahi e eita e maoro e anaanatae faahou â oe i te oraraa. Ia tupu mai râ te hepohepo rahi, mea taa ê ïa te tupuraa.

“E vau avae i te maororaa, aita hoê aˈe mea, tae noa ˈtu hoi i te haereraa na roto i te mau fare toa, i taui noa ˈˈe i to ˈu nei mau manaˈo”, ta Elisabeth ïa i parau. Te parau ra o Carole, te tahi atu â vahine tei roohia i taua maˈi ra, e: “E au ra mai te hoê pepe i roto i to ˈu nei roro, mai te hoê ata riaria mau ra te huru e vai noa ra i nia ia ˈu. Noa ˈtu e e horoahia mai i te hoê tino moni rahi roa na ˈu, eita iho â taua mau huru ino mau ra e moe ê atu.” Ia au i te hoê taata, ‘e au ra e te hiˈo ra oe i te mau mea atoa na roto i te mau hiˈo i faaereerehia — aita e vai ra te hoê noa ˈˈe mea anaanatae. Hau atu â, e ohipa mai taua mau hiˈo ra mai te mau hiˈo faarahi i te mau mea, o te faariro hoi i te mau fifi tataitahi mai te mouˈa ra te huru’.

E farerei te taata e roohia ra i te hepohepo rahi i te mau huru faito manaˈo hohonu atoa oia hoi, e oto o ˈna na mua ˈˈe e i muri iho aita ïa to ˈna e tiaturiraa faahou e e opua ˈtu ai o ˈna e haapohe ia ˈna iho (hiˈo i te tabula i te apî 18). E tia mau â ia ite-papu-hia te rahiraa o te mau tapao o te maˈi, to ratou puai e to ratou maororaa, ia riro mai te huru faaturuma-noa-raa ei hepohepo ino mau.

E ere noa i te mea ohie ia ite-papu-hia te huru o te hepohepo rahi

Mea pinepine e mea fifi roa ia ite-papu-hia ˈtu te hepohepo rahi, no te mea e nehenehe te reira e apeehia e te tahi mau tapao e itehia i nia i te tino. “Te ite ra vau i te hoê mauiui puai mau i roto i ta ˈu nau avae, e i te tahi taime, o to ˈu ïa tino taatoa te mauiui, ta Elisabeth ïa e haamanaˈo ra. Ua farerei au e rave rahi taote. Ua papu roa ia ˈu e ua roohia vau i te hoê maˈi i te pae tino nei o ta ratou e ore e taa ra e o te haapohe ra ia ˈu.” Mai ia Elisabeth, fatata e 50 % o te feia e peapea noa ra o te haere e farerei i te taote, teie e faaite mai e ua roohia ratou i te mau fifi i te pae o te tino nei, eiaha râ i te horuhoru o te aau.

“I te rahiraa o te taime, te parau nei ratou e te mauiui ra to ratou upoo, aita ratou e taoto nei, aita ratou e hinaaro nei e tamaa, e faatumau noa ratou aore ra e rohirohi tamau noa ratou”, ta te taote ra ïa o Samuel Guze i papai, e faatere oia i te ohipa rapaauraa i te pae feruriraa no te Haapiiraa tuatoru Washington i Saint Louis, “aita râ ratou i faahiti noa ˈˈe i te parau no te oto, te ere-noa-raa i te tiaturiraa aore ra te paruparu o te feruriraa. (...) Mai te huru ra e aita roa ˈtu te tahi feia maˈi e ite ra e te roohia ra ratou i te hepohepo rahi”. Ua riro atoa te mauiui tamau, te tauiuiraa o te kilo e te toparaa o te hinaaro i te pae taatiraa, ei mau tapao matau-maitai-hia no te hepohepo rahi.

Te faaite maira te taote ra o Ovuga no te Fare maˈi Umzimkulu, i roto i te Transkei (Afirika Apatoa) e, mai te peu e mea varavara te feia no Afirika e peapea noa ra i te faahapa ia ratou iho aore ra i te haafaufaa ore ia ratou iho, te parau nei râ ratou ma te peapea mau e te hinaaro rahi noa ra ratou e rave i te ohipa, te mauiui ra ratou i te pae tino e te erehia ra ia ratou i te tahi mea. I te matahiti 1983, ua nenei te Faanahonahoraa o te ao taatoa nei no te pae o te oraora-maitai-raa i te hoê faataaraa parau no nia i te hiˈopoaraa i te feia hepohepo rahi i Tuete, i Irania, i Canada e i Tapone. Te itehia ra e te rahiraa i rotopu ia ratou, hoê â ïa mau tapao ta ratou i ite i te haamataraa — aita e oaoa ra, te taiâ ra, te paruparu ra e te haafaufaa ore ra ia ratou iho.

No te ape i to ratou peapea rahi, e imi ratou i te ravea na roto i te raveraa i te ava, te raau taero aore ra te peu taiata. Oia mau, “ata noâ te taata, te oto ra te aau”. (Maseli 14:13.) E ite-maitai-hia te reira i rotopu i te mau taurearea. “Ia peapea anaˈe te taata paari, e ite-maitai-hia te reira, aita râ te hoê noa ˈˈe mea e faaite mai e te hepohepo ra te hoê tamarii e tomo maira i roto i te hoê piha”, ta te taote ra ïa o Donald McKnew no te NIMH (Fare maimiraa rahi [marite] no te maitairaa i te pae o te feruriraa), i faataa mai i roto i te hoê tauaparauraa ta ˈna i horoa ˈtu ia A ara mai na!. “Tera ïa te tumu te hepohepo rahi o te tamarii i ore i taa-maitai-hia ˈi e mea maoro i teie nei. Ia paraparauhia ˈtu ratou no nia i taua tumu parau ra, e faaite tahaa mai te mau tamarii i to ratou mau manaˈo.”

Teie râ, i roto i te mau matahiti 80, ua itehia mai te mau haereraa i mua i te pae no te taa-maitai-raa e te rapaauraa i te hepohepo rahi. Te taahia ra i teie nei te mau ohipa moe i te pae o te mau taoˈa e vai ra i roto i te roro. Ua haamauhia te mau tamataraa no te ite-papu-raa ˈtu i te tahi mau huru taa ê o te hepohepo rahi. Te arohia nei taua maˈi ra ma te manuïa rahi, na roto i te faaohiparaa i te mau raau tamǎrû e te mau taoˈa maitai ei maa no te tino, mai te tahi mau acides aminés. E faatupu atoa mai te mau aparauraa poto noa i te mau faahopearaa maitai. Ia au i te mau taote no te NIMH, e mamahia mai 80 e tae atu i te 90 % o te feia maˈi na roto i te raveraa i te rapaauraa tano maitai.

Teie râ te uiraa e tia ia anihia: Eaha teie e faatupu nei i teie mau horuhoruraa o te aau ino mau?

[Tapura i te api 18]

Te faito o te hepohepo rahi

Faaturumaraa Hepohepo ino mau

Huru

Oto, taˈi e tano Aita e tiaturiraa faahou

Mau manaˈo

Tatarahaparaa Mau manaˈo e haapohe ia ˈna iho

Maororaa

Mau tapao i te pae o te tino nei