No te aha te mau upoo faatere haapaoraa e faaô ai ia ratou i roto i te ohipa politita?
EITA e tia ia manaˈo outou e mea faufaa ore teie uiraa, no te mea e ohipa atoa te reira na outou.
Parau mau, e ere no te hoê â tumu te mau perepitero, te mau orometua e te tahi atu mau ekalesiatiko e faaô ai ia ratou i roto i te ohipa politita. Te tapapa ra te tahi i te mau tapao ta te rahiraa o te mau taata e faahapa nei. Peneiaˈe vetahi pae ra, te turaihia ra ratou e te mau manaˈo maitai roa, mai te manaˈo e tauturu i te feia veve.
Mai te peu e e ite outou eaha râ te mau manaˈo e turai ra ia ratou, mea ohie aˈe paha ïa na outou ia papu eaha mau na te manaˈo o te Atua no nia i teie tumu parau e eaha ta ˈna e faataa nei no a muri atu.
Te tiaraa, te moni e te politita
Ia nehenehe tatou e ite mai hoê o te mau tumu e faaô ai te mau ekalesiatiko ia ratou i roto i te ohipa politita, e hiˈopoa anaˈe na i te hiˈoraa o te tahi mau raatira haapaoraa no te senekele I. O teie mau taata, oia hoi te tahuˈa rahi e tae noa ˈtu te mau Pharisea e te mau Sadukea, te faaoti i te Tiribuna teitei ati iuda. I te mea e ua feaa roa ratou i te faatia-faahou-raahia mai o Lazaro e Iesu, ua feruri aˈera ratou e: “I vaiiho noa ˈtu â tatou (...) [ia Iesu] mai teie nei â, e hope roa te taata i te faaroo ia ˈna; e e tae mai hoi to Roma e rave i to tatou nei vahi e te fenua atoa hoi.” — Ioane 11:48.
“To tatou nei vahi e te fenua atoa hoi.” Oia mau, te haapeapea ra ratou na mua roa ˈˈe, no to ratou tiaraa, to ratou puai e to ratou mana, e i muri aˈe no te faufaa o to ratou fenua (Mataio 23:2-8). I to ratou imiraa ia auhia mai ratou e te feia politita, ua taeahia i te tahi mau ekalesiatiko i te hoê toroa teitei e e rave rahi i rotopu ia ratou tei nehenehe e ora i te hoê oraraa faahiahia roa. Inaha, te faataa nei te buka hopea o te Bibilia no “te hoê vahine” o “Babulonia Rahi” te iˈoa, e te ite-maitai-hia ra oia na nia i “te rahi o ta ˈna ra mau peu faahiahia”. Inaha, te faaite nei te Bibilia e te Tuatapaparaa e te faataipe nei teie vahine i te amuiraa o te mau haapaoraa hape atoa o te ao nei. — Apokalupo 17:1-5; 18:3.
E hiˈo anaˈe na i teie nei i te mau haapapuraa e faataa mai nei e tera mau iho â te turai nei i te tahi mau ekalesiatiko ia amui atu i roto i te politita. Te parau nei te buka ra Te haapaoraa e te orureraa hau (beretane) e: “I roto i te mau matahiti 1774 e 1790, 173 o na 192 epikopo farani, no roto ïa i te mau opu hui mana. Te ora ra fatata te afaraa o ratou i Paris ma te fanaˈo i te oraraa moni rahi o te oire pû no Farani. Ua pohe na te karatino no Polignac i te matahiti 1741 aita hoi oia i haere aˈenei e hiˈo i te tuhaa o te arii-epikopo tei horoahia na ˈna, 15 matahiti na mua ˈtu. Te ite-atoa-hia ra te hoê huru haapao ore o te haere noa ˈtura i te rahi, i roto i te mau fare monahi, mea moni roa hoi te rahiraa o teie mau fare monahi.” Te ora noa ra te tuhaa teitei no te upoo faatere haapaoraa i te hoê oraraa unauna rahi, i roto râ i te mau paroita, tei roto ïa te rahiraa o te mau perepitero i te veve.
E faahiti anaˈe i te tahi atu â hiˈoraa, no nia i te fenua Mexique. I te matahiti 1810, ua aratai aˈera o Miguel Hidalgo, perepitero no te hoê oire iti, i te aroraa no te faatiamâ mai i to ˈna fenua mai raro aˈe mai i te faatereraa paniora. No nia i teie tumu parau, te faataa nei te orometua haapii o Guenter Lewy e: “Ua faahapa te pâpa e fatata te taatoaraa o te mau epikopo, i teie mau taata here aiˈa [no Mexique]. Ua ite-maitai-hia hoi (...) te aravihi haavarevare ta te mau upoo faatere haapaoraa i faaohipa no te riro mai [i muri aˈe] ei turu itoito mau no te tiamâraa. Ua tauturu teie aravihi haavarevare ia faahohoˈa te Ekalesia i te hoê pupu faufaa taa maitai eita roa ˈtu hoi e nehenehe e tiaturi atu. (...) Mea rahi roa ta te Ekalesia faufaa materia, hau atu i te afaraa o te mau faufaa mau o te nunaa, ia au i te parau a vetahi pae.”
Noa ˈtu e e porotetani tatou, e katolika, e ati iuda aore ra e melo tatou no te hoê haapaoraa ê atu, eita anei tatou e manaˈo e eita e tia ia amui atu te mau ekalesiatiko i roto i te politita ia noaa mai ia ratou te hoê tiaraa teitei? Inaha hoi, tera mau iho â ta ratou e rave pinepine nei.
Mai te tau o te Heremani nazi e tae roa mai i to tatou nei mau mahana
E haamaramarama rahi mai â te tau nazi ia tatou i nia i te papuraa e ua amui mau â te haapaoraa i roto i te ohipa politita. E rave rahi mau taata maramarama tei tutava maite i te ite mai eaha te haerea ta te mau ekalesiatiko katolika e luthériens i rave i mua ia Hitler e ta ˈna mau tavini haavî, te mau nazis.
Te mea pinepine roa ˈˈe, ua turu teie mau ekalesiatiko i te mau nazis, aore ra, i te pae iti roa ˈˈe, ua farii ratou i te amui atu i roto i ta ratou mau ohipa. Mea iti roa i rotopu ia ratou tei faateitei i to ratou reo no te patoi atu. Te faahiti nei râ te orometua haapii, o T. Gill, i te parau o te hoê taata tuiroo tei taa ê roa: “Ua papu aˈera [te taata tuatapapa i te parau no nia i te atua, o Dietrich] Bonhoeffer, i te pae hopea, i te parau ta to ˈna metua tane e ta ˈna mau tuaane i parau noa na ia ˈna mai te ahuru ma paeraa o to ˈna matahiti: aita te ohipa a te Ekalesia e navai faahou ra i roto i te mau tuhaa faufaa roa ˈˈe e e mâuˈa ïa to ˈna pûpûraa ˈtu i to ˈna ora.” No to ˈna riri i te iteraa e te horoa ra te mau Ekalesia i to ratou turu ia Hitler aore ra te faaea ohipa ore noa ra ratou, ua apiti atura o Dietrich Bonhoeffer i roto i te hoê totovaraa no te haapohe i te Führer. Ua taa ê roa râ oia i te toea.
I roto i ta ˈna buka Aamu o te kerisetianoraa (beretane), te faataa ra o Paul Johnson i te haerea ta te rahiraa o te mau ekalesiatiko i maiti: “I roto i te taatoaraa, ua horoa na Ekalesia e piti [katolika e porotetani] i to raua turu rahi i te faatereraa. (...) I nia i te 17 000 orometua porotetani, aita i hau atu i te pae ahuru i te hoê â taime, tei faautuahia i te mau utua roa roa [no to ratou patoiraa i te turu i te faatereraa nazi]. I te pae katolika ra, ua tiavaruhia te hoê epikopo i ta ˈna mataeinaa epikopo, e ua faautuahia te hoê epikopo ê atu, i te hoê utua poto fare tapearaa no to ˈna haaparareraa i te mau manaˈo patoi.” No nia i te feia tei tapea tamau i ta ratou mau faaueraa tumu, ua papai o Paul Johnson e: “Te mau taata itoito roa ˈˈe, o te mau Ite no Iehova ïa o tei faaite tia ˈtu, mai te haamataraa mai â, i ta ratou mau haapiiraa i mua i te faatereraa, e inaha, ua mauiui ratou no te reira. Ua patoi mau â ratou i te turu atu i te Hau nazi.”
Mai taua tau ra, ua turu atu te tahi atu â mau ekalesiatiko i te mau faatereraa haavî, ia tapea noa mai â ratou i to ratou tiaraa teitei, to ratou mana e ta ratou mau faufaa. No nia i teie tumu parau, teie te nehenehe e taiohia i roto i te hoê vea no te National Catholic Reporter: “Ua haairiirihia te aamu o te Ekalesia katolika i te fenua Argentine, no to ˈna mamû-noa-raa e to ˈna tautururaa ˈtu i te hoê faatereraa faehau aroha ore, te hoê o te mau faatereraa haavî roa ˈˈe o te aamu no teie nei anotau. (...) E mana hoi to te mau raatira haapaoraa no te faaite i te parau e no te faataa ê mai ia ratou, e peneiaˈe atoa paha, no te tatara i te tiaraa o te faatereraa i te pae haapaoraa. Teie râ, aita te rahiraa i rotopu ia ratou i faahiti noa ˈˈe i te hoê parau. Ua faatia te tahi pae, e tae noa ˈtu te tahi mau ekalesiatiko tei oomo i te ahu faehau, i te haamauiuiraa e te mau taparahiraa taata.” — 12 no eperera 1985.
Te mau tiaraa i te pae tivila, te parau-tia i te pae totiale
Tera râ, mai ta matou i faahiti aˈenei, te vai ra te tahi mau tumu no reira te tahi mau raatira haapaoraa e haafaahiahiahia ˈi, no te tuhaa ohipa itoito ta ratou e rave ra i roto i te oraraa politita.
Te vai ra te hiˈoraa, i te Fenua Marite, o te orometua baptiste o Martin Luther King, taata paruru i te mau tiaraa i te pae tivila, o tei vai maoro hoi ei upoo no te aroraa i te faataa-ê-raa i te huru iri o te taata. Ua aro atoa te tahi atu mau taata no te Ekalesia i nia i te reni matamua roa, no te mau tiaraa o te mau vahine e o te tahi atu mau pupu iti. Ua horoa te tahi mau perepitero e te tahi mau orometua i te hoê turu itoito i te pae politita no te mau tumu parau mai te tiaraa no te maiti aore ra te aifaitoraa e te parau-tia i te pae o te ohipa. Aita i maoro roa i teie nei, ua haamauhia te hoê “manaˈo tumu i te pae haapaoraa no nia i te faatiamâraa” no te faaitiraa mai i te mau mauiui o te feia veve, na roto iho â râ i te ravea o te hoê tatuhaa-faahou-raa i te mau fenua.
Eaha to outou manaˈo no nia i te haerea o te mau raatira haapaoraa o te haere nei i nia i te tahua politita no te haafaufaa i te ohipa totiale aore ra te “manaˈo haamaitai i te huitaata no te mau senekele mai â”, mai te parauhia i te tahi taime? Te hiˈo ino nei te tahi mau ekalesiatiko iho i te ohipa e tupu ra i roto i ta ratou haapaoraa. Teie te faataaraa a Keith Gephart, te hoê orometua fondamentaliste: “A vai taurearea noa ˈi au, ua parau-noa-hia mai ia ˈu e e tia ia faaea noa te mau Ekalesia i te hiti o te ohipa politita. I teie nei râ, mai te huru ra e ua riro te amui-ore-raa i roto i te ohipa politita, ei hara.” Teie ta te hoê papai parau tei aravihi maitai i roto i te mau tumu parau no nia i te haapaoraa i tapao: “Mai te omuaraa o te mau matahiti 1970 mai, ua haamata rii mǎrû noa mai te mau kerisetiano fondamentalistes i te manaˈo e ta ratou hopoia, te amuiraa ˈtu ïa i roto i te oraraa politita ma te itoito.”
Noa ˈtu e e au te mau tumu e paruruhia ra e te mau upoo faatere haapaoraa i te mea niu-maite-hia, e hiˈo anaˈe i hea roa ta ratou ohipa e aratai ai ia ratou e mai te peu te turu atura anei outou i te reira.
Te mau hotu o te manaˈo tumu i te pae haapaoraa no nia i te faatiamâraa
Ua matau-maitai-hia o Gustavo Gutiérrez, te hoê perepitero katolika no te fenua Pérou, no to ˈna haamauraa i te “manaˈo tumu i te pae haapaoraa no nia i te faatiamâraa” no te arai i te huru o te feia veve. Ua parare rahi roa teie manaˈo i rotopu i te mau upoo faatere haapaoraa i Marite Latino e i te tahi atu mau vahi. Te faaite nei te vea beretane ra Manchester Guardian Weekly e, ua faahapa te epikopo no Durham i te politita a te faatereraa, e inaha, ua faaitoito oia “ia faarahihia te hoê ‘manaˈo tumu i te pae haapaoraa no nia i te faatiamâraa’”.
E ere anei teie manaˈo i te pae haapaoraa, te hoê faaitoitoraa ia haapeapea no te feia veve, mai ta te Bibilia e aˈo maira ia tatou nei? E ere te reira roa te huru. Te faˈi nei te epikopo no Durham e “i te fenua Beretane, e haapao maite te manaˈo tumu i te pae haapaoraa no nia i te faatiamâraa i te tahi mau tuatapaparaa marxistes”. E titau te reira i te hoê hiˈoraa marxiste i te pae o te aroraa i rotopu i te mau pupu totiale, tei arataihia e te feia veve. Eaha te mau hotu o teie manaˈo i te pae haapaoraa?
Teie te upoo parau a te National Catholic Reporter no te 4 no tiurai 1986: “Beresilia: Te faataa ê nei te aroraa no te faanahonaho-faahou-raa i te pae faaapu, i te Ekalesia e te Hau.” Ua tupu teie amahamaha no te mea, “te fatu nei [te hoê pupu iti oia hoi, te mau] fatu fenua rahi, i te mau fenua e 83 i nia i te hanere”. Ua riro atoa te mau tairururaa e te mau patoiraa faanahohia e te mau upoo faatere haapaoraa ei tuhaa o te “aroraa no te faanahonaho-faahou-raa i te pae faaapu”. E ere hoi te parau ra “aroraa” i te mea rahi roa. Ua haapapu mai teie â tumu parau e “ua haapohe na 700 aroraa e tiahapa tei tupu i te matahiti i mairi aˈenei no te mau ohipa fenua, e 218 feia, e ua pohe atoa te metua Josimo Tavares, perepitero beresilia e raatira o te ohipa haaparareraa no te faanahonaho-faahou-raa i te pae faaapu, inaha, ua taparahihia oia i te 11 no tiunu”.
Te rahi noa ˈtura te roo o te manaˈo tumu i te pae haapaoraa no nia i te faatiamâraa. Mai tei nehenehe e taiohia i roto i te hoê vea taa ê no te New York Times, i mua i te taataoraa te patoi nei te Vaticana ia faaô te mau melo o te mau upoo faatere haapaoraa i roto i te politita faatia pae, teie râ, “te farii nei [oia] i te parau tumu no te manaˈo tumu i te pae haapaoraa no nia i te faatiamâraa, oia hoi, te haapapu nei te Evanelia i te mau aroraa a te feia veve no te tiamâraa i te pae politita e no te tiaraa ia faatere ratou i to ratou iho oraraa.”
I roto i te hoê â huru feruriraa, te parihia nei te pupu mitionare katolika Maryknoll e “te haaparare ra ratou i te evanelia no te manaˈo tumu i te pae haapaoraa no nia i te faatiamâraa e no te politita socialiste”. Teie te mau pariraa e taorahia nei e te hoê tuatapaparaa tei ravehia i te matahiti 1985, tei neneihia na roto i te reo beretane i raro aˈe i te upoo parau ra Te omuaraa o te orureraa hau: “Mai te peu e ua manuïa te pupu Maryknoll i te haafarii i te huiraatira i te poroi a Marx e a Lénine, o te faateitei nei hoi i te orureraa hau haavî, no te mea mau ïa e te faatiahia ra oia i te ohipa ei mauhaa a te Ekalesia katolika. Te taea nei ta ˈna poroi, eiaha noa i te taata faaroo no te huiraatira, i te feia politita marite atoa râ.”
Te farii ra anei te Atua i teie faaôraa ˈtu i roto i te ohipa politita?
Ma te papu maitai, te faaô nei te haapaoraa ia ˈna i roto i te ohipa politita i teie mahana na te ao atoa nei, e te reira, no te mau tumu huru rau. Tera râ, eaha te manaˈo o te Atua? Te parau nei te Bibilia e ua fatata roa oia i te faaite maitai mai i to ˈna tiaraa no nia i teie tumu parau. I tei hea vahi teie e riro ai ei ohipa na outou, na outou iho e na te feia ta outou e here nei? E eaha te mau faahopearaa o teie mea i nia i to outou haerea e ta outou mau ohipa i teie nei?
[Tumu parau tarenihia i te api 6]
“I Heremani, mea puai roa te here aiˈa o te Ekalesia katolika no te fenua heremani e, mai te Ekalesia porotetani atoa, ua turu oia i te mana faatere.” — Te mau Ekalesia heremani i raro aˈe ia Hitler (beretane).
“Inanahi ra, ua turu uˈana mau â te Ekalesia orthodoxe rusia i te mau faaauraa parau no te faaoreraa i te mau mauhaa tamaˈi tei hohorahia mai e Gorbatchev Tane (...) Ua faaite mai oia e ‘ua tuea roa [te reira] e te mau manaˈo tumu kerisetiano’.” — The Guardian (Lonedona), 9 no eperera 1986.
[Hohoˈa i te api 7]
Martin Luther King o te hoê ïa o te mau faatere haapaoraa tei matau-roa ˈˈe-hia no to ratou aroraa i te faataa-ê-raa i te huru o te iri o te taata.
[Faaiteraa i te tumu]
U.P.I./Bettmann Newsphotos
[Hohoˈa i te api 8]
Ua riro te veve e te parau-tia ore ei faaitoitoraa i te manaˈo tumu i te pae haapaoraa no nia i te faatiamâraa.
[Faaiteraa i te tumu]
J. Viscarrs/O.M.S.