Ia au i te Bibilia

Te Atua — Te haapao maira anei oia ia ˈu?

“UA FIU roa vau!”, ta te hoê potii ïa i parau. Ahiri e e nehenehe ta ˈu e haapohe ia ˈu iho, e ore ïa to ˈu mau peapea i roto i teie ao ahoaho!”

Aita o Jill “e ite ra i te hoê tumu faufaa no te oraraa i roto i te hoê ao taa ore, tei î roa i te ino e te haavîraa puai”. Ua manaˈo o ˈna e e nehenehe te raau taero, te ava e te upaupa e faaoaoa ia ˈna. Aita râ oia i oaoa. I te faataa-ê-raa to ˈna nau metua, amahamaha roa ˈtura ïa to ˈna utuafare taatoa. I reira to ˈna anianiraa e: “Eaha ta te Atua i rave i roto i taua taime ra?”

Ia farerei anaˈe outou i te fifi, e feruri anei outou mai te reira te huru? Te aha ra te Atua i teie nei, i te XXraa o to tatou senekele tei î roa i te ati? E tia i te feia atoa e tiaturi ra i te hoê Atua aroha ia feruri hohonu i taua uiraa ra. Te haamanaˈo maira anei te Atua i te taata nei? Te haapao maira anei oia ia oe?

Te haapao mai nei te Atua ia oe

A hiˈo na na pihaiiho ia oe. Ahiri e aita te Atua e haapao maira i te taata, no te aha ïa oia i poiete ai i te maa maitatai, i te mau animala auhia e tatou aore ra te mau vahi nehenehe mau ia hiˈohia? Tae noa ˈtu i te mau vahi e faaeahia ra e te feia veve roa ˈˈe, te faaunaunahia ra ïa e te hoê toparaa mahana nehenehe mau. Mai ta Paulo i parau i te feia no Lukaonia no te tau tahito e, “Aita râ oia [te Atua] i ere i te faaite ia ˈna iho, oia i hamani maitai mai, e te horoaraa mai i te ûa no nia i te raˈi ra, e te anotau auhune, e te faaîraa mai i to ratou aau i te maa e te oaoa”. — Ohipa 14:17.

Eita iho â râ te hoê toparaa mahana nehenehe mau e faaoaoa i te hoê utuafare tei roohia i te fifi. Eita te mau hautiraa a te mau animala e tamarû i te mauiui ia pohe te hoê taata herehia. Eita atoa te mau maa maitatai e tamahanahana i te mafatu tei î i te peapea. Mai te peu e te haapao maira te Atua i te taata, no te aha oia i vaiiho noa ˈi i te mau ati e haamauiui ra i teie nei ao?

Oia, te haapao mai nei te Atua e e nehenehe o oe iho e fanaˈo i te reira. A hiˈo anaˈe i te tahi mau tupuraa e faaite mai e te haapao mai nei te Atua ia oe.

Nafea tatou e ite ai e te haapao maira oia i te taata?

◻ Te opua nei te Atua e faatupu i te hoê paradaiso nehenehe roa no te monoraa i teie nei ao ino. Te faaite papu ra te Bibilia i te hoê fenua i reira “e ore roa te pohe, te oto, e te mihi, e te mauiui, e ore atoa ïa”. (Apokalupo 21:4.) O vai te ora i reira? “Area te feia mǎrû ra, e parahi ïa i te fenua, e oaoa ratou i te rahi o te hau ra.” (Salamo 37:11). Ia taio oe i te Isaia pene 11, 35 e te 65, e ite ïa oe i te tahi atu mau mea no nia i taua Paradaiso ra.

◻ Ia nehenehe OE e ora i roto i taua Paradaiso ra, ua horoa mai te Atua i ta ˈna Tamaiti fanau tahi. “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.” (Ioane 3:16). Na roto i taua ohipa ra, e nehenehe atoa te feia pohe e oaoa i taua paradaiso i te fenua ra na roto i te faatia-faahou-raa. — Ioane 5:28-30.

◻ Ia nehenehe OE e fanaˈo i taua ohipa ra, ua haapao te Atua ia poro-haere-hia te parau apî oaoa no to ˈna Basileia i te ao atoa nei. “E parau-haere-hia te evanelia o te Basileia nei e ati noa ˈˈe teie nei ao, ia ite te mau taata atoa: o te hopea ihora ïa i reira ra.” (Mataio 24:14). I raro aˈe i te faatereraa a ta ˈna Tamaiti, ua horoa te Atua i taua ohipa ra na to ˈna nunaa e rave, oia hoi ‘te faariroraa i te taata no te mau fenua atoa ei pipi’. — Mataio 28:18-20.

Ia fanaˈo oe i taua mau haamaitairaa a te Atua ra, e tia ia oe ia rave i te tahi ohipa. E tia ia oe ia faaite i te Atua e te haapao atoa ra oe ia ˈna.

Te haapao ra anei oe i te Atua?

E maere anei oe i taua uiraa ra? Eiaha oe e maere i te reira, no te mea i roto i te mau auraa atoa i rotopu e piti taata, e ere ïa i te mea tia e na te hoê noa e haapao i te tahi, e ere anei? Hoê â huru e te mau auraa i rotopu i te hoê taata e te Atua ra o Iehova. Mea pinepine te Bibilia i te faaite i te reira. Te faaitoito mai nei o Iakobo 4:8 ia tatou e: “E haafatata ˈtu i te Atua, e na ˈna e haafatata mai ia outou na.”

Te faataa mai nei te Deuteronomi 30:19, 20 e eaha ta te Atua e titau maira i to ˈna nunaa: “Ua tuu vau i te ora e te pohe, i te maitai e te ino i mua ia oe; e tena na, a rave i te ora ia ora oe e to oe ra huaai: ia hinaaro hoi oe i to Atua ra ia Iehova, e ia faaroo oe i to ˈna reo e ia ati atu oe ia ˈna.” Mea peapea roa ïa mai te peu e e erehia tatou i te mau haamaitairaa mure ore e noaa ia tatou na roto i te mau auraa maitai e o te Atua, no te mea noa e aita tatou i haapao atu ia ˈna!

‘Nafea ïa vau e ite ai e te haapao ra anei au i te Atua, e mea hohonu anei to ˈu hinaaro ia ˈna?’ ta oe paha ïa e ani. Mai te peu e e ani mai te Atua ia oe e e rave i te hoê tiaraa aore ra te hoê ohipa eita hoi te taata e au i te reira, mai te pororaa i ta ˈna parau, e nafea ïa oe? Ua ineine anei oe ia faaite na roto i te ohipa e te haapao ra oe i te Atua e ta ˈna Tamaiti? Ua faaara mai Iesu e: “O tei haama ia ˈu e ta ˈu nei parau i teie nei ui hara e te faaturi, oia atoa ta te Tamaiti a te taata e haama ia tae mai oia ma te hanahana o to ˈna ra Metua, e ma te mau melahi moˈa atoa ra.” — Mareko 8:38.

Mea au roa na Iehova e na Iesu te feia e haapao atu ia raua e i ta raua mau tavini i to tatou nei tau. Ua parau Iesu e: “E o te horoa i te hoê auˈa pape toetoe na te hoê o teie nei mau taata rii, no te mea e e pipi oia na ˈu, (...) e ore roa oia e ere i te utua.” — Mataio 10:41, 42.

Oia mau, te haapao mai nei te Atua ia oe e i te mau taata aau maitai atoa e ora nei i teie mahana, e tae noa ˈtu i te feia pohe. Eiaha râ e na ˈna e haapao noa mai ia tatou. Te haapao ra anei oe ia ˈna? Mai te peu e, e mai te peu e ua ineine oe i te haapapu i te reira, e nehenehe ïa oe e ite atu i te hoê oraraa mure ore.

[Hohoˈa i te api 25]

No te aha te Atua i horoa mai ai teie mau mea na tatou ahiri e aita o ˈna e haapao maira ia tatou?