“Ei taata maitai”: e navai noa anei?

AUE te oraraa i te au e ahiri e mea maitai te mau taata atoa! Eita roa ˈtu ïa te hoê taata e mataˈu o te taparahihia mai oia, ia haruhia aore ra ia hamani-ino-hia. Aita ïa e fare auri faahou, aita e mutoi, e aita atoa e faehau faahou. E ao maitai roa ïa te reira!

Eita iho â e tia ia tiaturi e e nehenehe teie nei ao e taui, i raro aˈe i te faatereraa o teie nei tau. E tia râ ia haapopouhia te feia e faaitoito nei ia riro ratou ei “taata maitai”. Noa ˈtu â ïa e aita ta ratou mau tutavaraa i horoa mai i te hoê ao maitai aˈe, aita râ ratou i faaino roa ˈtu i te mau tupuraa.

E navai noa anei râ ia riro mai ei taata maitai? Mea maitai iho â ïa no to tatou mau hoa e te feia i pihaiiho ia tatou, e no te Atua, e navai anei ïa? Mea anaanatae na te feia e hinaaro ia fariihia mai ratou e te Poiete ia ite i te reira.

Eaha te auraa i te parau e ei “taata maitai”?

Ua matauhia i te parau e “e tamarii maitai” ra e tamarii faaroo ïa, e ere i te tamarii roo ino. I roto râ i te pae faaroo, mea hohonu roa ïa te auraa o taua parau ra.

Parau mau, te vai nei e rave rahi mau taata tei ore i tiaturi i te Atua, tei feaa i nia i te parau no te Atua aore ra aita ta ratou e haapaoraa, e mau taata maitai hoi ratou, e mau tane e mau vahine maitai i te pae morare. Aita ratou e rave nei i te ohipa ino. E nehenehe anei e parau e e farii mai te Poiete ia ratou, te parau nei hoi ratou e aita e Atua, aore ra te patoi nei ratou ia ˈna? Eita roa ˈtu ïa.

E tia ia noaa ia tatou te ite papu e eaha ta te Atua e faariro nei ei mea maitai. Mai te peu e aita tatou i ite i te “parau-tia a te Atua”, e nehenehe ïa tatou e ‘haamau i ta tatou iho parau-tia’. (Roma 10:1-3.) Mea hape roa ïa, no te mea aita te mau manaˈo taata nei — te mau ohipa ta tatou e manaˈo ra e mea maitai — e tano ra e ta te Atua.

I roto i ta ˈna taviniraa i nia i te fenua nei, ua tatara Iesu Mesia, te Tamaiti a te Atua, e eaha te mea maitai i mua i to ˈna Metua. Ua ani atu te hoê taata apî taoˈa rahi ia ˈna e: “Eaha ta ˈu ohipa maitai e rave e noaa ˈi te ora mure ore ia ˈu?” Mea faufaa roa ta raua aparauraa. Ua pahono atu Iesu e: “‘A haapao i te mau ture ra’. Ua parau maira oia ia ˈna, ‘I teihea ture?’ Ua na ô atura Iesu, ‘Eiaha oe e taparahi i te taata, Eiaha oe e faaturi, Eiaha oe e eiâ, Eiaha oe e pari haavare. E faatura ˈtu i to metua tane e to metua vahine; e aroha ˈtu i to taata-tupu mai to aroha ia oe iho na.’ Ua na ô maira taua taata apî ia ˈna ra, ‘Ua hope te reira i te haapaohia e au, (...) eaha iho â tei toe ia ˈu?’ Ua parau atura Iesu ia ˈna, ‘Ia hinaaro oe e ia maitai roa, a tii a hoo i ta oe atoa ra, a hopoi atu ai na te taata rii, e e taoˈa ta oe i te ao i reira a haere mai ai a pee mai ia ˈu.’ Ia faaroo mai ra taua taata apî ra i te reira parau, haere ê atura ma te oto; e taoˈa rahi hoi ta ˈna.” — Mataio 19:16-22.

Ia hiˈo-anaˈe-hia te viiviiraa i te pae morare e te inoraa o te mau auraa i rotopu i te taata nei, eita anei outou e faariro i teie taata ei taata maitai? Aita o ˈna i taparahi i te taata, aita i faaturi, aita i eiâ, aita i pari haavare, te faatura noa ra oia i to ˈna mau metua e te here atoa ra oia i to ˈna taata-tupu mai ia ˈna iho.

Te faaite ra râ Iesu e eita te reira e navai. Te erehia ra taua taata ra i te hoê mea tei titauhia ia riro oia ei taata maitai roa. Eaha ïa te reira mea? Te hoê here otia ore i te Atua o te turai ia ˈna ia riro ei pipi na te Mesia. E turai atoa taua here ra ia ˈna ia poro i te Basileia o te Atua, ta Iesu i haapii atu i ta ˈna mau pipi. No te mea hoi e e “taoˈa rahi” ta taua taata ra, e haapao rahi ïa oia i te reira. Ahiri oia i haapao i te aˈoraa a Iesu e e hoo i ta ˈna mau taoˈa e e opere atu ai na te feia rii, e iti mai ïa to ˈna peapea i te pae materia e haapao rahi atu ïa oia i te pae varua. E nehenehe ïa oia e “imi i te basileia o te Atua”. — Mataio 6:33.

Ia riro ei taata maitai i mua i te Atua, eita e navai ia ore e rave i te ohipa ino. E mea faufaa atoa ia rave i te mea maitai na roto i te peeraa i te hiˈoraa o te Mesia. No reira, e mea maitai e ia ‘faaite tatou i te parau mau’ no nia i te Atua e ta ˈna mau opuaraa, ia ‘faaite tatou i te iˈoa’ o to tatou Metua i te raˈi ra i to tatou mau taata-tupu e ia turu uˈana tatou i taua iˈoa ra i mua i te mau hape e te mau pariraa haavare (Ioane 17:4, 6; 18:37). E tia atoa ia tatou ia “horoa”. — Mataio 24:14; Hebera 13:15, 16.

Mea nafea ia riro mai ei taata maitai aˈe

Eita e navai ia riro noa ei taata maitai, eaha ïa te tia ia rave ia riro tatou ei taata maitai roa ˈˈe? E ite tatou i te hoê manaˈo anaanatae i roto i te Luka 10:38-42 i te na ôraa e: “Ua farii maira te hoê vahine ia ˈna [Iesu] i roto i to ˈna fare, o Mareta te iˈoa. E taeae to ˈna o Maria te iˈoa, o tei parahi ïa i te pae avae o Iesu i te faarooraa i ta ˈna parau. Area Mareta, peapea ihora ïa i te haapaoraa i te manihini, e ua haere maira, na ô maira, E te Fatu, eita oe e haapao mai, e ua faarue mai ta ˈu taeae ia ˈu, o vau anaˈe teie rave noa ˈi? e parau atu oe ia ˈna e rave atoa mai. Ua parau atura Iesu ia ˈna, na ô atura, E Mareta e, e Mareta, ua ahoaho oe, e te peapea na oe ia oe iho i te mau mea e rave rahi: hoê roa râ mea tia, e ua rave iho nei Maria i taua mea tia ra, e ore roa hoi ta ˈna e riro ê.”

Eaha ta teie tauaparauraa e faaite mai nei? Mea maitai iho â ia haapao i te mau hinaaro pae tino o Iesu, mea maitai roa ˈˈe râ ia haafaahiahia i te mau faufaa pae varua na roto i te faarooraa i ta ˈna haapiiraa. Mea maitai ta Mareta ohipa i rave, aita râ i navai. Mea maitai roa ˈˈe râ ta Maria ohipa i rave.

I roto i ta ˈna Aˈoraa i nia i te mouˈa, ua tuu Iesu i te mau faufaa pae varua i te parahiraa matamua. Ua parau oia e: “E ao to tei ite i to ratou mau hinaaro i te pae varua, no te mea no ratou hoi te Basileia o te mau raˈi.” — Mataio 5:3 (A. a.).

Ua ite aˈenei paha oe i te mau taata maitai o te ore e haapao nei “i to ratou mau hinaaro i te pae varua”. Mai te reira atoa paha oe. Mai te peu e mai te reira ra, e tia roa ïa ia oe ia faaitoito ia ite oe i te mea maitai, ia au râ i te hiˈoraa o te Atua, na roto i te haapaoraa i te mau mea pae varua.

Ia na reira anaˈe oe, e nehenehe ïa oe e ite atu i te faanahonahoraa apî ta te Atua e haamau i nia i te fenua nei. I reira, eita ïa te taata e hamani-ino-hia, e haruhia e e taparahihia. Aita roa ˈtu e fare auri faahou, aita e mutoi e aita atoa e faehau faahou. E tia ïa ia ratou ia rave i te hoê ohipa maitai aˈe.