A O Tshwanetse Go Di Goga kwa Pele?
SEIPONE sa TV se simolola go benya-benya fa dikamera di lebagana le mmampudi yo o tumileng. Fa a sena go latlhela monyenyo o o supang maatlametlo, o simolola go tshameka. Re reetsa mmino wa gagwe ka boitumelo jo bogolo. Kamera e a mo atametsa, e dira gore re bone sefatlhego sa gagwe fa a ntse a se tsamaisanya le menwana ya gagwe e e manontlhotlho mme a tlhagisa mmino mo seletsong sa gagwe.
Ee, moopedi ke ene a ipelelang go di goga kwa pele. Mme fa kopelo e sena go fela, tlhokomela lenaneo le leleele la ditebogo mo seiponeng—setlhopha sa baopedi, moopedisi, bakapa-mantswe, batshwantshi, bakaedi, batshamekisi, bakgabisi, le ba bangwe, ba bantsintsi. Botlhe ba a tlhokafala go atlegisa motshameko. Botlhe ke ba ba tshegetsang.
Go na le boemo jo bo tshwanang mo phuthegong ya Bokeresete. Batho bangwe ba dirisiwa thata go gaisa ba bangwe, lefa go ntse jalo ba bangwe ba dira mo maemong a a fitlhegileng jaaka baboledi fela ba molaetsa wa Bogosi. Lefa go ntse jalo, a bano ba tshwanetse go ikutlwa ka gore ba ka ne ba se botlhokwa thata ka tsela nngwe ka go bo ba sa di goge kwa pele? A ba tshwanetse go tshwenyega fa ekete ga ba godisiwe ka gope?
‘Botlhe ba Tla Abelwa ka go Tshwana’
Polelo kaga Kgosi Dafide e senola sengwe. Bibela e bontsha gore nako nngwe o ne a etelelapele mophato wa banna ba le 400 ba le mo letsholong la phalotso. Ba ne ba bololela go ya go tsaya ba malapa a bone le dithoto tsa bone mo mophatong wa dinokwane. Lefa go le jalo, banna ba le makgolo a mabedi, ba ne ba sala go lebelela dithoto. Fa letsholo la bafalotsi le boa morago ga phenyo ka basadi, bana, le dilwana, le thopo e ntsi, bothata bo ne jwa tsoga: Ke bomang ba ba tla nnang le seabe mo dithotong tse di bonyweng morago ga tlhabano? A ke bao fela ba ba neng ba ile tlhabanong ba ba neng ba tshwanela go ka nna le seabe mo papading eo? Dafide o ne a araba ka tsela eo e neng ya tsewa jaaka yone ketapele ya kafa molaong, “molaō o o tlhōmameñ mo Iseraela.” O ne a re: “Gonne yaka kabèlō ea eo o ileñ tlhabanoñ e nntse, kabèlō ea gagwè eo o na a setse le dithoto e tla nna yalo: ba tla abèlwa ka go chwana hèla.” (1 Samuele 30:24, 25) Jehofa ke ene yo o neng a kaela Dafide gore a ntshe katlholo e e ntseng jaana. Mme seno se ne se bontsha kanaanelo e e boteng ya ga Jehofa mo go bao ba direlang mo maemong a tshegetso.
A mme molao-motheo ono o a dira mo phuthegong ya Bokeresete? Moaposetoloi Paulo o araba ka setshwantsho. Ka go tshwantsha phuthego le mmele wa motho, a re: “Leitlhō ga le kake ya raea seatla, ya re, Ga ke gu dihe sepè: le tlhōgō gapè, ga e kake ea raea dinaō, ea re, ga ke lo dihe sepè.” Ee, mo mmeleng wa motho tokololo nngwe le nngwe—le eleng monwananyana fela—e na le tiro e e botlhokwa. Modimo o dirisa botlhale jo bo tshwanang mo go rulaganyeng phuthego ya gagwe. “Modimo o tlhomile bañwe mo phuthegoñ,” a abela batho ba ba farologanyeng maikarabelo a a sa tshwaneng.—1 Bakorintha 12:21, 28.
Ka gone, mo lekgolong la ntlha la dingwaga, Bakeresete bangwe ba ne ba ipelela selekanyo se se rileng sa ketelelopele. Ka sekai, Petere o ne a di goga kwa pele. E ne e le ene mmueledi wa baaposetoloi mo letsatsing lele le le sa lebalesegeng la Pentekosete. (Ditihō 2:14) O ne a nna lee tshiamelo ya go thusa basokologi ba ntlha ba Baditšhaba go nna Bakeresete. (Ditihō 10:44-48) Tota, le dibuka tse pedi tsa Bibela di bidiwa ka leina la gagwe! Lefa go le jalo bangwe ba baaposetoloi ba bangwe ga ba ke ba bo ba umakiwa. Mathaio, Nathanaele (Barotholomea), Thadaeo (Judase, morwa Jakobe), Simone yo o matlhagatlhaga le Jakobe, morwa Alefaeo (yo o bidiwang Jakobe Mmotlana), ba umakiwa fela go sekae. Lefa go le jalo, ba ne ba thusa Morena wa bone ka boikanyego mo tirong e kgolo ya go rera le go ruta.
Tirelo ya Boikobo, ya Moya Otlhe
Go na le boemo jo bo tshwanang gompieno. Mo phuthegong ya Bokeresete, Jehofa o santse a ‘tlhoma maloko fela jaaka a rata.’ Seno se felela ka gore bangwe ba di goge kwa pele go na le ba bangwe. Mme boikutlo jwa rona e tshwanetse go nna bofe tebang le ditshiamelo tsa rona tsa tirelo, lefa e ka tswa e le dife? Bakolosa 3:23, 24 e tlhalosa ka tsela eno: “Leha e ka bo e le eñ se lo se dihañ, lo se dihè ka pelo eotlhe, yaka e ka bo e le go dihèla Morèna, e señ batho; Lo nntse lo itse ha tuèlō ea boshwa lo tla e amogèla mo Moreneñ [Jehofa].”
Basupi ba le bantsi gompieno ba bona boipelo jwa mmannete ka go dira ditiro tse di kwa tlase, tse di tshegetsang. Ka sekai, akanya ka Edmundsen, Mosupi mongwe yo o dirang a le kwa Pietermaritzburg, kwa Afrika Borwa. O ne a kolobediwa ka 1946 mme a tsenelela tirelo ya nako e e tletseng ka 1950. Le ka motlha ga a ise a ko a di goge kwa pele. Lefa go ntse jalo, o ne a nna le boipelo jwa go bona bana ba gagwe ba le 15 le ditlogolwana tsa gagwe di ineela, di bo di nna Basupi ba ba kolobeditsweng, le bana ba bana ba gagwe ba le 27 le bana ba bone ba nna gone mo dipokanong tsa phuthego! Mme gompieno, lemororo a golafaditswe ke kutlo e e koafetseng le matlho, o ntse a rera ka boikanyego jaaka mmulatsela yo o thusang. Aitsane, a setse jaanong a le dingwaga tse 84 o santse a dira jaaka mogolwane mo phuthegong mme o fa dipuo tsa phatlalatsa! Lefa go le jalo, tirelo ya ga Edmundsen, ka nako e ntsi, e ne e le e e sa itsegeng. Mme fela jaaka diketekete tsa batlhanka ba bangwe ba ba ikanyegang ba Modimo, o ile a direla Jehofa tiro e e mosola thata, le e e botlhokwa.
Ee, gore motho a direle mo lefelong je le sa itsegeng o tshwanetse a bo a le boikokobetso. Mme seno gape se re fa sebaka sa go tokafatsa botho jwa rona le kgono pele ga maikarabelo a a boima a pegwa mo go rona. Kgosi Josia o ne a nna kgosi ya Juda a le dingwaga di hera bobedi. (2 Dikgosi 22:1) Mme re ka re o ne a iketleeleditse go le kana kang pele ga a ka tsaya boemo joo? Mo letlhakoreng je lengwe, Moshe, o ne a tsaya dingwaga di le 40 a sa itsege e le modisa kwa Mediana pele ga a ka nna mogolodi. Mo lobakeng loo lotlhe, o ne a godisa dinonofo dingwe jaaka ya boikokobetso. (Dipalō 12:3) O ne a ithuta go lebelela mo go Jehofa. Mme ya re kgabagare fa Jehofa a mmitsa gore a etelele Iseraele pele mo dingwageng tse 40 tse di latelang, o ne a iketleeleditse boikarabelo jono!
Jalo motho yo o ka ikutlwang gore dikgono tsa gagwe ga di dirisiwe ka botlalo mo phuthegong ga aa tshwanela go kgobega marapo. Gongwe Jehofa o ikutlwa gore motho o tshwanetse a ithuta go nna pelotelele kana boikokobetso pele ga a ka neelwa ditshiamelo tse dingwe. Gakologelwa gape gore, bontsi jwa batlhanka ba ga Jehofa ba dira fela fa go fitlhegileng. Tora ya Tebelo e ile ya nna le seabe se segolo mo thulaganyong ya dithuto tsa Basupi ba ga Jehofa mo jaanong e setseng e feditse lekgolo la dingwaga. Lefa go le jalo bakwadi ba yone ga ba itsiwe. Akanya gape, ka diketekete tsa ba ba direlang mo magaeng a Bethele kana ba ba direlang jaaka babulatsela le barongwa. Ga se gantsi ba di goga kwa pele. Lefa go le jalo ba ipelela go bo ba tshwaregile mo matshelong a bone ba bile ba kgotsofala le go itemogela thitibalo e kgolo e e nnang gone ka ntlha ya go ithebola go thusa ba bangwe.—Ditihō 20:35.
Phelelo ya Bao ba Direlang ka Boikokobetso
Mo baaposetoloing ba pele ba ba 12, ke a le mongwefela yo o neng a retelelwa—mooki Judase Isekariota. Ba bangwe ba ne ba ipelela tuelo e e galalelang. Go Tshenolō 21:10, 14 Bibela e ba tlhalosa jaaka “motse o o boitshèpō” o o agilweng mo majeng a motheo a le 12. Mo go lengwe le lengwe la one, ga bo go kwadilwe leina la moaposetoloi wa ga Kwana. Ka mo go kgatlhisang, ba le babedi mo baaposetoloing bano ba ba ikanyegang ba ne ba bidiwa Simone. Yo o neng a bidiwa Simone Petere ke ene yo o neng a di goga kwa pele thata; yo mongwe, yo o neng a bidiwa Simone yo o tlhagafetseng, o ne a sa nna jalo. (Ditihō 1:13) Tota, ga go buiwe sepe se sentsi kaga Simone yono. Mme bo-Simone boo-babedi ba ne ba amogela tuelo e e tshwanang—tshiamelo ya go nna maloko a motheo a puso ya selegodimo ya ga Kgosi Jesu Keresete!
Legale, ga se gore ke batlodiwa botlhe ba ba tsositsweng ba ba tla direlang mo maemong a a kwa godimo jaaka ‘maje a motheo.’ Jehofa o tla dirisa badiri ba goromente wa gagwe mo maemong lefa e ka nna afe ao a bonang a ba tshwanetse. Rona ba re solofetseng go tshelela ruri mo Paradaiseng mo lefatsheng ka tsela e e tshwanang re ka tlhomamisa gore mo thulaganyong eo, Kgosi ya rona o tla re dirisa ka tsela e e molemo-lemo. Mo ditikologong tse di itumedisang, re na le ditsala tse di ikanyegang, le tiro e e itumedisang e e farologanyeng, mme ebile go sena ditlhodiego dipe kana tapisego, botho jwa rona le dikgono di tla okediwa go ya maemong a a tletseng!
Jalo a e ka ne motho a bileditswe tuelong ya selegodimo kana a lebile gore o tla tshela mo lefatsheng je le ntlafaditsweng, a rotlhe re kgotsofaleleng kabelo eo re direlang mo go yone mo phuthegong ya ga Jehofa mme re dire mo go yone ka moya otlhe. Eno ke tsela ya botlhale le boipelo. Go na le gore ka mafega re bo re senka go di goga kwa pele, a re tlhagoleleng boikutlo jwa boikokobetso jwa ga Kgosi Dafide, yo o neng a re: “Ke lopile selō señwe mo go Yehofa, ke shōna se ke tla se senkañ; ke gore ke tlè ke age mo tluñ ea ga Yehofa ka malatsi aotlhe a botshelō yoa me, go leba bontlè yoa ga Yehofa, le go botsa mo tempeleñ ea gagwè.”—Pesalema 27:4.