‘Lo Seka Lwa Akofa Go Tshikinngwa Mogopolo’

“Rea to rapèla Rea re, lo seka loa tshikiñwa mogopolō, leha e le go huduiwa ke mōea moñwe, leha e le ke puō, leha e le lokwalō lo go ka tweñ to cwa kwano go rona.”​—2 BATHESALONIA 2:1, 2.

1. Ke dikgakologelo dife tse di itumedisang tse di tlang mo mogopolong fa re gopola nako e re neng re simolola go ithuta boammaaruri ka yone?

DIKGAKOLOGELO tse di itumedisang di nna di ntse di tla mo mogopolong fa rona jaaka Bakeresete re gopola ka nako eo re neng re simolola go ithuta boammaaruri go tswa mo Lefokong la Modimo ka yone. Go ne go le gontle, go utlwala, go kgotsofatsa. Abo dipelo tse rona di ne di phophoma ka kanaanelo jang ne fa re ne re ithuta kaga Jehofa le dinonofo tse gagwe tse di tlotlometseng, go akareletsa le lorato lwa gagwe lo logolo le kutlwelo-botlhoko! Re ne ra ipela fa re kopanela le badumedi ka rona ba ba neng ba bontsha loreto lwa mmatota lwa Bokeresete mme ba tshela ka melao-metheo ya Bibela.

2. Ke ditsholofelo dife tse re nang natso jaaka batlhanka bo ga Jehofa, mme re iphitlhela re le mo boemong bofe jwa semoya?

² Abo re ne re leboga jang ne go ithuta gore Jehofa o tla akofa a tlosa botlhoko, bohutsana, le eleng loso (Tshenolō 21:3, 4) A o ke o akanya, go tshelela ruri mo lefatsheng la paradaise, ka botsogo jo bo itekanetseng le boitumelo jo bo feletseng! Go ne go le thata go go dumela. Mme e ne e le boammaaruri. Go ne go tshegediwa ke Lefoko la Modimo. Go ne go kgatlhisa! Kwantle ga pelaelo, re ne ra ikutlwa jaaka barutwa ba ga Jesu fa a ne a tlhaga go bone morago ga tsogo ya gagwe. Ba ne ba raana ba re: “A dipelo tsa rona, a ga dia ka tsa tuka mo teñ ga rona, ka a nntse a bua le rona mo tseleñ, le ka a re rarabololèla dikwalō?” (Luke 24:32). Ee, ka go ithuta boammaaruri le go neela matshelo a rona go Jehofa, re ne ra iphitlhela re le mo paradaiseng ya semoya. Abo e le lesego jang ne!

3. Diabolo le baganetsi ba bangwe ba senka go re amoga melemo ya paradaise ya semoya ya ga Jehofa jang?

³ Mme go nna mo paradaiseng ya semoya ya ga Jehofa ga se sengwe seo re ka se tlhaetsang matlho. Re tlile mo paradaiseng eno ka go ithatela; re ka nna ra tswa kwantle ga go diega (kana ra ntshiwa) fa re wela mo go tlhaeleng tumelo kana mo go robeng melao e e siameng ya ga Jehofa ka bomo. Tota, seno ga se kitla se diragala fa re boloka ‘lorato lwa rona lwa ntlha’ lo nonofile, fa re tswelapele go anaanela dipaakanyetso tsotlhe tsa ga Jehofa go re boloka re nonofile semoyeng. (Tshenolō 2:4) Mme Diabolo le baganetsi ba bangwe ba kobamelo ya boammaaruri ke ditswerere mo go tsietseng. Le ka motlha ga re a tshwanela go lebala gore ba nna ba ntse ba iketleeleditse go roba bothokgami jwa rona fa go kgonega. Maaka a bone a rulaganyeditswe go koafatsa tumelo ya rona, go tsidifatsa lorato lwa rona go Modimo, go jala dipelaelo mo megopolong ya rona​—ee, go dira gore paradaise ya semoya e lebege jaaka ekete ga se paradaise gotlhelele.

4. Ke eng se se ka diragalang fa re letlelela tumelo ya rona go koafala le go letlelela dipelaelo tse di masisi go gola?

⁴ Fa re tshwantshisa seno, re ka fitlha mo ntlheng e re tla go fitlhelang go le thata, gongwe le eleng go sa kgonege, go bona sekgwa sa paradaise ya semoya ka ntlha ya go tlhokomedisisa thata ditlhare tse di sa itekanelang tsa batho tse jaanong di leng mo go yone thata. Kgatlhego eo re neng re na le yone mo go ithuteng boammaaruri jwa Lefoko la Modimo, tsholofelo e e molemo e re neng ra nna le yone, lorato lo re lo tlhagoleletseng Modimo le bakaulengwe ba rona ba semoya, le tlhoafalo e re nnileng le yone ya tirelo ya ga Jehofa di ka nyelela. Fa go sa tsewe dikgato tse di masisi go siamisa tshenyego epe e e ntseng jalo ya semoya, ka bonako dipatlafalo tse di lorato tsa Modimo di lebega ekete di a gatelela. Dijo tse di nonotshang tsa semoya tse di tswang go “motlhanka eo o boikañō le eo o botlhale” di ka lebega jaaka sengwe se se nyatsegang, mme bokaulengwe jwa batlhanka ba ga Jehofa ba ba lorato bo ka lebega jaaka lelapa la baba. Mme kgotsofalo fela, ya mofuta o o bodileng, e ka nna ya tla ka go simolola go betsa batlhanka ka wena ka tshebo le boammaaruri jo bo sa felelang​—Mathaio 24:45-51.

5. Go latlhegelwa ga motho go ka bapisiwa jang le seo se neng sa latlhegela Adame le Efa ka go kobiwa mo Paradaiseng ya Edene?

⁵ Ee, re ka nna ra se latlhegelwe fela ke melemo ya paradaise ya semoya jaanong mme, se se masisi thata, re latlhegelwe gape ke tsholofelo ya go tshelela ruri mo Paradaiseng ya selefatshe. Mme re ka latlhegelwa ka ntlha ya lebaka le le tshwanang le leo Adame le Efa ba latlhegetsweng ke Paradaise ya Edene ka lone. Ba ne ba na le sengwe le sengwe seo ba neng ba se tlhoka go itumela ka botlalo mme ba ka bo ba tsheletse ruri. Mme boitaolo​—tota thuto e e farologaneng—​e ne e le botlhokwa go gaisa go utlwa Modimo le masego a Edene. Efa o ne a tsiediwa. Lemororo Adame a ne a sa tsiediwa, o ne a letlelela maatla a maemo, go akareletsa le tlhotlheletso e e maatla ya mosadi wa gagwe, go mo dira gore le ene a leofe. Ka gone, ba ne ba tlosiwa mo Paradaiseng, go tshela botshelo jwa mahutsana go fitlhela ba swa. Ba ne ba latlhegelwa ke tsholofelo ya bone ya botshelo jo bo sa khutleng le go tlisa go rua boleo le loso mo lotsalong lwa bone. (Genesise 3:1-7, 14-19, 24; 1 Timotheo 2:14; Baroma 5:12) Abo e ne e le tlhotlhwa e e boitshegang jang ne go e duelela seo ba neng ba se bitsa boitaolo!

6. (a) Ke kamego efe e Paulo a neng a e bontsha mabapi le bangwe mo phuthegong ya Korintha? (b) Kamego eno e e tshwanang e ne ya bonala jang mo go seo se neng se kwaletswe phuthego e e kwa Thesalonia?

⁶ Moaposetoloi Paulo o ne a tlhagisa kamego eno jaana: “Me kea boiha, gore e se re kgotsa motlha moñwe, yaka nōga e tsieditse Efe ka boherehere yoa eōna, pelo tsa lona tsa senyega yalo, tsa kgaogana le tshiamō le boitshèkō yo bo ntlheñ ea ga Keresete.” (2 Bakorintha 11:3) Paulo o ne a go fitlhela go tlhokafala gore a kwale mabapi le dithuto dingwe tsa maaka tseo di neng di anama mo motlheng wa gagwe. Mo lokwalong lwa gagwe lwa bobedi lo lo neng lo ya kwa phuthegong ya Thesalonia, o ne a kwala jaana: “Rea lo rapela, . . . rea re, lo seka loa ba loa tshikiñwa mogopolō, leha e le go huduiwa ke mōea moñwe, leha e le ke puō, leha e le ke lokwalō lo go ka tweñ lo cwa kwano go rona, go etsa yaka ekete letsatsi ya Morèna le setse le le ha: opè motho a se ka a lo hora ka mokgwa opè.”​—2 Bathesalonia 2:1-3.

O Seka wa Nna le Ditirisano Dipe le Batenegi

7. (a) Ke dipotso dife tse di tsogang fa dibuka tsa botenegi di amogelwa ka poso? (b) Ke ka ntlhayang fa go iikanya go go feteletseng go le kotsi mo go itshireletseng mo tlhotlheletsong ya batenegi?

⁷ Jaanong, o tla dirang fa o thulana le thuto ya botenegi​—dikakanyo tse di bolalome—​e e bolelang gore seo o se dumelang jaaka mongwe wa Basupi ba ga Jehofa ga se boammaaruri? Ka sekai, o tla dirang fa o amogela lekwalo kana buka nngwe o le bula, mme o bona go tloga fela kwa tshimologong gore le tswa kwa moteneging? A go batla go itse go tla baka gore o le bale, e le fela gore o bone gore a reng? O ka nna wa akanya le eleng go re: ‘Ga le kitla le nkama; ke nonofile thata mo boammaaruring. Mme, kwantle ga moo, fa re na le boammaaruri, ga go sepe se re se boifang. Boammaaruri bo tla itshokela teko.’ Bangwe mo go akanyeng ka tsela eno, ba ile ba fepa megopolo ya bone ka go akanya ga botenegi mme ba ile ba wela mo seraing sa go belaela le go nyatsa tse di masisi. (Bapisa Yakobe 1:5-8.) Jalo gakologelwa tlhagiso e e mo go 1 Bakorintha 10:12: “Eo o gopolañ, go re, o eme, a a itisè gore a se ka a wa.”

8. Ke thuso efe e e tlhokwang ke ba bangwe bao ba neng ba fenngwa ke dipelaelo?

⁸ Bangwe ba ba nang le dipelaelo tse di jadilweng ke batenegi, ka thuso e e lorato go tswa go bakaulengwe ba ba kelotlhoko, ba ne ba rarabologelwa morago ga lobaka lwa go tshwenyega semoyeng. Mme botlhoko jono bo ka bo bo ile jwa tilwa. Go Diane 11:9 re bolelelwa jaana: “Motho eo o sa reñ Modimo sepè o senya oa gabo ka molomo oa gagwè: mme mosiami o tla gololwa ka kicō.” Jude o ne a bolelela Bakeresete ka ene gore ba ba “utlwèlè botlhoko, eboñ ba ba akabalañ; Me banwè lo ba bolokè, ka go ba shwatola mo moleloñ.” (Yude 22, 23) Paulo o ne a gakolola molebedi Timotheo go kgalemela “baganetsi ka bonolo, gongwe Modimo a ka ba naya go sokologa go go isang kitsong ya boammaaruri, ba tle ba rarabologelwe, ba tswe mo serung sa ga Diabōlo, se ba neng ba tshwerwe ke sone gore ba dire thato ya gagwe.”​—2 Timotheo 2:25, 26, NW.

9. Ke matswela afe a a kotsi a a tlhagelang bao ba latlhang kobamelo ya boammaaruri?

⁹ Ka maswabi, ba bangwe ba tsene mo lefifing le le feteletseng, le eleng go boela kwa dithutong tse di phoso tsa La-Bodumedi. Moaposetoloi Petere o kwadile kaga matswela a a botlhoko a bao pele ba neng ba sepela mo boammaaruring mme morago ba fapoga. O ne a re: “Gonne ha e tla re ba sena go halola mo mashweñ a lehatshe ka kico ea Morèna le Mmoloki Yesu Keresete, me ba ba ba tloga ba itlhakatlhakanya naō, mme ba heñwa, popego ya moragō mo go banō, e tle e behe bogolo go ea pele.” Petere o ne a re ba tshwana le ntša e e boelang mo matlhatseng a yone le kolobe e e tlhapisitsweng e e boelang kwa go ipitikeng mo seretseng.​—2 Petere 2:20-22.

10. (a) Jehofa o reng kaga go reetsa batenegi? (b) Go bala dibuka tsa batenegi go ka tshwana le go dirang?

¹⁰ Fa motho fela a re bolelela jaana: ‘Lo seka lwa bala seno’ kana ‘Lo seka lwa reetsa seo,’ re ka raelesega go tlhokomologa kgakololo ya gagwe. Mme gakologelwa, mo lebakeng leno Jehofa ke Ene yo o re bolelelang seo re tshwanetseng go se dira mo Lefokong la gagwe. Mme a reng ka batenegi? “Lo kgaoganè nabō” (Baroma 16:17, 18); “lo seka loa tlwaèlana” nabo (1 Bakorintha 5:11); le “lo seka loa [ba] cholèla mo tluñ ea lona, le gōna lo seka loa [ba] dumedisa” (2 Yohane 9, 10). Ano ke mafoko a a otlelelang, dikaelo tse di phepafetseng. Fa ka ntlha ya go batla go itse, re ne re tshwanetse go bala dibuka tsa motenegi mongwe yo o itsegeng, a seo se ne se se kitla se tshwana fela le go laletsa mmaba wa kobamelo ya boammaaruri mo magaeng a rona gore a dule le rona le go bolela megopolo ya gagwe ya botenegi?

11, 12 (a) Ke setshwantsho sefe se se neetsweng go re thusa go lemoga gore ga re kitla re bala dibuka tsa batenegi fela kwantle ga go tswa kotsi? (b) Seno se ka dira Jang mo go amegeng ga ga Jehofa ka batho ba gagwe?

¹¹ A re tshwanetseng dikgang ka tsela eno: A re re morwao wa dingwaga tsa bolesome o amogetse buka nngwe e e hepisang keletso ya kafa dikobong mo posong. O ne o ka dirang? Fa a ne a rata go e bala ka ntlha ya go batla go itse, a o ne o tla re: ‘Ee, morwa, tswelapele go e bala. Ga e kitla e go gobatsa. Re go rutile go tswa bonnyaneng gore boitsholo jo bo sa siamang bo maswe. Kwantle ga moo, o tshwanetse go itse seo se diragalang mo lefatsheng gore o bone gore tota se maswe’? A o ne o ka akanya ka tsela eo? Le eseng! Go na le moo, eleruri o ne o ka mmontsha dikotsi tsa go bala dibuka tse di hepisang keletso ya dikobo le go batla gore e senngwe. Ka ntlhayang? Gonne go sa kgathalesege gore motho o nonofile go le kana-kang mo boammaaruring, fa a fepa mogopolo wa gagwe ka megopolo e e bodileng eo e fitlhelwang mo dibukeng tse di ntseng jalo, pelo le mogopolo tsa gagwe di tla amega. Keletso e e phoso e e saletseng eo e jadilweng mo matshobeng a pelo la bofelo e ka nna ya bopa keletso e e bodileng ya kafa dikobong. Matswela? Jakobe a re fa keletso e e phoso e emera e tsala sebe, mme sebe se isa losong. (Yakobe 1:15) Ka jalo ke ka ntlhayang fa o simolola ditiragalo tse di lomaganeng?

¹² Jalo, fa re ne re ka dira ditshwetso tse di ntseng jalo go sireletsa bana ba rona mo go bontshiweng dibuka tse di hepisang keletso ya dikobo, a ga rea tshwanela go lebelela gore Rrarona yo o lorato wa selegodimo o ne a ka re sireletsa mo kgokafalong ya semoya ka mo go tshwanang, go akareletsa le botenegi? A re, Kgaoganang le jone!

13. Ke eng se re ka se dirang fa dipotso tse di gwetlhang, tse di theilweng mo go seo batenegi ba se buileng kana ba se kwadileng, di bodiwa fa re ntse re arola mo tirong ya go rera?

¹³ Mme a re re re rera mafoko a a molemo mme batho ba tsosa dipotso kana dikganetso tse di tshwanang le tse di tsosiwang ke baganetsi? Tota, fa motho a se pelo-e-phepa mme a eletsa go ganetsana fela, gantsi go molemo go laela le go ya kwa ntlong e e latelang. Mme fa mongwe a botsa ka bopelo-e-phepa kaga maiphako mangwe a batenegi, go ka dirwang? Santlha, re ka botsa gore ke eng se tota se bakileng kamego eo. E ka ne e le ntlha e le nngwe kana di le pedi fela. Mme re ka di kgomarela le go araba go tswa mo Dikwalong, go tswa mo dibukeng tsa Mokgatlho, le go tswa go seo re se itseng mabapi le kgang eo ka boikanyegi. Ga rea tshwanela go swetsa gore re tshwanetse go bala buka nngwe kana pampiri e e tletseng ka maaka le dinnete tse di sa felelang gore re ganetse maiphako a maaka le dithuto tsa baganetsi.

Go Ikanya Jehofa

14. Ke go amega gofe go go lorato goo Rrarona wa selegodimo a nang le gone ka rona, mme ke ka ntlhayang fa re ka baya ikanyo ya rona yotlhe go ene?

¹⁴ Fa re ntse re tswelapele, re agelela tumelo go nna re tshwaregile mo tirelong ya Bogosi, re ka ikanya Jehofa ka tsholofelo, re itse gore, jaaka Rrarona yo o lorato wa selegodimo, o re batlela se se molemo-lemo. Modimo oa re ruta; oa re tlhagisa. O dira seno ka Lefoko la gagwe le ka kaelo e e phepa e e neelwang ke phuthego ya gagwe e e bonalang. Fa re ne re ka kopa motsadi yo o lorato senkgwe le tlhapi, o ne a ka seka a re naya lentswe kana noga. Modimo ga a kitla a re dira dieleele kana a re tsietsa. (Mathaio 7:7-11) Lefa go ntse jalo, Modimo ga a kitla a re sireletsa gotlhelele mo dithaelong kana le eleng mo maakeng a a tsietsang le a bodiabolo. O re kaga gagwe: “Ke Nna Yehofa, Modimo oa gago, eo ke gu rutañ go itemohalèla, eo ke gu gōgañ mo tseleñ e u chwanetseñ go tsamaea ka eōna.” (Isaia 48:17) Ee, Jehofa ‘o re ruta go itemofalela.’ O re bolelela gore re kgaogane le batenegi le thuto ya bone, mme seno se sireletsa rona. Se raya botshelo jwa rona.

15. Ke ditlhagiso dife tseo moaposetoloi Paulo a neng a di neela mabapi le bangwe bao ba neng ba tla leka go iponela barutwa?

¹⁵ Moaposetoloi Paulo o ne a tlhagisa bagolwane ka ene ba Bakeresete jaana: “Le mo go lona ka losi go tla coga banna ba ba buañ dilō tse di shokameñ, go tla ba itshadisa barutwa moragō.” (Ditihō 20:30) Fa re tswelapele go reetsa dikganetsano tse di bolalome le dikakanyo tse di tsietsang, “dilō tse di shokameñ” di ka utlwala ekete di lolame. Fa Efa a sena go nna a lebelela leungo le le ileditsweng le go reetsa boikutlo jo bo sokameng jwa ga Diabolo, o ne a tlhatswega pelo gore o ne a nepile. Paulo o ne a tlhagisa jaana: “Lo itisè e se be kgotsa go bo le moñwe eo o lo thopañ ka botlhayana yo e leñ yoa gagwè le ka tsieco e e ithamakañ, kaha melaoaneñ ea batho, le kaha ditlhakeñ tsa kicō ea lehatshe, me e señ kaha mokgweñ oa ga Keresete.” (Bakolosa 2:8) Moaposetoloi yono o ne gape a bontsha gore “[baitimokanyi] ba tle ba tsietse dipelo tsa ba ba bopegileñ senyana, ka puō ea bōnè e e borethe, e e ntle.” (Baroma 16:17, 18; bapisa 2 Bakorintha 11:13-15.) Tota, lebaka la gore ba sekae ba faposiwa ke mofuta oo wa maaka ga le kae gore re tshwanetse go ba latela. Lefa go ntse jalo, re tshwanetse go nna re ntshitse matlho dinameng.

16. Ke ka go dirisa ditlhagiso dife tsa Dikwalo go tla re thusang go emelana le maiteko a ga Satane a go tsietsa le go faposa batho mo kobamelong ya boammaaruri?

¹⁶ Maano a ga Diabolo ga a ise a fetoge fa esale kwa Edene. O dirisa dipotso tse di bolalome le go ikuela mo go ikgotsofatseng. Petere o kwadile jaana: “Le mo go lona go tla nna le baruti ba eseñ bōne, ba ba tla tsenyañ dithutō tse di senyañ, . . . me mo boiphetlhoñ yoa bōne ba tla lo ntsha tlhwatlhwa, ka mahoko a boitimokanyō.” (2 Petere 2:1-3) Selo se se boitemokanyo se rulaganyeditswe go bonala kana go utlwala e le boammaaruri. Go 2 Timotheo 2:14-19, Paulo o ne a otlelela botlhokwa jwa go dirisa Lefoko la ga Jehofa go siamisa dikgang mme a tlhagisa kaga tlhokafalo ya go tila batenegi, bao dipolelo tsa bone di leng ‘lolea tseo di senyang se se boitshepo,’ (NW) gonne, o rile “lehoko ya bōne le tla ya yaka nthō e e kèkèlañ.”

17, 18. (a) Thuto ya botenegi e tshwana jang le ntho e e lekelang? (b) Ke tlhagiso efe eo moaposetoloi Petere a e neelang mabapi le bao ba lekang go re faposa mo kobamelong ya boammaaruri? (c) Ke dipotso dife tse di tla arabiwang mo thutong e e latelang?

¹⁷ Tshwantshanyo e e tshwanelang tota! Jaaka ntho e e kekelang, mogopolo wa botenegi ga se sepe fa e se loso lwa semoya lo lo anamang ka bonako. Mme ereka maloko a phuthego a tshwana le mmele o le mongwe, go na le kotsi ya gore bangwe ba ka amega. Fa mongwe yo o anamisang dithuto tsa botenegi a ka se busediwe mo boitekanelong jwa semoya ka tiriso e e lorato le e e nitameng ya boroku jo bo alafang jwa Lefoko la Modimo, go kgaolwa ga leloko leno e ka nna tsela fela ya go sireletsa maloko a mangwe a mmele. (Bapisa Tito 1:10, 11.) O seka wa tshwaediwa ke ntho e e kekelang e e bolayang ya mofuta wa semoya! Ipoloke o le mo botsogong jo bo molemo jwa semoya ka go tila go kgotlhelwa ke go akanya ga batenegi. Tsaya tsia kgakololo e e utlwalang e e go 2 Petere 3:17, 18 “Me ke gōna, lona baratwa, ka lo itsile dilō tse galè, lo itisè, e se re kgotsa loa katogana le tlhōmamō ea lona, ka go ucwiwa dipelo ke timelō ea baikepi. Me golañ mo tshegōhacoñ le mo kicoñ ea Morèna wa rona le Mmoloki Yesu Keresete.”

¹⁸ Mme re ka itshireletsa jang mo boteneging? Re ka boloka dipelo tsa rona di sa amogele megopolo ya botenegi jang? Dipotso tseno di tla sekasekiwa mo setlhogong se se latelang.

A O A Gakologelwa?

◻ Re ka latlhegelwa ke melemo ya paradaise ya semoya ya ga Jehofa jang?

◻ Ke ka ntlhayang fa go bala dibuka tsa batenegi go tshwana le go bala dibuka tse di hepisang boitsholo jo bo maswe jwa kafa dikobong?

◻ Ke eng se re ka se dirang fa re bodiwa kaga maiphako mangwe a batenegi?

◻ Ke ka ntlhayang fa dithuto tsa botenegi di tshwana le ntho e e kekelang?

[Setshwantsho mo go tsebe 12]

A ka botlhale o senya dilo tsa botenegi?